ສຸກສາລາຢູ່ເທດສະບານເມືອງເຈືອງຊາ, ເມືອງເກາະເຈືອງຊາ, ແຂວງແຄ້ງຮ່ວາ, ບໍ່ພຽງແຕ່ເປັນບ່ອນເບິ່ງແຍງ ຮັກສາສຸຂະພາບໃຫ້ແກ່ພະນັກງານ, ນັກຮົບ ແລະ ປະຊາຊົນໃນເກາະເທົ່ານັ້ນ, ຫາກຍັງເປັນທີ່ຮູ້ຈັກທີ່ດີຂອງຊາວປະມົງທີ່ພວມຫາປາຢູ່ເຂດຫາປາເຈືອງຊາເມື່ອຖືກເຈັບເປັນອີກດ້ວຍ.
ແຕ່ລະປີ, ສຸກສາລາໄດ້ຮັບປິ່ນປົວໃຫ້ຊາວປະມົງນັບຮ້ອຍເທື່ອຄົນ ເມື່ອປະສົບເຄາະຮ້າຍຢູ່ກາງທະເລ |
ສຸກສາລາຢູ່ເກາະເຈືອງຊາໄດ້ຮັບການກໍ່ສ້າງຢ່າງໃຫຍ່ໂຕໂອຖົງ ແລະ ໄດ້ຮັບການລົງທຶນທາງດ້ານພື້ນຖານວັດຖຸ, ພາຫະນະອຸປະກອນການແພດ. ນອກຈາກຫ້ອງນອນຄົນເຈັບ 3 ຫ້ອງແລ້ວ, ສຸກສາລາກໍຍັງມີຫ້ອງຜ່າຕັດພ້ອມກັບບັນດາພາຫະນະເຄື່ອງຈັກບົ່ງມະຕິພະຍາດ ແລະ ປິ່ນປົວທີ່ທັນສະໄໝ. ທິມງານແພດໝໍທີ່ພວມປະຕິບັດງານຢູ່ເທດສະບານເມືອງເຈື່ອງຊາ ແມ່ນຂຶ້ນກັບໂຮງໝໍເສນາລັກ 175, ເຂົາເຈົ້າສ່ວນຫຼາຍແມ່ນຄົນໜຸ່ມ ແລະ ລ້ວນແຕ່ເປັນກຳລັງຕະລຸມບອນໄປຮັບໜ້າທີ່ວຽກງານໃນເກາະ.
ບັນດາແພດໝໍໃນສຸກສາລາໃຫ້ຮູ້ວ່າ ວຽກງານຢູ່ເກາະເຈືອງຊາແມ່ນຫຼວງຫຼາຍ ແລະ ມີຫຼາຍຮູບຫຼາຍແບບເມື່ອທຽບໃສ່ຢູ່ດິນຕໍ່ແຜ່ນ ເພາະຕ້ອງປິ່ນປົວຫຼາຍພະຍາດທີ່ແຕກຕ່າງກັນພ້ອມກັບກໍລະນີຮັບບາດເຈັບ. ດັ່ງນັ້ນ, ບັນດາແພດໝໍໃນສຸກສາລາຕ້ອງຄົ້ນຄ້ວາເອງຜ່ານປຶ້ມແພດສາດ, ເອກະສານຕ່າງໆຈຶ່ງສາມາດຕອບສະໜອງໄດ້ຄວາມຮຽກຮ້ອງຕ້ອງການຂອງວຽກງານ. ເພື່ອພົບພໍ້ກັບກໍລະນີຄົນເຈັບຕິດພະຍາດທີ່ປົວຍາກນັ້ນ, ບັນດາແພດໝໍກໍຕ້ອງເພີ່ງຄວາມຊ່ວຍເຫຼືອຈາກດິນຕໍ່ແຜ່ນໂດຍຜ່ານການຮັບຄຳແນະນຳ, ໃຫ້ຄຳປຶກສາຜ່ານເຄືອຂ່າຍໂທລະສັບ, ຫຼືຖ່າຍຮູບລັງສີແລ້ວ ສົ່ງຜ່ານທາງອີແມວເພື່ອໃຫ້ບັນດາສາດສະດາຈານ, ທ່ານໝໍຢູ່ ໂຮງໝໍເສນາລັກ 175 ກວດ,ວິນິດໄສ ແລະ ບົ່ງມະຕິ. ປະຈຸບັນ, ສຸກສາລາຢູ່ເທດສະບານເມືອງເຈື່ອງຊາໄດ້ມີລະບົບແຜ່ພາບຜ່ານລະບົບອິນເຕີເນັດເພື່ອໃຫ້ແພດໝໍຢູ່ດິນຕໍ່ແຜ່ນສາມາດໃຫ້ຄຳແນະນຳ, ທີ່ປຶກສາ, ວິນິດໄສກໍຄືໃຫ້ການແນະນຳກ່ຽວກັບກໍລະນີຜ່າຕັດທີ່ປະສົບກັບຄວາມຫຍຸ້ງຍາກ. ທ່ານບຸຍດິງເຢືອງ ການນຳຄະນະກຳມະການປະຊາຊົນເມືອງເຈືອງຊາໃຫ້ຮູ້ວ່າ :
