ນັກທ່ອງທ່ຽວຢ້ຽມຊົມຄອກເສືອຢູ່ ກົນດ໋າວ
ພາບ:ຈາກ internet
|
(vovworld) - ກົນດ໋າວ ແມ່ນເມືອງຫນຶ່ງຂອງແຂວງ ບ່າເຣ້ຍ ຫວູງເຕົາ ແລະ ແມ່ນສະຖານທີ່ຊື່ງແຂກທ່ອງທ່ຽວຮູ້ຈັກເຖິງຄືແດນສະຫວັນແຫ່ງການພັກຜ່ອນບຳລຸງສຸຂະພາບ. ອາກາດຢູ່ກົນດ໋າວແມ່ນມີແສງແດດກ້າໃນຕະຫລອດປີ, ຫາດຊາຍທະເລຢູ່ແຫ່ງນີ້ແມ່ນສວຍງາມທີ່ສຸດ. ມາຢ້ຽມຢາມກົນດ໋າວ ນອກຈາກຄວາມສວຍສົດງົດງາມຂອງທິວທັດທຳມະຊາດຂອງເຂດທະເລແລ້ວ ນັກທ່ອງທ່ຽວຍັງມີຄວາມຮູ້ສຶກປະທັບໃຈເປັນພິເສດເມື່ອໄດ້ຢ້ຽມຊົມລະບົບປູຊະນີຍະສະຖານຄຸກ ຊຶ່ງໄດ້ຮັບການຂະຫນານນາມວ່າແມ່ນຂຸມນາລົກແຫ່ງໂລກມະນຸດ ແລະ ຂຸມຝັງສົບນັບພັນຂຸມຂອງນັກຮົບນິລະນາມ ທີ່ເສຍສະຫລະຊີວິດເພື່ອປົກປັກຮັກສາປະເທດຊາດ.
ກົນດ໋າວນັບມື້ນັບສວຍງາມກວ່າ. ຖ້າຫາກສັດຕູຢາກເຮັດໃຫ້ກົນດ໋າວກາຍເປັນນາລົກແຫ່ງໂລກມະນຸດ ຊາວຫວຽດນາມຜູ້ຮັກຊາດ ແລະ ຄົນລຸ້ນຫລັງພວມກໍ່ສ້າງ ເກາະແຫ່ງນີ້ໃຫ້ກາຍເປັນເກາະແຫ່ງໜຶ່ງທີ່ສວຍງາມ, ສະຫງົບສຸກ, ແມ່ນສະຖານທີ່ທ່ອງທ່ຽວຈັບອົກຈັບໃຈ. ຢູ່ກົນດ໋າວ ລະບົບບໍລິການທ່ອງທ່ຽວນັບມື້ນັບສົມບູນແບບດ້ວຍລະບົບໂຮງແຮມ, ເຂດພັກຜ່ອນບັນລຸມາດຕະຖານສາກົນພວມສືບຕໍ່ໄດ້ຮັບການລົງທຶນກໍ່ສ້າງ. ແຕ່ລະມື້ມີຄະນະນັກທ່ອງທ່ຽວຢູ່ພາຍໃນ ແລະ ຕ່າງປະເທດມາຢ້ຽມຊົມກົນດ໋າວເປັນຈຳນວນຫລາຍ. ເຂົາເຈົ້າບໍ່ພຽງແຕ່ມາແຫ່ງນີ້ເພື່ອຊົມທິວທັດ ແລະ ສູບອາກາດທີ່ປອດໂປ່ງເທົ່ານັ້ນ ຫາກຍັງຢາກເຫັນປະຈັກຕາລະບົບປູຊະນີຍະສະຖານປະຫວັດສາດປະຕິວັດພິເສດຢູ່ຫວຽດນາມ. ເອື້ອຍ ຫງວຽນທິເຕີມ ຜູ້ແນະນຳກ່ຽວກັບເຂດປູຊະນິຍະສະຖານປະຫວັດສາດຢູ່ ກົນດ໋າວ ໃຫ້ຮູ້ວ່າ: ແຕ່ລະເທື່ອເມື່ອແນະນຳກ່ຽວກັບປະຫວັດສາດຢູ່ແຫ່ງນີ້ໃຫ້ນັກທ່ອງທ່ຽວ ຍາມໃດເອື້ອຍກໍ່ຮູ້ສຶກຕຶ້ນຕັນໃຈ.
