ຫງວຽນທິຫາຍອ໊ຽນ ມີຄວາມເມົາມົວຢ່າງໃຫຍ່ຫຼວງກັບການເຮັດເຄື່ອງຫັດຖະກຳດ້ວຍມື

ຫງວຽນທິຫາຍອ໊ຽນ - ນາງສາວໜຸ່ມຮຽນຈົບຈາກ ພາກວິຊາ ວຽກງານສັງຄົມ, ມະຫາວິທະຍາໄລ ແຮງງານ - ສັງຄົມ ຮ່າໂນ້ຍ ມີຄວາມເມົາມົວຢ່າງໃຫຍ່ຫຼວງກັບການເຮັດເຄື່ອງຫັດຖະກຳດ້ວຍມື ຫຼື ຍັງເອີ້ນວ່າ ເຄື່ອງ handmade, ພິເສດແມ່ນປະເພດຖົງຫີ້ວ ແລະ ກະເປົາ. ນັບແຕ່ຕອນຍັງເປັນນັກສຶກສາ, ນາງໄດ້ຊອກຄົ້ນ, ຮຽນຮູ້ການອອກແບບຖົງ ແລະ ເຮັດເອງ ດ້ວຍສະຕາຍທີ່ເປັນເອກະລັກ. ພາຍຫຼັງຮຽນຈົບ, ນາງໄດ້ຕັດສິນໃຈກັບເມືອບ້ານເກີດເມືອງນອນເພື່ອປະຕິບັດຄວາມຝັນສ້າງຕັ້ງເຄື່ອງໝາຍ handmade ສະເພາະຂອງຕົນ ແລະ ເຄື່ອງໝາຍ Meo Tom Handmade ກໍໄດ້ກຳເນີດຂຶ້ນ. ແຕ່ເຖິງຢ່າງໃດກໍຕາມ, ຜ້າ Jean ບໍ່ແມ່ນວັດຖຸດິບຕົ້ນຕໍ ທີ່ນາງໄດ້ເລືອກນັບແຕ່ຕົ້ນ.

  “ຕອນທີ່ຂ້າພະເຈົ້າຫາກໍເລີ່ມເຮັດເຄື່ອງ handmade, ຂ້າພະເຈົ້າໄດ້ເລືອກເຮັດດ້ວຍຜ້າໃໝ່. ເຄື່ອງ handmade ເອງກໍມີຈຸດທີ່ເປັນເອກະລັກສະເພາະຂອງມັນຢູ່ແລ້ວ. ແຕ່ເມື່ອໃຊ້ຜ້າໃໝ່, ແຕ່ລະຖົງທີ່ເຮັດອອກມາມັນກໍມີຈຸດໃດຈຸດໜຶ່ງຄ້າຍຄືກັນ ແລະ ບໍ່ຕອບສະໜອງໄດ້ຄວາມປະດິດຄິດສ້າງຂອງຂ້າພະເຈົ້າ. ສະນັ້ນ, ພາຍຫຼັງທີ່ຄິດຊອກຫາເສັ້ນທາງເດີນສະເພາະໃຫ້ແກ່ເຄື່ອງໝາຍຂອງຕົນເປັນເວລາ 2 ປີ, ຂ້າພະເຈົ້າຈຶ່ງຄິດອອກຜ້າຊະນິດໜຶ່ງທີ່ທັງໃກ້ຊິດກັບເຮົາ, ທັງເປັນມິດກັບສິ່ງແວດລ້ອມ, ນັ້ນກໍແມ່ນຜ້າ Jean ຈາກໂສ້ງເສື້ອຜືນເກົ່າໆຂອງຕົນ. ໂສ້ງແຕ່ລະຜືນຈະນຳແນວຄວາມຄິດໃໝ່ມາໃຫ້ຂ້າພະເຈົ້າ. ອາດເຫັນວ່າ ຖົງແຕ່ລະແບບນີ້ ຈະມີແຕ່ອັນດຽວເທົ່ານັ້ນ”.

