(vovworld) - ໃນຊຸມມື້ນີ້, ຖ້າມາຢ້ຽມຢາມຫໍພິພິດຕະພັນແມ່ຍິງຫວຽດນາມ, ປະຊາຊົນນະຄອນຫຼວງຮ່າໂນ້ຍ ຈະໄດ້ສຳຜັດກັບປື້ມກວ່າ 5.000 ເລື່ອງ, ລວມ 20.000 ຫົວຂອງໂຮງພິມຈຳໜ່າຍໃຫຍ່ສາມແຫ່ງຄື: ໂຮງພິມຈຳໜ່າຍໄວໜຸ່ມ, ໂຮງພິມຈຳໜ່າຍກິມດົ່ງ ແລະ ໂຮງພິມຈຳໜ່າຍແມ່ຍິງ. ງານບຸນປຶ້ມລະດູໃບໄມ້ຫຼົ່ນປີ 2015 ແມ່ນສະຖານທີ່ເພື່ອໃຫ້ບັນດາຜູ້ນິຍົມປື້ມມາຊອກຫາ ແລະ ອ່ານປື້ມໃນຊຸມວັນທ້າຍສັບປະດາ.
ນັກຮຽນນັກສຶກສາເລືອກຊື້ປື້ມ
(ພາບ: ອິນເຕີແນດ)
ນັບແຕ່ປີ 2013 ມາຮອດປະຈຸບັນ, ງານບຸນປຶ້ມລະດູໃບໄມ້ຫຼົ່ນ, ດ້ວຍການເຂົ້າຮ່ວມຂອງໂຮງພິມຈຳໜ່າຍໄວໜຸ່ມ, ໂຮງພິມຈຳໜ່າຍກິມດົ່ງ ແລະ ໂຮງພິມຈຳໜ່າຍແມ່ຍິງ ໄດ້ກາຍເປັນຈຸດນັດພົບຂອງບັນດາຜູ້ທີ່ເອົາໃຈໃສ່ເຖິງການພັດທະນາຂອງວັດທະນະທຳອ່ານ. ຫົວຂໍ້ຂອງງານບຸນປຶ້ມລະດູໃບໄມ້ຫຼົ່ນປີນີ້ແມ່ນ “ສ້າງຕູ້ປື້ມຄອບຄົວ“, ຜ່ານນັ້ນຄະນະຈັດຕັ້ງຢາກສົ່ງສານ: “ປື້ມໃຫ້ທຸກຄົນ“ ແລະ ມຸ່ງໄປເຖິງການກໍ່ສ້າງ “ຫໍສະໝຸດຄອບຄົວ“, “ຕູ້ປື້ມຄອບຄົວ“. ອະທິບາຍກ່ຽວກັບຫົວຂໍ້ຂອງງານບຸນປຶ້ມລະດູໃບໄມ້ຫຼົ່ນປີນີ້, ທ່ານນາງ ຄຸກທິຮວາເຟື້ອງ, ຮອງຜູ້ອຳນວຍການ, ບັນນາທິການໃຫຍ່ໂຮງພິມຈຳໜ່າຍແມ່ຍິງ, ໃຫ້ຮູ້ວ່າ:
“ພວກຂ້າພະເຈົ້າເຫັນໄດ້ຄວາມຕ້ອງການຂອງຜູ້ອ່ານໃນສັງຄົມນັ້ນແມ່ນມາແຫ່ງນີ້ເພື່ອຊື້ປື້ມມ່ວນ, ທັງເພີ່ມເຕີມໃຫ້ຕູ້ປື້ມຄອບຄົວຂອງຕົນ, ບາງເທື່ອກໍ່ມີຫຼາຍຄົນມາຊື້ປື້ມເພື່ອມອບໃຫ້ລູກ, ຫຼານ, ຍາດຕິພີ່ນ້ອງ, ເພື່ອນມິດຢູ່ເຂດຫ່າງໄກສອກຫຼີກ, ເຂດຍັງປະສົບກັບຄວາມຫຍຸ້ງຍາກ. ຍ້ອນເຫດນັ້ນພວກຂ້າພະເຈົ້າຈຶ່ງເລືອກຫົວຂໍ້ໃຫ້ງານບຸນປຶ້ມລະດູໃບໄມ້ຫຼົ່ນປີນີ້ແມ່ນ ສ້າງຕູ້ປື້ມຄອບຄົວ“.
