(vovworld)- ສັນຍາຄູ່ຮ່ວມມືຂ້າມປີຊີຟີກ (TPP) ຊື່ງຫວຽດນາມ ເປັນສະມາຊິກ ຫາກຳສຳເລັດການເຈລະຈາຢ່າງເປັນທາງການໃນວັນທີ 5/10/2015. ຍາດແຍ່ງກາລະໂອກາດດີ ຊື່ງ TPP ນຳມາໃຫ້, ຄາດຄະເນ ແລະ ຈຳກັດບັນດາ ຄວາມສ່ຽງ ຈະແມ່ນບາດລ້ຽວເພື່ອໃຫ້ພື້ນຖານເສດຖະກິດຫວຽດນາມ ກ້າວເຂົ້າສູ່ໄລຍະປະຕິຮູບພັດທະນາ, ສ້າງທ່ວງທ່າເພື່ອໃຫ້ບັນດາວິສາຫະກິດ ຫວຽດນາມ ໄປທັນກັບທ່າເຕີບໂຕຂອງທົ່ວໂລກ. ບົດຂຽນຂອງນັກຂ່າວ ເລ້ຮັ່ງ ທີ່ມີຫົວຂໍ້ວ່າ: ສ້າງກຳລັງຫນູນໃຫ້ແກ່ການເຕີບໂຕຂອງວິສາຫະກິດຫວຽດນາມ
ພາບປະກອບ:giacaphe |
ຫວຽດນາມ ໄດ້ຮັບການຕີລາຄາວ່າ ແມ່ນຫນຶ່ງໃນບັນດາປະເທດສະມາຊິກໄດ້ຊົມໃຊ້ຜົນປະໂຫຍດຫລາຍສຸດຈາກສັນຍາ TPP. ຕາມການຄິດໄລ່, TPP ຈະຊ່ວຍ GDP ຂອງຫວຽດນາມ ເພີ່ມຂຶ້ນ 23,5 ຕຶ້ USD ໃນປີ 2020 ແລະ 33,5 ຕື້ USD ໃນປີ 2025. ການສົ່ງອອກ ຈະເພີ່ມຂຶ້ນຕື່ມອີກ 68 ຕື້ USD ໃນປີ 2025. ເປັນຫນ້າສົນໃຈ ເລື່ອງບັນດາຕະຫລາດໃຫຍ່ຄື: ອາເມລິກາ, ຍີ່ປຸ່ນ ແລະ ການາດາ ຫລຸດຜ່ອນພາສີນຳເຂົ້າ ລົງລະດັບ 0% ຈະເປັນສິ່ງກະຕຸກຊຸກຍູ້ສຳລັບການເຄື່ອນໄຫວສົ່ງອອກຂອງ ຫວຽດນາມ. ບັນດາວິສາຫະກິດສົ່ງອອກສຳຄັນຄື: ຕ່ຳແຜ່ນຕັດຫຍິບ, ເກີບຫນັງ, ປະເພດຜະລິດຕະພັນກະເສດ, ສິນໃນນ້ຳຈຳນວນຫນຶ່ງ… ອາດຈະມີບາດກ້າວພັດທະນາກະໂດດຂັ້ນກ່ຽວກັບວົງເງິນສົ່ງອອກໄປຍັງຕະຫລາດນີ້. ເມື່ອເຂົ້າຮ່ວມສັນຍາ TPP, ບັນດາວິສາຫະກິດ ຫວຽດນາມ ພວມຕ້ອນຮັບຫລາຍກາລະໂອກາດພັດທະນາ, ແຕ່ຄຽງຄູ່ກັນນັ້ນ ກໍປະເຊີນຫນ້າກັບບັນດາສິ່ງທ້າທາຍບໍ່ແມ່ນຫນ້ອຍ. ທ່ານ ຫງວຽນຈີຮຽວ ຜູ້ຊ່ຽວຊານດ້ານເສດຖະກິດ ຖືວ່າ:
“TPP ເປີດກາລະໂອກາດໃຫຍ່ໃຫ້ ຫວຽດນາມ, ກາລະໂອກາດໄດ້ເຊື່ອມໂຍງເຂົ້າກັບພື້ນຖານເສດຖະກິດທົ່ວໂລກ, ພື້ນຖານເສດຖະກິດ ຫວຽດນາມ ຈະປ່ຽນແປງຫລາຍຢ່າງ. ແລະ ພ້ອມກັບການເຊື່ອມໂຍງນັ້ນ ແມ່ນການປ່ຽນແປງ ພື້ນຖານເສດຖະກິດຫວຽດນາມ ເກືອບທັງໝົດ. ເປັນຫນ້າສົນໃຈ ນັ້ນແມ່ນບັນດາປະເພດສິນຄ້າ ຫວຽດນາມ ພວມມີທ່າແຮງ, ມີວົງເງິນສົ່ງອອກໃຫຍ່ຄື: ເຄື່ອງຕ່ຳແຜ່ນຕັດຫຍິບ, ຜະລິດຕະພັນກະເສດ, ສິນທະເລ, ສິນໃນນ້ຳ ໄດ້ຊົມໃຊ້ຜົນປະໂຫຍດຫລາຍກວ່າ.”
