ໂດຍຈັດຂຶ້ນແຕ່ວັນທີ 11 – 16 ພະຈິກ, ຢູ່ນະຄອນຫຼວງ ລີມາ, ປະເທດ ເປຣູ, ສັບປະດາສຸດຍອດເວທີປາໄສຮ່ວມມືເສດຖະກິດ ອາຊີ - ປາຊີຟິກ (APEC) ຄັ້ງທີ 31 ໄດ້ຮັບຄວາມຫວັງວ່າ ຈະຮັກສາກຳລັງໜູນການໂອ້ລົມສົນທະນາສຳຄັນລະຫວ່າງບັນດາພື້ນຖານເສດຖະກິດສະມາຊິກ, ຜ່ານນັ້ນ, ກໍ່ຊຸກຍູ້ການເຕີບໂຕໃນສະພາບການການຄ້າໂລກປະເຊີນໜ້າກັບສິ່ງທ້າທາຍຫຼາຍຢ່າງ.

        ດ້ວຍຫົວຂໍ້ “ມອບສິດ, ກວມລວມ, ເຕີບໂຕ”, ສັບປະດາສຸດຍອດ APEC 2024 ລວມມີຫຼາຍການເຄື່ອນໄຫວ, ໃນນັ້ນ, ຈຸດສຸມແມ່ນແຕ່ວັນທີ 14 – 16 ພະຈິກ ເມື່ອດຳເນີນບັນດາວາລະປະຊຸມສຸດຍອດ ດ້ວຍການເຂົ້າຮ່ວມຂອງປະມຸກລັດຂອງຫຼາຍພື້ນຖານເສດຖະກິດສະມາຊິກ APEC.

ກຳນົດຮູບແບບບົດບາດຂອງ APEC

        ສັບປະດາສຸດຍອດ APEC ຢູ່ນະຄອນຫຼວງ ລີມາ, ປະເທດ ເປຣູ ໄດ້ເປັນການອັດປີສຳຄັນສຳລັບ APEC, ເມື່ອນີ້ເປັນຂີດໝາຍ 35 ປີແຫ່ງການສ້າງຕັ້ງ APEC (1989), ສະນັ້ນ, ບັນດາສະມາຊິກລ້ວນແຕ່ມີຄວາມຕ້ອງການກວດກາຄືນ, ຕີລາຄາໝາກຜົນ ແລະ ກຳນົດທິດທາງຮ່ວມມືໃນໄລຍະໃໝ່. ດ້ວຍຫົວຂໍ້ “ມອບສິດ, ກວມລວມ, ເຕີບໂຕ” ໃນປີ APEC 2024, ປະເທດເຈົ້າພາບ ເປຣູ ໄດ້ຊຸກຍູ້ 3 ບຸລິມະສິດຕົ້ນຕໍ, ລວມມີ: ການຄ້າ ແລະ ການລົງທຶນເພື່ອການເຕີບໂຕກວມລວມ ແລະ ເຊື່ອມຕໍ່; ນະວັດຕະກຳ ແລະ ຫັນເປັນດີຈີຕອນ ເພື່ອຊຸກຍູ້ການຫັນຈາກເສດຖະກິດບໍ່ເປັນທາງການໄປສູ່ເສດຖະກິດເປັນທາງການ ແລະ ທົ່ວໂລກ; ການເຕີບໂຕແບບຍືນຍົງເພື່ອການພັດທະນາການສ້າງຄວາມເຂັ້ມແຂງດ້ວຍຕົນເອງ.

        ຈຸດສຸມຂອງສັບປະດາສຸດຍອດ APEC 2024 ແມ່ນບັນດາກອງປະຊຸມຂັ້ນສູງທີ່ຈັດຂຶ້ນແຕ່ວັນທີ 14 – 16 ພະຈິກ, ລວມມີບັນດາການເຄື່ອນໄຫວຕົ້ນຕໍ, ຄື: ກອງປະຊຸມສຸດຍອດ APEC ຄັ້ງທີ 31 ສຸມໃສ່ແລກປ່ຽນກ່ຽວກັບການຊຸກຍູ້ໂຄງການດຳເນີນງານພັດທະນາກວມລວມ ແລະ ປະຕິບັດວິໄສທັດ ແລະ ບັນດາແຜນການກະທຳຂອງ APEC; ການໂອ້ລົມສົນທະນາລະຫວ່າງບັນດາການນຳ APEC ແລະ ບັນດາການນຳແມ່ນແຂກຖືກເຊີນກ່ຽວກັບການເພີ່ມທະວີປະສິດທິຜົນການຮ່ວມມື APEC ແລະ ຊຸກຍູ້ການເຊື່ອມຕໍ່ເສດຖະກິດລະຫວ່າງພາກພື້ນ; ການໂອ້ລົມສົນທະນາລະຫວ່າງບັນດາການນຳ APEC ກັບສະພາໃຫ້ຄຳປືກສາດຳເນີນທຸລະກິດ APEC (ABAC); ກອງປະຊຸມສຸດຍອດວິສາຫະກິດ APEC (CEO Summit) ດ້ວຍຫົວຂໍ້ “ປະຕູໄປເຖິງເຂດດິນແດນແຫ່ງກາລະໂອກາດ”. ທ່ານ Chris Penk, ລັດຖະມົນຕີກະຊວງຂໍ້ມູນທີ່ດິນ ນິວຊີແລນ, ໃຫ້ຮູ້ວ່າ:

