(vovworld)- ໃນຊຸມປີຜ່ານມາ, ການຮ່ວມມືດ້ານເສດຖະກິດ ລະຫວ່າງຫວຽດນາມ ແລະ ສິງກະໂປ ນັບມື້ນັບພັດທະນາອັນດີງາມ ນຳມາເຊິ່ງຜົນປະໂຫຍດຢ່າງແທດຈິງໃຫ້ທັງສອງປະເທດ. ພິເສດ ຮູບແບບບັນດາເຂດອຸດສາຫະກຳ ຫວຽດນາມ - ສິງກະໂປ (VSIP) ໄດ້ຮັບການສ້າງຕັ້ງຂຶ້ນກ່ອນນີ້ 20 ປີ ໄດ້ຖືວ່າ ແມ່ນຮູບແບບຮ່ວມທຸລະກິດຢ່າງມີປະສິດທິຜົນ, ບັນລຸຜົນງານຫລາຍຢ່າງ. ທີ່ພິທີເລີ່ມລົງມືກໍ່ສ້າງເຂດອຸດສາຫະກຳ ຫວຽດນາມ ສິງກະໂປ ຢູ່ ແຂວງ ເງ້ອານ ເມື່ອວັນທີ 16/9/2015, ທ່ານນາຍົກລັດຖະມົນຕີ ຫງວຽນເຕີນຢູງ ຢືນຢັນ: ຮູບແບບຮ່ວມທຸລະກິດ ຫວຽດນາມ ສິງກະໂປ ແມ່ນຈຸດພົ້ນເດັ່ນໃນການພົວພັນຮ່ວມມືສອງຝ່າຍ, ບໍ່ພຽງແຕ່ມີຄວາມໝາຍທາງດ້ານເສດຖະກິດຕ່າງຝ່າຍຕ່າງມີຜົນປະໂຫຍດເທົ່ານັ້ນ ຫາກຍັງປະກອບສ່ວນເພີ່ມທະວີການພົວພັນຄູ່ຮ່ວມມືຍຸດທະສາດ ແລະ ຂໍ້ຕົກລົງເຊື່ອມຕໍ່ສອງພື້ນຖານເສດຖະກິດ ຫວຽດນາມ ແລະ ສິງກະໂປ ອີກດ້ວຍ.
ເຂດອຸດສາຫະກຳ ຫວຽດນາມ - ສິງກະໂປ VSIP
|
ພາຍຫລັງເກືອບ 20 ປີ ນັບແຕ່ເມື່ອສ້າງຕັ້ງເຂດອຸດສາຫະກຳ ຫວຽດນາມ - ສິງກະໂປ VSIP ແຫ່ງທຳອິດຢູ່ ບີງເຢືອງ ເມື່ອປີ 1996, ມີ VSIP 6 ແຫ່ງໄດ້ຮັບການສ້າງຕັ້ງຂຶ້ນຕາມລຳດັບ ແລະ ໄດ້ພັດທະນາສຳເລັດຜົນຢູ່ຫວຽດນາມ ດ້ວຍພື້ນຖານໂຄງລ່າງລົງທຶນຢ່າງຄົບຊຸດ, ທັນສະໄຫມ, ບໍ່ສົ່ງຜົນສະທ້ອນເຖິງສິ່ງແວດລ້ອມ ແລະ ໄດ້ດຶງດູດນັກລົງທຶນເຂົ້າຮ່ວມການຜະລິດ, ດຳເນີນທຸລະກິດເປັນຈຳນວນຫລາຍ, ປະກອບສ່ວນພັດທະນາເສດຖະກິດສັງຄົມຂອງຫວຽດນາມ ແລະ ນຳມາເຊິ່ງຜົນປະໂຫຍດລວມໃຫ້ທັງສອງປະເທດ ຫວຽດນາມ ແລະ ສິງກະໂປ. ບັນດາເຂດອຸດສາຫະກຳ ຫວຽດນາມ - ສິງກະໂປ ໄດ້ກາຍເປັນຈຸດພົ້ນເດັ່ນແຫ່ງການພັດທະນາເສດຖະກິດເທື່ອລະກ້າວ, ດຶງດູດການລົງທຶນຢູ່ຫວຽດນາມ. ປະຈຸບັນ ເຂດອຸດສາຫະກຳ ຫວຽດນາມ - ສິງກະໂປ ໄດ້ຮັບການສ້າງຕັ້ງຢູ່ຫລາຍເຂດພາກໃນທົ່ວປະເທດປະເທດຫວຽດນາມ. ເຂດອຸດສາຫະກຳ ຫວຽດນາມ - ສິງກະໂປເງ້ອານ ຫາກໍເລີ່ມລົງມືກໍ່ສ້າງ ແລະ ນີ້ແມ່ນໂຄງການທີ 7 ຂອງ ເຂດອຸດສາຫະກຳ ຫວຽດນາມ - ສິງກະໂປ ຢູ່ຫວຽດນາມ ຖັດຈາກບັນດາ ເຂດອຸດສາຫະກຳ ຫວຽດນາມ - ສິງກະໂປ ຢູ່ ບີງເຢືອງ, ບັກນີງ, ຫາຍຟ່ອງ, ກວ໋າງຫງາຍ ແລະ ຫາຍເຢືອງ. ຍອດເນື້ອທີ່ດິນຂອງ ເຂດອຸດສາຫະກຳ ຫວຽດນາມ - ສິງກະໂປ ພວມວາງແຜນກຳນົດ ແລະ ພັດທະນາໃຫ້ຂຶ້ນເຖິງ ກວ່າ 6.150 ເຮັກຕາ. ຍອດເງິນລົງທຶນ ຊື່ງບັນດານັກລົງທຶນໄດ້ລົງທຶນເຂົ້າເກືອບ 800 ບໍລິສັດຢູ່ບັນດາ ເຂດອຸດສາຫະກຳ ຫວຽດນາມ - ສິງກະໂປ ແມ່ນຂຶ້ນເຖິງ ເກືອບ 8 ຕື້ USD, ສ້າງວຽກເຮັດງານທຳໃຫ້ຄົນກງານກວ່າ 155.000 ຄົນ. ເຂດອຸດສາຫະກຳ ຫວຽດນາມ - ສິງກະໂປ ເງ້ອານ ແມ່ນເຂດອຸດສາຫະກຳປະສົມ ກວມລວມຫລາຍຂະແຫນງ ພ້ອມກັບເຂດຕົວເມືອງ- ບໍລິການ ໃນເນື້ອທີ່ 1.475 ເຮັກຕາ ແລະ ນອນໃນແຜນຜັງເຂດເສດຖະກິດທິດຕາເວັນອອກສ່ຽງໃຕ້ຂອງ ແຂວງ ເງ້ອານ, ໃນນັ້ນ ໄລຍະ 1 ມີເນື້ອທີ່ 750 ເຮັກຕາ ດ້ວຍຍອດລະດັບການລົງທຶນເກືອບ 1.700 ຕື້ດົງ. ກ່າວຄຳເຫັນທີ່ພິທີເລີ່ມລົງມືກໍ່ສ້າງ ເຂດອຸດສາຫະກຳ ຫວຽດນາມ - ສິງກະໂປ ຢູ່ ເງ້ອານ, ທ່ານນາຍົກລັດຖະມົນຕີ ຫງວຽນເຕີນຢູງ ຊີ້ແຈ້ງວ່າ:
“ເພື່ອໃຫ້ ເຂດອຸດສາຫະກຳ ຫວຽດນາມ - ສິງກະໂປ ເງ້ອານ ປະກົດຜົນເປັນຈິງ, ຂ້າພະເຈົ້າສະເຫນີ ການນຳບັນດາກະຊວງ, ຂະແຫນງການ, ແຂວງ ເງ້ອານ ແລະ ປະຊາຊົນ ໃນບໍລິເວນກໍ່ສ້າງໂຄງການ ສະຫນັບສະຫນູນ, ຮ່ວມມືຢ່າງແຫນ້ນແຟ້ນກັບບັນດາເຈົ້າຂອງການລົງທຶນ ເພື່ອຮັບປະກັນການປະຕິບັດໂຄງການຕາມກົດໝາຍ, ຄວາມຄືບຫນ້າ, ຮັບປະກັນຄຸນນະພາບ, ຄວາມປອດໄພ ແລະ ປະສິດທິຜົນ, ຮັບປະກັນສິ່ງແວດລ້ອມເປັນຢ່າງດີ ແລະ ຮັບປະກັນຊີວິດສັງຄົມໃຫ້ປະຊາຊົນທ້ອງຖິ່ນ. ຂ້າພະເຈົ້າເນັ້ນຫນັກວ່າ ໂຄງການນີ້ສຳເລັດຜົນບໍ່ພຽງແຕ່ປະກອບສ່ວນພັດທະນາເສດຖະກິດສັງຄົມຂອງເງ້ອານ, ຂອງເຂດ ແລະ ທົ່ວປະເທດ, ນຳມາເຊິ່ງຜົນປະໂຫຍດໃຫ້ທັງສອງຝ່າຍ ຫວຽດນາມ ແລະ ສິງກະໂປ ເທົ່ານັ້ນ ຫາກຍັງປະກອບສ່ວນເພີ່ມທະວີການພົວພັນຄູ່ຮ່ວມມືຍຸດທະສາດ ແລະ ຂໍ້ຕົກລົງເຊື່ອມຕໍ່ສອງພື້ນຖານເສດຖະກິດ ລະຫວ່າງຫວຽດນາມ ແລະ ສິງກະໂປອີກດ້ວຍ.”