“ນີ້ແມ່ນຫ້ອງຄຸມຂັງເໝືອນກັບຄອກເສືອ, ແຕ່ລະຫ້ອງແມ່ນນ້ອຍຫລາຍ ແລະ ເຮັດດ້ວຍເຫລັກກ້າເສັ້ນໃຫຍ່. ເມື່ອເວົ້າເຖິງຮູບການທໍລະມານຂອງສັດຕູ ພວກເຂົາສວຍໃຊ້ສະພາບອາກາດຮ້າຍແຮງຢູ່ທີ່ນີ້ເພື່ອທໍລະມານນັກຮົບປະຕິວັດ. ຍາມຮ້ອນ ພວກເຂົາໃຊ້ແປ້ງປຸນ ແລະ ນ້ຳເສດເຫລືອ. ຫ້ອງຫນຶ່ງບໍ່ຮອດ 5 ຕາລາງແມດ ພວກເຂົາກັກຂັງແຕ່ 6 - 8 ຄົນ, ບາງເທື່ອຂຶ້ນເຖິງ 10 ຄົນ. ຮອດລະດູຫນາວ ພວກເຂົາພັດໄຫລ່ອອກ, ຂັງໄວ້ແຕ່ 1 - 2 ຄົນເທົ່ານັ້ນ.”
ຫວ່າງແລ້ວນີ້ ດາລາຮູບເງົາ Hollywood, Bad Pitt ແລະ Angelina Jolie ມາຢ້ຽມຊົມເຂດປູຊະນິຍະສະຖານທີ່ລືຊື່: ຄອກເສືອຝລັ່ງ ນອນໃນຄຸກກົນດ໋າວ. ເມື່ອໄດ້ເຫັນປະຈັກຕາຄຸກແຫ່ງນີ້ ພິເສດແມ່ນບັນດາຮູບປັ້ນວາດພາບການທໍລະມານນັກຮົບປະຕິວັດ, ດາລາທັງສອງຄົນນີ້ລ້ວນແຕ່ມີຄວາມຕຶ້ນຕັນໃຈຫລາຍ ແລະ ນຶກຄິດເຖິງອະດີດຕະການທີ່ແສນທໍລະມານຢູ່ທີ່ນີ້. ເຖິງວ່າໄດ້ຮັບຟັງ, ໄດ້ອ່ານປື້ມ, ຫນັງສືພິມແລ້ວ ແຕ່ນັກທ່ອງທ່ຽວຜູ້ທີ່ຫາກໍມາຢ້ຽມຢາມກົນດ໋າວໃນຄັ້ງທຳອິດ ກໍລ້ວນແຕ່ເອີຍຄຳອອກມາວ່າ: ບ່ໍອາດຈິນຕະນາການໄດ້ເລີຍ.
ທ່ານໂຕເທບີ່ນ ນັກທ່ອງທ່ຽວມາຈາກນະຄອນຫລວງ ຮ່າໂນ້ຍ ໄດ້ແບ່ງປັນວ່າ.
“ແຕ່ລະບ່ອນມີຄວາມແຕກຕ່າງກັນ. ເຂດຄຸມຂັງພິເສດຂອງພວກລ່າເມືອງຂຶ້ນຝລັ່ງ ຊຶ່ງແມ່ນບ່ອນສະຫງວນໃຫ້ແກ່ນັກຮົບປະຕິວັດຖືກຕັດສິນປະຫານຊີວິດ, ເມື່ອເຫັນປະຈັກຕາຮູບການທໍລະມານຂ້າພະເຈົ້າບໍ່ສາມາດນຶກຄິດໄດ້ ເປັນຫຍັງພວກເຂົາໂຫດຮ້າຍສາມານຄືແນວນັ້ນ.”
ສຳລັບອ້າຍ ເລຮົ່ງຢວານ ພະນັກງານກວດກາປ່າໄມ້ ຢູ່ປ່າສະຫງວນແຫ່ງຊາດ ບໍ່ອາດຫລົງລືມຄວາມຮູ້ສຶກເມື່ອເປັນຄັ້ງທຳອິດມາຢ້ຽມຢາມແຫ່ງນີ້. ອ້າຍໃຫ້ຮູ້ວ່າ:
“ເມື່ອເຫັນປະຈັກຕາຂ້າພະເຈົ້າຈຶ່ຶງຮູ້ໄດ້ວ່າ ການຂູດຮີດ, ທໍລະມານຢ່າງໂຫດຮ້າຍສາມານຂອງພວກເຂົາແມ່ນຮ້າຍແຮງກວ່າໂດຍຫນັງສືພິມສ່ອງແສງ. ແລະເມື່ອຊົມເບິ່ງຮູບປັ້ນວາດພາບກ່ຽວກັບນັກຮົບປະຕິວັດໃນຄາວນັ້ນ ຂ້າພະເຈົ້າຍິ່ງເຄົາລົບນັບຖືຄົນລຸ້ນກ່ອນ.”
