(vovworld)- ດາຫນັງແມ່ນສະຖານທີ່ຊື່ງນັກທ່ອງທ່ຽວຫລາຍຄົນຮູ້ຈັກເຖິງແມ່ນນະຄອນທີ່ສວຍງາມຕັ້ງຢູ່ແຄມແມ່ນ້ຳ ຮ່ານ. ຈຸດທີ່ດູດດື່ມຂອງນະຄອນແຫ່ງນີ້ບໍ່ພຽງແຕ່ແມ່ນຄວາມງາມທີ່ທຳມະຊາດໄດ້ດົນບັນດານໃຫ້ຄື: ນະຄອນໃກ້ກັບພູ ແລະ ທະເລເທົ່ານັ້ນ ຫາກ ດາຫນັງຍັງແມ່ນສະຖານທີ່ເຕົ້າໂຮມທັດສະນີຍະພາບ, ປູຊະນີຍະສະຖານຫລາຍແຫ່ງຂອງພາກກາງ ຫວຽດນາມ ອີກດ້ວຍ. ໃນລາຍການທ່ອງທ່ຽວພາກນີ້ ເຊີນທ່ານແວ່ຢາມວັດ ລີງອືງ ບ໋າຍບູດ, ຊ່ືງແມ່ນຫນຶ່ງໃນບັນດາສະຖານທີ່ທ່ອງທ່ຽວຈິດວິນຍານທີ່ລືຊື່ຂອງນະຄອນ ດາຫນັງ.
ໂດຍຫ່າງຈາກໃຈກາງນະຄອນ ດາຫນັງ ທາງທິດຕາເວັນອອກສຽງເຫນືອປະມານ 10 ກິໂລແມດ, ວັດ ລີງອືງ ຖືກຕັ້ງຢູ່ແຫລມເຊີນຈ່າ ໃນລະດັບສູງເກືອບ 200 ແມັດເມື່ອທຽບໃສ່ຫນ້ານ້ຳທະເລ. ວັດແຫ່ງນີ້ມີທີ່ຕັ້ງ ແລະ ສະຖາປັດຕະຍະກຳທີ່ເປັນເອກະລັກສະເພາະ. ວັດ ລີງອືງ ໄດ້ຮັບການກໍ່ສ້າງໃນເນື້ອທີ່ປະມານ 20 ເຮັກຕາ ອີງຫລັງໃສ່ພູ ແລະ ມູ່ງຫນ້າສູ່ທະເລ. ຈາກທີ່ຕັ້ງພິເສດນີ້, ນັກທ່ອງທ່ຽວສາມາດຊົມທິວທັດທຳມະຊາດນະຄອນ ດາຫນັງທັງໝົດໄດ້. ຕາມການເລົ່າຂານຂອງພະອາຈານໃຫຍ່ ທິກທ້ຽນຫງວ້ຽນ, ເຈົ້າອະທິການວັດ ລີງອືງ-ບາ໋ຍບູດ(ໝາຍເຖິງຫາດຊາຍທະເລມີພະພຸດທະເຈົ້າ)ແລ້ວ, ໃນສະໄຫມເຈົ້າຊີວິດມີງມ້າງ, ຊາວປະມົງ
ຢູ່ແຄມທະເລແຫ່ງນີ້ ໄດ້ພົບເຫັນພະພຸດທະຮູບຢູ່ຫາດຊາຍທະເລ ແລະ ໄດ້ສ້າງສານບູຊາ, ນັບແຕ່ເວລານັ້ນເປັນຕົ້ນມາໄດ້ປະກົດມີພະພຸດມາຊ່ວຍກູ້ໄພກູ້ຊີບ, ຊ່ວຍຊາວປະມົງມີຄວາມອຸ່ນອ່ຽນໃຈໃນການທຳມາຫາກິນ. ມາຮອດປີ 2004, ພະອາຈານໃຫຍ່ ທີກທ້ຽນຫງວ້ຽນ ໄດ້ ຂົນຂວາຍສາສະນິກກະຊົນທັງຢູ່ໃກ້ ແລະ ໄກ ກໍ່ສ້າງວັດ ລີງອືງ ບາຍບູດ. ພາຍຫລັງ 6 ປີ, ວັດລີງອືງ ໄດ້ຮັບການກໍ່ສ້າງສຳເລັດຢູ່ເທິງພູ ເຊີນຈ່າ ເປັນຂີດໝາຍແຫ່ງການພັດທະນາຂອງພຸດທະສາສະຫນາຫວຽດນາມ ໃນສັດຕະວັດທີ 21.
