(vovworld) – ວັນທີ 12/11, ປະທານາທິບໍດີສະຫະພັນລັດເຊຍ Vladimir Putin ໄດ້ມາຢ້ຽມຢາມຫວຽດນາມ ຕາມຄຳເຊື້ອເຊີນຂອງທ່ານປະທານປະເທດຫວຽດນາມ ເຈືອງເຕິ໋ນຊາງ. ນີ້ແມ່ນເທື່ອທີ 3 ທີ່ທ່ານ Putin ມາຢ້ຽມຢາມຫວຽດນາມ ແລະ ແມ່ນເທື່ອທີ 2 ໃນຖານະເປັນປະທານາທິບໍດີສະຫະພັນລັດເຊຍ. ການຢ້ຽມຢາມບໍ່ພຽງແຕ່ສະແດງໃຫ້ເຫັນຄວາມໄວ້ເນື້ອເຊື່ອໃຈດ້ານການເມືອງລະຫວ່າງຫວຽດນາມ ແລະ ສະຫະພັນລັດເຊຍ ເທົ່ານັ້ນ, ຫາກຜ່ານນັ້ນຍັງປະກອບສ່ວນເຮັດໃຫ້ການພົວພັນຄູ່ຮ່ວມມືຍຸດທະສາດ ແລະ ການຮ່ວມມືຮອບດ້ານຫວຽດນາມ - ສະຫະພັນລັດເຊຍໃນໄລຍະໃໝ່ເລິກເຊິ່ງກວ່າອີກ.
ປະທານາທິບໍດີສະຫະພັນລັດເຊຍ Vladimir Putin
(ພາບ: ອິນເຕີແນດ)
ເມື່ອເຕື້ອງເຖິງການພົວພັນລະຫວ່າງຫວຽດນາມ - ໂຊຫວຽດ (ໃນເມື່ອກ່ອນ) ແລະ ການພົວພັນລະຫວ່າງຫວຽດນາມ - ສະຫະພັນລັດເຊຍ ໃນປະຈຸບັນ, ປະຊາຊົນສອງປະເທດລ້ວນແຕ່ເຄົາລົບນັບຖືສາຍພົວພັນສາມັກຄີ ແລະ ການຮ່ວມມືທີ່ມີມາແຕ່ດົນນານ, ເຊິ່ງໄດ້ຮັບການສ້າງຕັ້ງ ແລະ ທົດລອງຜ່ານຊຸມເດືອນປີອັນທຸກຍາກລຳບາກ ແຕ່ເຕັມໄປດ້ວຍຄວາມສະຫງ່າອົງອາດຂອງການປົກປັກຮັກສາ ແລະ ສ້າງສາປະເທດຂອງທັງສອງຊາດ.
ຂອບເຂດແຫ່ງການຮ່ວມມືຮອບດ້ານ
ໂດຍສືບທອດມໍລະດົກອັນລຳ້ຄ່ານັ້ນ, ການນຳສອງປະເທດຍາມໃດກໍ່ສະຫງວນບຸລິມາສິດສູງສຸດໃຫ້ແກ່ກັນ. ໃນສະຖານະການທີ່ປະເທດລັດເຊຍ ພວມເອົາໃຈໃສ່ເຖິງທິດຕາເວັນອອກ ແລະ ພວມເພີ່ມທະວີບົດບາດຢູ່ພາກພື້ນອາຊີ - ປາຊີຝິກ ນັ້ນ, ລັດເຊຍ ໄດ້ຕີລາຄາສູງທີ່ຕັ້ງຂອງຫວຽດນາມ ໃນພາກພື້ນ. ໃນຂະນະນັ້ນ, ດ້ວຍນະໂຍບາຍເປີດກວ້າງ, ຫັນການພົວພັນກັບຕ່າງປະເທດເປັນຫຼາຍຮູບຫຼາຍແບບ ແລະ ຫຼາຍຝ່າຍນັ້ນ, ຍາມໃດຫວຽດນາມ ກໍ່ຖືເປັນສຳຄັນ ແລະ ຊຸກຍູ້ການພົວພັນຮອບດ້ານກັບສະຫະພັນລັດເຊຍ ເຊິ່ງແມ່ນປະເທດມະຫາອຳນາດ, ແມ່ນປະເທດເພື່ອນມິດທີ່ເປັນມູນເຊື້ອ, ມິດຕະພາບກັບຫວຽດນາມ.