ຄອກເສືອ
ພາບ: ຈາກ internet
|
ຜ່ານໄລຍະເວລາກວ່າ 100 ປີອັນມືດມົວຂອງລະບົບຄຸກທີ່ຮ້າຍແຮງ ນັບແຕ່ເມື່ອພວກລ່າເມືອງຂຶ້ນຝລັ່ງສ້າງຕັ້ງຄຸກ ກົນດ໋າວ ມາຮອດມື້ ກົນດ໋າວໄດ້ຮັບການປົດປ່ອຍຢ່າງສົມບູນ (1/5/1975 ) ມີນັກຮົບປະຕິວັດກວ່າ 20,000 ຄົນຖືກເສຍຊີວິດຢູ່ກົນດ໋າວ ແລະ ມາຮອດປະຈຸບັນ ສຸສານຮ່າງເຢືອງແມ່ນສະຖານທີ່ຝັງສົບຂອງນັກປະຕິວັດບໍ່ຈັກວ່າເທົ່າໃດຄົນແລະໃນນັ້ນຍັງມີຂຸມຝັງສົບນັກຮົບນິລະນາມນັບພັນຂຸມ. ທ່ານ ຮຸ່ນວັນຮຸ່ງ ຫົວຫນ້າຫ້ອງການທ່ອງທ່ຽວຊີວະພາບ ແລະ ການສຶກສາສິ່ງແວດລ້ອມ ສັງກັດປ່າສະຫງວນແຫ່ງຊາດ ກົນດ໋າວ ໃຫ້ຮູ້ວ່າ:
“ການທ່ອງທ່ຽວຈິດວີນຍານເຂົ້າຢ້ຽມສຸສານ ຮ່າງເຢືອງ ພິເສດແມ່ນເຂົ້າຢ້ຽມ ສຸສານ ເອື້ອຍຫວໍທິເຊົາ. ໃນຊຸມປີມໍ່ໆມານີ້ ນັກທ່ອງທ່ຽວມາຈາກທຸກແຖບຖິ່ນໃນທົ່ວປະເທດ, ນັກຮຽນນັກສຶກສາ, ຊາວຫນຸ່ມ.... ເຄີຍມາແຫ່ງນີ້ເພື່ອຢ້ຽມຢາມເພື່ອ ອາໄລຫານັກຮົບປະຕິວັດກວ່າ 20.000 ຄົນທີ່ຖືກເສຍສະຫລະຊີວິດ. ຜ່ານການເຄື່ອນໄຫວນີ້ ແມ່ນສຶກສາມູນເຊື້ອຕໍ່ສູ້ປົກປັກຮັກສາປະເທດຊາດຂອງລຸ້ນພໍ່ລຸ້ນອ້າຍ, ສຶກສາໃຫ້ລຸ້ນຫນຸ່ມຝຶກຝົນຫລໍ່ຫລອມເຈດຈຳນົງ, ນ້ຳໃຈສ້າງສາບ້ານເກີດເມືອງນອນ ສ້າງສາປະເທດຊາດໃຫ້ນັບມື້ນັບຮັ່ງມີເຂັ້ມແຂງ.”
ສຸສານຮ່ວາງເຢືອງມີເນື້ອທີ່ 190.000 ຕາລາງແມດ. ແຕ່ມາຮອດປະຈຸບັນ ສຸສານແຫ່ງນີ້ບໍ່ແມ່ນແຫ່ງທ້ອນໂຮມອັດຖິນັກຮົບທີ່ເສຍສະຫລະຊີວິດເພື່ອຊາດທັງໝົດ ພຽງແຕ່ທ້ອນໂຮມໄດ້ກວ່າ 2000 ຂຸມຝັງສົບເທົ່ານັ້ນ, ໃນນັ້ນມີ 23 ຂຸມຝັງສົບລວມໝູ່ ,600 ຂຸມຝັງສົບມີຊື່, ສ່ວນຍັງເຫລືອແມ່ນນິລະນາມ. ແຕ່ລະຂຸມຝັງສົບຢູ່ທີ່ນີ້ບໍ່ພຽງແຕ່ສະແດງໃຫ້ເຫັນຮອ່ງຮອຍໂທດກຳຂອງພວກລ່າເມືອງຂຶ້ນຝລັ່ງ ຫາກຍັງແມ່ນຫນ້າປະຫວັດສາດອັນສະຫງ່າລາສີຂອງການຕໍ່ສູ້ໃນຄຸກ, ສະແດງໃຫ້ເຫັນລັດທິວັດທະນະທຳມະນຸດ ແລະ ລັດທິວິລະຊົນປະຕິວັດຫວຽດນາມ.
ລານແອນ