(vovworld)- ກົດໝາຍວ່າດ້ວຍການລົງທຶນຂອງລັດໂດຍກອງປະຊຸມສະໄຫມສາມັນຂອງສະພາແຫ່ງຊາດຫວຽດນາມຊຸດທີ XIII ຮັບຮອງເອົາໃນວັນທີ 18/6/2014 ມີຜົນສັກສິດນັບແຕ່ວັນທີ 1/1/2015 ເປັນຕົ້ນໄປ. ເລື່ອງຜັນຂະຫຍາຍກົດໝາຍສະບັບດັ່ງກ່າວ ຈະຫລີກລ້ຽງການລົງທຶນບໍ່ມີຈຸດສຸມ, ຂາດຄວາມດຸ່ນດ່ຽງໃນການລົງທຶນ, ຜ່ານນັ້ນ ແກ້ໄຂສະພາບກໍ່ຄວາມຮົ່ວໄຫລ, ຟຸມເຟືອຍໃນການລົງທຶນ.
ພາບປະກອບ:nguoiduatin
|
ຈຸດໃຫມ່ໃນກົດໝາຍວ່າດ້ວຍການລົງທຶນຂອງລັດ ຫັນວຽກງານສ້າງແຜນການ ແລະ ການລົງທຶນຂອງປະເທດຊາດ ເປັນລະບຽບກວ່າ, ຈາກການສ້າງແຜນການໃຫ້ແຕ່ລະປີ ຫັນໄປສູ່ການສ້າງແຜນການໄລຍະກາງ ແລະ 5 ປີ. ການປ່ຽນໃຫມ່ນີ້ ຈະຮັບປະກັນລັກສະນະພື້ນຖານ,ຍາວນານຂອງ ການລົງທຶນຂອງລັດ, ສອດຄ່ອງກັບຍຸດທະສາດ, ແຜນກຳນົດພັດທະນາເສດຖະກິດສັງຄົມ, ຮັບປະກັນຄວາມດຸ່ນດ່ຽງມະຫາພາກຂອງພື້ນຖານເສດຖະກິດ, ຮັບປະກັນລັກສະນະເປີດເຜີຍ, ໂປ່ງໃສ, ປະກອບສ່ວນຫລຸດຜ່ອນຄວາມຫຍໍ້ທໍ້ໃນການລົງທຶນຂອງລັດ; ແກ້ໄຂສະພາບການລົງທຶນບໍ່ມີຈຸດສຸມ, ໂຄງການລົງທຶນທີ່ຊັກຊ້າເມື່ອທຽບໃສ່ຂໍ້ຕົກລົງອະນຸມັດ, ປະກອບສ່ວນຍົກສູງປະສິດທິຜົນບັນດາໂຄງການລົງທຶນ. ທ່ານ ຟຸ່ງກວາງຮຸ່ງ, ປະທານຄະນະກຳມະການປະຊາຊົນ ແຂວງ ຫວີງຟຸກ ຖືວ່າ: ກົດໝາຍວ່າດ້ວຍການລົງທຶນຂອງລັດ ຈະຊ່ວຍໃຫ້ທ້ອງຖິ່ນ ເປັນເຈົ້າການໃນການສັບຊ້ອນ ແລະ ນຳໃຊ້ແຫລ່ງຊັບພະຍາກອນມະນຸດ, ນຳໃຊ້ແຫລ່ງເງິນລົງທຶນຢ່າງມີປະສິດທິຜົນ.
“ກະຊວງແຜນການ ແລະ ການລົງທຶນ ສະເຫນີ ສ້າງແຜນການໄລຍະກາງ, ສິ່ງນີ້ໄດ້ເຮັດໃຫ້ທ້ອງຖິ່ນພວກຂ້າພະເຈົ້າມີພື້ນຖານສຳຄັນເພື່ອຄຸ້ມຄອງ. ສິ່ງນີ້ກໍໄດ້ສ້າງເງື່ອນໄຂໃຫ້ແກ່ພວກຂ້າພະເຈົ້າພິຈາລະນາຄືນແຫລ່ງງົບປະມານທັງໝົດ, ຈາກນັ້ນ ເປັນເຈົ້າການໃນການກໍ່ສ້າງໂຄງການ ແລະ ສະກັດກັ້ນສະພາບການຟຸມເຟືອຍໃນການກໍ່ສ້າງພື້ນຖານ ແລະ ຄວາມຮັບຜິດຊອບຂອງຜູ້ລົງທຶນ.”
ດ້ວຍການຜັນຂະຫຍາຍກົດໝາຍວ່າດ້ວຍການລົງທຶນຂອງລັດຄັ້ງນີ້, ກະຊວງແຜນການ ແລະ ການລົງທຶນ ກໍໄດ້ເປັນເຈົ້າການໃນວຽກງານເປັນເສນາທິການໃຫ້ລັດຖະບານປະກາດໃຊ້ຄຳສັ່ງກ່ຽວກັບການກຳນົດທິດລົງທຶນຂອງລັດໃນໄລຍະກາງ, ມີບັນດາການກຳນົດທິດໃຫຍ່ ໃນທັດສະນະກ່ຽວກັບການລົງທຶນຂອງລັດ, ຊ່ວຍໃຫ້ບັນດາກະຊວງ, ຂະແຫນງການ ແລະ ທ້ອງຖິ່ນ ມີພື້ນຖານເພື່ອສ້າງແຜນການລະອຽດຂອງຂະແຫນງ, ທ້ອງຖິ່ນ, ຫລີກລ້ຽງການລົງທຶນບໍ່ມີຈຸດສຸມ. ທ່ານ ເລຮວ່າງກວນ, ປະທານຄະນະກຳມະການປະຊາຊົນນະຄອນ ໂຮ່ຈິມີນ ຖືວ່າ: ເລື່ອງປະສານງານລະຫວ່າງແຜນການການເງິນ ກັບແຜນການລົງທຶນເປັນຢ່າງດີ ຈະຫລີກລ້ຽງສະພາບຂາດຄວາມດຸ່ນດ່ຽງ.