ຮູບປັ້ນເຈົ້າແມ່ກວນອີນມີຄວາມສູງ 67 ແມດ
ພາບ: internet
|
ເມື່ອໄປຢ້ຽມຢາມວັດ ລີງອືງ ບາຍບູດ, ນັກທ່ອງທ່ຽວມີຄວາມຮູ້ສຶກຄືດັ່ງມີຊີວິດຢູ່ແດນສະຫວັນແທ້. ຢູ່ໃນເດີນວັດ ມີຮູບປັ້ນພະອໍລະຫັນ 18 ອົງ, ແຕ່ລະອົງມີສີຫນ້າແຕກຕ່າງກັນ ແລະສະແດງໃຫ້ເຫັນຄວາມຮູ້ສຶກຢ່າງຊີວິດຊີວາ. ແລະ ນີ້ກໍແມ່ນໂອກາດເພື່ອໃຫ້ບັນດານັກສິລະປະການແກະຄວັດສະຫລັກຫີນສະແດງສີມືທີ່ຄ່ອງແຄ້ວຂອງຕົນ. ຍ້ອນບັນດາຮູບປັ້ນພະອໍລະຫັນດັ່ງກ່າວໄດ້ປະກອບສ່ວນເຮັດໃຫ້ກຸ່ມສະຖາປັດຕະຍະກຳຢູ່ອ້ອມແອ້ມວັດລີງອືງ ຍີ່ງມີຄວາມເປັນເອກະລັກສະເພາະ ແລະ ດູດດື່ມກວ່າ. ທ່ານ ຮ່າມີງກວາງ, ນັກທ່ອງທ່ຽວມາຈາກຮ່າໂນ້ຍ ໃຫ້ຮູ້ວ່າ:
“ເປັນຄັ້ງທຳອິດພວກຂ້າພະເຈົ້າດມາຢ້ຽມຢາມວັດ ລີງອືງ, ດາຫນັງ. ພວກຂ້າພະເຈົ້າຮູ້ສຶກວ່າ ຢູ່ທີ່ນີ້ແມ່ນແຫ່ງທີ່ສັກສິດ. ມາຮອດນີ້ແລ້ວ ເຫັນວ່າ ທິວທັດທຳມະຊາດຂອງ ພູ, ທະເລ ມີຄວາມງາມດັ່ງໃນຝັນ, ຕົນເອງຮູ້ສຶກສະຫວາດສະເຫວີຍທີ່ສຸດ. ຫ່າງຈາກນີ້ປະມານ 5 - 6 ກິໂລແມດພວກຂ້າພະເຈົ້າໄດ້ເຫັນຮູບປັ້ນເຈົ້າແມ່ກວນອີນແລ້ວ. ນັບແຕ່ຄາວຍັງນ້ອຍຈົນເຖິງປະຈຸບັນ, ຂ້າພະເຈົ້າບໍ່ທັນເຫັນ ຮູບປັ້ນໃດສວຍງາມ ແລະ ມີຄວາມສູງຄືແນວນີ້ເທື່ອ.”
ວັດລີງອືງ ມີທີ່ຕັ້ງພະເສດຢູ່ນະຄອນ ດາຫນັງ. ສິ່ງພິເສດ ແລະ ດຶງດູດຄວາມສົນໃຈຂອງບັນດານັກທ່ອງທ່ຽວເມື່ອມາຢ້ຽມຢາມວັດ ລີງອືງ ບາຍບູດ ແມ່ນຮູບປັ້ນເຈົ້າແມ່ກວນອີນ ຊື່ງໄດ້ຮັບຖືວ່າ ມີຄວາມສູງກວ່າໝູ່ຢູ່ອາຊີຕາເວັນອອກສຽງໃຕ້ ດ້ວຍຄວາມສູງ 67 ແມດ, ເທົ່າທຽມກັບອາຄານ 30 ຊັ້ນ. ຢູ່ພາຍໃນຂອງຮູບປັ້ນນີ້ ປະກອບມີ 17 ຊັ້ນ, ແຕ່ລະຊັ້ນລວມມີຮູບປັ້ນພະພຸດທະເຈົ້າ 21 ອົງດ້ວຍຮູບຊົງ ແລະ ສີຫນ້າແຕກຕ່າງກັນ. ມາຢ້ຽມຢາມວັດ ລີງອືງ ບາຍບູດ, ນັກທ່ອງທ່ຽວມີຄວາມຮູ້ສຶກສະຫງົບງຽບ ແລະປາສະຈາກຄວາມວິຕົກກັງວົນໃນວຽກງານກໍຄືໃນຊີວິດປະຈຳວັນເພື່ອມຸ່ງໄປເຖິງສິ່ງທີ່ດີ. ທ່ານນາງ ຫງວຽນທິເຟື້ອງ, ຊາວນະຄອນ ດາຫນັງ ໃຫ້ຮູ້ວ່າ:
“ຂ້າພະເຈົ້າມັກເຂົ້າຢ້ຽມຢາມວັດແຫ່ງນີ້, ໂດຍສະເພາະແຕ່ລະເດືອນໃນວັນທີ 15, 30 ຫລື ວັນທີ 1 ໄລ່ຕາມຈັນທະປະຕິທິນ. ເພາະວ່າ ມາແຫ່ງນີ້ເຫັນວ່າ ທິວທັດທຳມະຊາດແມ່ນງາມຫລາຍ, ບັນຍາກາດກໍສະຫງົບງຽບ ເຮັດໃຫ້ຂ້າພະເຈົ້າຮູ້ສຶກສະບາຍໃຈ ແລະ ສະຫວາດສະເຫວີຍ.”