ປື້ມໃນງານບຸນມີຫຼາຍປະເພດ
ຫົວຂໍ້ຂອງງານບຸນປື້ມມຸ່ງໄປເຖິງການຊ່ວຍຜູ້ອ່ານສ້າງຕູ້ປື້ມຄອບຄົວ, ຫໍສະໝຸດຄອບຄົວ ດ້ວຍສານທີ່ວ່າເລືອກປື້ມໃຫ້ທຸກຄອບຄົວ, ທຸກຄົນ. ບັນດາປື້ມທີ່ງານບຸນນີ້ແມ່ນອຸດົມສົມບຸນກ່ຽວກັບປະເພດ ເພື່ອໃຫ້ຜູ້ອ່ານເລືອກເຟັ້ນເຊັ່ນ: ປື້ມປະຫວັດສາດ, ປື້ມຄົ້ນຄ້ວາວິທະຍາສາດ, ປື້ມເສດຖະກິດ, ປື້ມແນະນຳກ່ຽວກັບການລ້ຽງ ແລະ ສິດສອນເດັກນ້ອຍ, ປື້ມ ວິທະຍາສາດ, ປື້ມສຳລັບເຍົາວະຊົນ… ຄະນະຈັດຕັ້ງຫວັງວ່າ, ຜ່ານງານບຸນປື້ມ, ແຕ່ລະຄອບຄົວຈະສ້າງເປັນລະບົບບັນດາຜະລິດຕະພັນພູມປັນຍາທີ່ເໝາະສົມກັບອາຍຸ, ຄວາມຮັບຮູ້ ແລະ ຄວາມນິຍົມຂອງສະມາຊິກແຕ່ລະຄົນໃນຄອບຄົວ, ຈາກນັ້ນວັດທະນະທຳອ່ານຈະແຜ່ຂະຫຍາຍອອກຢ່າງກວ້າງຂວາງ ແລະ ເລິກເຊິ່ງ, ກະທົບເຖິງວັດທະນະທຳປະຊາຄົມກວ່າອີກ. ເຂົ້າຮ່ວມ ງານບຸນປຶ້ມລະດູໃບໄມ້ຫຼົ່ນປີ 2015, ທ່ານ ຟ້າມເທ໋ຄາງ, ປະທານສະມາຄົມຫໍສະໝຸດຫວຽດນາມ, ຖືວ່າ:
“ຫົວຂໍ້ຂອງ ງານບຸນປຶ້ມລະດູໃບໄມ້ຫຼົ່ນປີນີ້ແມ່ນເໝາະສົມກັບມະຫາຊົນ, ນັ້ນແມ່ນປື້ມໃຫ້ທຸກຄົນ. ວັນບຸນປື້ມໄດ້ປະກອບສ່ວນປຸກລຸກວັດທະນະທຳອ່ານ, ເຊີດຊູຄຸນຄ່າຂອງປື້ມ, ການອຸທິດສ່ວນຂອງບັນດານັກປະພັນ, ນັກກະວີ, ນັກວິທະຍາສາດ ກໍ່ຄືລະດົມກຳລັງໃຈຜູ້ທີ່ພວມປະກອບສ່ວນໂຄສະນາປື້ມ, ນຳປື້ມມາໃຫ້ຜູ້ອ່ານ.“
ຜ່ານການຈັດຕັ້ງ 8 ຄັ້ງ, ງານບຸນປຶ້ມລະດູໃບໄມ້ຫຼົ່ນປີ 2015 ບໍ່ພຽງແຕ່ນຳເອົາບັນດາປື້ມຫົວມ່ວນ ໄດ້ຮັບຄວາມນິຍົມຈາກຜູ້ອ່ານຫຼາຍຄົນເຖິງຊາວນະຄອນຫຼວງຮ່າໂນ້ຍ ເທົ່ານັ້ນ, ຫາກບັນດາໂຮງພິມຈຳໜ່າຍ ຍັງນຳເອົາບັນດາສື່ສິ່ງພິມໃໝ່ສຸດ ມາໃຫ້ງານບຸນອີກດ້ວຍ. ທ່ານ ຫງວຽນຊວນດິ່ງ, ຢູ່ຖະໜົນ ຮ່ວາງຮວາທ໋າມ, ຮ່າໂນ້ຍ, ໃຫ້ຮູ້ວ່າ:
“ຢູ່ທີ່ນີ້ມີປື້ມມ່ວນຫຼາຍຫົວ, ເຊິ່ງຂ້າພະເຈົ້າສາມາດເລືອກຊື້ໃຫ້ຕົນເອງ ແລະ ໃຫ້ລູກເຊັ່ນ: ປື້ມສອນວິທີປະພຶດລະຫວ່າງຄົນກັບຄົນ, ເລື່ອງຍາວ, ເລື່ອງສັ້ນ. ສຳລັບພວກຫຼານ, ຂ້າພະເຈົ້າສາມາດຊື້ປື້ມທີ່ມີລັກສະນະສຶກສາ, ສອນກ່ຽວກັບແບບແຜນດຳລົງຊີວິດວັດທະນະທຳມະນຸດ. ຂ້າພະເຈົ້າເຫັນວ່າການຈັດງານບຸນປື້ມແມ່ນດີຫຼາຍ“.
