(vovworld)- ພ້ອມກັບການພັດທະນາຂອງພື້ນຖານເສດຖະກິດ ແລະ ທ່າເຕີບໂຕຂອງການສົ່ງອອກ, ວົງເງິນການສົ່ງອອກນຳເຂົ້າສິນຄ້າຢູ່ດ່ານຊາຍແດນຂອງຫວຽດນາມໃນຊຸມເດືອນຕົ້ນປີ2015 ສືບຕໍ່ບັນລຸບັນດາສັນຍານຕັ້ງຫນ້າ. ຢູ່ບັນດາດ່ານຊາຍແດນ ສາກົນ, ໃນນັ້ນ ມີດ່ານຊາຍແດນສາກົນ ລ່າວກາຍ, ການເຄື່ອນໄຫວນຳເຂົ້າ ສົ່ງອອກສິນຄ້າດຳເນີນໄປຢ່າງຟົດຟື້ນ, ພິເສດ ວົງເງິນສົ່ງອອກ ຜະລິດຕະພັນກະເສດເຄື່ອງປ່າຂອງດົງ, ເພີ່ມຂຶ້ນຢ່າງແຮງ. ບົດຂຽນຂອງນັກຂ່າວ ຫວີງຟອງດ້ວຍຫົວຂໍ້ວ່າ: ການສົ່ງອອກ ຜະລິດຕະພັນກະເສດເຄື່ອງປ່າຂອງດົງ - ສັນຍານຕັ້ງຫນ້າຈາກດ່ານຊາຍແດນສາກົນ ລ່າວກາຍ.
ນັບແຕ່ຮຸ່ງເຊົ້າ, ຢູ່ສະຖານທີ່ເຕົ້າໂຮມສິນຄ້າ, ກວດກາສິນຄ້າສົ່ງອອກຂອງດ່າຍຊານແດນສາກົນ ລ່າວກາຍ ໄດ້ເລີ່ມຟົດຟື້ນຂຶ້ນ. ຢູ່ເຂດສິນຄ້າ, ໝາກໂມ, ໝາກໄມ້ແຫ້ງ ແລະ ຜະລິດຕະພັນກະສິກຳຊະນິດອື່ນນັບພັນໆໂຕນ ຖືກພໍ່ຄ້າແມ່ຄ້າຫວຽດນາມ ຫຸ້ມຫໍ່, ຕິດກາໝາຍເພື່ອກະກຽມຂົນສົ່ງເຖິງຄູ່ຄ້າຈີນ.
ເອື້ອຍ ຟານທິຫາຍ, ວິສາຫະກິດ ຮ່ວາຍເຮື່ອງ ນະຄອນ ລ່າວກາຍ, ຊື່ງແມ່ນວິສາຫະກິດປະຕິບັດບັນດາສັນຍາສະຫນອງໝາກໂມໃຫ້ແກ່ຝ່າຍຈີນ ໃຫ້ຮູ້ວ່າ: ຜະລິດຕະພັນກະເສດຂອງຫວຽດນາມ ໄດ້ຮັບຄວາມນິຍົມຈາກຝ່າຍຈີນ, ແຕ່ເຂົາເຈົ້າຕ້ອງການສິນຄ້າມີຄຸນນະພາບສູງ. ເພາະສະນັ້ນ ວິສາຫະກິດສົ່ງອອກຕ້ອງຍົກສູງຄຸນນະພາບສິນຄ້າຢ່າງບໍ່ຢຸດຢັ້ງ ເພື່ອຕອບສະຫນອງຄວາມຮຽກຮ້ອງຕ້ອງການຂອງຄູູ່ຄ້າ.
“ສິນຄ້າທີ່ຝ່າຍຈີນນຳເຂົ້າຈາກຫວຽດນາມຕ້ອງແມ່ນສິນຄ້າມີຄຸນນະພາບສູງ ຖ້າ ບໍ່ມີຄຸນນະພາບສູງ ເຂົາເຈົ້າຈະສົ່ງຄືນ. ປະຈຸບັນ ຈີນ ຊື້ຫລາຍປະເພດສິນຄ້າຈາກຫວຽດນາມ ສະນັ້ນ ນີ້ກໍແມ່ນຄວາມສະດວກທີ່ມີຕໍ່ບັນດາວິສາຫະກິດຫວຽດນາມ.”
