(vovworld)- ທ່ານເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດ ຫວຽດນາມ ຫງວຽນຟູຈ້ອງ ພວມຢ້ຽມຢາມ ສາທາລະນະລັດ ອີຕາລີ ຢ່າງເປັນທາງການ ກົງກັບໂອກາດສະເຫລີມສະຫລອງ 40 ປີແຫ່ງວັນສ້າງຕັ້ງສາຍພົວພັນທາງການທູດ ລະຫວ່າງສອງປະເທດ, ການຢ້ຽມຢາມຂອງຜູ້ນຳພັກກອມມູນິດ ຫວຽດນາມ ຍັງມີຄວາມໝາຍສຳຄັນຍິ່ງ ນັ້ນແມ່ນ ສອງປະເທດໄດ້ລົງນາມໃນຖະແຫລງການຮ່ວມຍົກການພົວພັນລະຫວ່າງສອງປະເທດໃຫ້ຂຶ້ນສູ່ລະດັບຄູ່ຮ່ວມມືຍຸດທະສາດຢ່າງເປັນທາງການ. ຄຳໝັ້ນສັນຍາດ້ານການເມືອງຢ່າງແຂງແຮງລະຫວ່າງການນຳຂັ້ນສູງສອງປະເທດ ຈະເປັນປະຖົມປັດໃຈ ເພື່ອນຳການພົວພັນລະຫວ່າງ ຫວຽດນາມ ແລະ ອີຕາລີກ້າວເຂົ້າສູ່ໄລຍະໃຫມ່, ແທດຈິງ ແລະ ມີປະສິດທິຜົນກວ່າ.
ກໍເຊັ່ນດຽວກັນກັບຫລາຍປະເທດອື່ນຢູ່ ເອີລົບ, ໃນຊຸມປີແຫ່ງການຕໍ່ຕ້ານຕ້ານຈັກກະພັດອາເມລິກາ, ຍາດເອົາເອກະລາດ, ເສລິພາບ ແລະ ສັນຕິພາບ, ປະຊາຊົນ ຫວຽດນາມ ໄດ້ຮັບການສະຫນັບສະຫນູນຢ່າງແຮງຈາກເພື່ອນມິດ ອີຕາລີ. ມີ ຊາວຫວຽດນາມ ລຸ້ນຫນຶ່ງຢູ່ອີຕາລີ ໃນຊຸມປີທີ່ຫຍຸ້ງຍາກລຳບາກນັ້ນ ໄດ້ລົງຖະຫນົນສະຫນັບສະຫນູນຫວຽດນາມ ເພື່ອມະໂນທຳ ແລະ ຍຸຕິທຳ.
ທ່ານເລຂາທິການໃຫຍ່ຫງວຽນຟູຈ້ອງ ແລະ ທ່ານ ປະທານາທິບໍດີ
ອີຕາລີ Napolitano
|
40 ປີຜ່ານມາ ນັບແຕ່ເມື່ອສອງປະເທດສ້າງຕັ້ງສາຍພົວພັນທາງການທູດ, ພິເສດນັບແຕ່ພາຍຫລັງ ຫວຽດນາມ ດຳເນີນກິດຈະການສ້າງສາປະເທດຊາດ ພາຍຫລັງສົງຄາມ ຄືນໃຫມ່, ກ້າວເຂົ້າສູ່ໄລຍະປ່ຽນແປງໃຫມ່, ການພົວພັນລະຫວ່າງ ຫວຽດນາມ ແລະ ອີຕາລີ ໄດ້ພັດທະນາຢ່າງຕັ້ງຫນ້າ, ຮອບດ້ານ. ອີຕາລີ ແມ່ນປະເທດທຳອິດຢູ່ເອີລົບທາງທິດຕາເວັນຕົກສຽງເຫນືອ ໄດ້ຕັ້ງຫນ້າສະຫນັບສະຫນູນການເພີ່ມທະວີການຮ່ວມມື ລະຫວ່າງ ຫວຽດນາມ ແລະ ສະຫະພາບເອີລົບ ໃນບັນດາເວທີປາໄສສາກົນໃຫຍ່ກໍຄືຫັນການພົວພັນລະຫວ່າງ ຫວຽດນາມ ແລະ ບັນດາອົງການການເງິນ, ການຄ້າ, ເງິນຕາສາກົນເປັນປົກກະຕິ.
