(vovworld)- ປີ 2014, ຍອດວົງເງິນສົ່ງອອກຂອງຫວຽດນາມ ບັນລຸກວ່າ 150 ຕື້ USD, ຊື່ງແມ່ນລະດັບສູງສຸດນັບແຕ່ກ່ອນມາຮອດປະຈຸບັນ. ດ້ວຍຕົວເລກປະທັບໃຈດັ່ງກ່າວ, ການສົ່ງອອກແມ່ນຈຸດພົ້ນເດັ່ນຂອງພື້ນຖານເສດຖະກິດຫວຽດນາມ.
ເບີ່ງລວມແລ້ວ,ວົງເງິນສົ່ງອອກຂອງຫວຽດນາມ ໃນປີ 2014 ເພີ່ມຂຶ້ນກວ່າ 13,6% ເມື່ອທຽບໃສ່ປີ 2013. ບັນດາປະເພດສິນຄ້າສົ່ງອອກຕົ້ນຕໍສ່ວນຫລາຍບັນລຸລະດັບເຕີບໂຕ, ໃນນັ້ນ ໝວດສິນຄ້າອຸດສາຫະກຳປຸງແຕ່ງກວມອັດຕາສ່ວນສູງສຸດ, ກວ່າ 73%. ຕໍ່ຈາກນັ້ນ ແມ່ນຜະລິດຕະພັນກະເສດ, ສິນໃນນ້ຳ ແລະ ເຊື້ອເພີງ ໂລຫະ. ໂທລະສັບ ແລະ ເຄື່ອງອາໄລ່ມີລະດັບການສົ່ງອອກໃຫຍ່ສຸດ, ຂຶ້ນເຖິງ 24 ຕື້ USD. ຕໍ່ມາ ແມ່ນເຄື່ອງຕ່ຳແຜ່ນຕັດຫຍິບ ດ້ວຍມູນຄ່າເກືອບ 21 ຕື້ USD. ເປັນຫນ້າສົນໃຈ ແມ່ນໂຄງປະກອບສິນຄ້າສົ່ງອອກໄດ້ມີການຫັນປ່ຽນຕາມທິດຫັນເປັນອຸດສາຫະກຳ, ໃນນັ້ນ ມີເຖິງ 16 ໝວດສິນຄ້າບັນລຸວົງເງິນສົ່ງອອກກວ່າ 2 ຕື້ USD. ໃນຈຳນວນໝວດສິນຄ້ານັ້ນ ເຄື່ອງຕ່ຳແຜ່ນຕັດຫຍິບ ຍັງຄົງຮັກສາລະດັບເຕີບໂຕສົ່ງອອກສູງ. ທ່ານ ເລຕຽນເຈື່ອງ, ຜູ້ອຳນວຍການໃຫຍ່ກຸ່ມບໍລິສັດຕ່ຳແຜ່ນຕັດຫຍິບຫວຽດນາມ ໃຫ້ຮູ້ວ່າ:
“ປີນີ້ ຕະຫລາດສົ່ງອອກສິນຄ້າໃນໂລກບໍ່ເຕີບໂຕຫລາຍປານໃດ. ພົ້ນເດັ່ນຄືຕະຫລາດອາເມລິກາ, ເຖິງວ່າ ພື້ນຖານເສດຖະກິດມີສັນຍານດີຂຶ້ນ, ແຕ່ການສົ່ງອອກສິນຄ້າຂອງ ອາເມລິກາ ພຽງເພີ່ມຂຶ້ນເລັກນ້ອຍ, ເອີລົບ ເພີ່ມຂຶ້ນ 9% ສ່ວນ ຍີ່ປຸນ ການໃຊ້ສອຍສິນຄ້າພາຍໃນປະເທດພັດຫລຸດລົງ 1%. ໃນສະພາວະນັ້ນ, ເຄື່ອງຕ່ຳແຜ່ນຕັດຫຍິບຂອງຫວຽດນາມ ສົ່ງໄປຂາຍຢູ່ຕະຫລາດ ອາເມລິກາ ຍັງຄົງເພີ່ມຂຶ້ນ 12,5%, ສົ່ງໄປຍັງເອີລົບເພີ່ມຂຶ້ນ 17% ແລະ ສົ່ງໄປຍັງຍີ່ປຸ່ນຍັງຮັກສາເກືອບ 9%.”