ມີປື້ມຫຼາຍປະເພດໄດ້ຫຼຸດລາຄາແຕ່ 10-50%
ຢູ່ທີ່ງານບຸນປຶ້ມລະດູໃບໄມ້ຫຼົ່ນປີ 2015, ຜູ້ນິຍົມປື້ມສາມາດຊື້ປື້ມ ດ້ວຍລາຄາພິເສດ, ຫຼຸດລາຄາແຕ່ 30-50%, ມີປື້ມບາງເລື່ອງລາຄາພຽງ 5.000-10.000 ດົ່ງເທົ່ານັ້ນ. ນອກນັ້ນ, ເມື່ອຊື້ປື້ມຜູ້ອ່ານຍັງໄດ້ຮັບຂອງຂວັນຈາກຄະນະຈັດຕັ້ງຕື່ມອີກເຊັ່ນ: ບິກ, ຖົງພາຍ, bookmark ອີກດ້ວຍ. ນ້ອງ ຫງວຽນຮ່ວາງບາວ, ນັກຮຽນມັດທະຍົມຕອນຕົ້ນ ຈຶງເວືອງ, ແບ່ງປັນວ່າ:
“ນ້ອງເລືອກຊື້ປື້ມຂອງໂຮງພິມຈຳໜ່າຍກິມດົ່ງ. ນ້ອງຊີ້ປື້ມວັນນະ ຄະດີຫຼາຍຫົວ, ພິເສດແມ່ນປື້ມເລື່ອງຂອງນັກປະພັນ ຫງວຽນເຍິດແອ໋ງ. ສຳລັບນ້ອງແລ້ວ ປື້ມມີຄວາມສຳຄັນທີ່ສຸດ, ເພາະວາປື້ມຊ່ວຍພວກເຮົາຊອກຮູ້ພູມປັບຍາໄດ້ຫຼາຍ.“
ໃນຂອບເຂດ ງານບຸນປຶ້ມລະດູໃບໄມ້ຫຼົ່ນ ຍັງຈັດງານພົບປະແລກປ່ຽນຫຼາຍຄັ້ງກັບນັກປະພັນ, ແລະການເຈລະຈາກ່ຽວກັບຫົວຂໍ້ “ທັງຄອບຄົວອ່ານປື້ມ - ສ້າງວັດທະນະທຳອ່ານ, ປະຊາຄົມອ່ານຈາກແຕ່ລະຄອບຄົວ“…. ນອກນັ້ນບັນດາໂຮງພິມຈຳໜ່າຍຍັງຈັດຕັ້ງ Minigame ຕະຫຼົກ, Minigame ຕາມຫົວຂໍ້ Halloween… ທີ່ສະຫງວນໃຫ້ຜູ້ມາຊົມ ແລະ ຊື້ປື້ມອີກ. ງານບຸນປຶ້ມລະດູໃບໄມ້ຫຼົ່ນປີ 2015 ດຳເນີນແຕ່ວັນທີ 29/10-02/11 ແມ່ນແຫ່ງທີ່ມີປະໂຫຍດໃຫ້ບັນດາຜູ້ນິຍົມປື້ມ, ນິຍົມອ່ານປື້ມໃນໂອກາດທ້າຍສັບປະດາ.