(vovworld) - ຕາມກົມລົງທຶນຕ່າງປະເທດ ສັງກັດກະຊວງແຜນການ ແລະ ການລົງທຶນຫວຽດນາມແລ້ວ, ຍ້ອນຖືກຜົນສະທ້ອນຈາກສະພາບ ເສດຖະກິດໂລກ, ສະນັ້ນການດຶງດູດເງິນລົງທຶນໂດຍກົງຂອງຕ່າງປະເທດ (FDI) ເຂົ້າຫວຽດນາມໃນເດືອນ 1/2012 ບັນລຸພຽງ 37,5 ລ້ານ USD. ເຖິງຢ່າງໃດກໍຕາມ, ຕາມບັນດາຜູ້ຊ່ຽວຊານເສດຖະກິດແລ້ວ, ຕົວເລກດັ່ງກ່າວຍັງບໍ່ທັນຕີລາຄາຢ່າງຖືກຕ້ອງກັບຄວາມຈິງ ແລະ ກໍບໍ່ຄວນເປັນຫ່ວງເປັນໄຍ. ບັນຫາທີ່ຄວນເອົາໃຈໃສ່ໃນພາຍພາກຫນ້າກໍຄືຍາວນານນັ້ນແມ່ນ ເຮັດແນວໃດຍົກສູງປະສິດທິຜົນແຫລ່ງທຶນ FDI ໃນຍຸດທະສາດສັງລວມແຫ່ງການພັດທະນາເສດຖະກິດຂອງປະເທດຊາດ.
ກະຊວງແຜນການ ແລະ ການລົງທຶນຫວຽດນາມໃຫ້ຮູ້ວ່າ: ປີ 2011 ເງິນລົງທຶນໂດຍກົງຂອງຕ່າງປະເທດ (FDI) ເຂົ້າຫວຽດນາມບັນລຸພຽງ 14,7 ຕື້ USD ເມື່ອທຽບໃສ່ຄາດໝາຍທີ່ໄດ້ວາງອອກແມ່ນ 20 ຕື້ USD. ຕາມບັນດາຜູ້ຊ່ຽວຊານເສດຖະກິດແລ້ວ, ສາຍເຫດທີ່ພາໃຫ້ແຫລ່ງທຶນ FDI ຖືກຫລຸດລົງນັ້ນ ສ່ວນຫນຶ່ງແມ່ນຍ້ອນຜົນສະທ້ອນຈາກການຊຸດໂຊມຂອງເສດຖະກິດໂລກ ແຕ່ສິ່ງສຳຄັນກວ່ານັ້ນແມ່ນ ຫວຽດນາມມີຄວາມເອົາໃຈໃສ່ເປັນພິເສດເຖິງຄຸນນະພາບການລົງທຶນ. ບັນດາໂຄງການແບບຈອມປອມ, ຜັນຂະຫຍາຍຢ່າງຊັກຊ້າ ດ້ວຍຈຳນວນທຶນຈົດທະບຽນຂຶ້ນເຖິງນັບຕື້ໆ USD ຖືກຫລຸດລົງຫລາຍ. ປິ 2011, ມີພຽງແຕ່ 2 ໂຄງການ ດ້ວຍທຶນຈົດທະບຽນຂຶ້ນເຖິງກວ່າ 1 ຕື້ USD. ຕາມບັນດາຜູ້ຊ່ຽວຊານເສດຖະກິດແລ້ວ, ໃນສະພາບປະຈຸບັນ ບໍ່ຄວນເອົາໃຈໃສ່ເປັນພິເສດເຖິງຈຳນວນທຶນຈົດທະບຽນ ຫາກຄວນເອົາໃຈໃສ່ເຖິງການປ່ອຍທຶນ. ສາດສະດາຈານ ຫງວຽນມ້າຍ, ປະທານສະຫະສະມາຄົມວິສາຫະກິດລົງທຶນຂອງຕ່າງປະເທດຖືວ່າ: ການຫລຸດລົງທີ່ຜິດປົກກະຕິກ່ຽວກັບປະລິມານ ແລະ ແຫລ່ງທຶນ FDI ໃນໄລຍະມໍ່ໆມານີ້ ມັນບໍ່ສ່ອງແສງຢ່າງຖືກຕ້ອງກັບຄວາມຈິງ ແລະ ບໍ່ຄວນເປັນຫວ່ງເປັນໄຍ, ເພາະວ່າ ໃນຈຳນວນທຶນກວ່າ 100 ຕື້ USD ທີ່ບໍ່ທັນປະຕິບັດນັ້ນ ສາມາດປ່ອຍທຶນໄດ້ປະມານ 50 ຕື້ USD. ຖ້າຫາກບໍ່ເພີ່ມທຶນຈົດທະບຽນໃຫມ່ ກໍຕ້ອງເສຍເວລາແຕ່ 4 - 5 ປີອີກຈຶ່ງສາມາດປະຕິບັດຈຳນວນທຶນທີ່ຍັງເຫລືອໃຫ້ໝົດໄດ້. ສາດສະດາຈານ ຫງວຽນມ້າຍ ໄດ້ໃຫ້ຂໍ້ສັງເກດວ່າ:
“ຈຳນວນທຶນຈົດທະບຽນບໍ່ແມ່ນສິ່ງທີ່ສຳຄັນ. ພວກເຮົາຄວນເອົາໃຈໃສ່ເຖິງການລົງທຶນໄລຍະຍາວເຂົ້າຂົງເຂດໃດ ປະສິດທິຜົນຄືແນວໃດ ເໝາະສົມກັບຈຸດໝາຍຂອງປະເທດພວກເຮົາແມ່ນພວມສຸມໃສ່ຂົງເຂດເຕັກໂນໂລຊີສູງ, ການສຶກສາ, ສາທາລະນະສຸກ ແລະ ບັນດາຂະແຫນງປະຢັດພະລັງງານ, ບໍ່ສ່ົງຜົນສະທ້ອນເຖິງສິ່ງແວດລ້ອມ. ປະຈຸບັນ ທາງກະຊວງແຜນການ ແລະ ການລົງທຶນ ພວມກຳນົດທິດນະໂຍບາຍການລົງທຶນໃຫມ່, ຖືຄຸນນະພາບປະສິດທິຜົນ ແລະ ການພັດທະນາແບບຍືນຍົງເປັນພື້ນຖານພິຈາລະນາບັນດາໂຄງການລົງທຶນ. ຈາກການກຳນົດທິດໃຫມ່ນີ້ ພວກເຮົາຈະຕ້ອງປ່ຽນແປງພື້ນຖານນະໂຍບາຍທີ່ມີຕໍ່ໂຄງການລົງທຶນ. ”
ໄລຍະ 2005 - 2010, ຫວຽດນາມ ດຶງດູດເງິນລົງທຶນໂດຍກົງຂອງຕ່າງປະເທດຈົດທະບຽນ 155 ຕື້ USD, ແຕ່ຈຳນວນທຶນປະຕິບັດບັນລຸພຽງ 47 ຕື້ USD(ປະມານ 31%). ສິ່ງດັ່ງກ່າວສະແດງໃຫ້ເຫັນວ່າ ຍັງມີຂໍ້ຂາດຕົກບົກຜ່ອງໃນການຄຸ້ມຄອງກໍຄືໃນການກວດກາໂຄງການ. ໃນໄລຍະຜ່ານມາ, ມີທ້ອງຖິ່ນຫລາຍແຫ່ງ ຍ້ອນຢາກບັນລຸຜົນງານ ສະນັ້ນ ການອອກຫນັງສືອະນຸຍາດລົງທຶນບໍ່ເຂັ້ມງວດປານໃດ. ດອກເຕີ ຟ້າມຮູ່ງຕຽນ, ຮອງຜູ້ອຳນວຍການສູນຄົ້ນຄ້ວາການລົງທຶນຕ່າງປະເທດ ສັງກັດມະຫາວິທະຍາໄລເສດຖະກິດ -ມະຫາວິທະຍາໄລແຫ່ງຊາດຮ່າໂນ້ຍ ຖືວ່າ:
“ໃນວິວັດທະນາການວາງແຜນກຳນົດ, ກວດກາເພື່ອອອກຫນັງສືອະນຸຍາດການລົງທຶນ, ພວກເຮົາຍັງມີວຽກງານຫລາຍຢ່າງສາມາດປະຕິບັດດີກ່ວາ ຈາກຂອດການປະກາດ, ຮຽກຮ້ອງໂຄງການລົງທຶນຕະຫລອດຮອດການກວດກາກ່ຽວກັບລັກສະນະປະສິດທິຜົນຂອງໂຄງການລົງທຶນ. ແລະ ເລື່ອງຄຸ້ມຄອງພາຍຫລັງອອກຫນັງສືອະນຸຍາດການລົງທຶນ ພວກເຮົາສາມາດປະຕິບັດດີກວ່າ. ຢູ່ ຫວຽດນາມ ອັດຕາສ່ວນປ່ອຍເງິນມີການເຫນັງຕີງ ແຕ່ 25 - 30% ກໍບໍ່ຄວນກັງວົນ, ສິ່ງສຳຄັນແມ່ນປ່ອຍເງິນໃນຂົງເຂດໃດ, ມັນມີການກະທົບ ເຖິງພື້ນຖານ ເສດຖະກິດສັງຄົມຄືແນວໃດ.”