ປີ 2014, ຂະແຫນງເກີບຫນັງ ຫວຽດນາມ ສືບຕໍ່ບັນລຸສະຖິຕິໃຫມ່ ກ່ຽວກັບວົງເງິນສົ່ງອອກ ບັນລຸ 12 ຕື້ USD, ເພີ່ມຂຶ້ນ 18% ເມື່ອທຽບໃສ່ປີກາຍ. ດ້ວຍໝາກຜົນດັ່ງກ່າວ, ປະຈຸບັນ ຫວຽດນາມ ແມ່ນຫນຶ່ງໃນ 10 ປະເທດ ສົ່ງອອກຜະລິດຕະພັນເກີບຫນັງໃຫຍ່ສຸດຢູ່ໃນໂລກ. ເປັນຫນ້າສົນໃຈ ແມ່ນບັນດາວິສາຫະກິດເກີບຫນັງ ໄດ້ຍາດແຍ່ງບັນດາສິ່ງສະດວກ ຈາກໂຄງການບຸລິມະສິດພາສີທົ່ວໄປ (GSP) ຊື່ງສະຫະພາບເອີລົບ(EU) ສະຫງວນໃຫ້ແກ່ຫວຽດນາມ ເມື່ອເດືອນ 1/2014 ດ້ວຍອັດຕາພາສີຫລຸດລົງແຕ່ 3-4%, ຊ່ວຍຍູ້ແຮງການສົ່ງອອກເຂົ້າຕະຫລາດ EU, ຊື່ງແມ່ນຕະຫລາດສົ່ງອອກໃຫຍ່ສຸດຂອງຂະແຫນງເກີບຫນັງຫວຽດນາມ. ທ່ານນາງ ຟານທິແທນຊວນ, ເລຂາທິການ ສະຫະສະມາຄົມເກີບຫນັງ, ກະເປົ່າ ຫວຽດນາມ ໃຫ້ຮູ້ສັງເກດວ່າ:
ຫວຽດນາມສົ່ງກູ້ງໄປຂາຍຢູ່ ອາເມລິກາ
ພາບ:vcci.com
|
“ກ່ອນນີ້ ການເຕີບໂຕພຽງບັນລຸ 15% ແຕ່ມາຮອດປະຈຸບັນ ລະດັບຈະເລີນເຕີບໂຕຂອງຂະແຫນງເກີບຫນັງ ບັນລຸ 18%. ການພັດທະນາດີຄືແນວນັ້ນ ແມ່ນຍ້ອນຄວາມມານະພະຍາຍາມຂອງວິສາຫະກິດເກີບຫນັງ, ທີສອງ ແມ່ນກຳໄດ້ກາລະໂອກາດຕະຫລາດພວມນັບມື້ນັບເປີດກວ້າງ ພິເສດ ແມ່ນ ຜ່ານບັນດາສັນຍາການຄ້າ ຊື່ງພວກເຮົາ ໄດ້ ແລະ ພວມເຈລະຈາ.”
ປີ 2014 ເປັນຂີດໝາຍຄວາມມານະພະຍາຍາມຫລາຍຢ່າງໃນການສົ່ງເສີມການຄ້າໄປຍັງຕະຫລາດສົ່ງອອກຈຸດສຸມຄື: ອາເມລິກາ, EU, ລັດເຊຍ.. ເພື່ອເຈລະຈາ, ແກ້ໄຂຮົ້ວກີດຂວາງ, ເປີດກວ້າງຕະຫລາດ, ເປັນຕົ້ນແມ່ນບັນດາຕະຫລາດສົ່ງອອກຜະລິດຕະພັນກະເສດ, ເຄື່ອງປ່າຂອງດົງ, ສິນໃນນ້ຳ, ຫລີກລ້ຽງການອີງໃສ່ສ່ວນໃຫຍ່ຈາກຕະຫລາດໃດຫນຶ່ງ, ຈາກນັ້ນ ຫລຸດຜ່ອນຄວາມເສຍຫາຍເມື່ອມີການຜັນແປ່ຜິດປົກກະຕິ. ຍ້ອນເຫດນັ້ນ ການສົ່ງອອອກຜະລິດຕະພັນກະເສດ, ເຄື່ອງປ່າຂອງດົງ, ສິນໃນນ້ຳຂອງຫວຽດນາມ ບັນລຸລະດັບເຕີບໂຕທີ່ບໍ່ເຄີຍມີມາກ່ອນ ດ້ວຍວົງເງິນເກືອບ 31 ຕື້ USD, ເພີ່ມຂຶ້ນກວ່າ 11% ເມື່ອທຽບໃສ່ປີກາຍ.
