ນັບແຕ່ເມື່ອກົດໝາຍວ່າດ້ວຍວິສາຫະກິດ, ກົດໝາຍວ່າດ້ວຍການລົງທຶນ 2014 ເລີ່ມມີຜົນບັນຄັບໃຊ້ນັບແຕ່ວັນທີ 01/07/2015, ນອກຈາກຈຳນວນວິສາຫະກິດເພີ່ມຂຶ້ນ, ຈຳນວນທຶນຈົດທະບຽນໃໝ່ກໍ່ເພີ່ມຂຶ້ນ. ເວລາຈົດທະບຽນສ້າງຕັ້ງວິສາຫະກິດໃໝ່ ແລະ ຈົດທະບຽນປ່ຽນແປງເນື້ອໃນດຳເນີນທຸລະກິດກໍ່ຫຼຸດລົງພໍ່ສົມຄວນ ເມື່ອທຽບໃສ່ໄລຍະກ່ອນທີ່ມີກົດໝາຍວ່າດ້ວຍວິສາຫະກິດປີ 2014. ໃນຂະນະນັ້ນ, ເລື່ອງຍົກເລີກການຈົດຂະແໜງ, ອາຊີບດຳເນີນທຸລະກິດໃນໃບຢັ້ງຢຶນຈົດທະບຽນດຳເນີນທຸລະກິດ ແລະ ຍົກເລີກຂໍ້ກຳນົດມອບໃບຢັ້ງຢືນຈົດທະບຽນລົງທຶນໃຫ້ນັກລົງທຶນພາຍໃນປະເທດ ກໍໄດ້ປະກອບສ່ວນຫຼຸດຜ່ອນລາຍຈ່າຍໃນການເຮັດລະບຽບການບໍລິຫານ, ຍົກສູງລັກສະນະເປັນເຈົ້າການ, ມີໄຫວພິບໃຫ້ວິສາຫະກິດ; ພ້ອມທັງສ້າງເງື່ອນໄຂສະດວກໃຫ້ບັນດານັກລົງທຶນຕ່າງປະເທດທີ່ຢາກລົງທຶນເຂົ້າຫວຽດນາມ. ທ່ານ ໂດ້ເຍີດຮ່ວາງ, ຫົວໜ້າກົມລົງທຶນຕ່າງປະເທດ, ກະຊວງແຜນການ ແລະ ການລົງທຶນ ໃຫ້ຮູ້ວ່າ.
“ລັດ, ລັດຖະບານ, ສະພາແຫ່ງຊາດ ແລະ ບັນດາກະຊວງ, ຂະແໜງການທ້ອງຖິ່ນ ໄດ້ຕັ້ງໜ້າ ແລະ ມານະພະຍາຍາມປັບປຸງສະພາບແວດລ້ອມແຫ່ງການລົງທຶນດຳເນີນທຸລະກິດໃນການປັບປຸງກົດໝາຍ, ນະໂຍບາຍໃຫ້ນັບມື້ນັບສະດວກສະບາຍກວ່າໃຫ້ແກ່ການເຄື່ອນໄຫວລົງທຶນ, ດຳເນີນທຸລະກິດ. ພ້ອມທັງ, ເດັດດຽວຜັນຂະຫຍາຍການປະຕິບັດໃຫ້ນັບມື້ນັບສະດວກ, ໃກ້ຊິດສະໜິດສະໜົມກວ່າໃຫ້ບັນດານັກລົງທຶນ”.
ຍ້ອນມີບັນດາການປະຕິຮູບຢ່າງແຮງໃນການປັບປຸງສະພາບແວດລ້ອມແຫ່ງການລົງທຶນ, ດຳເນີນທຸລະກິດ ກໍຄືບັນດາການປ່ຽນແປງເຊິ່ງກົດໝາຍວ່າດ້ວຍວິສາຫະກິດ ແລະ ກົດໝາຍວ່າດ້ວຍການລົງທຶນ (ສະບັບປັບປຸງ) ນຳມາໃຫ້, ທະນາຄານໂລກ ຕີລາຄາວ່າ ຫວຽດນາມ ໄດ້ເພີ່ມຂຶ້ນ 3 ຂັ້ນໃນຕາຕະລາງຈັດອັນດັບ “ສະພາບແວດລ້ອມແຫ່ງການລົງທຶນທົ່ວໂລກ”. ພ້ອມກັນນັ້ນ, ໃນ “ບົດລາຍງານດັດຊະນີຄວາມສາມາດແກ່ງແຍ້ງຂັ້ນແຂວງ (PCI) 2015” ຂອງຫ້ອງການການຄ້າ ແລະ ອຸດສາຫະກຳຫວຽດນາມ ກໍຮັບຮູ້ການຈົດທະບຽນສ້າງຕັ້ງວິສາຫະກິດທີ່ມີບາດກ້າວໃຫຍ່ສຸດ ແລະ ມີຄະແນນສູງສຸດໃນຮອບເວລາ 11 ປີ ແຫ່ງການສຳຫຼວດ PCI.