ນັບແຕ່ສອງປະເທດສ້າງຕັ້ງ “ການພົວພັນຄູ່ຮ່ວມມືຍຸດທະສາດ“ ເມື່ອເດືອນ 3/2001 ແລະ ພິເສດແມ່ນພາຍຫຼັງຍົກການພົວພັນຂຶ້ນລະດັບ “ຄູ່ຮ່ວມມືຍຸດທະສາດຮອບດ້ານ“ ເມື່ອປີ 2012, ການພົວພັນລະຫວ່າງຫວຽດນາມ - ສະຫະພັນລັດເຊຍ ໄດ້ກ້າວເຂົ້າສູ່ໄລຍະໃໝ່ຢ່າງເປັນທາງການ, ທັງຂະຫຍັນຂັນເຂື່ອນ, ທັງມີປະສິດທິຜົນ, ພິເສດແມ່ນໃນຂົງເຂດເສດຖະກິດ, ການຄ້າ, ການຮ່ວມມືລົງທຶນ ແລະ ການປ້ອງກັນຊາດ, ປ້ອງກັນຄວາມສະຫງົບ.
ກາລະໂອກາດໃໝ່ເພື່ອຊຸກຍູ້ການຮ່ວມມື
ເຖິງວ່າໄດ້ຮັບການພັດທະນາຢ່າງຂະຫຍັນຂັນເຂື່ອນໃນໄລຍະຜ່ານມາແລ້ວກໍ່ຕາມ, ແຕ່ການພົວພັນທາງດ້ານເສດຖະກິດ, ການຄ້າ ແລະ ການລົງທຶນລະຫວ່າງຫວຽດນາມ - ສະຫະພັນລັດເຊຍ ຍັງບໍ່ທັນເສີມຂະຫຍາຍທ່າສະດວກທີ່ມີຢູ່ແລ້ວໄດ້ໝົດເທື່ອ. ໃນໄລຍະປະຈຸບັນ, ສາຍພົວພັນນີ້ພວມມີບັນດາກາລະໂອກາດໃຫຍ່ ເມື່ອລັດເຊຍ ເຂົ້າເປັນສະມາຊິກອົງການການຄ້າໂລກ (WTO) ແລະ ຫວຽດນາມເຂົ້າຮ່ວມສັນຍາການຄ້າເສລີ (FTA) ກັບພັນທະມິດພາສີລັດເຊຍ - ເບລາຣຸດ - ກາຢັກສະຖານ. ທ່ານ ເຈິ່ນດັງຈູງ, ປະທານສະຫະສະມາຄົມວິສາຫະກິດຫວຽດນາມ ຢູ່ ສະຫະພັນລັດເຊຍ , ຖືວ່າ:
“ເມື່ອລັດເຊຍເຂົ້າເປັນສະມາຊິກ WTO ກາລະໂອກາດສົ່ງອອກສິນຄ້າຂອງຫວຽດນາມ ໄປຍັງລັດເຊຍ ຈະສະດວກສະບາຍກວ່າ ແລະ ບັນດາວິສາຫະກິດຫວຽດນາມ ຢູ່ສະຫະພັນລັດເຊຍ ກໍ່ສາມາດໝູນໃຊ້ກາລະໂອກາດນີ້ເປັນຂົວຕໍ່ເພື່ອແຈກຢາຍສິນຄ້າ, ກໍ່ຄືເປັນຂົວຕໍ່ກັບບັນດາວິສາຫະກິດຂອງລັດເຊຍ ໃນການຈຳໜ່າຍສິນຄ້າຂອງຕົນ“.