ປີ 2014, ຫວຽດນາມ ສິ້ນສຸດການເຈລະຈາສັນຍາການຄ້າເສລີ ຫວຽດນາມ ແລະ ສເກົາຫລີໂດຍພື້ນຖານ, ສັນຍາການຄ້າເສລີ ລະຫວ່າງຫວຽດນາມ ແລະ ສຳພັນທະມິດພາສີ ລັດເຊຍ -ເບລາຣຸດ- ກາຊັກສະຖານ ແລະ ຈະດຳເນີນບັນດາລະບຽບການດ້ານກົດໝາຍເພື່ອສາມາດປະຕິບັດສັນຍາໃນປີ 2015. ໄລຍະຈະມາເຖິງ ຫວຽດນາມ ຈະສືບຕໍ່ເຂົ້າຮ່ວມສັນຍາຄູ່ຮ່ວມມືເສດຖະກິດຍຸດທະສາດຂ້າມ ປາຊີຟີກ (TPP) ແລະ ເຂົ້າຮ່ວມປະຊາຄົມເສດຖະກິດ ອາຊຽນ. ທ່ານ ໂດ໋ທັງຫາຍ, ລັດຖະມົນຕີຊ່ວຍວ່າການກະຊວງອຸດສາຫະກຳ ແລະ ການຄ້າຫວຽດນາມ ຖືວ່າ: ນີ້ແມ່ນບັນດາກາລະໂອກາດໃຫຍ່ໃຫ້ແກ່ບັນດາວິສາຫະກິດສົ່ງອອກເປີດກວ້າງຕະຫລາດ ແລະ ບັນລຸລະດັບຈະເລີນເຕີບໂຕສູງກວ່າ.
“ການສົ່ງອອກສືບຕໍ່ແມ່ນຈຸດພົ້ນເດັ່ນຂອງພື້ນຖານເສດຖະກິດ. ໃນສະພາບຫຍຸ້ງຍາກ ແຕ່ຍັງຄົງບັນລຸໄດ້ແຜນການ ຊື່ງ ສະພາແຫ່ງຊາດ ແລະ ລັດຖະບານມອບໝາຍໃຫ້, ທັງເພີ່ມວົງເງິນສົ່ງອອກ ທັງສ້າງເງິນຕາຕ່າງປະເທດເກີນດຸນ, ສ້າງວຽກເຮັດງານທຳ. ໃນໄລຍະຈະມາເຖິງ, ສິ່ງດັ່ງກ່າວສືບຕໍ່ແມ່ນທ່າແຮງຂອງຫວຽດນາມ. ປີ 2015, ມີຢ່າງຫນ້ອຍສຸດ 2 ສັນຍາ ນັ້ນແມ່ນສັນຍາ FTA ຫວຽດນາມ - ສເກົາຫລີ, ສັນຍາສຳພັນທະມິດພາສີ ຊ່ວຍໃຫ້ວິສາຫະກິດຫວຽດນາມ ພິເສດວິສາຫະກິດສິນໃນນ້ຳ, ເກີບຫນັງ, ເຄື່ອງຕ່ຳແຜ່ນຕັດຫຍິບ.. ຊຸກຍູ້ການສົ່ງອອກເຂົ້າບັນດາຕະຫລາດນີ້.”
ມີຈຸດພິເສດຫນຶ່ງອີກ ນັ້ນແມ່ນ ເຖິງວ່າ ການຈະເລີນເຕີບໂຕການສົ່ງອອກຂອງຂົງເຂດລົງທຶນໂດຍກົງຂອງຕ່າງປະເທດ FDI ໄດ້ປະກອບສ່ວນກວ່າ 100 ຕື້ USD ລວມທັງນ້ຳມັນອາຍແກສ, ເສດຖະກິດພາຍໃນປະເທດແມ່ນກວ່າ 48 ຕື້ USD, ເພີ່ມຂຶ້ນກວ່າ 10% ເມື່ອທຽບໃສ່ປີ 2013, ສະແດງໃຫ້ເຫັນທ່າຟື້ນຕົວຂອງການຜະລິດພາຍໃນປະເທດ.
ດ້ວຍບັນດາໝາກຜົນທີ່ບັນລຸໄດ້, ປີ 2014 ການສົ່ງອອກໄດ້ຮັບຖືວ່າແມ່ນຈຸດພົ້ນເດັ່ນຂອງພື້ນຖານເສດຖະກິດຫວຽດນາມ. ເຖິງວ່າ ປີ 2015 ໄດ້ຮັບການຄາດຄະເນວ່າ ມີການຜັນແປຫລາຍຢ່າງ, ແຕ່ຜົນການສົ່ງອອກສິນຄ້າໃນປີນີ້ ຈະແມ່ນປະຖົມປັດໄຈເພື່ອໃຫ້ການສົ່ງອອກຫວຽດນາມ ສືບຕໍ່ທ່າເຕີບໂຕ, ສູ້ຊົນບັນລຸວົງເງິນສົ່ງອອກ ໃຫ້ໄດ້160 ຕື້ USD ໃນປີ 2015.