ຍາມໃດ ສອງປະເທດກໍຖືບົດບາດ, ທີ່ຕັ້ງຂອງກັນເປັນສຳຄັນ, ແລກປ່ຽນເສດຖະກິດ, ການຄ້າ, ການລົງທືນສອງຝ່າຍໃຫ້ພັດທະນາເປັນປົກກະຕິ. ຍາມໃດການນຳຂັ້ນສູງຂອງ ອີຕາລີ ກໍຢືນຢັນເຖິງຄວາມຕິດສິນໃຈຊຸກຍູ້ການພົວພັນຮ່ວມມືຫລາຍດ້ານກັບ ຫວຽດນາມ, ຖື ຫວຽດນາມ ແມ່ນປະເທດບຸລິມະສິດໃນການພັດທະນາການພົວພັນຢູ່ ພາກພື້ນ ອາຊີຕາເວັນອອກສຽງໃຕ້ ແລະ ແມ່ນປະເທດຊຶ່ງບັນດາວິສາຫະກິດ ອີຕາລີ ເລືອກເຟັ້ນເຂົ້າມາລົງທຶນນັບແຕ່ນີ້ຮອດປີ 2020. ພິເສດ ໃນຫລາຍປີຜ່ານມາ, ອີຕາລີ ແມ່ນຄູ່ຮ່ວມມືດ້ານການຄ້າຕົ້ນຕໍຂອງ ຫວຽດນາມ ໃນອີຢູ. ໃນສະພາບເສດຖະກິດໂລກ ແລະ ປະເທດຈຳນວນຫນຶ່ງປະສົບກັບຄວາມຫຍຸ້ງຍາກ, ການແລກປ່ຽນດ້ານການຄ້າສອງສົ້ນສືບຕໍ່ບັນລຸລະດັບຈະເລີນເຕີບໂຕດີພໍສົມຄວນໃນປີ 2011 ແລະ 2012 (ເພີ່ມຂື້ນກວ່າ 38% ໃນປີ 2011, ບັນລຸປະມານ 2,53 ຕື້ໂດລາສະຫະລັດ ແລະ ເພີ່ມຂຶ້ນກວ່າ 10% ໃນປີ 2012, ບັນລຸປະມານ 2,8 ຕື້ໂດລາສະຫະລັດ). ທ່ານ ເລຫາຍບີ່ງ, ຫົວຫນ້າກົມນະໂຍບາຍການຕ່າງປະເທດ, ສັງກັດກະຊວງການຕ່າງປະເທດ ຫວຽດນາມ ຖືວ່າ:
“ການພົວພັນລະຫວ່າງ ຫວຽດນາມ ແລະ ອີຕາລີ ພວມພັດທະນາຢ່າງຕັ້ງຫນ້າທີ່ສຸດ.ສະແດງອອກຜ່ານເລື່ອງ: ທີຫນຶ່ງ ອີຕາລີ ໄດ້ຮັບຮູ້ກົດລະບຽບພື້ນຖານເສດຖະກິດການຕະຫລາດຂອງ ຫວຽດນາມໃນປີ 2012, ປາດຖະຫນາຢາກສ້າງການພົວພັນຄູ່ຮ່ວມມືຍຸດທະສາດກັບ ຫວຽດນາມ. ການຢ້ຽມຢາມທີ່ສຳຄັນຂອງທ່ານເລຂາທິການໃຫຍ່ ຫງວຽນຟູຈ້ອງ ຄັ້ງນີ້ ກໍແມ່ນເພື່ອສະເຫລີມສະຫລອງ 40 ປີແຫ່ງວັນສ້າງຕັ້ງສາຍພົວພັນທາງການທູດ ລະຫວ່າງ ຫວຽດນາ ແລະ ອີຕາລີ, ສ້າງເປັນຂີດໝາຍໃນໄລຍະແຫ່ງການພັດທະນາການພົວພັນລະຫວ່າງສອງປະເທດ ໃນ 40 ປີຜ່ານມາ.”