“ ລະບົບເສນາລັກຢູ່ ເກາະເຈືອງຊາແມ່ນຢູ່ຫ່າງໄກຈາກດິນຕໍ່ແຜ່ນ. ເລື່ອງຊາວປະມົງເດີນທະເລໄປຈັບຫາປາເຄີຍເກີດອາການເຈັບເປັນຜິດປົກກະຕິນັ້ນ, ກໍຕ້ອງໄດ້ຮັບການປິນປົວພະຍາບານສຸກເສີນ, ຫຼັງຈາກນັ້ນ ກໍສົ່ງເຖິງໂຮງໝໍຂັ້ນເທິງ. ເພາະສະນັ້ນ, ຖັນແຖວແພດໝໍໃນສຸກສາລາຕ່າງກໍແມ່ນພະນັກງານທີ່ຊຳນານງານ, ມີບົດຮຽນ, ມີແພດໝໍຫຼາຍຄົນໄດ້ໄປປະຕິບັດງານຢູ່ ເກາະເຈືອງຊາຫຼາຍຄັ້ງແລ້ວ. ຢູ່ສຸກສາລາໃນເກາະເຈືອງຊາ ມີຢຸກຢາປົວພະຍາດທີ່ຮັບປະກັນຄຸນນະພາບ, ກຽມພ້ອມປິ່ນປົວໃຫ້ແກ່ຊາວປະມົງ, ກອງທັບ ແລະ ປະຊາຊົນໃນເກາະ ”
ສະແດງຄວາມພາກພູມໃຈພາຍຫຼັງທຳການຜ່າຕັດເປັນເວລາ 2 ຊົ່ວໂມງໃຫ້ຄົນເຈັບຊາວປະມົງແຂວງກວາງບິງຍ້ອນຖືກອັກເສບໄສ້ຮຸນແຮງເມື່ອພວມຫາປາຢູ່ເຂດຫາປາເຈືອງຊາ, ທ່ານໝໍ ທ້າຍງອກບິງ ໃຫ້ຮູ້ວ່າ ການຜ່າຕັດໄດ້ຮັບຜົນດີ, ສຸຂະພາບຂອງຄົນເຈັບໄດ້ຄ່ອຍກັບຄືນສູ່ປົກກະຕິ. ທ່ານໝໍ ທ້າຍງອກບິງ ເວົ້າວ່າ :
“ ພາຍຫຼັງກວດພະຍາດ, ພວກຂ້າພະເຈົ້າໄດ້ປຶກສາກັບແພດໝໍຢູ່ດິນຕໍ່ແຜ່ນ ແລ້ວກໍຕົກລົງທຳການຜ່າຕັດໃຫ້ຄົນເຈັບໃນຄ່ຳຄືນໂດຍທັນທີ່. ນີ້ແມ່ນກໍລະນີຜ່າຕັດທີ່ສັບສົນຊຶ່ງແກ່ຍາວເປັນເວລາ 2 ຊົ່ວໂມງ. ປະຈຸບັນ, ສຸຂະພາບຂອງຄົນເຈັບໄດ້ຄ່ອຍກັບຄືນສູ່ປົກກະຕິ, ແລະ ສາມາດເຮັດວຽກໃນ 2-3 ມື້ຂ້າງໜ້າ ”