ພາຍໃນເຮືອນຊັ້ນດຽວຫຼັງນ້ອຍໆສີຂາວທີ່ພົ້ນເດັ່ນຂຶ້ນໃນສວນດອກບານເພນພວມພາກັນເບັ່ງບານນັ້ນ, ມີຊຸດໂຕະຕັ່ງເຮັດດ້ວຍຢາງລົດເກົ່າ ແລະ ຜ້າ Jean ສີຟ້າ. ພິເສດ, ພົ້ນເດັ່ນຂຶ້ນໃນຝາສີຂາວຂອງເຮືອນຫຼັງນັ້ນ ແມ່ນຖົງຫີ້ວ, ກະເປົາຊະນິດຕ່າງໆທີ່ເຮັດຈາກຜ້າ Jean ເກົ່າ ເປັນຕົ້ນແມ່ນຖົງພາຍຂ້າງ, ກະເປົາພາຍ, ກະເປົາເປ້ ຫຼື ຖົງໃສ່ໂທລະສັບ…. ແລະ ຫາຍອຽນ ກໍ່ພວມເມົາມົວກັບຜືນຜ້າ ແລະ ຈັກຕັດຫຍິບທີ່ຕັ້ງຢູ່ໃກ້ປ່ອງຢ້ຽມ, ມືຂອງນາງຫຍິບຕາມຈັງຫວະຂອງຈັກຕັດຫຍິບຢ່າງວ່ອງໄວຄ່ອງແຄ້ວ, ບໍ່ພໍຄາວ ນາງກໍເຮັດສຳເລັດຖົງພາຍຂ້າງອັນໜຶ່ງແລ້ວ. ຈາກເຄື່ອງ Jean ເກົ່າ ທີ່ຂາດ ແລະ ຕົກສີ, ເບິ່ງຄືວ່າມີແຕ່ເອົາໄປຖີ້ມເທົ່ານັ້ນ ແຕ່ຜ່ານສີມືຂອງນາງສາວຄົນນີ້ ພັດກາຍເປັນຜະລິດຕະພັນທີ່ເປັນເອກະລັກສະເພາະ. ນັ້ນກໍແມ່ນສິ່ງທີ່ເຮັດໃຫ້ຄົນລຸ້ນໜຸ່ມນິຍົມຊົມຊອບ. ເພື່ອນ ຫງວຽນທິຮ່າ ໜຶ່ງໃນບັນດາລູກຄ້າຄົນທຳອິດທີ່ສັ່ງສິນຄ້າຈາກ ຫາຍອຽນ ໄດ້ແບ່ງປັນວ່າ:

“ຂ້າພະເຈົ້າມັກແນວຄວາມຄິດທີ່ ອຽນ ກຳລັງຂະຫຍາຍທີ່ສຸດ. ຂ້້າພະເຈົ້າເຄີຍສົ່ງເຄື່ອງ Jean ເກົ່າທີ່ຂ້າພະເຈົ້າບໍ່ນຸ່ງອີກແລ້ວໄປໃຫ້ ຫາຍອຽນ. ໃນນັ້ນ ມີກະໂປງຜືນໜຶ່ງ ທີ່ມີຄວາມຊົງຈຳຫຼາຍຢ່າງສຳລັບຂ້າພະເຈົ້າ, ເພາະວ່າມີຄົນມອບໃຫ້ຂ້າພະເຈົ້າ ແຕ່ມັນມີຮອຍເປື້ອນ ກໍ່ເລີຍໃຊ້ຕໍ່ບໍ່ໄດ້. ເມື່ອໄດ້ຮັບຖົງທີ່ຫຍີບຈາກຜ້່າເກົ່າຜືນນັ້ນ, ຂ້າພະເຈົ້າປະເອີບໃຈທີ່ສຸດ ເພາະວ່າ  ອ໊ຽນ ຍັງຮັກສາໄດ້ລວດລາຍທີ່ຂ້າພະເຈົ້າມັກ ແລະ ຄວາມຊົງຈຳທີ່ຂ້າພະເຈົ້າຢາກເກັບໄວ້. ເຄື່ອງທັງໝົດແມ່ນໄດ້ເຮັດດ້ວຍມືຢ່າງພິຖີພິຖັນ, ເຂົ້າກັບເຄື່ອງນຸ່ງໄດ້ງ່າຍ, ບໍ່ພຽງແຕ່ເໝາະສົມກັບໂສ້ງເສື້ອ Jean ເທົ່ານັ້ນ, ຫາກຍັງໃຊ້ນຳກະໂປ່ງອີກດ້ວຍ”.