ລົດຂົນສົ່ງສິນຄ້າສົ່ງອອກຜ່ານດ່ານຊາຍແດນ ລ່າວກາຍ
|
ໄລ່ທ້າຍເດືອນ 3/2015, ການສົ່ງອອກບັນດາຜະລິດຕະພັນກະເສດ, ເຄື່ອງປ່າຂອງດົງຜ່ານດ່ານຊາຍແດນສາກົນ ລ່າວກາຍ ບັນລຸ 18 ລ້ານ USD, ລື່ນກາຍ 10% ເມື່ອທຽບໃສ່ໄລຍະດຽວກັນຂອງປີກາຍ. ສິນຄ້າລວມມີຫລາຍປະເພດ ແລະ ມາຈາກຫລາຍທ້ອງຖິ່ນພາຍໃນປະເທດ. ທ່ານ ຫວູກວາງວີງ, ຮອງຫົວຫນ້າກົມພາສີ ດ່ານຊາຍແດນສາກົນ ລ່າວກາຍ ໃຫ້ຮູ້ວ່າ:
“ປະຈຸບັນ ຢູ່ດ່ານຊາຍແດນມີສິນຄ້າສົ່ງອອກຫລາຍປະເພດ. ບາງປະເພດແມ່ນຜະລິດຈາກທ້ອງຖິ່ນຄື: ມັນຕົ້ນ, ໝາກກວ້ຍ ແລະ ເຄື່ອງປ່າຂອງດົງບາງປະເພດ ຄືຜະລິດຕະພັນໄມ້ແມ່ນມາຈາກບັນດາແຂວງຄື ອຽນບາຍ, ຟູທໍ້ ຫລື ໝາກໄມ້ຂອງບັນດາແຂວງພາກໃຕ້ສົ່ງມາເພື່ອສົ່ງໄປຂາຍຢູ່ຈີນ. ວົງເງິນສົ່ງອອກຂອງແຂວງ ລ່າວກາຍ ລ້ວນແຕ່ເພີ່ມຂຶ້ນ. ປະຈຸບັນ ແຂວງ ລ່າວກາຍ ມີການປ່ຽນແປງຫລາຍຢ່າງກ່ຽວກັບກົນໄກນະໂຍບາຍເພື່ອສ້າງເງື່ອນໄຂສະດວກໃຫ້ແກ່ວິສາຫະກິດ.”
ນອກຈາກການຟື້ນຕົວຂອງຕະຫລາດຈີນ, ວິສາຫະກິດ ຫວຽດນາມ ຍົກສູງຄຸນນະພາບສິນຄ້ານັ້ນ ບັນດານະໂຍບາຍຂອງລັດ ແລະ ພາສີແຂວງ ລາວກາຍ ກໍຊ່ວຍໃຫ້ວົງເງິນສົ່ງອອກຂອງບັນດາດ່ານຊາຍແດນໃນບໍລິເວນແຂວງ ເພີ່ມຂຶ້ນແຮງ. ຕາມທ່ານ ຫງວຽນກວຽດຈຽນ, ຫົວຫນ້າກົມພາສີ ດ່ານຊາຍແດນ ລ່າວກາຍ, ນັບແຕ່ເມື່ອ ພາສີດ່ານຊາຍແດນ ລ່າວກາຍ ນຳໃຊ້ລະບົບເຮັດລະບຽບການພາສີເອເລັກໂຕນິກ, ການເຮັດລະບຽບການພາສີລະຫວ່າງສອງປະເທດໄດ້ດຳເນີນສະດວກຢ່າງສະດວກໄວກວ່າ.
“ກົມພາສີດ່ານຊາຍແດນ ລ່າວກາຍ ຍາມໃດກໍສ້າງເງື່ອນໄຂສະດວກໃຫ້ແກ່ບັນດາການເຄື່ອນໄຫວດຳເນີນທຸລະກິດ, ການລົງທຶນໃນບໍລິເວນແຂວງ. ນັບແຕ່ເມື່ອນຳໃຊ້ລະບົບເຮັດລະບຽບການພາສີເອເລັກໂຕນິກ, ການເຮັດລະບຽບການພາສີສິນຄ້າໄດ້ຮັບການປະຕິບັດຢ່າງວ່ອງໄວ, ໂປ່ງໃສ. ການປະຕິຮູບລະບຽບການບໍລິຫານ ແລະ ນຳລະບົບໃຫມ່ນຳໃຊ້ແມ່ນໄດ້ຮັບຄວາມຊົມເຊີຍ ແລະ ສະຫນັບສະຫນູນຈາກບັນດາວິສາຫະກິດ”
ບັນດາການປະຕິຮູບກ່ຽວກັບລະບຽບການບໍລິຫານພ້ອມກັບນະໂຍບາຍຂອງລັດໃນການຊຸກຍູ້ການສົ່ງອອກສິນຄ້າ ແມ່ນບັນດາສັນຍານຕັ້ງຫນ້າໃຫ້ແກ່ບັນດາວິສາຫະກິດຫວຽດນາມ. ນີ້ແມ່ນການພິສູດຢ່າງມີຊີວິດຊີວາ, ຢືນຢັນບັນດາຄວາມມານະພະຍາຍາມຍົກສູງຄຸນນະພາບສິນຄ້າໃນການດຳເນີນທຸລະກິດ ແລະ ການເຊື່ອມໂຍງເຂົ້າກັບສາກົນ.