ເມື່ອເຂົ້າຮ່ວມ FTA ກັບພັນທະມິດພາສີລັດເຊຍ - ເບລາຣຸດ - ກາຢັກສະຖານ, ວິສາຫະກິດຫວຽດນາມ ແລະ ສະຫະພັນລັດເຊຍ ມີເງື່ອນໄຂເພີ່ມຜົນປະໂຫຍດກວ່າອີກຈາກການແລກປ່ຽນດ້ານການຄ້າ ແລະ ການສົ່ງອອກ. ກ່ຽວກັບຜົນປະໂຫຍດ ເຊິ່ງ FTA ນຳມາໃຫ້, ທ່ານ ຟ້າມກວາງນ້ຽມ, ທີ່ປຶກສາດ້ານການຄ້າ, ສະຖານທູດຫວຽດນາມ ປະຈຳ ສະຫະພັນລັດເຊຍ , ຊີ້ແຈ້ງວ່າ:
“ທີ່ໜຶ່ງແມ່ນສ້າງບາດກ້າວບຸກທະລຸໃນການພັດທະນາເສດຖະກິດ, ການຄ້າ, ການລົງທຶນດ້ານອຸດສາຫະກຳລະຫວ່າງຫວຽດນາມ - ພັນທະມິດພາສີ. ທີສອງ, ຫວຽດນາມ ຈະໄດ້ຮັບເອົາເຕັກໂນໂລຢີທີ່ກ້າວໜ້າ, ພື້ນຖານພັດທະນາວິທະຍາສາດ ເຕັກນິກຢ່າງແຮງຈາກພັນທະມິດພາສີ ເພື່ອຫັນພື້ນຖານເສດຖະກິດຂອງຕົນເປັນທັນສະໄໝ. ທີສາມ, ແມ່ນສ້າງວຽກເຮັດງານທຳ, ພັດທະນາຂະແໜງບໍລິການ, ທ່ອງທ່ຽວກັບພັນທະມິດພາສີ ແລະ ສ້າງເງື່ອນໄຂຊຸກຍູ້ການລົງທຶນຢ່າງແຮງລະຫວ່າງພັນທະມິດພາສີ - ຫວຽດນາມ“
ມາຮອດປະຈຸບັນ, ຫວຽດນາມ ໄດ້ດຳເນີນການເຈລະຈາ ສັນຍາການຄ້າເສລີ (FTA) 3 ຄັ້ງ ກັບພັນທະມິດພາສີ ລັດເຊຍ, ເບລາຣຸດ ແລະ ກາຢັກສະຖານ ແລະ ນີ້ກໍ່ແມ່ນເນື້ອໃນປຶກສາຫາລືຕົ້ນຕໍ່ຂອງປະທານາທິບໍດີ ລັດເຊຍ Putin ໃນການຢ້ຽມຢາມ ຫວຽດນາມ ຄັ້ງນີ້. ນອກນັ້ນ, ທ່ານປະທານາທິບໍດີ ລັດເຊຍ V. Putin ຈະພ້ອມກັບບັນດາການນຳ ຫວຽດນາມ ປຶກສາຫາລືບັນດາເນື້ອໃນຮ່ວມມືໃນຂົງເຂດປ້ອງກັນຊາດ, ພະລັງງານ, ການສຶກສາບຳລຸງສ້າງ ແລະ ພິເສດແມ່ນການສົມທົບກັນເຄື່ອນໄຫວ ແລະ ການສະໜັບສະໜູນເຊິ່ງກັນ ແລະ ກັນຢູ່ບັນດາເວທີປາໄສສາກົນ ແລະ ພາກພື້ນ.
