(vovworld)-ໃນ 6 ເດືອນຕົ້ນປີນີ້, ວົງເງິນສົ່ງອອກຂອງຫວຽດນາມ ບັນລຸເກືອບ 71 ຕື້ USD(ເກືອບເທົ່າກັບລະດັບທັງປີ 2010), ເພີ່ມຂຶ້ນ 15% ເມື່ອທຽບໃສ່ໄລຍະດຽວກັນຂອງປີກາຍ. ບັນດາຕົວເລກນີ້ສະແດງໃຫ້ເຫັນວ່າ ການສົ່ງອອກຍັງແມ່ນຈຸດເດ່ັ່ນຂອງພື້ນຖານເສດຖະກິດ. ເຖິງຢ່າງໃດກໍຕາມ, ຄຽງຄູ່ກັບບັນດາຕົວເລກທີ່ຫນ້າປະທັບໃຈນັ້ນ, ຫວຽດນາມ ຕ້ອງແກ້ໄຂຄວາມຫຍຸ້ງຍາກໃນຕໍ່ຫນ້າ ເມື່ອມຸ່ງໄປສູ່ຈຸດໝາຍເພີ່ມທະວີການສົ່ງອອກຢ່າງໝັ້ນຄົງ.
ພາບປະກອບ:internet
|
ນັບແຕ່ຕົ້ນປີມາຮອດປະຈຸບັນ, ຫວຽດນາມ ມີ 13 ປະເພດສິນຄ້າສົ່ງອອກບັນລຸວົງເງິນແຕ່ 1 ຕື້ USD ຂຶ້ນໄປ. ຄາດຄະເນທັງປີ ຈະມີ ສິນຄ້າ 22 ປະເພດ, ສູງກວ່າເມື່ອທຽບໃສ່ປີກ່ອນ 1 ປະເພດ ແລະ ເປັນຄັ້ງທຳອິດ ຫວຽດນາມ ມີ ສິນຄ້າ 2 ປະເພດ ຄືໂທລະສັບ, ເຄື່ອງຕຳ່ແຜ່ນຕັດຫຍິບ ບັນລຸວົງເງິນສົ່ງອອກກວ່າ 20 ຕື້ USD. ມີແຂວງຫນຶ່ງຕ່ືມອີກບັນລຸວົງເງິນສົ່ງອອກກວ່າ 1 ຕື້ USD ນັ້ນແມ່ນແຂວງ ທາຍງວຽນ ແລະ ອາດຈະມີ 20 ແຂວງ,ນະຄອນ ບັນລຸວົງເງິນສົ່ງອອກກວ່າ 1 ຕື້ USD ໃນປີນີ້.
ເບິ່ງລວມແລ້ວ ໃນ 6 ເດືອນຕົ້ນປີ, ການສົ່ງອອກຜະລິດຕະພັນກະເສດຂອງທັງປະເທດບັນລຸເກືອບ 15 ຕື້ USD, ເພີ່ມຂຶ້ນເກືອບ 13% ເມື່ອທຽບໃສ່ໄລຍະດຽວກັນຂອງປີກາຍ. ເຖິງຢ່າງໃດກໍຕາມ, ນັບແຕ່ເດືອນ 5 ຈະມາເຖິງ, ການສົ່ງອອກຜະລິດຕະພັນກະເສດຂອງຫວຽດນາມບາງປະເພດ ໄປຍັງຈີນ ປະສົບກັບຄວາມຫຍຸ້ງຍາກຢູ່. ໃນສະພາບການຄືແນວນັ້ນ, ເລື່ອງເປີດກວ້າງຕະຫລາດໃຫມ່ຍິ່ງມີຄວາມຈຳເປັນ. ນີ້ກໍແມ່ນທິດກ້າວເດີນຂອງວິສາຫະກິດສົ່ງອອກ ຫລາຍແຫ່ງຢູ່ຫວຽດນາມ ໃນໄລຍະຈະມາເຖິງ ເພື່ອຫລີກລ້ຽງການອາໄສຕະຫລາດໃດຫນຶ່ງ. ທ່ານ ຟ້າມກວກທາຍ, ຜູ້ຕາງຫນ້າບໍລິສັດໃຫຍ່ຜັກ,ໝາກໄມ້ ແລະ ຜະລິດຕະພັນກະເສດ ແບ່ງປັນວ່າ:
“ໄລຍະຈະມາເຖິງ ຄາດຄະເນການສົ່ງອອກ ຍັງປະສົບກັບຄວາມຫຍຸ້ງຍາກ. ການກຳນົດທິດຂອງພວກຂ້າພະເຈົ້າ ແມ່ນຫັນຕະຫລາດ, ການຜະລິດສິນຄ້າມີມູນຄ່າເພີ່ມສູງເປັນຫລາຍຮູບຫລາຍແບບຄື: ໝາກນັດ, ໝາກລີນຈີ່ແຊເຢັນສົ່ງໄປຂາຍຢູ່ຕະຫລາດສເກົາຫລີ, ຍີ່ປຸ່ນດີທີ່ສຸດ, ຊ້ຳບໍ່ໜຳ ຍັງສົ່ງໄປຂາຍຢູ່ອາເມລິກາ ແລະ ຕະຫລາດແຫ່ງໃຫມ່ຈຳນວນຫນຶ່ງ.”
