(vovworld) - ປີ 2012, ໃນສະພາບທີ່ພື້ນຖານເສດຖະກິດພວມປະສົບກັບຄວາມຫຍຸ້ງຍາກຫຼາຍຢ່າງນັ້ນ, ແຕ່ການສົ່ງອອກຍັງຄົງບັນລຸລະດັບເຕີບໂຕດີພໍສົມຄວນ ແລະ ຖືກຖືວ່າແມ່ນຈຸດພົ້ນເດັ່ນຂອງພື້ນຖານເສດຖະກິດຫວຽດນາມ.
(ພາບປະກອບ)
ຕາມຕົວເລກລ້າສຸດຂອງກະຊວງອຸດສາຫະກຳ ການຄ້າ ຫວຽດນາມ ແລ້ວ, ວົງເງິນສົ່ງອອກໃນເດືອນ 11 ບັນລຸໄດ້ 10,2 ຕື້ ໂດລາສະຫະລັດ, ແລະ ໄລ່ລວມ 11 ເດືອນໃນປີ 2012 ແມ່ນບັນລຸໄດ້ກວ່າ 104 ຕື້ ໂດລາສະຫະລັດ, ເພີ່ມ ຂຶ້ນ18,4% ເມື່ອທຽບໃສ່ໄລຍະດຽວກັນຂອງປີ 2011. ດ້ວຍຄວາມສະດວກຕ່າງໆໃນເດືອນທ້າຍປີ, ການສົ່ງອອກຂອງຫວຽດນາມ ຈະລື່ນກາຍຄາດໝາຍທີ່ໄດ້ວາງອອກໃນປີ 2012 ແມ່ນ 109 ຕື້ ໂດລາສະຫະລັດ. ຕາມການຕີລາຄາຂອງກະຊວງອຸດສາຫະກຳ ການຄ້າແລ້ວ, ສະພາບການສົ່ງອອກຂອງຫວຽດນາມໃນປີຜ່ານມາ ແມ່ນມີການຫັນປ່ຽນຕາມທິດເພີ່ມໝວດສິນຄ້າປຸງແຕ່ງ, ຜະລິດ, ໝວດສິນຄ້ານຳໃຊ້ເຕັກໂນໂລຢີສູງ ແລະ ພູມປັນຍາ, ຫຼຸດຜ່ອນການສົ່ງອອກວັດຖຸດິບ. ການສົ່ງອອກຂອງຫວຽດນາມໃນປີຜ່ານມາແມ່ນມີບັນດາປັດໃຈໃໝ່ຄື: ນອກຈາກສິນຄ້າສົ່ງອອກທີ່ເປັນມູນເຊື້ອຄື: ໄມ້, ເຄື່ອງເຟີນີເຈີ, ເຄື່ອງຕ່ຳແຜ່ນຕັດຫຍິບ, ເກີບຫຼາຍປະເພດ, ຜະລິດຕະພັນກະເສດ, ເຄື່ອງປ່າຂອງດົງເຊັ່ນ: ເຂົ້າສານ, ກາເຟ, ຢາງພາລາ ແລ້ວ. ຍັງມີສິນຄ້າປະເພດຕ່າງໆທີ່ມີມູນຄ່າສົ່ງອອກສູງ. ໃນນັ້ນ, ສະເພາະໂທລະສັບ, ຄອມພິວເຕີ, ຜະລິດຕະພັນເອເລກໂຕນິກ ແລະ ສິນສ່ວນ, ອັນໄດ້ປະກອບສ່ວນເພີ່ມວົງເງິນສົ່ງອອກໃນ 11 ເດືອນຜ່ານມາຂຶ້ນ 8,5 ຕື້ໂດລາສະຫະລັດ. ທ່ານ ໂງສີບັ່ງ, ຫົວໜ້າຄະນະຄຸ້ມຄອງບັນດາເຂດອຸດສາຫະກຳແຂວງບັກນິງ, ຖືວ່າ:
“ເມື່ອເລີ່ມດຶງດູດບັນດາໂຄງການເຕັກໂນໂລຢີສູງເຂົ້າມາລົງທຶນ, ພິເສດແມ່ນບັນດາໂຄງການເອເລກໂຕນິກ ໂທລະຄົມນັ້ນ, ມູນຄ່າສົ່ງອອກກໍ່ເລີ່ມມີບົດບາດສຳຄັນທີ່ສຸດ ແລະ ໃນຂົງເຂດນີ້, ພວກເຮົາໄດ້ກຳນົດທິດຢ່າງຖືກຕ້ອງ. ໃນໄລຍະຍາວ, ພວກເຮົາຈະສູມໃສ່ບັນດາໂຄງການເຕັກໂນໂລຢີສູງ, ມີມູນຄ່າເພີ່ມ, ສາມາດຍົກສູງວົງເງິນສົ່ງອອກຂອງຫວຽດນາມໄດ້”.