ອາດຈະເຫັນໄດ້ຜົນປະໂຫຍດໃນການດຶງດູດທຶນ FDI, ນັ້ນແມ່ນນອກຈາກການປະກອບບັນດາແຫລ່ງພາສີອາກອນໃຫ້ແກ່ງົບປະມານແລ້ວ, ບັນດາໂຄງການ FDI ຍັງປະກອບສ່ວນແກ້ໄຂວຽກເຮັດງານທຳ, ຊ່ວຍໃຫ້ຂະແຫນງອຸດສາຫະກຳ, ກະສິກຳຖ່າຍທອດເຕັກໂນໂລຊີທັນສະໄໝໄດ້. ແຕ່ໃນຄວາມຈິງ, ປະສິດທິຜົນບັນດາໂຄງການ, FDI ບໍ່ແມ່ນເວລາໃດກໍໄດ້ຮັບຜົນຄືດັ່ງຄວາມປາດຖະຫນາ. ຕົວຢ່າງຄື: ຢູ່ແຂວງ ເລີມດົງ ມີ 108 ໂຄງການ FDI ໃນນັ້ນ ມີ 68 ໂຄງການລົງທຶນເຂົ້າຂົງເຂດກະສິກຳ, ຊຶ່ງແມ່ນຂົງເຂດທີ່ໄດ້ຮັບການສົ່ງເສີມຫລາຍກວ່າໝູ່ ແຕ່ຕາມການຕີລາຄາລວມຂອງບັນດາໂຄງການ FDI ຢູ່ທີ່ນີ້ ສ່ວນຫລາຍພຽງດຶງດູດແຮງງານທຳມະດາ ຫາກບໍ່ທັນມີການຖ່າຍທອດເຕັກໂນໂລຊີໃຫມ່, ສະນັ້ນ ຊາວກະສິກອນຢູ່ໃນບໍລິເວນແຂວງ ບໍ່ໄດ້ຮັບຜົນປະໂຫຍດຈາກໂຄງການ. ບັນຫາທີ່ວາງອອກ ບໍ່ພຽງແຕ່ສຳລັບແຂວງ ເລີມດົ່ງເທົ່ານັ້ນ ຫາກຍັງຢູ່ຫລາຍທ້ອງຖິ່ນອື່ນ, ເຮັດແນວໃດເພື່ອຍົກສູງປະສິດທິຜົນຂອງບັນດາໂຄງການ FDI. ທ່ານ ຟານວັນຢູງ ຮອງຫົວຫນ້າພະແນກແຜນການ ແລະ ການລົງທຶນແຂວງ ເລີມດົງ ຖືວ່າ:
“ນອກຈາກບັນດານັກລົງທຶນສ້າງລາຍຮັບທາງເສດຖະກິດຫຼາຍແລ້ວ, ຄວນມີການປະກອບສ່ວນເຂົ້າໃນການຖ່າຍທອດເຕັກໂນໂລຊີ, ບົດຮຽນການຜະລິດໃຫ້ແກ່ຊາວກະສິກອນຢູ່ທ້ອງຖິ່ນ.”
ເຂດອຸດສາຫະກຳແຫ່ງຫນ່ຶງ(ພາບປະກອບ :ຈາກ Internet)
ທ່ານ ໂດເຍີດຮ່ວາງ ຫົວຫນ້າກົມລົງທຶນຕ່າງປະເທດ ສັງກັດກະຊວງແຜນການ ແລະ ການລົງທຶນໃຫ້ຮູ້ວ່າ: ປີ 2012 ການຄຸ້ມຄອງກະແສເງິນລົງທຶນ FDI ຈະສຸມໃສ່ການຍົກສູງຄຸນນະພາບການລົງທຶນ. ທ່ານກ່າວວ່າ:
“ນະໂຍບາຍການລົງທຶນຕ່າງປະເທດໃນໄລຍະຈະມາເຖິງ ຕ້ອງຫັນປ່ຽນຕາມທິດຖືໂຄງປະກອບຄຸນນະພາບການລົງທຶນ, ພັດທະນາແບບຍືນຍົງ, ບຸລິມະສິດການພັດທະນາບັນດາຂະແຫນງອຸດສາຫະກຳສະອາດ,ການນຳໃຊ້ບັນດາຊັບພະຍາກອນ
ທຳມະຊາດ, ພະລັງງານ ປະຢັດ ແລະ ມີປະສິດທິຜົນ, ລົງທຶນຂະແຫນງອຸດສາຫະກຳສຳຮອງ. ໄປຄຽງຄູ່ກັບການດຶງດູດທຶນ FDI ພວກເຮົາຕ້ອງຕິດຕາມ ກວດກາຢ່າງແຫນ້ນແຟ້ນ.”
ປີ 2012, ຫວຽດນາມ ຄາດວ່າ ຈະດຶງດູດທຶນ FDI ປະມານ 15 - 16 ຕຶ້ USD . ຄຽງຂ້າງນະໂຍບາຍຊຸກຍູ້ການປ່ອຍເງິນຢ່າງມີປະສິດທິຜົນ, ບຸລິມະສິດ, ມີການຄັດເລືອກບັນດາໂຄງການທີ່ມີເຕັກໂນໂລຊີທັນສະໄໝ, ບໍ່ສົ່ງຜົນສະທ້ອນເຖິງສິ່ງແວດລ້ອມ ແລະ ດຶງດູດນັກລົງທຶນຈາກບັນດາຕະຫລາດໃຫມ່, ລັດຖະບານຫວຽດນາມ ຕ້ອງວາງຈຸດສຸມເຂົ້າໃນການຍົກສູງຄຸນນະພາບ, ປະສິດທິຜົນບັນດາໂຄງການ FDI ໃຫ້ສອດຄ່ອງກັບຍຸດທະສາດພັດທະນາຂອງພື້ນຖານເສດຖະກິດແຫ່ງຊາດ.
ໂຕຕວນ