ບໍ່ພຽງແຕ່ດຶງດູດການລົງທຶນ, ພັດທະນາເສດຖະກິດ, ເຂດອຸດສາຫະກຳ ຫວຽດນາມ - ສິງກະໂປ ຍັງມຸ່ງໄປເຖິງຈຸດສຸມພັດທະນາແບບຍືນຍົງຢູ່ບັນດາທ້ອງຖິ່ນ. ສະເພາະ 4 ໂຄງການກ່ອນນີ້ ໂດຍ ເຂດອຸດສາຫະກຳ ຫວຽດນາມ - ສິງກະໂປ ລົງທຶນຢູ່ແຂວງ ບີງເຢືອງ, ບັກນີງ ແລະ ຫາຍຟ່ອງ ໄດ້ດຶງດູດເກືອບ 490 ນັກລົງທຶນຢູ່ພາຍໃນ ແລະ ຕ່າງປະເທດ ຂຶ້ນກັບ 23 ປະເທດ ແລະ ເຂດແຄ້ວນ ດ້ວຍຍອດຈຳນວນເງິນລົງທຶນກວ່າ 6,2 ຕື້ USD, ແກ້ໄຂວຽກເຮັດງານທຳໃຫ້ແກ່ຄົນງານກວ່າ 140.000 ຄົນ. ກ່ອນນັ້ນ ເຂດອຸດສາຫະກຳປະສົມ ຕົວເມືອງ ບໍລິການ VSIP ຢູ່ ແຂວງ ກວ໋າງຫງາຍ ກໍໄດ້ດຶງດູດການລົງທຶນຢ່າງວ່ອງໄວ, ສະແດງໃຫ້ເຫັນວ່າ ເບື້ອງຕົ້ນ ໄດ້ຮັບຜົນສຳເລັດ. ທ່ານ ຫງວຽນຊວນຖູຍ, ຫົວຫນ້າພະແນກອຸດສາຫະກຳ ການຄ້າແຂວງ ກວ໋າງຫງາຍ ຖືວ່າ:
“ເຂດອຸດສາຫະກຳ VSIP ລົງທຶນຢູ່ທີ່ນີ້ແມ່ນແກ້ໄຂໄດ້ຫລາຍບັນຫາ. ທີຫນຶ່ງ ເມື່ອລົງທຶນເຂົ້າເຂດນີ້ ເຂົາເຈົ້າກໍ່ສ້າງພື້ນຖານໂຄງລ່າງ. ທີສອງ ແມ່ນແກ້ໄຂບັນຫາເຮືອນຢູ່ໃຫ້ກຳມະກອນ, ກໍ່ສ້າງເປັນເຂດຕົວເມືອງ. ບັນດາເຂດອຸດສາຫະກຳນີ້ແມ່ນເຂດອຸດສາຫະກຳຫນູນຊ່ວຍເຂດເສດຖະກິດ ຢູງກວດ.”
ໄລຍະຜ່ານມາ, ເງິນລົງທຶນໂດຍກົງຂອງ ສິງກະໂປ ເຂົ້າຫວຽດນາມ ເພີ່ມຂຶ້ນຢ່າງບໍ່ຢຸດຢັ້ງ, ປະຈຸບັນ ບັນລຸລະດັບ 33 ຕື້ USD ແລະ ສ່ວນຫລາຍບັນດາໂຄງການ, ລາຍການຮ່ວມມືລ້ວນແຕ່ສຳເລັດຜົນ, ນຳມາເຊິ່ງຜົນປະໂຫຍດໃຫ້ທັງສອງຝ່າຍ. ການແລກປ່ຽນດ້ານການຄ້າສອງສົ້ນ ກໍເພີ່ມຂຶ້ນຫລາຍ, ປີ 2015 ບັນລຸລະດັບປະມານ 11 ຕື້ USD. ພິເສດ ເພື່ອຮັກສາຂໍ້ລິເລິ່ມຊອງການນຳຂັ້ນສູງສອງປະເທດ, ສອງຝ່າຍໄດ້ເສີມຂະຫຍາຍ ແລະ ຜັນຂະຫຍາຍຮູບແບບເຂດອຸດສາຫະກຳ VSIP ຢູ່ບັນດາທ້ອງຖິ່ນຂອງຫວຽດນາມ ເປັນຢ່າງດີ. ເລື່ອງບັນດາເຂດອຸດສາຫະກຳ VSIP ເສີມຂະຫຍາຍປະສິດທິຜົນ ໄດ້ນຳມາເຊິ່ງຄວາມໝາຍດ້ານເສດຖະກິດອັນໃຫຍ່ຫລວງໃຫ້ທັງສອງຝ່າຍ ພ້ອມທັງ ປະກອບສ່ວນສຳຄັນເຂົ້າໃນຈຸດໝາຍເຊື່ອມຕໍ່ສອງພື້ນຖານເສດຖະກິດ, ປະກອບສ່ວນເພີ່ມພູນຄູນສ້າງ ປັບປຸງ ແລະ ນຳການພົວພັນຄູ່ຮ່ວມມືຍຸດທະສາດຍາວນານ, ໝັ້ນຄົງ ລະຫວ່າງສອງປະເທດນັບມື້ນັບມີປະສິດທິຜົນ ແລະ ແທດຈິງ.