(vovworld) - ໃນຊຸມມື້ຕົ້ນເດືອນ 5/2012, ອາກາດຢູ່ ແຂວງ ກວ໋າງນາມ ທາງພາກກາງຫວຽດນາມ ຮ້ອນເອົ້າຫລາຍ, ແຕ່ຈຳນວນນັກທ່ອງທ່ຽວມາຢ້ຽມຢາມ ເທວະສະຖານ ໝື້ເຊີນ ກໍ່ບໍ່ຫລຸດລົງເທື່ອ. ໃນເຂດເທວະສະຖານນີ້ ມີທາດບູຮານ 2,3 ແຫ່ງ, ທີ່ຖືກຫັກພັງ, ດິນຂໍ, ດິນຈີ່, ຢັ່ງຢາຍເດຍລະດາດເຕັມຫນ້າດິນ. ແຕ່ສິ່ງໃດເປັນສາຍເຫດທີ່ພາໃຫ້ນັກທ່ອງທ່ຽວທັງພາຍໃນ ແລະ ຕ່າງປະເທດມາຢ້ຽມຢາມ ໝີີ້ເຊີນນັບມື້ນັບຫລາຍ.
ເທວະສະຖານໝີ້ເຊີນ
ພາບ:danangbech.vn
|
ໝີ້ເຊີນ ຂຶ້ນກັບຕາແສງ ຢູຍຟູ ເມືອງ ຢູຍຊວຽນ ຫ່າງຈາກນະຄອນດາຫນັງທາງທິດຕາເວັນຕົກສຽງໃຕ້ປະມານ 70 ກິໂລແມດ, ນັກທ່ອງທ່ຽວສາມາດເຊົ່າລົດຈັກ ຫລື ຂີ່ລົດເມໃນເວລາປະມານ 1 ຊົ່ວໂມງກໍຈະມາຮອດເຂດເທວະສະຖານ ໝີ້ເຊີນ
ໝີ້ເຊີນ ແມ່ນເທວະສະຖານຂອງສາສະຫນາຮິນດູ ແຫ່ງລາຊະອານາຈັກ ຈຳປາ, ປະຈຸບັນຢູ່ທີ່ນີ້ ຍັງມີຮ່ອງຮອຍກິດຈະກຳ 70 ແຫ່ງ ຊຶ່ງໄດ້ຮັບການກໍ່ສ້າງ ດ້ວຍດິນຈີ່, ຫີນ ນັບແຕ່ສັດຕະວັດທີ 7 ເຖິງສະຕະວັດທີ 13. ບັນດາວິຫານໃຫຍ່ຢູ່ ໝີ້ເຊີນ ແມ່ນບູຊາເທວະດາ Siva ເຊິ່ງແມ່ນຜູ້ປົກປ້ອງບັນດາເຈົ້າຊີວິດ ຈຳປາ. ແລະ ເທວະດາໄດ້ຮັບການບູຊາຢູ່ ໝີເຊີນ ແມ່ນ Bhadresvara ຊຶ່ງແມ່ນເຈົ້າຊີວິດຜູ້ທຳອິດຂອງເຂດ Amaravati ໃນທ້າຍສັດຕະວັດທີ 4. ຫນຶ່ງໃນບັນດາຈຸດທີ່ເປັນເອກະລັກສະເພາະໃນສະຖາປັດຕະຍະກຳທາດຈຳ ນັ້ນແມ່ນຮູບຄວັດສະຫຼັກຢູ່ເທິງຝາທາດ ແລະ ດິນຈີ່ກໍ່ສ້າງທາດ. ຊາວຈຳໄດ້ນຳໃຊ້ປູນຊາຍບາງໆເພື່ອກໍ່ສ້າງທາດ ແລະ ບັນດານັກສິລະປະກຳໄດ້ແກະສະຫລັກໂດຍກົງເທິງຝາດິນຈີ່ດ້ວຍລວດລາຍທີ່ລະອຽດອ່ອນ, ແລະ ຄ່ອງແຄ້ວ. ສິ່ງດັ່ງກ່າວໄດ້ດຶງດູດນັກທ່ອງທ່ຽວມາແຫ່ງນີ້ເພື່ອເຫັນປະຈັກຕາສິ່ງມະຫັດສະຈັນຂອງບັນດາກິດຈະກຳໃນໝີ້ເຊີນ. ໂດຍແມ່ນນັກທ່ອງທ່ຽວຜູ້ຫນຶ່ງທີ່ມາຈາກນະຄອນ ໂຮ່ຈິມີນ, ລຸງ Dinh Ngan ໃຫ້ຮູ້ວ່າ: ນີ້ເປັນຄັ້ງທຳອິດທີ່ຄອບຄົວຂອງລຸງມາຢ້ຽມຊົມ ໝີ້ເຊີນ.
