(vovworld)- ກະສິກຳພວມໄດ້ຮັບຖືວ່າ ແມ່ນພື້ນຖານພັດທະນາສຳຄັນຂອງພື້ນຖານເສດຖະກິດຫວຽດນາມ, ເປັນຕົ້ນໃນໄລຍະເສດຖະກິດໂລກໍຄືຢູ່ຫວຽດນາມ ຍັງປະສົບກັບຄວາມຫຍຸ້ງຍາກຍ້ອນວິກິດການ. ເລື່ອງຫັນປ່ຽນຜົນລະປູກ, ນຳວິທະຍາສາດເຕັກນິກເຂົ້າໃນການຜະລິດ ເພື່ອຍົກສູງມູນຄ່າຜະລິດຕະພັນກະເສດເພື່ອສົ່ງອອກ, ເປັນຕົ້ນສຳລັບການຜະລິດເຂົ້າສານສົ່ງອອກແມ່ນບັນຫາຊື່ງຫວຽດນາມ ພວມເອົາໃຈໃສ່.
ພາບປະກອບ:internet
|
ລະດູການຜະລິດເຂົ້າລະດູຫນາວຕໍ່ລະດູບານໃຫມ່ 2013-2014, ຊາວກະສິກອນຢູ່ເຂດທົ່ງພຽງແມ່ນຳ້ຂອງທາງພາກໃຕ້ຫວຽດນາມ ໄດ້ຮັບຜົນດີ. ຢູ່ທ້ອງຖິ່ນຫລາຍແຫ່ງ, ຊາວກະສິກອນພວມເກັບກ່ຽວເຂົ້າລະດູຫນາວຕໍ່ລະດູບານໃຫມ່ ດ້ວຍສະມັດຕະພາບສະເລ່ຍບັນລຸເກືອບ 7 ໂຕນ/ເຮັກຕາ, ບາງສະຖານທີ່ບັນລຸ 10 ໂຕນ/ເຮັກຕາ. ເຖິງວ່າ ລະດູການເກັບກ່ຽວໄດ້ຮັບຜົນດີກໍຕາມ ແຕ່ຊາວກະສິກອນ ພັດເປັນຫ່ວງກັງວົນວ່າ ລາຄາເຂົ້າສານຫລຸດລົງ. ກາງເດືອນ 3, ລັດຖະບານ ໄດ້ຜັນຂະຫຍາຍລາຍການຊື້ເຂົ້າສານ ແຮໄວ້ 1 ລ້ານໂຕນ ເພື່ອແບ່ງເບົາຄວາມຫຍຸ້ງຍາກໃຫ້ແກ່ຊາວກະສິກອນ ແລະ ຊ່ວຍຮັກສາລາຄາເຂົ້າສານໃຫ້ເປັນປົກກະຕິ. ແຕ່ການຊື້ເຂົ້າສານແຮໄວ້ພຽງແຕ່ຮັບປະກັນບໍ່ໃຫ້ລາຄາເຂົ້າຫລຸດລົງຫລາຍເທ່ົານັ້ນ ຫາກບໍ່ເຮັດໃຫ້ລາຄາເຂົ້າເພີ່ມຂຶ້ນ, ຂະນະທີ່ຕະຫລາດສົ່ງອອກພວມແກ້ງແຍ້ງຢ່າງແຮງ, ຍາມໃດລາຄາເຂົ້າຂອງຫວຽດນາມ ກໍຕຳ່ກວ່າເມື່ອທຽບໃສ່ບັນດາປະເທດສົ່ງອອກເຂົ້າສານອື່ນ. ໃນຈຸດເວລານີ້, ບັນດາແຂວງຢູ່ເຂດທົ່ງພຽງແມ່ນຳ້ຂອງ ເກັບກ່ຽວເຂົ້າໄດ້ປະມານ 700 ເຮັກຕາ ແລະ ຄາດວ່າຮອດເດືອນ 4/2014 ຈະເກັບກ່ຽວກວ່າ 1.600.000 ເຮັກຕາ. ທ່ານ ຫງວຽນຟອງກວາງ, ຮອງຫົວຫນ້າຄະນະປະຈຳ, ຄະນະຊີ້ນຳເຂດຕາເວັນຕົກພາກໃຕ້ ໃຫ້ຮູ້ວ່າ:
“ການຜະລິດເປັນຈຳນວນຫລວງຫລາຍ, ການເກັບກ່ຽວໄດ້ຮັບຜົນດີ ແຕ່ລາຄາພັດຫລຸດລົງ. ຊາວກະສິກອນແມ່ນຜູ້ປະສົບກັບຄວາມຫຍຸ້ງຍາກກວ່າໝູ່. ນີ້ແມ່ນບັນຫາໃຫຍ່ຢູ່ເຂດທົ່ງພຽງແມ່ນຳ້ຂອງ. ສະນັ້ນ ຕ້ອງມີການຄົ້ນຄ້ວາຢ່າງລະອຽດ. ບັນຫາຕົ້ນຕໍ ນັ້ນແມ່ນ ຕ້ອງມີມາດຕະການເປັນເຈົ້າການໃນການເກັບຊື້, ແຮໄວ້ ເພື່ອຮັກສາລາຄາໃຫ້ເປັນປົກກະຕິນັບແຕ່ຕົ້ນລະດູການຈົນເຖິງທ້າຍລະດູການ. ”
ຄຽງຄູ່ກັບການເພີ່ມມູນຄ່າ, ແກ້ໄຂສົ້ນອອກໃຫ້ແກ່ຕົ້ນເຂົ້າ, ຮັບປະກັນຜົນປະໂຫຍດໃຫ້ແກ່ຊາວກະສິກອນຄືກຳລັງປະຕິບັດ, ຫວຽດນາມ ໄດ້ເປັນເຈົ້າການມີຍຸດທະສາດພັດທະນາກະສິກຳແບບຍືນຍົງ ແລະ ປະສິດທິຜົນ. ໂຄງການສັງລວມສ້າງໂຄງປະກອບພື້ນຖານກະສິກຳຄືນໃຫມ່ ດ້ວຍແຜນນະໂຍບາຍຍູ້ແຮງການຫັນປ່ຽນຜົນລະປູກ, ກໍ່ສ້າງທົ່ງນາຂະຫນາດໃຫຍ່, ນຳວິທະຍາສາດເຕັກນິກເຂົ້າໃນການຜະລິດກະສິກຳ ເພື່ອຍົກສູງມູນຄ່າຜະລິດຕະພັນກະເສດສົ່ງອອກ ໄດ້ຮັບຖືວ່າແມ່ນທິດກ້າວເດີນຢ່າງຖືກຕ້ອງ ແລະ ຍາວນານ ເພື່ອໃຫ້ພື້ນຖານກະສິກຳຫວຽດນາມ ພັດທະນາເປັນປົກກະຕິ.
ຄວາມຈິງໃຫ້ເຫັນວ່າ: ທົ່ງນາຂະຫນາດໃຫຍ່, ແມ່ນຮູບແບບການຜະລິດຕາມທິດເປັນຈຸດສຸມ ໂດຍມີການເຂົ້າຮ່ວມຢ່າງແຮງຂອງວິສາຫະກິດ ພວມຄ່ອຍໆໄດ້ຮັບການຢັ້ງຢືນໝາກຜົນກ່ຽວກັບດ້ານເສດຖະກິດ, ສັງຄົມ. ເລື່ອງເຂົ້າຮ່ວມ ທົ່ງນາຂະຫນາດໃຫຍ່ ອາດຈະຫລຸດຜ່ອນລາຄາຜະລິດ, ປັບປຸງສະມັດຕະພາບ, ຄຸນນະພາບ, ກ້າວໄປເຖິງການສ້າງເຄື່ອງໝາຍການຄ້າເພື່ອຍົກສູງມູນຄ່າເຂົ້າສານແຕ່ຍັງຮັບປະກັນການສ້າງກຳໄລ. ເລ່ືອງຜັນຂະຫຍາຍທ່ົງນາຂະຫນາດໃຫຍ່ຢູ່ ຫລາຍທ້ອງຖິ່ນໃນໄລຍະຜ່ານມາສະແດງໃຫ້ເຫັນວ່າ ເມື່ອເຂົ້າຮ່ວມຮູບແບບນີ້, ຊີວິດການເປັນຢູ່ຂອງຊາວກະສິກອນ ມີການປ່ຽນແປງຢ່າງເຫັນໄດ້ຊັດ. ທ່ານ ຫງວຽນວັນຕັກ ຢູ່ຕາແສງ ຫວີງບີງ ເມືອງ ເຈົາແທ່ງ ຢູ່ແຂວງ ອານຢາງ ໃຫ້ຮູ້ວ່າ:
“ຮູບແບບການຮ່ວມສຳພັນໃນການຜະລິດຂອງທົ່ງນາຂະຫນາດໃຫຍ່ ແມ່ນຮູບແບບທີ່ຂ້າພະເຈົ້າ ແລະ ຊາວກະສິກອນຫລາຍຄົນເຫັນວ່າເໝາະສົມທີ່ສຸດ. ຜ່ານນັ້ນ ຊາວກະສິກອນໄດ້ຮັບຜົນປະໂຫຍດຢ່າງແທ້ຈິງກວ່າຈາກການສ້າງເຄື່ອງໝາຍການຄ້າສົ່ງອອກເຂົ້າສານ.”