ຫວຽດນາມຊຸກຍູ້ການສົ່ງອອກເຄື່ອງເອເລກໂຕນິກ
(ພາບອິນເຕີແນດ)
ປີ 2012 ກໍ່ແມ່ນປີທີ່ບັນດາວິສາຫະກິດລົງທຶນໂດຍກົງຕ່າງປະເທດ FDI ໄດ້ປະກອບສ່ວນຢ່າງຕັ້ງໜ້າເຂົ້າໃນຂົງເຂດສົ່ງອອກ, ພິເສດແມ່ນສົ່ງອອກເຄື່ອງຈັກ, ອຸປະກອນ, ເຄື່ອງອາໄຫຼ່ ແລະ ພາຫະນະຂົນສົ່ງ. ສິນຄ້າທັງສອງປະເທດລ້ວນແຕ່ມີລະດັບເຕີບໂຕກວ່າ 60%. ສິ່ງດັ່ງກ່າວໄດ້ປະກອບສ່ວນສ້າງຄວາມດຸນດຽງລະຫວ່າງການສົ່ງອອກ ແລະ ນຳເຂົ້າຂອງຫວຽດນາມ. ໃນປະຈຸບັນ, ຫວຽດນາມມີສິນຄ້າ 22 ປະເພດບັນລຸລະດັບການສົ່ງອອກກວ່າ 1 ຕື້ໂດລາສະຫະລັດ (ເພີ່ມຂື້ນ 3 ປະເພດ ເມື່ອທຽບໃສ່ປີ 2011). ນັ້ນແມ່ນຜະລິດຕະພັນເຫຼັກກ້າ, ວັດຖຸໜຽວ, ກະເປົາ, ຫີບ, ຄັນຮົ່ມ. ບົດລາຍງານຂອງອົງການການຄ້າໂລກຫວ່າງແລ້ວນີ້ໃຫ້ຮູ້ວ່າ: ການສົ່ງອອກຂອງທົ່ວໂລກໃນປີ 2012 ເພີ່ມຂຶ້ນພຽງແຕ່ 5 – 6% ເທົ່ານັ້ນ, ແຕ່ໃນ 11 ເດືອນຜ່ານມາ, ຫວຽດນາມໄດ້ເພີ່ມຂຶ້ນກວ່າ 18%, ດັ່ງນັ້ນ, ນີ້ແມ່ນໝາກຜົນທີ່ໜ້າຊື່ນຊົມ. ຜູ້ຊ່ຽວຊານດ້ານເສດຖະກິດ ຫງວຽນມິງຟອງ, ຖືວ່າ:
”ເພື່ອບັນລຸໄດ້ໝາກຜົນດັ່ງກ່າວ, ຂະແໜງສົ່ງອອກຫວຽດນາມໄດ້ມີຄວາມມານະພະຍາຍາມທີ່ສຸດ, ໃນສະພາບການທີ່ຕະຫຼາດຖືກຮັດແຄບລົງ, ຮົ້ວປົກປ້ອງພວມເພີ່ມຂຶ້ນ ແລະ ຄ່າໃຊ້ຈ່າຍພາຍໃນປະເທດບໍ່ທັນຫຼຸດລົງຫຼາຍ. ພິເສດ, ເຖິງວ່າລາຄາສິນຄ້າສົ່ງອອກບາງປະເພດຖືກຫຼຸດລົງກໍ່ຕາມ, ແຕ່ຍ້ອນມີການປັບປຸງການສົ່ງອອກຢ່າງທັນການ, ດັ່ງນັ້ນຍັງຄົງບັນລຸຜົນງານທີ່ດີ, ສິ່ງດັ່ງກ່າວສະແດງໃຫ້ເຫັນຄວາມມານະພະຍາຍາມຂອງບັນດາວິສາຫະກິດໃນການຂຸດຄົ້ນຕະຫຼາດ”.