“ເມື່ອໄດ້ຮູ້ວ່າ ເທວະສະຖານໝີ້ເຊີນແມ່ນທັດສະນີຍະພາບລະດັບຊາດ ແລະ ມໍລະດົກໂລກ, ພວກຂ້າພະເຈົ້າໄດ້ພາຄອບຄົວມາຢ້ຽມຢາມ. ແລະ ເມື່ອມາຮອດແລ້ວ ໄດ້ເຫັນປະຈັກຕາກິດຈະກຳບູຮານແຫ່ງນີ້ ພວກຂ້າພະເຈົ້າຈຶ່ງມີຄວາມເຂົ້າໃຈຢ່າງລະອຽດກ່ຽວກັບວັດທະນະທຳຂອງເຜົ່າຈຳ.”
ສ່ວນນາງ Tran Thi Du Hoai ກໍແມ່ນນັກທ່ອງທ່ຽວມາຈາກນະຄອນ ໂຮ່ຈິມີນ ໃຫ້ຮູ້ວ່າ: ເສັ້ນທາງໄປເຖິງໝີ້ເຊີນ ກໍສະດວກສະບາຍຫລາຍແລ້ວ, ຄ່າໃຊ້ຈ່າຍກໍ່ບໍ່ແພງປານໃດ, ທິວທັດທຳມະຊາດ ແລະ ສະຖາປັດຕະຍະກຳຢູ່ ໝີ້ເຊີນ ໄດ້ສ້າງຄວາມປະທັບໃຈທີ່ສຸດໃຫ້ແກ່ພວກຂ້າພະເຈົ້າ.
“ຂ້າພະເຈົ້າເຫັນວ່າ ສະຖາປັດຕະຍະກຳແມ່ນມີຄຸນນະພາບດີຫລາຍ, ຜ່ານໄລຍະເວລາຍາວນານຄືແນວນັ້ນ ແຕ່ເຂດເທວະສະຖານໝີ້ເຊີນ ຍັງຄົງຮັກສາຈຸດດັ້ງເດີມໄວ້ໄດ້. ກິດຈະກຳນີ້ພຽງແຕ່ກໍ່ສ້າງດ້ວຍດິນຈີ່ເທົ່ານັ້ນ, ບໍ່ມີຊີມັງປະສົມເລີຍ ແຕ່ມັນຍັງຄົງຮັກສາຮູບເດີມໄວ້ໄດ້ຄືເກົ່າ”
ເມື່ອປີ 1898, ນັກວິທະຍາສາດຊາວຝລັ່ງຄົນຫນຶ່ງ ທີ່ມີຊື່ວ່າ: MC Paris ໄດ້ພົບເຫັນໝີີ້ເຊີນ ແລະ ຮູ້ສຶກແປກປະຫລາດໃຈຕໍ່ຄວາມງາມແບບດັ່ງເດີມ. ທາດທີ່ຍັງເຫຼືອ 30 ແຫ່ງຢູ່ໝີ້ເຊີນ ລ້ວນແຕ່ໄດ້ຮັບການກໍ່ສ້າງນັບແຕ່ສັດຕະວັດທີ 4 ຫາ 13 ແລະ ກາຍເປັນຫໍພິພິດທະພັນສະຖາປັດຕະຍະກຳ ແລະ ສິລະປະຄວັດສະຫລັກອັນລ້ຳຄ່າ, ກໍ່ຄືພື້ນຖານວັດທະນະທຳຂອງເຜົ່າຈຳ. ສິລະປະໃນການການກໍ່ສ້າງ, ການແກະສະຫລັກກ່ຽວກັບໂລກຈັກກະວານ, ເທວະດາ, ມະນຸດ ໄດ້ນຳເອົາຄວາມງາມຢູ່ອາຊີຕາເວັນອອກສຽງໃຕ້ມາໃຫ້ເຂດວິຫານນີ້. ທາດຈຳ ໝີ້ເຊີນ ຍັງມີສິ່ງເລິກລັບຫນຶ່ງອີກ, ນັ້ນແມ່ນສິລະປະແກະສະຫລັກຢ່າງຄ່ອງແຄ້ວເທິງດິນຈີ່. ຜ່ານການເວລາ, ການທຳລາຍຢ່າງຫນັກຫນ່ວງຈາກສົງຄາມ, ແລະ ໄພທຳມະຊາດ ແຕ່ສິ່ງທີ່ຍັງເຫຼືອຢູ່ເທວະສະຖານໝີ້ເຊີນ ຍັງສະແດງໃຫ້ເຫັນຄວາມງາມແບບເລິກລັບ, ມະຫັດສະຈັນ, ອັນໄດ້ດຶງດູດນັກທ່ອງທ່ຽວມາຈາກທຸກສາລະທິດໃນໂລກມາຢ້ຽມຢາມເປັນຈຳນວນຫລວງຫລາຍ. ນັກທ່ອງທ່ຽວຜູ້ຫນຶ່ງທີ່ມາຈາກ ແອດສະປາຍ ໃຫ້ຮູ້ວ່າ:
“ຂ້າພະເຈົ້າໄດ້ມາຢ້ຽມຢາມນະຄອນ ຮ່າໂນ້ຍ, ເຫ້ວ, ຮ້າລອງ, ດາໜັງ, ໂຮ້ຍອານ ແລະ ໝີ້ເຊີນ. ແຕ່ລະແຫ່ງລ້ວນແຕ່ມີຄວາມງາມແຕກຕ່າງກັນ. ເມື່ອມາແຫ່ງນີ້ ຂ້າພະເຈົ້າຮູ້ສຶກເສຍດາຍຫລາຍ ຍ້ອນວິຫານ, ທາດ ຢູ່ທ່ີນີ້ໄດ້ຖືກສົງຄາມທຳລາຍຫຼາຍ. ທຸກສິ່ງທຸກຢ່າງຢູ່ທີ່ນີ້ ລ້ວນແຕ່ມີຄວາມງາມທີ່ແຕກຕ່າງກັບວັດທະນະທຳຂອງປະເທດພວກຂ້າພະເຈົ້າ. ບັນດາທັດສະນີຍະພາບຢູ່ທີ່ນີ້ງາມຫລາຍ, ທິວທັດທຳມະຊາດກໍສວຍງາມ ແລະ ປະຊາຊົນກໍແມ່ນຜູ້ຮັກແພງແຂກຄົນ.”