ເລື່ອງສ້າງຮູບແບບຮ່ວມສຳພັນລະຫວ່າງລັດ, ນັກວິທະຍາສາດ, ວິສາຫະກິດ ແລະ ຊາວກະສິກອນ ນັບມື້ນັບແຫນ້ນແຟ້ນກວ່າ. ຜ່ານບັນດາສັນຍາການຄ້າ, ວິສາຫະກິດ ໄດ້ສະຫນອງແນວພັນ, ຝຸ່ນເຄມີ, ຢາປາບສັດຕູພືດ, ກົນຈັກ, ອຸປະກອນຮັບໃຊ້ການນຳໃຊ້ກົນຈັກໃນການຜະລິດເຂົ້າ. ມາຮອດເວລາເກັບກ່ຽວ, ວິສາຫະກິດໝັ້ນໝາຍຊື້ເຂົ້າຂອງຊາວກະສິກອນດ້ວຍລາຄາເໝາະສົມ. ເມື່ອທຽບໃສ່ບັນດາທົ່ງນາບໍ່ຂຶ້ນກັບທົ່ງນາຂະຫນາດໃຫຍ່, ບັນດາທົ່ງນາໃນຮູບແບບນີ້ແມ່ນສ້າງກຳໄລສູງກວ່າ. ອ້າຍ ຫງວຽນວັນເກືອງ, ຊາວກະສິກອນຜະລິດເຂົ້າຢູ່ທົ່ງນາຂະຫນາດໃຫຍ່ ຫວີງບີງ ໂດຍບໍລິສັດປ້ອງກັນພືດ ອານຢາງ ລົງທຶນ ໃຫ້ຮູ້ວ່າ:
“ຈາກສະພາບ ລະດູເກັບກ່ຽວໄດ້ຮັບຜົນດີ ແຕ່ລາຄາຖືກຫລຸດລົງ, ປະຈຸບັນ ໂດຍມີການຮ່ວມສຳພັນກັບບໍລິສັດ, ຊາວກະສິກອນຜະລິດເຂົ້າເລືອກເອົາຜູ້ຊື້ເຂົ້າຕາມໃຈ. ຕົວຢ່າງ ປະຈຸບັນ ເມື່ອເກັບກ່ຽວສຳເລັດແລ້ວ ເຫັນວ່າ ລາຄາເຂົ້າເໝາະສົມຈະຂາຍເລີຍ. ຖ້າຫາກລາຄາຕຳ່ ແມ່ນແຮໄວ້ ຖ້າເວລາລາຄາເພີ່ມຂຶ້ນຈຶ່ງຂາຍ”
ຫວຽດນາມ ໄດ້ກາຍເປັນປະເທດສົ່ງອອກເຂົ້າສານນຳຫນ້າໂລກ ແລະ ຜະລິດຕະພັນກະເສດຈຳນວນຫນຶ່ງ. ຂະແຫນງກະສິກຳ ຫວຽດນາມ ກໍໄດ້ຄິດໄລ່ເຖິງປັດໄຈເພື່ອເຮັດໃຫ້ການເຕີບໂຕບັນລຸລະດັບສູງກວ່າ ນັ້ນແມ່ນ: ຊັບພະຍາກອນທຳມະຊາດ, ທີ່ດິນ, ແຫລ່ງຊັບພະຍາກອນມະນຸດ. ເພາະວ່າ ບັນດາປັດໄຈນີ້ ບໍ່ມີຄຸນປະໂຫຍດຕັດສິນຊີ້ຂາດ. ແທນທີ່ນັ້ນ, ເລື່ອງສ້າງໂຄງປະກອບຜົນລະປູກ, ສັດລ້ຽງຄືນໃຫມ່, ແລະ ລະດັບຄວາມຮູ້ໃນການໝູນໃຊ້ວິທະຍາສາດເຕັກໂນໂລຊີ ຈຶ່ງແມ່ນປັດໄຈຕົ້ນຕໍເພື່ອຊ່ວຍຂະແຫນງກະສິກຳຢືນຢັນປະສິດທິຜົນໃນອັດຕາສ່ວນໂຄງປະກອບເສດຖະກິດຂອງປະເທດຊາດ.