ຈາກເຄື່ອງ Jean ເກົ່າ ທີ່ຂາດ ແລະ ຕົກສີ ຫຼື ມີຮອຍເປື້ອນ, ເບິ່ງຄືວ່າມີແຕ່ເອົາໄປຖີ້ມເທົ່ານັ້ນ ແຕ່ຜ່ານສີມືຂອງນາງສາວຄົນນີ້ ພັດກາຍເປັນຜະລິດຕະພັນທີ່ເປັນເອກະລັກສະເພາະ.

ຫາຍອຽນ ແບ່ງປັນຕື່ມອີກວ່າ: ຜ້າ Jean ແມ່ນຜ້າຊະນິດໜຶ່ງທີ່ມີຄວາມທົນທານດີ ສະນັ້ນ ເໝາະສົມກັບການນຳໃຊ້ຄືນເພື່ອເຮັດກະເປົາ. ຍ້ອນມັນມີຄວາມທົນທານດີແນວນັ້ນ ກ່ອນທີ່ຈະຜະລິດຜ້າປະເພດນີ້ອອກມາໄດ້ ກໍບໍ່ແມ່ນງ່າຍດາຍ ແລະ ສິ້ນເປືອງເຄື່ອງຂອງກັບພະລັງງານນຳ້, ໄຟເປັນຈຳນວນຫຼາຍ. ບໍ່ພຽງແຕ່ເທົ່ານັ້ນ, ເວລາມັນເກົ່າ ຫຼື ຫຼ້າສະໄໝ ແລ້ວຖີ້ມມັນໄປ, ການບຳບັດສິ່ງເສດເຫຼືອນີ້ກໍຍາກບໍ່ຕ່າງຫຍັງກັບຢາງພະລາດສະຕິກເສດເຫຼືອ. ພິເສດ, ເມື່ອກະແສແຟຊັນໄວພວມໄດ້ຮັບຄວາມນິຍົມຄືນໃນປັດຈຸບັນ, ການແກ້ໄຂສິ່ງເສດເຫຼືອຈາກຂົງເຂດແຟຊັນ ກໍແມ່ນບັນຫາທີ່ໜ້າວິຕົກກັງວົນ. ເພາະສະນັ້ນ, ນາງສາວຄີງບາງນ້ອຍນີ້ ມີຄວາມປາດຖະໜາຢາກປະກອບສ່ວນໃດສ່ວນໜຶ່ງເຂົ້າໃນພາລະກິດຫຼຸດຜ່ອນສິ່ງເສດເຫຼືອ.

ກະເປົ່າ, ຖົງຫີ້ວ ນາໆຊະນິດທີ່ໄດ້ເຮັດດ້ວຍເຄື່ອງ Jean ເກົ່າ

“ໜຶ່ງໃນບັນດາສາຍເຫດທີ່ປະກອບສ່ວນບໍ່ໜ້ອຍເຂົ້າໃນບັນຫາມົນລະພິດສິ່ງແວດລ້ອມນັ້ນ ແມ່ນ ການລະເບີດຂອງກະແສແຟຊັນໄວ. Meo Tom Handmade ມີຄວາມຮັກມັກໃນການປະດິດຄິດສ້າງ, ເຄື່ອງແຟຊັນ, ເພາະສະນັ້ນ, ພວກຂ້າພະເຈົ້າ ໄດ້ ແລະ ກຳລັງນຳໃຊ້ເຄື່ອງ Jean ເກົ່າຄືນ ແລ້ວເຮັດເປັນຜະລິດຕະພັນໃໝ່ທີ່ມີປະໂຫຍດກວ່າອອກມາ, ແກ່ຍາວເວລານຳໃຊ້ໃຫ້ແກ່ບັນດາຜະລິດຕະພັນເກົ່າ ແທນທີ່ຈະເອົາໄປຖີ້ມ, ກໍ່ມົນລະພິດຕໍ່ສິ່ງແວດລ້ອມ”.