        “APEC ແມ່ນເວທີປາໄສແຖວໜ້າຢູ່ພາກພື້ນ ອາຊີ - ປາຊີຟິກ ໃນການຊຸກຍູ້ບັນດາແນວຄິດ ເພື່ອປັບປຸງ ແລະ ເພີ່ມທະວີດ້ານການຄ້າ, ພ້ອມກັນນັ້ນ, APEC ຍັງຮັກສາໄດ້ບົດບາດເປັນມູນເຊື້ອແມ່ນປູກລ້ຽງດ້ານແນວຄວາມຄິດ. ນີ້ແມ່ນສິ່ງທີ່ໜ້າເຄົາລົບ, ພິເສດແມ່ນໃນຈຸດເວລາທີ່ພວມມີສິ່ງທ້າທາຍຫຼາຍຢ່າງ, ນັບທັງຢູ່ພາກພື້ນ ແລະ ທົ່ວໂລກ, ອາດສາມາດນາບຂູ່ເຖິງສະພາບແວດລ້ອມດ້ານການຄ້າເສລີ ແລະ ຄວາມຂະຫຍັນຂັນເຄື່ອນເຊິ່ງພວກເຮົາຢາກລະດົມສົ່ງເສີມ”.

        ໂດຍຈັດຂຶ້ນໃນສະພາບພູມສາດການເມືອງໃນໂລກສືບຕໍ່ມີການຜັນແປທີ່ສັບສົນ, ດ້ວຍການປະທະກັນຖືກແກ່ຍາວຢູ່ ຢູແກຼນ, ເຂດຕາເວັນອອກກາງ, ສັບປະດາສຸດຍອດ APEC ຢູ່ ລີມາ ກໍ່ໄດ້ຮັບຄວາມຫວັງວ່າ ຈະຊຸກຍູ້ການສົນທະນາລະຫວ່າງການນຳບັນດາປະເທດ. ທ່ານ Renato Reyes, ເຈົ້າໜ້າທີ່ຂັ້ນສູງຮັບຜິດຊອບ APEC ຂອງ ເປຣູ, ໃຫ້ຮູ້ວ່າ:

        “APEC ໄດ້ຮັບການສ້າງຕັ້ງໃນປີ 1989 ຄືດັ່ງເວທີປາໄສປອດການເມືອງ, ບໍ່ອະນຸຍາດໃຫ້ບັນຫາພູມສາດການເມືອງແຊກຊຶມເຂົ້າ. ເຖິງຢ່າງໃດກໍ່ຕາມ, ສິ່ງນີ້ພວມມີການປ່ຽນແປງ. ພວກເຮົາໄດ້ເຫັນວ່າ, ໃນໄລຍະເກືອບ 3 ປີມໍ່ໆມານີ້, ເລື່ອງ APEC ຕອບສະໜອງກັບສະພາບຕົວຈິງໃໝ່ນີ້ຄືແນວໃດ ແລະ ຂ້າພະເຈົ້າຄິດວ່ານັ້ນກໍ່ແມ່ນຈຸດແຮງໃໝ່ຂອງ APEC”.

