ການດຶງດູດ ແລະຍົກສູງຄຸນນະພາບການລົງທຶນໂດຍກົງຂອງຕ່າງປະເທດປີ 2015

ວັນອັງຄານ ທີ 29 ທັນວາ ຄ.ສ. 2015 | 15:23:43

(vovworld)- ໂດຍບໍ່ຫົວຊາຕໍ່ບັນດາການຜັນປ່ຽນຂອງໂລກ, ປີ 2015 ຫວຽດນາມ ຍັງຄົງດຶງດູດຈຳນວນເງິນລົງທຶນໂດຍກົງຂອງຕ່າງປະເທດ ເປັນຈຳນວນຫລາຍ ແລະ ເປັກປົກກະຕິ. ໄລ່ຮອດເດືອນ 11, ຍອດຈຳນວນເງິນລົງທຶນຈົດທະບຽນໃຫມ່ ແລະ ເພີ່ມຂຶ້ນ ບັນລຸ 20,22 ຕື້ USD. ບັນດາຄວາມມານະພະຍາຍາມປະຕິຮູບລະບອບນະໂຍບາຍ ແລະ ຍູ້ແຮງການເຊື່ອມໂຍງເຂົ້າກັບເສດຖະກິດສາກົນ ຂອງຫວຽດນາມ ໃນໄລຍະຜ່ານມາ ແມ່ນພື້ນຖານຮັກສາສະຖຽນລະພາບ ແລະ ການເຕີບໂຕຂອງການດຶງດູດເງິນລົງທຶນໂດຍກົງຂອງຕ່າງປະເທດ.

ການດຶງດູດ ແລະຍົກສູງຄຸນນະພາບການລົງທຶນໂດຍກົງຂອງຕ່າງປະເທດປີ 2015 - ảnh 1

ໂຄງການ Samsung ຂອງ ສເກົາຫລີ ຢູ່ ບັກນີງ
ພາບ:baomoi.com

ສະພາບການເສດຖະກິດມະຫາພາກໄດ້ຮັບການຮັກສາໄວ້ເປັນປົກກະຕິ, ໄພເງິນເຟີ້ຢູ່ໃນລະດັບຕ່ຳ, ຄ່າສະກຸນເງິນພາຍໃນປະເທດໝັ້ນທ່ຽງ, ພື້ນຖານໂຄງລ່າງຄົມມະນາຄົມ, ສັງຄົມໄດ້ຮັບການປັບປຸງດີສົມຄວນ ນັ້ນແມ່ນສາຍເຫດທີ່ສ້າງຄວາມດູດດື່ມໃຫຍ່ສຳລັບນັກລົງທຶນຕ່າງປະເທດ. ກ່າວຄຳເຫັນທີ່ເວທີປາໄສການລົງທຶນ ຫວຽດນາມ ທົ່ວໂລກ ຊຶ່ງຖືກຈັດຂຶ້ນໃນເດືອນ 9/2015 ຢູ່ຮ່າໂນ້ຍ, ທ່ານ ບູ່ຍກວາງວີງ, ລັດຖະມົນຕີວ່າການກະຊວງແຜນການ ແລະ ການລົງທຶນຫວຽດນາມ ໃຫ້ຮູ້ວ່າ: ສະພາບແວດລ້ອມແຫ່ງການລົງທຶນຢູ່ຫວຽດນາມໃນປີຜ່ານມາ ໄດ້ຮັບການປັບປຸງຢ່າງແຮງ, ເປັນຕົ້ນແມ່ນ ນະໂຍບາຍກົດໝາຍ. ລະອຽດຄື: ກົດໝາຍວ່າດ້ວຍການລົງທຶນ ສະບັບປັບປຸງ ແລະ ກົດໝາຍວ່າດ້ວຍວິສາຫະກິດ ສະບັບປັບປຸງ ໄດ້ຮັບການຮັບຮອງເອົາຈາກສະພາແຫ່ງຊາດໃນປີ 2014 ໄດ້ເສີມຂະຫຍາຍຢ່າງມີປະສິດທິຜົນ. ກົດໝາຍວ່າດ້ວຍການລົງທຶນສະບັບໃຫມ່ ໄດ້ຍົກເລີກລະບຽບການກວດກາຢັ້ງຢືນການລົງທຶນ, ຫລຸດຜ່ອນເວລາເຮັດລະບຽບການຈົດທະບຽນໃຫ້ນັກລົງທຶນ, ບັນດາຂະແຫນງອາຊີບທີ່ຫ້າມການດຳເນີນທຸລະກິດ, ການດຳເນີນທຸລະກິດມີເງື່ອນໄຂໄດ້ຫລຸດຜ່ອນຫລາຍເມື່ອທຽບໃສ່ກ່ອນນີ້. ກົດໝາຍວ່າດ້ວຍວິສາຫະກິດ ສະບັບໃຫມ່ ກໍໄດ້ສ້າງບາດກ້າວບຸກທະລຸ ເມື່ອບໍ່ຈຳກັດຈຳນວນ, ຂະແຫນງອາຊີບເຄື່ອນໄຫວດຳເນີນທຸລະກິດຂອງວິສາຫະກິດ. ບັນດາການປ່ຽນແປງນີ້ໄດ້ສ້າງຄວາມດຶງດູດ ອັນໃຫຍ່ຫລວງໃຫ້ນັກລົງທຶນຕ່າງປະເທດ.