ນອກຈາກບັນດາໝາກຜົນຕັ້ງໜ້າທີ່ບັນລຸໄດ້, ມາຮອດປະຈຸບັນ, ການປະຕິບັດ ກົດໝາຍວ່າດ້ວຍວິສາຫະກິດ ແລະ ກົດໝາຍວ່າດ້ວຍການລົງທຶນ (ສະບັບປັບປຸງ) ຍັງມີບາງຂໍ້ກຳນົດຍັງບໍ່ທັນຄົບຊຸດ ກັບບັນດາກົດໝາຍສະເພາະຂະແໜງ. ທ່ານ ວູຕຽນໂລກ, ປະທານຫ້ອງການການຄ້າ ແລະ ອຸດສາຫະກຳຫວຽດນາມ ໃຫ້ຮູ້ວ່າ.
“ຜ່ານວິວັດແຫ່ງການກວດກາ, ຮັບເອົາຄຳເຫັນຈາກວິສາຫະກິດ, ພວກຂ້າພະເຈົ້າກໍ່ເຫັນວ່າ, ກົດໝາຍວ່າດ້ວຍວິສາຫະກິດ ແລະ ກົດໝາຍວ່າດ້ວຍການລົງທຶນ, ມີບາງຈຸດຍັງບໍ່ທັນເໝາະສົມ, ພິເສດແມ່ນບັນຊີບັນດາຂະແໜງ, ອາຊີບທີ່ມີເງື່ອນໄຂດຳເນີນທຸລະກິດ. ໃນຕົວຈິງ, ມີບາງຂະແໜງ, ອາຊີບ ບໍ່ຈຳເປັນຕ້ອງມີເງື່ອນໄຂດຳເນີນທຸລະກິດຕາມຄວາມຮຽກຮ້ອງຂອງລັດຖະທຳມະນູນ ແລະ ກົດໝາຍ. ເພາະສະນັ້ນ, ພວກຂ້າພະເຈົ້າພວມກວດກາເພື່ອສະເໜີຕໍ່ລັດຖະບານ, ສະພາແຫ່ງຊາດ ປະກາດໃຊ້ກົດໝາຍເພື່ອປັບປຸງກົດໝາຍຫຼາຍສະບັບທີ່ກ່ຽວຂ້ອງເຖິງການດຳເນີນທຸລະກິດ, ໃນນັ້ນລວມທັງກົດໝາຍວ່າດ້ວຍການລົງທຶນ ແລະ ກົດໝາຍວ່າດ້ວຍວິສາຫະກິດ ເພື່ອຮັບປະກັບລັກສະນະສະເໝີຕົ້ນສະເໝີປາຍຂອງລະບົບກົດໝາຍ ແລະ ຮັບປະກັນສະພາບແວດລ້ອມແຫ່ງການດຳເນີນທຸລະກິດໃຫ້ດີທີ່ສຸດ, ຮັບປະກັນສິດເສລີໃນການດຳເນີນທຸລະກິດຂອງປະຊາຊົນ ແລະ ວິສາຫະກິດ”.