ວັດລີງອືງ
ພາບ:danangcity.gov.vn
|
ສຳລັບຊາວປະມົງຢູ່ເຂດທະເລ ດາຫນັງ, ເຂົາເຈົ້າສາມາດເຫັນໄດ້ຮູບປັ້ນເຈົ້າແມ່ກວນອີນແຕ່ໄກ, ບໍ່ພຽງແຕ່ໃນຍາມກາງເວັນເທົ່ານັ້ນ ຫາກນັບທັງຍາມກາງຄືນອີກດ້ວຍ. ຮູບປັ້ນນີ້ແມ່ນຄ້າຍຄືປາພະຄານຊ່ວຍໃຫ້ບັນດາຜູ້ເດີນເຮືອຫາປາຮູ້ສຶກປອດໄພ, ເປັນຕົ້ນໃນມື້ທີ່ຖືກຝົນຕົກຫນັກ ແລະນ້ຳຖ້ວມ. ອ້າຍ ຮູ່ນວັນເຕີ, ຊາວປະມົງຢູ່ຕາແສງ ທໍ້ກວານ, ເມືອງເຊີນຈາ ໃຫ້ຮູ້ວ່າ:
“ໃນຈິດສຳນຶກຂອງຂ້າພະເຈົ້າ, ຮູບປັ້ນເຈົ້າແມ່ກວນອີນ ແມ່ນສວມບົດບາດສຳຄັນທີ່ສຸດ. ພວກຂ້າພະເຈົ້າເມື່ອເດີນເຮືອອອກສູ່ທະເລຫາປາ ຍາມໃດກໍຄິດເຖິງເຈົ້າແມ່ກວນອີນ, ພາວະນາຂໍໃຫ້ສິ່ງທີ່ໂຊກດີ. ພວກຂ້າພະເຈົ້າກໍຄິດວ່າ ເຈົ້າແມ່ກວນອີນກໍຕິດຕາມພວກຂ້າພະເຈົ້າຕະຫລອດ.”
ບາຍບູດ ຕັ້ງຢູ່ເຄິ່ງກາງໂນນພູ ແລະ ປ່າໄມ້ຢູ່ຕໍ່ຫນ້າວັດໄດ້ຮັບຖືວ່າແມ່ນຫາດຊາຍທະເລສວຍງາມກວ່າໝູ່ຢູ່ເຂດ ເຊີນຈ່າ. ບາຍບູດ ແມ່ນຈຸດນັດພົບຂອງບັນດາເຂດທ່ອງທ່ຽວຊີວະພາບ, ແມ່ນແຫ່ງທີ່ດຶງດູດນັກທ່ອງທ່ຽວມັກຄວາມງາມແບບຮົກເຮື້ອເປົ່າຫວ່າງເປັນຈຳນວນຫລວງຫລາຍ. ໃນວັນນີ້, ດາຫນັງ ພວມປ່ຽນແປງໃຫມ່ໃນແຕ່ລະມື້ ແລະ ເຕັມໄປດ້ວຍພະລັງຊີວິດໃຫມ່, ແຕ່ບັນຍາກາດຢູ່ວັດ ລີງອືງ ຍັງຄົງສະຫງົບງຽບດ້ວຍສຽງລະຄັງກ້ອງກັນວານໄປທົ່ວ, ສຽງຄື້ນທະເລກະທົບຝັ່ງທີ່ເປັນຈັງຫວະໄດ້ດຶງດູດໃຈນັກທ່ອງທ່ຽວທີ່ສຸດ. ນີ້ແມ່ນສະຖານທີ່ທ່ອງທ່ຽວດ້ານຈິດວິນຍານທີ່ດູດດື່ມຢ່າງແທດຈິງຂອງນະຄອນ ດາຫນັງ.
ດາຫນັງ ບໍ່ພຽງແຕ່ມີທ່າແຮງກ່ຽວກັບການທ່ອງທ່ຽວທະເລ, ທ່ອງທ່ຽວພັກຜ່ອນບຳລຸງສຸຂະພາບເທົ່ານັ້ນ ຫາກທ່ອງທ່ຽວຈິດວິນຍານພວມພັດທະນາຢ່າງແຂງແຮງຢູ່ນະຄອນ ທະເລ ພາກກາງຫວຽດນາມ. ສະນັ້ນ ວັດລີງອືງ ບາຍບູດ ແລະ ບັນດາວັດວາອາຮາມຢູ່ນະຄອນດາງຫນັງ ພວມກາຍເປັນສະຖານທີ່ດູດດື່ມໃນລາຍການທ່ອງທ່ຽວຄົ້ນຫາ ດາຫນັງ.