ການສົ່ງອອກເຂົ້າສານຂອງຫວຽດນາມ
(ພາບອິນເຕີແນດ)
ໃນຂະນະນັ້ນ, ຜະລິດຕະພັນກະເສດ, ເຄື່ອງປ່າຂອງດົງສົ່ງອອກຍັງຄົງບັນລຸລະດັບເຕີບໂຕສູງພໍສົມຄວນຄື: ມັນຕົ້ນເພີ່ມຂຶ້ນ 63,5%, ກາເຟເພີ່ມຂຶ້ນ 34,6%, ສິ່ງທີ່ໜ້າສົນໃຈແມ່ນໃນອົງປະກອບການສົ່ງອອກ, ໝວດສິນຄ້າອຸດສາຫະກຳປຸງແຕ່ງ, ຜະລິດ ບັນລຸມູນຄ່າ 67 ຕື້ໂດລາສະຫະລັດ, ກວມເຖິງ 64,3% ຍອດວົງເງິນສົ່ງອອກ. ນີ້ແມ່ນສັນຍານທີ່ໜ້າຊື່ນຊົມ, ສະແດງໃຫ້ເຫັນຄວາມເປັນເຈົ້າການໃນການກໍ່ສ້າງບັນດາຮາກຖານຜະລິດທີ່ທັນສະໄໝ, ເຕັກໂນໂລຢີສູງ, ເປັນກຳລັງໜູນປະກອບສ່ວນຍູ້ໄວວິວັດການຫັນພື້ນຖານເສດຖະກິດເປັນອຸດສາຫະກຳ ແລະ ທັນສະໄໝ.
ໃນປີຜ່ານມາ, ສິນຄ້າສົ່ງອອກຂອງຫວຽດນາມຍັງຮັກສາທີ່ຕັ້ງໝັ້ນຄົງໃນຕະຫຼາດທີ່ມີຢູ່ແລ້ວຄື: ອີຢູ, ອາເມລິກາ, ອາຊຽນ, ຍີ່ປຸ່ນ, ຈີນ… ບັນດາວິສາຫະກິດກໍ່ເປັນເຈົ້າການ ໃນການຂຸດຄົ້ນປະສິດທິຜົນຈາກຕະຫຼາດອື່ນໆ. ມາຮອດຈຸດເວລານີ້, ສາມາດເຫັນໄດ້ຢ່າງຈະແຈ້ງວ່າ, ຍອດວົງເງິນສົ່ງອອກຂອງຫວຽດນາມໃນປີນີ້ຈະບັນລຸປະມານ 114,5 ຕື້ໂດລາສະຫະລັດ, ເພີ່ມຂຶ້ນ 4,6% ເມື່ອທຽບໃສ່ແຜນການ ແລະ ເພີ່ມຂຶ້ນປະມານ 18,2% ເມື່ອທຽບໃສ່ປີ 2011. ອາດຢືນຢັນໄດ້ວ່າການເຄື່ອນໄຫວສົ່ງອອກໄດ້ປະກອບສ່ວນຢ່າງມີປະສິດທິຜົນເຂົ້າໃນການສ້າງຄວາມດຸນດຽງໃຫ້ແກ່ດຸນການຄ້າ, ສ້າງແຫຼ່ງສະໜອງເງິນຕາຕ່າງປະເທດໃຫ້ແກ່ການຊຳລະຂອງຊາດ.