ບັນດາປະເທດເຂົ້າຮ່ວມ TPP ແມ່ນຄູ່ຮ່ວມມືສົ່ງອອກສຳຄັນຂອງຫວຽດນາມ ພິເສດ ແມ່ນ ອາເມລິກາ ແລະ ຍີ່ປຸ່ນ ກວມເຖິງ 40% ມູນຄ່າສິນຄ້າສົ່ງອອກຂອງຫວຽດນາມ ໄປຍັງ 11 ປະເທດໃນ TPP. ໃນການເຈລະຈາ TPP, ຂະແຫນງຕ່ຳແຜ່ນຕັດຫຍິບ ຂອງຫວຽດນາມ ໄດ້ຮັບຖືວ່າ ແມ່ນຂະແຫນງໄດ້ຊົມໃຊ້ຜົນປະໂຫຍດຫລາຍສຸດຈາກ TPP. ເຖິງຢ່າງໃດກໍຕາມ, ເພື່ອຕອບສະຫນອງບັນດາຄຳຮຽກຮ້ອງຕ້ອງການຂອງ TPP, ບັນດາວິສາຫະກິດ ຕ່ຳແຜ່ນຕັດຫຍິບ ກໍຕ້ອງມານະພະຍາຍາມຫລາຍຢ່າງ, ເປັນຕົ້ນແມ່ນຕອບສະຫນອງຂໍ້ກຳນົດຕົ້ນກຳເນີດຂອງສັນຍາ. ຕາມບັນດາຂໍ້ກຳນົດນີ້ ຜະລິດຕະພັນຕ່ຳແຜ່ນຕັດຫຍິບ ຢາກໄດ້ຊົມໃຊ້ບຸລິມະສິດພາສີ TPP ຕ້ອງຜະລິດຈາກເສັ້ນຝ້າຍຂຶ້ນໄປ ຢູ່ປະເທດສະມາຊິກ TPP, ໃນຂະນະທີ່ ຫວຽດນາມ ຍັງຄົງຕ້ອງນຳເຂົ້າແຫລ່ງວັດຖຸດິບແຜ່ນແພ, ເສັ້ນຝ້າຍດ້ວຍລາຄາສູງ ຈາກບັນດາປະເທດບໍ່ແມ່ນສະມາຊິກ TPP. ສະນັ້ນ ນີ້ຈະແມ່ນບັນຫາຍາກ ຊື່ງຫວຽດນາມ ຕ້ອງແກ້ໄຂໃນທັນທີ ເພື່ອສາມາດຊົມໃຊ້ຜົນປະໂຫຍດຈາກ TPP. ທ່ານ ໂງດືກຮ່ວາ, ປະທານສະພາບໍລິຫານບໍລິສັດຫຸ້ນສ່ວນຕັດຫຍິບ ທັງເລີ້ຍ ໃຫ້ຮູ້ວ່າ:
“ປະຈຸບັນ ສິ່ງຫຍຸ້ງຍາກທີ່ສຸດຂອງວິສາຫະກິດ ນັ້ນແມ່ນຕົ້ນກຳເນີດຂອງຜະລິດຕະພັນຕ່ຳແຜ່ນຕັດຫຍິບຕ້ອງແມ່ນຂອງຫວຽດນາມ ໃນຂະນະຫວຽດນາມ ບໍ່ທັນຕອບສະຫນອງໄດ້. ສ່ວນວິສາຫະກິດນຳເຂົ້າວັດຖຸດິບຈາກ ອາເມລິກາ ແລະ ຍີ່ປຸ່ນ ລາຄາສູງສົມຄວນ."
ໃນໄລຍະຜ່ານມາ, ບັນດາວິສາຫະກິດ ຫວຽດນາມ ເວົ້າລວມ ແລະ ວິສາຫະກິດຕ່ຳແຜ່ນຕັດຫຍິບ ເວົ້າສະເພາະ ໄດ້ກຽມພ້ອມໃຫ້ການເຊື່ອມໂຍງ.
