ໃນຜົນສຳເລັດຂອງກອງປະຊຸມປາຣີ, ທີ່ພາໄປເຖິງການເຊັນສັນຍາປາຣີ ເມື່ອວັນທີ 27/1/1973 ນັ້ນ, ຄຽງຄູ່ກັບສິລະປະການເຈລະຈາຂອງຫວຽດນາມແລ້ວ, ຍັງມີການສະໜັບສະໜູນອັນໃຫ່ຍຫຼວງຂອງປະຊາຊົນຜູ້ຮັກຫອມສັນຕິພາບໃນໂລກອີກດ້ວຍ. ເຊີນທ່ານກັບຄືນສູ່ອະດີດຕະການຜ່ານຄວາມຊົງຈຳຂອງບັນດາຕົວປະຍານ, ເຊິ່ງແມ່ນບັນດາເພື່ອນມິດສາກົນຜ່ານບົດຂຽນທີ່ມີຫົວຂໍ້ວ່າ: ເພື່ອນມິດສາກົນ, ແຫຼ່ງກຳລັງແຮງດ້ານຈິດໃຈຂອງຫວຽດນາມ ໃນການເຈລະຈາສັນຍາປາຣີ.
(ພາບປະກອບ:vi.wikipedia.org)
40 ປີໄດ້ລ່ວງເລີຍໄປແລ້ວ, ແຕ່ທ່ານ Michel Strachinescu ຍັງຄົງຈື່ຈຳບັນດາເລື່ອງລາວ, ອະນຸສອນຂອງທ່ານກັບບັນດາເພື່ອນມິດຫວຽດນາມ ໃນຄະນະຜູ້ແທນແນວໂຮມແຫ່ງຊາດປົດປ່ອຍພາກໃຕ້ຫວຽດນາມ ທີ່ເຄື່ອນໄຫວຢູ່ຝະລັ່ງ ໃນໄລຍະເວລານັ້ນ. ໃນຕະຫຼອດເວລາ 4 ປີເປັນຜູ້ຂັບລົດໃຫ້ຄະນະເຈລະຈາຫວຽດນາມ, ແຕ່ລະມື້, ທ່ານພ້ອມກັບບັນດາສະມາຊິກໃນຄະນະ ໄດ້ຜ່ານຜ່າຄວາມຫຍຸ້ງຍາກ, ແບ່ງປັນແນວຄິດຈິດໃຈນຳກັນ, ທ່ານ Michel Strachinescu ຫວນຄືນວ່າ:
“ວັນທີ 27/1/1973 ແມ່ນວັນທີ່ພວກຂ້າພະເຈົ້າມີຄວາມພາກພູມໃຈຄືກັນກັບບັນດາເພື່ອນສະຫາຍຫວຽດນາມ. ຫວຽດນາມ ແມ່ນປະເທດໜ້ອຍແຕ່ພັດສາມາດບັງຄັບໃຫ້ປະເທດມະຫາອຳນາດອາເມລິກາ ຕ້ອງຍອມຈຳນົນ. ສຳຫຼັບຂ້າພະເຈົ້າແລ້ວ, ປະທານໂຮ່ຈິມິນ ແມ່ນແສງສະຫວ່າງໃຫ້ແກ່ປະຊາຊົນໃນທົ່ວໂລກ. ໃນເວລາ 40 ປີກ່ອນ, ພວກຂ້າພະເຈົ້າໄດ້ຮ້ອງໂຮ ແລະ ພ້ອມກັນຈັດງານລ້ຽງຊົມເຊີຍໄຊຊະນະພ້ອມກັບພວກເພື່ອນ”
(ພາບປະກອບ:hanoimoi.com.vn)
ໜຶ່ງໃນບັນດາສິ່ງພິເສດສະເພາະ ແລະ ແມ່ນຄວາມງາມແຫ່ງນ້ຳໃຈມິດຕະພາບຂອງຂະບວນການປະຊາຊົນໂລກສາມັກຄີກັນ, ສະໜັບ ສະໜູນຫວຽດນາມ ແມ່ນການເຕົ້າໂຮມບັນດາກຳລັງການເມືອງ ແລະ ມະຫາຊົນບັນດາປະເທດເອີລົບ ເວົ້າສະເພາະ ແລະ ໂລກເວົ້າລວມຢ່າງກ້ວາງຂວາງ ແລະ ມີຫຼາຍຮູບຫຼາຍແບບ. ນອກຈາກນັ້ນແລ້ວ, ໃນວິວັດການເຈລະຈາສັນຍາປາຣີ, ການສະໜັບສະໜູນຂອງວົງການນັກຂ່າວສາກົນກໍ່ໄດ້ປະກອບສ່ວນບໍ່ແມ່ນໜ້ອຍເຂົ້າໃນຂະບວນການຄັດຄ້ານສົງຄາມຢູ່ຫວຽດນາມ ໃນທົ່ວໂລກ. ທ່ານນາງ Madeleine Riffaud ນັກຂ່າວສາກົນທີ່ໄດ້ຖ່າຍທຳຟິມເອກະສານທີ່ມີຄ່າໃນຊຸມວັນອາເມລິກາ ນຳໃຊ້ເຮືອບິນ B52 ມາຖິ້ມລະເບີດລົງຮ່າໂນ້ຍ ແລະ ຫາຍຟ່ອງ ເມື່ອປີ 1972 ອັນໄດ້ຊ່ວຍກ່າວປະນາມການຕໍ່ສູ້ບໍ່ເປັນທຳຂອງອາເມລິກາ ແລະ ຊ່ວຍຫວຽດນາມ ສະແຫວງຫາການສະໜັບສະໜູນຈາກຫາງສຽງໂລກກໍ່ຄືມີທ່າໄດ້ປຽບໃນການເຈລະຈາສັນຍາປາຣີ ຕື່ມອີກ. ທ່ານນາງ Madeleine Riffaud ໃຫ້ຮູ້ວ່າ:
“ນີ້ແມ່ນເຫດການໃຫ່ຍໃນຊີວິດຂອງຂ້າພະເຈົ້າ. ຂ້າພະເຈົ້າແມ່ນນັກຂ່າວຕ່າງປະເທດຄົນດຽວທີ່ໄດ້ຮ່ວມດຳລົງຊີວິດພ້ອມກັບທະຫານ ແລະ ປະຊາຊົນຫວຽດນາມ. ຫຼັງຈາກນັ້ນຂ້າພະເຈົ້າໄດ້ກັບຄືນປາຣີ ແລະ ສາຍຟິມເອກະສານຂອງຕົນທາງພາຫະນະສື່ມວນຊົນໂລກ. ຟິມເອກະສານດັ່ງກ່າວສະແດງໃຫ້ເຫັນວ່າ ເຖິງວ່າປະສົບກັບຄວາມທຸກຍາກລຳບາກແນວໃດກໍ່ຕາມ ແຕ່ຊາວຫວຽດນາມ ກໍ່ບໍ່ຍອມຈຳນົນ, ຍັງຄົງຕໍ່ສູ້ຈົນເຖິງເວລາໄດ້ຮັບເອກະລາດ”
ສັນຍາປາຣີ ກໍ່ແມ່ນເລື່ອງລາວອັນມະຫັດສະຈັນກ່ຽວກັບວິວັດການຊອກຫາສັນຕິພາບຄືນໃໝ່, ນີ້ກໍ່ແມ່ນສາຍເຫດເພື່ອໃຫ້ຜູ້ຖ່າຍທຳຮູບເງົາຊາວຝະລັ່ງ Daniel Roussel ຜະລິດຮູບເງົາເອກະສານ “ສັນຍາປາຣີ“. ນັກຖ່າຍທຳຮູບເງົາ Daniel Roussel ແບ່ງປັນວ່າ:
“ຂ້າພະເຈົ້າຢາກຊີ້ໃຫ້ເຫັນວ່າ: ຄວາມມຸ້ງຫວັງສັນຕິພາບໄດ້ຮັບໄຊຊະນະຄືແນວໃດ. ສັນຍາປາຣີ ທີ່ລົງນາມເມື່ອວັນທີ 27/1/1973 ແມ່ນເລື່ອງລາວອັນມະຫັດສະຈັນ, ແມ່ນໝາກຜົນແຫ່ງວິວັດການເຈລະຈາລະຫວ່າງ 4 ຝ່າຍໃນຕະຫຼອດໄລຍະເວລາເກືອບ 5 ປີ. ໃນຈຸດເວລານັ້ນ, ບັນດາເພື່ອນມິດຊາວຝະລັ່ງ, ຜູ້ຮັບໃຊ້ຄະນະ, ຜູ້ຂັບລົດ, ຜູ້ປ້ອງກັນ, ໜ່ວຍການແພດ… ນັບຮ້ອຍໆຄົນ ໄດ້ຊ່ວຍເຫຼືອຄະນະຜູ້ແທນຫວຽດນາມ ຄືດັ່ງໃນຄອບຄົວດຽວກັນຢ່າງແທ້ຈິງ”.
ການຕໍ່ສູ້ຍາດເອົາເອະລາດຂອງປະຊາຊົນຫວຽດນາມ ໃນໄລຍະນີ້ ໄດ້ກາຍເປັນສຽງເວົ້າທີ່ເປັນທຳ, ເພື່ອມະໂນທຳ, ຄຸນນະທາດຂອງມະນຸດ, ມີຄຸນຄ່າໃນການປຸກລຸກມວນມະນຸດຜູ້ກ້າວໜ້າ. ຍ້ອນເຫດນັ້ນ, ບໍ່ມີແຫ່ງໃດ ແລະ ບໍ່ມີໄລຍະເວລາໃດໃນປະຫວັດສາດໂລກ, ຂະບວນການສາມັກຄີສາກົນເພື່ອປະເທດໜຶ່ງ ພັດມີກຳລັງແຮງຄືແນວນັ້ນ. ສຳລັບຫວຽດນາມ ແລ້ວ, ຍາມໃດ, ການສະໜັບສະໜູນຂອງບັນດາເພື່ອນມິດສາກົນກໍ່ແມ່ນແຫຼ່ງລະດົມກຳລັງໃຈທີ່ມີຄ່າໃນການຕໍ່ສູ້ຍາດເອົາເອກະລາດແຫ່ງຊາດ, ທ້ອນໂຮມປະເທດຊາດເປັນເອກະພາບ.