ທ່ານໝໍ ທ້າຍງອກບິງ ໃຫ້ຮູ້ວ່າເຖິງວ່າພາຫະນະອຸປະກອນການແພດຢູ່ສຸກສາລາຢູ່ເທດສະບານເມືອງເຈືອງຊາບໍ່ທັນສະໄໝຄືກັບບັນດາໂຮງໝໍຢູ່ດິນຕໍ່ແຜ່ນກໍຕາມ, ແຕ່ບັນດາແພດໝໍໃນສຸກສາລາຍາມໃດກໍມານະພະຍາຍາມຜ່ານຜ່າຄວາມຫຍຸ້ງຍາກເພື່ອຕອບສະໜອງຄວາມຮຽກຮ້ອງຕ້ອງການຂອງວຽກງານກວດ ແລະ ປິ່ນປົວພະຍາດໃຫ້ແກ່ພະນັກງານ, ນັກຮົບ ແລະ ປະຊາຊົນໃນເກາະ. ຕາມທ່ານໝໍ ທ້າຍງອກບິງແລ້ວ, ບັນດາກໍລະນີຮັບບາດເຈັບໃນທ້ອງ, ອັກເສບໄສ້ຕີງ, ບາດເຈັບໜ້າເອິກ, ກະດູກຫັກ, ອັກເສບລະບົບທາງເດີນອັດສະວະ…ກໍລ້ວນແຕ່ໄດ້ຮັບການປິນປົວຢ່າງສຳເລັດຜົນ. ທ່ານໝໍທ້າຍງອກບິງເວົ້າຕໍ່ໄປວ່າ:
“ ປີກາຍນີ້, ທາງສຸກສາລາໄດ້ປິນປົວໃຫ້ກວ່າ 2600 ກໍລະນີຄົນເຈັບ, ໃນນັ້ນ ມີ 600 ກໍລະນີສຸກເສີນ. ບັນດາກໍລະນີສຸກເສີນ, ກໍລ້ວນແຕ່ໄດ້ຮັບແກ້ໄຂຢ່າງສຳເລັດຜົນ, ອັນໄດ້ນຳຄວາມເຊື່ອໝັ້ນມາສູ່ພະນັກງານ, ນັກຮົບ ແລະ ປະຊາຊົນໃນເກາະເພື່ອມີຄວາມໝັ້ນໃຈປະຕິບັດໜ້າທີ່ ກໍຄືປະກອບອາຊີບຫາປາຢູ່ທະເລ ”
ທ່ານ ຫງວຽນວັນຕ້ວນ ການນຳເທດສະບານເມືອງເຈື່ອງຊາໃຫ້ຮູ້ວ່າ : ແຕ່ລະປີ, ສຸກສາລາໄດ້ຮັບປິ່ນປົວໃຫ້ຊາວປະມົງນັບຮ້ອຍເທື່ອຄົນ ເມື່ອປະສົບເຄາະຮ້າຍຢູ່ກາງທະເລ, ເປັນຕົ້ນແມ່ນບັນດາກໍລະນີຕ້ອງໄດ້ຮັບການປິ່ນປົວສຸກເສີນຢ່າງທັນການ. ທ່ານ ຫງວຽນວັນຕ້ວນ ການນຳເທດສະບານເມືອງເຈື່ອງຊາເວົ້າວ່າ:
“ ສຳລັບບັນດາກໍລະນີຊາວປະມົງພວມເດີນທະເລຖືກເຈັບເປັນ, ຕ້ອງການປິ່ນປົວໃນທັນທີ່ນັ້ນ, ສຸກສາລາຢູ່ເກາະເຈືອງຊາໄດ້ກາຍເປັນທີ່ຮູ້ຈັກໄວ້ເນື້ອເຊື່ອໃຈຂອງພໍ່ແມ່ພີນ້ອງຊາວປະມົງ ”
ດ້ວຍໜ້າທີ່ກອບກູ້ເອົາຊີວິດຂອງຄົນເຈັບ, ບັນດາແພດໝໍໃນສຸກສາລາຍາມໃດກໍມານະພະຍາຍາມຜ່ານຜ່າຄວາມຫຍຸ້ງຍາກເພື່ອຕອບສະໜອງຄວາມຮຽກຮ້ອງຕ້ອງການຂອງວຽກງານກວດ ແລະ ປິ່ນປົວພະຍາດໃຫ້ແກ່ພະນັກງານ, ນັກຮົບ ແລະ ປະຊາຊົນໃນເກາະ. ສຳລັບເຂົາເຈົ້າແລ້ວ, ນີ້ແມ່ນຄວາມມ່ວນຊື່ນ, ແມ່ນຄວາມຜາສຸກເມື່ອໄດ້ນຳຄວາມເຊື່ອໝັ້ນມາສູ່ພະນັກງານ, ນັກຮົບ ແລະ ປະຊາຊົນໃນເກາະເພື່ອມີຄວາມໝັ້ນໃຈປະຕິບັດໜ້າທີ່ ກໍຄືປະກອບອາຊີບຫາປາຢູ່ທະເລ.