ບັນດາຫົວຂໍ້ສຳຄັນຢູ່ນອກ APEC

        ມີອີກຫົວຂໍ້ໜຶ່ງທີ່ໜ້າສົນໃຈ ອາດຈະສ້າງເປັນການປືກສາຫາລືຫຼາຍຢ່າງໃນສັບປະດາສຸດຍອດ APEC ປີນີ້, ເຖິງວ່າບໍ່ນອນໃນໂຄງການດຳເນີນງານເປັນທາງການ, ແມ່ນບັນດາຜົນກະທົບຂອງການເລືອກຕັ້ງປະທານາທິບໍດີ ອາເມລິກາ ໃນມໍ່ໆມານີ້ສຳລັບການຄ້າທົ່ວໂລກ, ກ່ອນອື່ນໝົດແມ່ນສຳລັບການຄ້າລະຫວ່າງບັນດາພື້ນຖານເສດຖະກິດສະມາຊິກ APEC. ຕາມວົງການນັກສັງເກດການແລ້ວ, ເລື່ອງທ່ານ Donald Trump ຮັບໄຊຊະນະໃນການເລືອກຕັ້ງດຳລົງຕຳແໜ່ງປະທານາທິບໍດີ ແນ່ນອນວ່າ ຈະເຮັດໃຫ້ຫຼາຍພື້ນຖານເສດຖະກິດ APEC ຕ້ອງມີການກະກຽມແຜນການເພື່ອຮັບມື ຖ້າມີການປ່ຽນແປງດ້ານນະໂຍບາຍການຄ້າຈາກ ອາເມລິກາ, ຍ້ອນໃນບັ້ນຫາສຽງເລືອກຕັ້ງປະທານາທິບໍດີ, ທ່ານ Donald Trump ໄດ້ຖະແຫຼງເປັນຫຼາຍຄັ້ງວ່າ ຈະເພີ່ມທະວີການຈັດວາງພາສີສິນຄ້ານຳເຂົ້າ ອາເມລິກາ ກັບທຸກຄູ່ຮ່ວມມືເສດຖະກິດ. ເຖິງຢ່າງໃດກໍ່ຕາມ, ທ່ານ Brian Nichols, ຜູ້ຊ່ວຍວຽກລັດຖະມົນຕີການຕ່າງປະເທດ, ຮັບຜິດຊອບພາກພື້ນເຂດຕາເວັນຕົກຊີກໂລກ ຖືວ່າ, ປະເທດ ອາເມລິກາ ຍາມໃດກໍ່ໃຫ້ຄຳໝັ້ນສັນຍາກັບ APEC ໃນໄລຍະກວ່າ 3 ທົດສະວັດຜ່ານມາ ແລະ ສິ່ງດັ່ງກ່າວຈະປ່ຽນແປງພາຍໃຕ້ສະໄໝອຳນາດການປົກຄອງໃໝ່ໄດ້ຂ້ອນຂ້າງຍາກ.

        “ປະຊາຊົນ ອາເມລິກາ ໄດ້ເລືອກຕັ້ງປະທານາທິບໍດີຄົນຕໍ່ໄປ ແລະ ພວກຂ້າພະເຈົ້າລໍຖ້າອຳນາດການປົກຄອງຊຸດຕໍ່ໄປວາງແຜນນະໂຍບາຍ ແລະ ເປົ້າໝາຍສະເພາະ, ແຕ່ປະເທດ ອາເມລິກາ ຜ່ານຫຼາຍສະໄໝປະທານາທິບໍດີນັບແຕ່ວັນສ້າງຕັ້ງ APEC ແລະ ພວກຂ້າພະເຈົ້າໄດ້ຮັກສາບັນດາຄຳໝັ້ນສັນຍາເປັນເຈົ້າການກັບພາກພື້ນ ອາຊີ - ປາຊີຟິກ ໃນຕະຫຼອດໄລຍະກວ່າ 30 ຜ່ານມາ. ສະນັ້ນ, ພວກຂ້າພະເຈົ້າຍັງຈູບຈ້າວຕໍ່ບັນດາການຮ່ວມມືກັບ APEC ໃນຫຼາຍປີຈະມາເຖິງ”.

        ນອກຈາກບັນດາຜົນກະທົບຂອງການປ່ຽນແປງອຳນາດການປົກຄອງຢູ່ ອາເມລິກາ ຕໍ່ກັບການຮ່ວມມື APEC, ມີເຫດການຢູ່ນອກສັບປະດາສຸດຍອດ APEC ກໍ່ໄດ້ດຶງດູດຄວາມສົນໃຈຢ່າງໃຫຍ່ຫຼວງແມ່ນເລື່ອງ ເພີ່ມທະວີການຮ່ວມມືດ້ານເສດຖະກິດ, ພື້ນຖານໂຄງລ່າງລະຫວ່າງ ຈີນ ກັບບັນດາປະເທດ ອາເມລິກາລາຕິນ ແລະ ພິເສດແມ່ນປະເທດເຈົ້າພາບ ເປຣູ.