ອີກບັນຫາຫນຶ່ງທີ່ວາງອອກສຳລັບການສົ່ງອອກຂອງຫວຽດນາມ ແມ່ນເພີ່ມມູນຄ່າຜະລິດຕະພັນ ພ້ອມທັງຫລຸດຜ່ອນການອາໄສວັດຖຸດິບນຳເຂົ້າຈາກຕະຫລາດ ແຫ່ງຫນຶ່ງເພື່ອຫລີກລ້ຽງຄວາມສ່ຽງເມື່ອຕະຫລາດເກີດການຫັນປ່ຽນ. ຕຳ່ແຜ່ນຕັດຫຍິບ, ແມ່ນຫນຶ່ງໃນບັນດາຂະແຫນງສົ່ງອອກປາຍແຫລມຂອງຫວຽດນາມ, 6 ເດືອນຕົ້ນປີບັນລຸໄດ້ກວ່າ 10 ຕື້ USD, ແຕ່ໝາກຜົນນີ້ກໍຊ້ອນແຝງຫລາຍບັນຫາຕ້ອງແກ້ໄຂ, ຍ້ອນວ່າ ວັດຖຸດິບສ່ວນຫລາຍແມ່ນນຳເຂົ້າຈາກຕ່າງປະເທດ, ໃນນັ້ນ ນຳເຂົ້າຈາກຈີນກວມເກືອບ 40%. ທ່ານ ເຈີນວັນຄາງ, ຜູ້ອຳນວຍການໃຫຍ່ບໍລິສັດຫຸ້ນສ່ວນຕັດຫຍິບ ດົງບີງ(ແຂວງ ບັກນີງ) ຖືວ່າ: ບັນຫາຕົ້ນຕໍປະຈຸບັນ ຕ້ອງຫລຸດຜ່ອນການອາໄສວັດຖຸດິບທີ່ນຳເຂົ້າຈາກຕ່າງປະເທດ ດ້ວຍການນຳໃຊ້ວັດຖຸດິບຜະລິດພາຍໃນປະເທດ, ສຸມໃສ່ເພີ່ມມູນຄ່າເພີ່ມຂອງຜະລິດຕະພັນ.
“ໂດຍແມ່ນຫນຶ່ງໃນບັນດາວິສາຫະກິດຜະລິດແບບຮັບຈ້າງເປັນຕົ້ນ, ແຕ່ໄລຍະມໍ່ໆມານີ້ ພວກຂ້າພະເຈົ້າພວມຫັນໄປສູ່ຮູບການ FOB(ເປັນເຈົ້າການໃນການຜະລິດວັດຖຸດິບ) ແລະ ຍູ້ແຮງການນຳໃຊ້ວັດຖຸດິບພາຍໃນປະເທດເພື່ອຮັບໃຊ້ຕາມໃບຊັ່ງຊື້ສິນຄ້າ ຕາມຮູບການ FOB. ຫລື ຍູ້ແຮງການຊື້ແຜ່ນແພຢູ່ບັນດາຕະຫລາດອື່ນຄື: ໄທ, ສິງກະໂປ… ເພື່ອຫລຸດຜ່ອນການອາໄສວັດຖຸດິບຈາກຕະຫລາດແຫ່ງຫນຶ່ງ.”