“ການກຳນົດທິດຄືດັ່ງກ່າວ ຈະຊ່ວຍໃຫ້ບັນດາທອ້ງຖີ່ນ, ພິເສດແມ່ນບັນດາເຂດເສດຖະກິດຈຸດສຸມຂອງປະເທດຊາດສົມທົບກັນເພື່ອກໍ່ສ້າງ. ພວກຂ້າພະເຈົ້າເຫັນວ່າ: ໃນແຜນການ, ບັນດາໂຄງການຈຸດສຸມແຫ່ງຊາດ, ບັນດາໂຄງການກໍ່ສ້າງພື້ນຖານໂຄງລ່າງສຳຄັນຂອງປະເທດຊາດ, ເພື່ອຫລີກລ້ຽງການລົງທຶນໂດຍບໍ່ມີຈຸດສຸມ. ”
ການລົງທຶນຂອງລັດໄດ້ປະກອບສ່ວນສ້າງພື້ນຖານນິຕິກຳຢ່າງຄົບຊຸດ, ເປັນເອກະພາບ ເພື່ອຍົກສູງປະສິດທິຜົນ, ຜົນສັກສິດຂອງວຽກງານຄຸ້ມຄອງ, ນຳໃຊ້ແຫລ່ງທຶນຂອງລັດສຳລັບວິວັດການລົງທຶນທັງໝົດ, ຍົກສູງປະສິດທິຜົນການລົງທຶນຈາກແຫລ່ງທຶນຂອງລັດຕາມການກຳນົດທິດສອດຄ່ອງກັບຍຸດທະສາດ, ແຜນກຳນົດ, ແຜນການພັດທະນາເສດຖະກິດສັງຄົມ. ເລື່ອງປະກາດໃຊ້ກົດໝາຍດັ່ງກ່າວ ກໍເປັນການຕ້ານສະພາບຮົ່ວໄຫລ, ຟຸມເຟືອຍ, ການລົງທຶນໂດຍບໍ່ມີຈຸດສຸມ ແລະ ຮັບປະກັນລັກສະນະໂປ່ງໃສ, ເປີດເຜີຍໃນການເຄື່ອນໄຫວລົງທຶນ, ນຳໃຊ້ແຫ່ລງທຶນຂອງລັດ. ທ່ານ ດາວກວາງທູ, ລັດຖະມົນຕີຊ່ວຍວ່າການກະຊວງແຜນການ ແລະ ການລົງທຶນ ໃຫ້ຮູ້ວ່າ:
“ເມື່ອສ້າງແຜນການລົງທຶນໄລຍະກາງ ແລະ ໄລຍະຍາວ ຈະຈຳກັດໄດ້ການລົງທຶນໂດຍບໍ່ມີຈຸດສຸມ ເພາະວ່າ ໃນການກຳນົດລົງທຶນໄລຍະກາງ ແລະໄລຍະ ຍາວ ເມື່ອລົງມືກໍ່ສ້າງບັນດາໂຄງການ ລ້ວນແຕ່ຕ້ອງປະຕິບັດຕາມການກຳນົດຢ່າງເຂັ້ມງວດ. ນັ້ນແມ່ນ ບັນດາຂະແຫນງການ, ທ້ອງຖິ່ນຕ່າງໆ ຕ້ອງຈັດແບ່ງແຫລ່ງທຶນໃຫ້ພຽງພໍ. ຫລັງຈາກນັ້ນ ບຸລິມະສິດໃຫ້ບັນດາໂຄງການທີ່ມີຄວາມສາມາດສຳເລັດໂດຍໄວ ແລະ ນຳເຂົ້າເຄື່ອນໄຫວ. ”
ທີ່ກອງປະຊຸມທົ່ວປະເທດກ່ຽວກັບຂະແຫນງແຜນການ ແລະ ການລົງທຶນ ຫາກໍດຳເນີນໄປຢູ່ ຮ່າໂນ້ຍ, ທ່ານນາຍົກລັດຖະມົນຕີ ຫງວຽນເຕີນຢູງ ໄດ້ຢືນຢັນວ່າ: ແຜນການ ແລະ ການລົງທຶນ ໄລຍະກາງ ແລະ ໄລຍະຍາວ 2016-2020 ມີຄວາມໝາຍໃຫຍ່ຫລວງ, ປະກອບສ່ວນສຳຄັນເພື່ອປະຕິບັດແຜນການພັດທະນາເສດຖະກິດສັງຄົມ ປີ 2016-2020. ເລື່ອງຜັນຂະຫຍາຍກົດໝາຍວ່າດ້ວຍການລົງທຶນ ຈະເຮັດໃຫ້ວຽກງານແຜນການ ແລະ ການລົງທຶນຂອງປະເທດຊາດເປັນລະບຽບກວ່າ, ເພີ່ມລັກສະນະເປັນເຈົ້າການໃຫ້ແກ່ບັນດາທ້ອງຖິ່ນ ແລະ ຜ່ານນັ້ນ ຍົກສູງຄຸນນະພາບຄຸ້ມຄອງ, ປະກອບສ່ວນເຂົ້າໃນການພັດທະນາເສດຖະກິດສັງຄົມ.