ກຸ່ມຕ່ຳແຜ່ນຕັດຫຍິບ ຫວຽດນາມ ໄດ້ເປັນເຈົ້າການສົມທົບກັບບັນດາກະຊວງ, ຂະແຫນງການ, ທ້ອງຖິ່ນ ຮ່ວມສຳພັນກັບບັນດາວິສາຫະກິດ ເພື່ອສ້າງເຂດຜະລິດວັດຖຸດິບ, ຍູ້ແຮງການອອກແບບຮູບແບບຜະລິດຕະພັນດ້ວຍຕົນເອງ, ຜະລິດອອກ ຜະລິດຕະພັນ ແລະ ຂາຍສິນຄ້າໃຫ້ຜູ້ຊົມໃຊ້. ຫວຽດນາມ ພວມມີທ່າແຮງກ່ຽວກັບເຄື່ອງຕ່ຳແຜ່ນຕັດຫຍິບ ແລະ ມີທ່າໄດ້ປຽບຫລາຍຢ່າງກວ່າ ເມື່ອທຽບໃສ່ບັນດາປະເທດ ອາຊີ ກ່ຽວກັບສີມື ແລະ ປະສົບການ, ສະນັ້ນ ການເຂົ້າຮ່ວມ TPP ຈະນຳມາເຊິ່ງຜົນປະໂຫຍດຫລາຍຢ່າງໃຫ້ຂະແຫນງນີ້.
ປະຈຸບັນ ຫວຽດນາມ ກໍແມ່ນຫນຶ່ງໃນ 15 ປະເທດສົ່ງອອກຜະລິດຕະພັນກະເສດໃຫຍ່ສຸດໄປຍັງຕະຫລາດ ອາເມລິກາ ດ້ວຍບັນດາຜະລິດຕະພັນຄື: ກາເຟ, ໝາກມ່ວງຫິມະພານ, ໝາກພິກໄທ, ເຂົ້າສານ ແລະ ຊາ. ຍີ່ປຸ່ນ ແມ່ນຫນຶ່ງໃນບັນດາປະເທດພວມເຈລະຈາສັນຍາ TPP ແລະ ກໍແມ່ນຕະຫລາດສົ່ງອອກຜະລິດຕະພັນກະເສດໃຫຍ່ທີ 3 ຂອງຫວຽດນາມ ດ້ວຍບັນດາປະເພດຜະລິດຕະພັນກະເສດຕົ້ນຕໍຄື: ກາເຟ, ໝາກໄມ້ ແລະ ອື່ນໆ. ປະເທດຈຳນວນຫນຶ່ງຄື: ອົດສະຕາລີ, ເມຊີໂກ ກໍແມ່ນບັນດາຕະຫລາດສົ່ງອອກຜະລິດຕະພັນກະເສດໃຫຍ່ຂອງຫວຽດນາມໃນກຸ່ມປະເທດສະມາຊິກ TPP ດ້ວຍບັນດາປະເພດຜະລິດຕະພັນກະເສດຊື່ງຫວຽດນາມ ມີທ່າແຮງຄື: ໝາກມ່ວງຫິມະພານ, ໝາກພິກໄທ, ເຂົ້າສານ, ກາເຟ, ໝາກໄມ້… ເຖິງຢ່າງໃດກໍຕາມ, ຄຽງຄູ່ກັບບັນດາປະເພດສິນຄ້າມີທ່າແຮງ, ວິສາຫະກິດຜະລິດນ້ຳຕານ, ວິສາຫະກິດການຢາ… ຂອງຫວຽດນາມ ກໍຖືກຜົນສະທ້ອນຈາກ TPP. ເລື່ອງເຂົ້າຮ່ວມ TPP ເຮັດໃຫ້ຫວຽດນາມ ຕ້ອງເປີດປະຕູຂະແຫນງນ້ຳຕານ, ຍົກເລີກບັນດາໂຄຕາ ນຳເຂົ້າ, ສະນັ້ນ ຂະແຫນງນ້ຳຕານ ຄາດຄະເນວ່າຈະປະສົບກັບຄວາມຫຍຸ້ງຍາກ ຍ້ອນລາຍຈ່າຍການຜະລິດຍັງສູງ, ຕ້ອງແກ້ງແຍ້ງກັບບັນດາປະເທດສະມາຊິກ TPP, ໃນນັ້ນ ມີປະເທດ ອົດສະຕາລີ ຊື່ງແມ່ນປະເທດສົ່ງອອກນ້ຳຕານໃຫຍ່ອັນດັບ 3 ໃນໂລກ. ຂະແຫນງນ້ຳນົມຂອງຫວຽດນາມ ກໍຈະຖືກຜົນສະທ້ອນຢ່າງໃຫຍ່ຫລວງ ຍ້ອນບັນດາປະເທດເຂົ້າຮ່ວມ TPP ມີອົດສະຕາລີ ແລະ ນິວເຊີແລນ- ຊື່ງແມ່ນບັນດາປະເທດມີຂະແຫນງນ້ຳນົມພັດທະນາທີ່ສຸດ.
ຮູ້ຈັກຍາດແຍ່ງກາລະໂອກາດ, ຈຳກັດຄວາມສ່ຽງ ເມື່ອຫວຽດນາມເຂົ້າຮ່ວມ TPP ຈະຊ່ວຍໃຫ້ບັນດາວິສາຫະກິດຫວຽດນາມ ບືນຕົວຂຶ້ນພັດທະນາ, ທັດທຽບກັບທ່າອ່ຽງເຊື່ອມໂຍງເຂົ້າກັບເສດຖະກິດສາກົນ.