ເພື່ອຜັນຂະຫຍາຍຄວາມຕັດສິນໃຈຢ່າງແຮງຂອງການນຳສອງປະເທດ ນຳການພົວພັນລະຫວ່າງ ຫວຽດນາມ ແລະ ອີຕາລີ ໃຫ້ກ້າວເຂົ້າສູ່ໄລຍະໃຫມ່, ບັນດາອົງການກ່ຽວຂອ້ງ, ກະຊວງຂະແຫນງການສອງປະເທດ ໄດ້ ແລະ ພວມມີແຜນການຈັດຕັ້ງການເຄື່ອນໄຫວຫລາຍຢ່າງ. ຫນຶ່ງໃນບັນດາເຫດການເປີດສາກໃຫ້ແກ່ການເຄື່ອນໄຫວຕ່າງໆໃນປີນີ້, ແມ່ນ “ຊຸມມື້ວັດທະນະທຳ ຫວຽດນາມ ຢູ່ ອີຕາລີ ” ພວມດຳເນີນໄປຢູ່ ນະຄອນຫລວງ ໂຣມ. ບໍ່ພຽງແຕ່ເພື່ອເພີ່ມທະວີຄວາມສາມັກຄີ, ມິດຕະພາບ ລະຫວ່າງປະຊາຊົນສອງປະເທດ ຫວຽດນາມ ແລະ ອີຕາລີ ເທົ່ານັ້ນ, ຊຸມມື້ວັດທະນະທຳ ຫວຽດນາມ ຍັງປະກອບສ່ວນເປີດກວ້າງບັນດາການເຄື່ອນໄຫວພົວພັນແລກປ່ຽນ, ແນະນຳວັດທະນະທຳ, ໂຄສະນາພາບພົດປະເທດຊາດ ແລະ ຊາວຫວຽດນາມ ເຖິງ ປະຊາຊົນອີຕາລີ ອີກດ້ວຍ. ທ່ານ ເຈີນແທນຫາຍ, ອະດີດທີ່ປຶກສາດ້ານການຄ້າ ສະຖານທູດ ຫວຽດນາມ ຢູ່ ອີຕາລີ ໃຫ້ຮູ້ວ່າ:
“ອາດເວົ້າໄດ້ວ່າ, ມາຮອດປະຈຸບັນ ປະຊາຊົນ ອີຕາລີ ບໍ່ທັນເຂົ້າໃຈໄດ້ວ່າ ຫວຽດນາມ ແມ່ນ ປະເທດ ທີ່ມີຄວາມສາມາດບົ່ມຊ້ອນດ້ານທ່ອງທ່ຽວຫລາຍຢ່າງ. ແລະ ພິເສດ ແມ່ນມີບັນດາເຂດປູຊະນີຍາສະຖານ, ທັດສະນີຍະພາບລືຊື່ຄື: ອ່າວຮ້າລອງ. ພວກຂ້າພະເຈົ້າໄດ້ມີການເຮັດວຽກກັບກະຊວງທ່ອງທ່ຽວ ອີຕາລີ ແລະ ສະຫະສະມາຄົມທ່ອງທ່ຽວຈຳນວນຫນຶ່ງຢູ່ບັນດານະຄອນໃຫຍ່ຂອງ ອີຕາລີ ເພື່ອໂຄສະນາພາບພົດກ່ຽວກັບການທ່ອງທ່ຽວ ຫວຽດນາມ ເວົ້າລວມ. ການເຄື່ອນໄຫວໂຄສະນາແມ່ນປັດໄຈຈຳເປັນທີ່ສຸດ. ຜ່ານນັ້ນ ຈະດຶງດູດ ນັກທ່ອງທ່ຽວມາຢ້ຽມຢາມ ຫວຽດນາມ.”