ບັນດາວິສາຫະກິດ ພວມຜັນຂະຫຍາຍການລົງທຶນເຂົ້າເຂດຜະລິດວັດຖຸດິບ, ຊ່ວຍສິນຄ້າສົ່ງອອກຂອງຫວຽດນາມ ເຂົ້າຮ່ວມລະບົບມູນຄ່າຢ່າງເລິກເຊິ່ງກວ່າ, ຈາກນັ້ນ ຊ່ວຍສິນຄ້າສົ່ງອອກສາມາດເຂົ້າຮ່ວມຕະຫລາດອື່ນຫລາຍແຫ່ງກວ່າ ດ້ວຍມູນຄ່າສູງກວ່າ. ໃນໄລຍະຜ່ານມາ ຂະແຫນງຕຳ່ແຜ່ນຕັດຫຍິບດຶງດູດຫລາຍໂຄງການລົງທຶນເຂົ້າເຕັກໂນໂລຊີຕຳ່ແຜ່ນ, ຍ້ອມສີ, ສ້າງແຜນກຳນົດພັດທະນາອຸດສາຫະກຳສຳຮອງສຳເລັດ ກໍແມ່ນທິດກ້າວເດີນອັນຖືກຕ້ອງເພ່ືອເພີ່ມທະວີການສົ່ງອອກບັນດາປະເພດສິນຄ້າເປັນປາຍແຫລມ.
ໃນສະພາບການຢູ່ທະເລຕາເວັນອອກພວມເກີດການຜັນແປຢ່າງສັບສົນ, ອາດຈະສົ່ງຜົນສະທ້ອນບໍ່ຫນ້ອຍເຖິງວົງເງິນສົ່ງອອກຂອງຫວຽດນາມ, ທ່ານ ຫວູຮູຍຮ່ວາງ, ລັດຖະມົນຕີວ່າການກະຊວງອຸດສາຫະກຳ ແລະ ການຄ້າຫວຽດນາມ ໄດ້ຢືນຢັນແຜນນະໂຍບາຍຂອງລັດຖະບານ ແມ່ນຍູ້ແຮງການສ້າງໂຄງປະກອບປະເພດສິນຄ້າ ແລະ ຕະຫລາດສົ່ງອອກຄືນໃຫມ່, ພ້ອມທັງ ມີບັນດານະໂຍບາຍຫນູນຊ່ວຍບັນດາວິສາຫະກິດຢ່າງທັນການ.
“ແຜນນະໂຍບາຍຂອງລັດຖະບານ ແມ່ນເປີດກວ້າງຕະຫລາດສົ່ງອອກແຫ່ງໃຫມ່ຕື່ມອີກ ແລະ ບັນດາຕະຫລາດນຳເຂົ້າໃຫມ່ ເພື່ອຫລີກລ້ຽງການອາໄສຄູ່ຮ່ວມມືໃດຫນຶ່ງ. ຄຽງຄູ່ກັນນັ້ນ, ພວກເຮົາຕ້ອງເພີ່ມທະວີການພັດທະນາຮາກຖານການຜະລິດວັດຖຸດິບ. ລັດຖະບານ ຈະສ້າງເງື່ອນໄຂສະດວກກ່ຽວກັບກົນໄກນະໂຍບາຍໃຫ້ແກ່ການຜະລິດກະສິກຳ, ເພີ່ມມູນຄ່າເພີ່ມ, ເພີ່ມຄວາມສາມາດສົ່ງອອກ, ຜ່ານນັ້ນ ການສົ່ງອອກສິນຄ້ານັບມື້ນັບເປັນປົກກະຕິ ແລະ ໝັ້ນຄົງກວ່າ.”
ເລື່ອງຕັ້ງຫນ້າເຈລະຈາເພື່ອເຂົ້າຮ່ວມບັນດາສັນຍາການຄ້າເສລີກັບສະຫະພາບເອີລົບ ແລະ ສັນຍາຄູ່ຮ່ວມມືເຂດປາຊີຟີກ (TPP) ກໍຈະເປີດປະຕູຕະຫລາດສິນຄ້າ, ສ້າງເງື່ອນໄຂໃຫ້ແກ່ບັນດາປະເພດສິນຄ້າມີທ່າໄດ້ປຽບຂອງຫວຽດນາມຄື: ເຄື່ອງຕຳ່ແຜ່ນຕັດຫຍິບ, ເກີບຫນັງ, ຜະລິດຕະພັນກະເສດ.. ແຊກຊືມເຂົ້າບັນດາຕະຫລາດທີ່ມີຄວາມສາມາດບົ່ມຊ້ອນດ້ວຍຂອບຂະຫນາດໃຫຍ່, ຫລຸດຜ່ອນການອາໄສບາງຕະຫລາດສົ່ງອອກ ແລະ ຮັບປະກັນການສົ່ງອອກສິນຄ້າເປັນປົກກະຕິ, ໝັ້ນຄົງ.