ໃນປີ 2015, ເປັນຫນ້າສົນໃຈແມ່ນການຫັນທິດຂອງກະແສເງິນລົງທຶນຂອງຕ່າງປະເທດ. ຖ້າຫາກຊຸມປີກ່ອນນີ້, ການລົງທຶນຂອງຕ່າງປະເທດສຸມໃສ່ເຂົ້າໃນຂົງເຂດການເງິນ, ຫລັກຊັບ, ອະສັງຫາລິມະສັບ.. ໃນຊຸມປີມໍ່ໆມານີ້ ທ່າອ່ຽງການລົງທຶນໄດ້ຫັນໄປສູ່ບັນດາຂົງເຂດການຜະລິດ, ດຳເນີນທຸລະກິດຄື: ອຸດສາຫະກຳພະລັງງານ, ອຸດສາຫະກຳຫນູນຊ່ວຍ, ອຸດສາຫະກຳປຸງແຕ່ງ, ການປະດິດສ້າງ ແລະ ເປັນຕົ້ນແມ່ນການລົງທຶນເຂົ້າໃນການຜະລິດກະສິກຳ.. ແມ່ນບັນດາຂົງເຂດມີຄວາມໝາຍສຳຄັນ, ແທດຈິງ, ສອດຄອ່ງກັບຄວາມຮຽກຮ້ອງຕ້ອງການພັດທະນາ ແລະ ການເຊື່ອມໂຍງເຂົ້າກັບເສດຖະກິດໂລກຂອງຫວຽດນາມ. ໃນຊຸມປີມໍ່ໆມານີ້ ແຂວງ ບີ່ງເຢືອງ ພຽງແຕ່ວາງຄາດໝາຍດຶງດູດເງິນລົງທຶນຂອງຕ່າງປະເທດ ສະເລ່ຍ 1 ຕື້ USD/ປີ. ແຕ່ລະປີ ແຫລ່ງເງິນລົງທຶນຂອງຕ່າງປະເທດລ້ວນແຕ່ລື່ນກາຍຄາດໝາຍທີ່ວາງອອກ ແລະ ຍາມໃດກໍນອນໃນບັນຊີລາຍຊື່ບັນດາແຂວງ, ນະຄອນ ນຳຫນ້າໃນການດຶງດູດທຶນ FDI ຫລາຍກວ່າໝູ່ໃນທົ່ວປະເທດ. ແຂວງ ບີງເຢືອງ ໄດ້ເປັນເຈົ້າການເລືອກເຟັ້ນບັນດາໂຄງການລົງທຶນທີ່ເໝາະສົມກັບການພັດທະນາຂອງທ້ອງຖິ່ນ, ສົ່ງເສີມດຶງດູດບັນດາກຸ່ມບໍລິສັດ, ວິສາຫະກິດມີຄວາມສາມາດດ້ານການເງິນຢ່າງແຮງ ແລະ ຕະຫລາດທີ່ກວ້າງໃຫຍ່, ດຶງດູດບັນດາຂະແຫນງອຸດສາຫະກຳສູງ, ສ້າງຜະລິດຕະພັນມີມູນຄ່າເພີ່ມຄື: ໄຟຟ້າ, ເອເລັກໂຕນິກ, ການຢາ, ກົນຈັກ. ທ່ານ ມາຍຮູ່ງຢູງ, ຜູ້ອຳນວຍການພະແນກແຜນການ ແລະ ການລົງທຶນ ແຂວງ ບີງເຢືອງ ໃຫ້ຮູ້ວ່າ:

“ຈຳກັດການລົງທຶນທີ່ກໍ່ມົນລະພິດເຖິງສິ່ງແວດລ້ອມ, ນຳໃຊ້ຄົນງານຫລາຍ. ຄຽງຄູ່ກັນນັ້ນ ແຂວງ ກໍສົ່ງເສີມບັນດານັກລົງທຶນນຳໃຊ້ເຕັກໂນໂລຊີສະອາດ ລົງທຶນຢູ່ນອກເຂດອຸດສາຫະກຳ, ເປັນຕົ້ນແມ່ນບັນດາແຂວງທາງພາກເຫນືອ. ສ່ວນພາກໃຕ້ ຍັງຄົງໃຫ້ບຸລິມະສິດພັດທະນາບໍລິການ. ນັກລົງທຶນສ່ວນຫລາຍມີຄວາມພຶງພໍໃຈ ເພາະທຸກສິ່ງທຸກຢ່າງທີ່ພວກເຂົາເຈົ້າປະຕິບັດຕາມການຊີ້ນຳຂອງຄະນະພັກ, ຄະນະກຳມະການປະຊາຊົນແຂວງລ້ວນແຕ່ໄດ້ຮັບການສ້າງເງື່ອນໄຂເພື່ອໃຫ້ວິສາຫະກິດພັດທະນາດີກວ່າ.”

ປີ 2015, ບັນດານັກລົງທຶນຕ່າງປະເທດ ລົງທຶນເຂົ້າ 18 ຂະແຫນງ, ຂົງເຂດ, ໃນນັ້ນ ອຸດສາຫະກຳປຸງແຕ່ງ, ປະດິດສ້າງ ແມ່ນຂົງເຂດດຶງດູດນັກລົງທຶນຕ່າງປະເທດເປັນຈຳນວນຫລາຍ ດ້ວຍ 892 ໂຄງການລົງທຶນຈົດທະບຽນໃຫມ່ ແລະ 491 ໂຄງການທີ່ເພີ່ມເງິນລົງທຶນ. ບັນດາໂຄງການລົງທຶນໃນປີນີ້ ແມ່ນສຸມໃສ່ເຂົ້າໃນບັນດາຂົງເຂດຜະລິດ, ແຈກຢາຍໄຟຟ້າ, ດຳເນີນທຸລະກິດອະສັງຫາລິມະຊັບ. ປະຈຸບັນ ມີ 57 ປະເທດ ແລະ ເຂດແຄ້ວນມີໂຄງການລົງທຶນຢູ່ ຫວຽດນາມ. ໃນນັ້ນ ສເກົາຫລີ ນຳຫນ້າ ດ້ວຍຍອດຈຳນວນເງິນລົງທຶນຈົດທະບຽນໃຫມ່ ແລະ ເພີ່ມເຕີມ 6,3 ຕື້ USD. ຖັດມາແມ່ນ ມາເລເຊຍ, ຍີ່ປຸ່ນ ແລະ British Virgin Islands. ບັນດາໂຄງການລົງທຶນໃຫຍ່ພົ້ນເດັ່ນນັ້ນແມ່ນ: ໂຄງການໂຮງງານໄຟຟ້າ ຢວຽນຫາຍ 2 ຂອງນັກລົງທຶນ ມາເລເຊຍ ຢູ່ ແຂວງ ຈາວີງ; ໂຄງການບໍລິສັດ Samsung Display ຫວຽດນາມ ສເກົາຫລີ ຢູ່ ແຂວງ ບັກນີງ, ໂຄງການຂອງບໍລິສັດ ຮ່ວມທຸລະກິດ ນະຄອນ ເດເວືອງ ຈຳກັດ ມີຍອດຈຳນວນເງິນລົງທຶນ 1,2 ຕື້ USD ໂດຍບໍລິສັດອະສັງຫາລິມະຊັບ ທຽນເຟືອກ ແລະ ບໍລິສັດອະສັງຫາລິມະຊັບ ເຈີນທາຍ ຈຳກັດ ຮ່ວມທຸລະກິດກັບນັກລົງທຶນ Denver Power Ltd ລາຊະອານາຈັກ ອັງກິດ ລົງທຶນ ຢູ່ ນະຄອນ ໂຮ່ຈິມີນ.