ເພື່ອສາມາດສົ່ງແຫຼ່ງບັນດານໃຈໃຫ້ແກ່ຄົນອື່ນໆມີຄວາມຮັກມັກໃນວຽກງານນຳໃຊ້ຜ້າເກົ່າຄືນໃໝ່ນີ້, ຫາຍອ໊ຽນ ພ້ອມດ້ວຍເພື່ອນຮ່ວມງານ ໄດ້ຈັດກິດຈະກຳແລກປ່ຽນ, ແບ່ງປັນແນວຄວາມຄິດ, ວິທີເຮັດ ຫຼື ໃນໄລຍະເກີດໂລກລະບາດຄືແນວນີ້, ອຽນ ກໍໄດ້ເຮັດຄລິບວິດີໂອ ເພື່ອແນະນຳວິທີການເຮັດກະເປົາດ້ວຍຕົນເອງ ແລະ ມີເພື່ອນໜຸ່ມຫຼາຍຄົນໄດ້ຕອບສະໜອງ, ຕັ້ງໜ້າເຂົ້າຮ່ວມ.

“ທີ່ຈິງແລ້ວ, ນ້ອງໄດ້ນຸ່ງເຄື່ອງ Jean ຕະຫຼອດ, ມັນແມ່ນເຄື່ອງນຸ່ງປະຈຳວັນຂອງນ້ອງຢູ່ແລ້ວ. ຖ້າຫາກວ່ານ້ອງບໍ່ໃຊ້ອີກ, ນ້ອງ ແລະ ແມ່ນ້ອງ ກໍຈະເອົາໄປເປັນແພເຊັດ ໂດຍບໍ່ເຄີຍເອົາໄປເຮັດກະເປົາແບບນີ້ຈັກເທື່ອ. ສະນັ້ນ, ນີ້ແມ່ນການລົງຕົວຈິງທີ່ໃໝ່ອ່ຽມສຳລັບນ້ອງ”.

“ນ້ອງໃຊ້ເວລາປະມານ 2 ຊົ່ວໂມງເພື່ອເຮັດຖົງນີ້ສຳເລັດ. ນ້ອງເຫັນວ່າ ໂສ້ງ Jean ທີ່ເຮົາບໍ່ໄດ້ນຸ່ງແລ້ວ, ເຮົາເອົາໄປເຮັດຖົງ, ເຮັດກະເປົາແບບນີ້ ແມ່ນຄັກຫຼາຍ ເພາະວ່າ ມັນຍັງຊ່ວຍໃຫ້ເຮົາຝຶກຄວາມອົດທົນ ແລະ ຄວາມພິຖີພິຖັນອີກດ້ວຍ”.

ດ້ວຍຄວາມເມົາມົວ, ປະດິດຄິດສ້າງ ແລະ ຄວາມຮັກສິ່ງແວດລ້ອມ, ຫາຍອ໊ຽນ ບໍ່ພຽງແຕ່ເຮັດຜະລິດຕະພັນທີ່ເປັນເອກະລັກສະເພາະອອກມາ ແລະ ປະກອບສ່ວນເຂົ້າໃນການປົກປັກຮັກສາສິ່ງແວດລ້ອມເທົ່ານັ້ນ, ຫາກຍັງສ້າງລາຍຮັບຕົ້ນຕໍໃຫ້ແກ່ຕົນເອງ ແລະ ເພື່ອນຮ່ວມງານ 3 ຄົນອີກດ້ວຍ. ໃນໄລຍະຈະມາເຖິງ, ຫາຍອຽນ ຈະສືບຕໍ່ຂະຫຍາຍຜະລິດຕະພັນຂອງຕົນໃຫ້ຫຼາຍຫຼາຍກວ່າອີກ ເພື່ອໃຫ້ເຄື່ອງໝາຍ Meo Tom Handmade ນັບມື້ນັບຫຍັບໃກ້ເຂົ້າກັບຜູ້ບໍລິໂພກພາຍໃນປະເທດ ແລະ ສາກົນ./.