ເຮັດໃຫ້ການພົວພັນຄູ່ຮ່ວມມືຍຸດທະສາດຮອບດ້ານເລິກເຊິ່ງກ່ວາອີກ
ກ່ອນການຢ້ຽມຢາມຄັ້ງນີ້, ຫາງສຽງ 2 ປະເທດໄດ້ຕີລາຄາສູງການຢ້ຽມຢາມຄັ້ງນີ້, ເຊື່ອໝັ້ນວ່າ ການຢ້ຽມຢາມ ຫວຽດນາມ ຂອງທ່ານປະທານາທິບໍດີ ລັດເຊຍ V. Putin ຄັ້ງນີ້ຈະນຳການພົວພັນຮ່ວມມືລະຫວ່າງ 2 ປະເທດຂຶ້ນສູ່ລະດັບສູງໃໝ່. ທ່ານ ໂດ໋ຊວນຮ່ວາງ, ຜູ້ອຳນວຍການໃຫຍ່ກຸ່ມບໍລິສັດ Mareven, ປະທານສະມາຄົມຊາວ ຫວຽດນາມ ຢູ່ສະຫະພັນ ລັດເຊຍ, ຕີລາຄາສູງການຢ້ຽມຢາມ ຫວຽດນາມຂອງທ່ານປະທານາທິບໍດີ V. Putin:
ຂ້າພະເຈົ້າຄິດວ່າ, ການພົວພັນ 2 ປະເທດໄດ້ໝັ້ນຄົງເຂັ້ມແຂງ, ມີຄວາມເລິກເຊິ່ງດ້ານປະຫວັດສາດ ແລະ ການຢ້ຽມຢາມ ຫວຽດນາມ ເປັນຄັ້ງທີ 3 ຂອງທ່ານ Putin ຈະເຮັດໃຫ້ການພົວພັນເສດຖະກິດລະຫວ່າງ 2 ປະເທດນັບມື້ນັບສະໜິດຕິດພັນ, ເລິກເຊິ່ງຂຶ້ນຕື່ມ. ເຫດການນີ້ອີກເທື່ອໜຶ່ງກໍ່ແມ່ນພະຍານຫຼັກຖານແຫ່ງຄວາມຕັດສິນໃຈກໍ່ສ້າງ, ປັບປຸງ ແລະ ພັດທະນາການພົວພັນລະຫວ່າງ 2 ປະເທດ, ນຳມາເຊິ່ງຜົນປະໂຫຍດໃຫ້ແກ່ພື້ນຖານເສດຖະກິດ 2 ປະເທດ, ປະຊາຊົນ 2 ປະເທດ ແລະ ບັນດາວິສາຫະກິດຂອງ ຫວຽດນາມ ແລະ ສະຫະພັນລັດເຊຍ”
ດ້ວຍພື້ນຖານຂອງການພົວພັນມິດຕະພາບ, ຄວາມສາມັກຄີ ແລະ ການຮ່ວມມືອັນຍາວນານ, ການຢ້ຽມຢາມທາງລັດຖະກິດ ຫວຽດນາມຂອງທ່ານປະທານາທິບໍດີ ລັດເຊຍ V. Putin ປະກອບສ່ວນຍົກສູງຄວາມໄວ້ເນື້ອເຊື່ອໃຈລະຫວ່າງ 2 ປະເທດກ່ວາອີກ, ເຮັດໃຫ້ການພົວພັນຄູ່ຮ່ວມມືຍຸດທະສາດເລິກເຊິ່ງ ແລະ ລະອຽດກ່ວາ. ຜ່ານການຢ້ຽມຢາມຄັ້ງນີ້, 2 ຝ່າຍໄດ້ວາງອອກບັນດາມາດຕະການລະອຽດ ໃນການຊຸກຍູ້ການພົວພັນມິດຕະພາບທີ່ເປັນມູນເຊື້ອ, ການຮ່ວມມືຮອບດ້ານຢ່າງແທດຈິງ ແລະ ມີປະສິທິຜົນກ່ວາອີກ.