ນອກຈາກຂົງເຂດວັດທະນະທຳ, ການທ່ອງທ່ຽວ, ສອງຝ່າຍຍັງເພີ່ມທະວີການຮ່ວມມືໃນບັນດາຂົງເຂດປ້ອງກັນຊາດ, ກິລາ. ... ທີ່ຍັງມີຄວາມສາມາດບົ່ມຊ້ອນຫລາຍຢ່າງ. ການຮ່ວມມືດ້ານສຶກສາ,ບຳລຸງສ້າງ ແລະ ຄົ້ນຄ້ວາວິທະຍາສາດກໍໄດ້ຮັບຄວາມເອົາໃຈໃສ່ຈາກສອງຝ່າຍ. ຫວຽດນາມ ແລະ ອີຕາລີ ພວມກະກຽມລົງນາມໃນເອກະສານຮ່ວມມືຫລາຍສະບັບ ເພື່ອຜັນຂະຫຍາຍບັນດາໂຄງການຫນູນຊ່ວຍນັກສຶກສາ ຫວຽດນາມ ໄປຮ່ຳຮຽນ ແລະ ບັນດາໂຄງການຮ່ວມມືຄົ້ນຄ້ວາວິທະຍາສາດ ຢູ່ ອີຕາລີໃນໄລຍະຈະມາເຖິງ. ການຮ່ວມມືລະຫວ່າງບັນດາທ້ອງຖິ່ນຂອງສອງປະເທດຄື: ຮ່າໂນ້ຍ ກັບໂຣມ, ນະຄອນໂຮ່ຈິມິນ ກັບມີລານ, ຫາຍຟ່ອງ ກັບ Geona, ເຫ້ວ ກັບ ວຽນ .. ສືບຕໍ່ໄດ້ຮັບການຜັນຂະຫຍາຍຢ່າງເລິກເຊິ່ງ ແລະ ກວ້າງຂວາງໃນໄລຍະຈະມາເຖິງ.
ບົນພື້ນຖານນັ້ນ, ການຢ້ຽມຢາມອີຕາລີ ເປັນຄັ້ງທຳອິດຂອງທ່ານເລຂາທິການໃຫຍ່ພັກກອມມູນິດ ຫວຽດນາມ ຈະສ້າງເປັນກຳລັງຫນູນໃຫມ່ໃຫ້ແກ່ການພົວພັນລະຫວ່າງສອງປະເທດ. ການເຈລະຈາ, ການພົບປະແລກປ່ຽນຄຳເຫັນຄັ້ງຕ່າງໆຂອງທ່ານເລຂາທິການໃຫຍ່ ຫງວຽນຟູຈ້ອງ ກັບບັນດາການນຳ ອີຕາລີ ໃນການຢ້ຽມຢາມອີຕາລີຄັ້ງນີ້ ແນ່ນອນວ່າ ຈະປະກອບສ່ວນເພີ່ມພູນຄູນສ້າງ, ຍົກການພົວພັນຮອບດ້ານລະຫວ່າງສອງປະເທດໃນບັນດາຂົງເຂດ ການເມືອງ, ການຕ່າງປະເທດ,ເສດຖະກິດ ການຄ້າ, ວັດທະນະທຳ, ການສຶກສາ, ການປ້ອງກັນຊາດ ປອ້ງກັນຄວາມສະຫງົບ ຂຶ້ນສູ່ລະດັບສູງໃຫມ່, ສ້າງການພົວພັນຄູ່ຮ່ວມມືຮອບດ້ານໝັ້ນຄົງກວ່າໃນໄລຍະຈະມາເຖິງ.