ກ່າວຄຳເຫັນທີ່ເວທີປາໄສການລົງທຶນຫວຽດນາມ ທົ່ວໂລກ ໂດຍມີການເຂົ້າຮ່ວມຂອງບັນດາການນຳກຸ່ມບໍລິສັດ, ບັນດານັກລົງທຶນໃຫຍ່ໃນໂລກ, ທ່ານນາຍົກລັດຖະມົນຕີ ຫງວຽນເຕີນຢູງ ໄດ້ເນັ້ນຫນັກວ່າ ເຖິງວ່າ ຍັງປະສົບກັບຄວາມຫຍຸ້ງຍາກຫລາຍຢ່າງກໍຕາມ, ແຕ່ໄລຍະ 2011-2015 ຫວຽດນາມ ຍັງຄົງບັນລຸລະດັບເຕີບໂຕ GDP ສະເລ່ຍ 5,9%, ຕາມທິດເພີ່ມຂຶ້ນ, ປີ 2015 ບັນລຸກວ່າ 6,5%. ຄຽງຄູ່ກັນນັ້ນ ດ້ວຍບັນດາສັນຍາການຄ້າເສລີພວມເປີດຕະຫລາດການຄ້າທີ່ກວ້າງໃຫຍ່ ລະຫວ່າງ ຫວຽດນາມ ກັບ 55 ຄູ່ຮ່ວມມື ລວມທັງໝົດບັນດາສະມາຊິກກຸ່ມ G7 ແລະ 15 ສະມາຊິກ ຂອງ G20. ທ່ານນາຍົກລັດຖະມົນຕີ ຫງວຽນເຕີນຢູງ ຊີ້ແຈ້ງວ່າ:

“ພວກຂ້າພະເຈົ້າປະຕິບັດໂຄງການປະຕິຮູບຮູບການລົງທຶນແຫ່ງລັດ, ສ້າງສະພາບແວດລ້ອມສະດວກໃຫ້ພາກເອກະຊົນພາຍໃນປະເທດ ແລະ ສາກົນເຂົ້າຮ່ວມລົງທຶນພື້ນຖານໂຄງລ່າງ ດ້ວຍການບຸລິມະສິດໃຫ້ບັນດາໂຄງການມີເຕັກໂນໂລຊີສູງ, ອຸດສາຫະກຳ ແລະ ບໍລິການຫນູນຊ່ວຍ. ດຳລັດລົງທຶນຕາມຮູບການ PPP ໄດ້ມີຜົນສັກສິດ ຈະສ້າງປະຖົມປັດໃຈເພື່ອເປີດກາລະໂອກາດດຶງດູດການເຂົ້າຮ່ວມຂອງພາກເອກະຊົນ, ພິເສດແມ່ນແຫລ່ງທຶນ FDI.”

ປີ 2015 ແມ່ນປີທີ່ຫວຽດນາມເຂົ້າຮ່ວມການເຄື່ອນໄຫວເສດຖະກິດການຕ່າງປະເທດຫລາຍຢ່າງ ມີລັກສະນະເປັນບາດລ້ຽວ. ຫວຽດນາມ ໄດ້ລົງນາມ ແລະ ສິ້ນສຸດການເຈລະຈາສັນຍາສຳຄັນ 4 ສະບັບ ກັບບັນດາຕະຫລາດໃຫຍ່. ໃນນັ້ນ ໄດ້ສິ້ນສຸດການເຈລະຈາສັນຍາໃຫຍ່ 2 ສະບັບ ຄື: ສັນຍາຄູ່ຮ່ວມມືຂ້າມປາຊີຟີກ TPP, ສັນຍາການຄ້າເສລີ ຫວຽດນາມ ອີຢູ, ສັນຍາການຄ້າ 2 ສະບັບໄດ້ຮັບການລົງນາມ ນັ້ນແມ່ນ: ສັນຍາການຄ້າເສລີ ຫວຽດນາມ ພັນທະມິດເສດຖະກິດ ອາຊີ ເອີລົບ ແລະ ສັນຍາການຄ້າເສລີ ຫວຽດນາມ ສເກົາຫລີ. ພ້ອມກັບບັນດາຄວາມມານະພະຍາຍາມໃນການປະຕິຮູບດ້ານບໍລິຫານ, ການປະຕິຮູບລະບອບນະໂຍບາຍພາຍໃນປະເທດ ແລະ ຍູ້ແຮງການເຊື່ອມໂຍງເຂົ້າກັບເສດຖະກິດສາກົນ ໄດ້ກາຍເປັນກຳລັງຫນູນ, ເປີດກາລະໂອກາດຫລາຍຢ່າງເພື່ອໃຫ້ຫວຽດນາມ ຍູ້ແຮງການດຶງດູດເງິນລົງທຶນຂອງຕ່າງປະເທດໃນໄລຍະຈະມາເຖິງ.