ເຖິງວ່າໜ່ວຍປະຕິບັດກົດໝາຍວ່າດ້ວຍການລົງທຶນ ແລະ ກົດໝາຍວ່າດ້ວຍວິສາຫະກິດ ໄດ້ພ້ອມກັບກະຊວງແຜນການ ແລະ ການລົງທຶນ, ຫ້ອງວ່າການລັດຖະບານ ແລະ ກະຊວງຍຸຕິທຳ ກວດກາ, ຍົກເລີກເງື່ອນໄຂດຳເນີນທຸລະກິດທີ່ບໍ່ເໝາະສົມ, ກໍ່ຄວາມຫຍຸ້ງຍາກໃຫ້ວິສາຫະກິດນັບພັນຂໍ້; ພ້ອມທັງ, ຕັ້ງໜ້າແນະນຳໃຫ້ບັນດາກະຊວງ, ຂະແໜງການທີ່ກ່ຽວຂ້ອງໃນການສ້າງ, ຮຽບຮຽງບັນດາດຳລັດກ່ຽວກັບເງື່ອນໄຂດຳເນີນທຸລະກິດ, ແຕ່ມາຮອດປະຈຸບັນ, ຍັງມີເງື່ອນໄຂດຳເນີນທຸລະກິດບໍ່ຈຳເປັນຫຼາຍຂໍ້, ທັງກີດຂວາງສະພາບແວດລ້ອມແຫ່ງການດຳເນີນທຸລະກິດ, ທັງບໍ່ຮັບປະກັນຜົນສັກສິດຂອງການຄຸ້ມຄອງລັດຢູ່. ທ່ານ ຟານດຶກຮ໋ຽວ, ຮອງຫົວໜ້າສະຖາບັນ, ຄົ້ນຄວ້າຄຸ້ມຄອງເສດຖະກິດສູນກາງໃຫ້ຮູ້ວ່າ.
“ໃນການກວດກາຫວ່າງແລ້ວນີ້, ລັດຖະບານໄດ້ມອບໃຫ້ກະຊວງແຜນການ ແລະ ການລົງທຶນເປັນເຈົ້າພາບສ້າງກົດໝາຍ 1, ດ້ວຍຄາດໝາຍແມ່ນປັບປຸງບັນດາກົດໝາຍທີ່ກ່ຽວຂ້ອງເພື່ອຮັບປະກັນບັນດາຈິດໃຈ ແລະ ເນື້ອໃນຂອງກົດໝາຍວ່າດ້ວຍການລົງທຶນ ແລະ ກົດໝາຍວ່າດ້ວຍວິສາຫະກິດ ໄດ້ຮັບການປະຕິບັດຢ່າງເຖິງຖອງກວ່າ, ເພື່ອບໍ່ຖືກຈຳກັດຍ້ອນບັນດາຂໍ້ກຳນົດອື່ນໆ. ທີ 2 ແມ່ນລົບລ້າງບັນດາສິ່ງທີ່ບໍ່ເໝາະສົມ ຫຼື ຂັດແຍ່ງກັນລະຫວ່າງກົດໝາຍວ່າດ້ວຍການລົງທຶນ, ກົດໝາຍວ່າດ້ວຍວິສາຫະກິດ ແລະ ບັນດາກົດໝາຍທີ່ກ່ຽວຂ້ອງ. ທີ 3 ແມ່ນ, ໃນອາຍຸການນີ້, ສະພາແຫ່ງຊາດກໍມອບໜ້າທີ່ກວດກາຄືນນັບທັງ 267 ຂະແໜງອາຊີບດຳເນີນທຸລະກິດຕ້ອງມີເງື່ອນໄຂ ເພື່ອຍົກເລີກບັນດາຂະແໜງອາຊີບດຳເນີນທຸລະກິດທີ່ມີເງື່ອນໄຂຫາກບໍ່ຈຳເປັນອີກ.”
ເພື່ອຍົກສູງປະສິດທິຜົນຕົວຈິງຂອງກົດໝາຍວ່າດ້ວຍການລົງທຶນ ແລະ ກົດໝາຍວ່າດ້ວຍວິສາຫະກິດ, ໃນໄລຍະຈະມາເຖິງ, ລັດຖະມົນຕີກະຊວງແຜນການ ແລະ ການລົງທຶນ ໄດ້ຊີ້ນຳບັນດາຫົວໜ່ວຍທີ່ກ່ຽວຂ້ອງ ສືບຕໍ່ສຸມໃສ່ປັບປຸງກົດໝາຍໃຫ້ສຳເລັດ. ໃນນັ້ນ, ສຸມໃສ່ເຂົ້າໃນການສ້າງຄວາມສະດວກໃຫ້ວິສາຫະກິດ ຕາມຈິດໃຈມະຕິຂອງລັດຖະບານ ກ່ຽວກັບການປັບປຸງສະພາບແວດລ້ອມແຫ່ງການລົງທຶນ, ດຳເນີນທຸລະກິດ, ຍົກສູງກຳລັງແກ່ງແຍ້ງແຫ່ງຊາດ.