ວິຫານ ແລະ ທາດຢູ່ເທວະສະຖານ ໝີ້ເຊີນ ຍັງເຫລືອພຽງ 2, 3 ແຫ່ງເທົ່ານັ້ນ ແຕ່ຄຸນຄ່າດ້ານສິລະປະ ແລະ ຈິດວິນຍານຂອງມັນຍັງຄົງສ້າງຄວາມສົນໃຈໃຫ້ແກ່ນັກທ່ອງທ່ຽວທຸກຄົນ. ທ່ານ Huynh Tan Lap ຮອງຫົວຫນ້າຄະນະຄຸ້ມຄອງເຂດປູຊະນີຍະສະຖານແລະ ທ່ອງທ່ຽວ ໝີ້ເຊີນໃຫ້ຮູ້ວ່າ:
“ເງື່ອນໄຂທຳມະຊາດຢູ່ທີ່ນີ້ບໍ່ເອື້ອອຳນວຍຄວາມສະດວກ, ຝົນຕົກ,ໄພນ້ຳຖ້ວມເກີດຂຶ້ນຢ່າງຮ້າຍແຮງ ໃນແຕ່ລະປີໄດ້ສົ່ງຜົນກະທົບເຖິງເຂດເທວະສະຖານໝີ້ເຊີນ. ເຖິງຢ່າງໃດກໍຕາມ ຄຸນຄ່າຂອງມໍລະດົກໝີ້ເຊີນຍັງຄົງດຶງດູດຄວາມສົນໃຈຈາກປະຊາຄົມໂລກ ແລະ ປະຊາຊົນພາຍໃນປະເທດເປັນຈຳນວນຫລວງຫລາຍ. ຈຳນວນນັກທ່ອງທ່ຽວມາຢ້ຽມຢາມ ໝີ້ເຊີນ ໄດ້ເພີ່ມຂຶ້ນສູງໃນແຕ່ລະປີ. ປີ 2011 ມີນັກທ່ອງທ່ຽວກວ່າ 200.000 ເທື່ອຄົນມາຢ້ຽມຢາມ. ສ່ວນ ປີ 1999 ມີນັກທ່ອງທ່ຽວມາຢ້ຽມຢາມພຽງ 2, 3 ໝື່ນຄົນ/ປີ.”
ເທວະສະຖານໝີ້ເຊີນ
ພາບ:vntime.com.vn
|
ປະຈຸບັນ ໝີ້ເຊີນ ກາຍເປັນສະຖານທີ່ທ່ອງທ່ຽວທີ່ຂາດບໍ່ໄດ້ສຳລັບນັກທ່ອງທ່ຽວຕ່າງປະເທດເມື່ອມາຢ້ຽມຢາມພາກກາງ ຫວຽດນາມ. ສະເລ່ຍໃນແຕ່ລະມື້ ເຂດປູຊະນີຍະສະຖານນີ້ຕ້ອນຮັບນັກທ່ອງທ່ຽວແຕ່ 500- 700 ເທື່ອຄົນ, ພິເສດໃນຊຸມມື້ທ້າຍອາທິດ ຫລືວັນບຸນຕ່າງໆ ຈຳນວນນັກທ່ອງທ່ຽວມາຢ້ຽມຢາມ ໝີ້ເຊີນ ໄດ້ເພີ່ມຂຶ້ນແຕ່ 1.200 - 1.500 ເທື່ອຄົນ. ນອກນັ້ນ, ການບໍລິການຢູ່ທີ່ນີ້ກໍນັບມື້ນັບໄດ້ຮັບການຍົງສູງຂຶ້ນ. ປະຈຸບັນ ໝີ້ເຊີນ ແມ່ນທັດສະນີຍະພາບ, ແມ່ນສະຖານທີ່ທ່ອງທ່ຽວທີ່ດຶງດູດນັກທ່ອງທ່ຽວຕ່າງປະເທດ ທັງແມ່ນແຫ່ງເພື່ອຄົ້ນຄ້ວາກ່ຽວກັບວັດທະນະທຳຂອງຊາວຈຳປາບູຮານ.
ລານແອງ