(vovworld) - ເຖິງວ່າ, ຫວຽດນາມມີປະລິມານເຂົ້າສານສົ່ງອອກຢືນອັບດັບທີ 3 ໃນໂລກ, ແຕ່ມູນຄ່າຂອງເຂົ້າສານຫວຽດນາມ ພວມຢູ່ໃນລະດັບປານກາງຕ່ຳ. ເພື່ອໃຫ້ເຂົ້າສານຫວຽດນາມ ສາມາດແຊກຊຶມເຂົ້າບັນດາຕະຫຼາດໃຫຍ່ ໃນສະພາບເຊື່ອມໂຍງເສດຖະກິດເຂົ້າກັບສາກົນນັ້ນ, ມີວິສາຫະກິດສົ່ງອອກເຂົ້າສານຫຼາຍແຫ່ງພວມມຸງໄປເຖິງການສົ່ງອອກເຂົ້າສານທີ່ມີຄຸນນະພາບສູງ. ບົດຂຽນຂອງນັກຂ່າວ ຈຸງທຸຍ ທີ່ມີຫົວຂໍ້ວ່າ “ການສົ່ງອອກເຂົ້າສານມີຄຸນນະພາບສູງ, ທິດທາງໃໝ່ໃຫ້ແກ່ຂະແໜງເຂົ້າສານຫວຽດນາມ’.
(ພາບປະກອບ)
ໃນຊຸມປີມໍ່ໆມານີ້, ການສົ່ງອອກເຂົ້າສານທີ່ມີມູນຄ່າໂພສະນາການສູງ, ໄດ້ປະກອບສ່ວນເພີ່ມປະລິມານການຜະລິດເຂົ້າສານມີຄຸນນະພາບສູງ ໃນໂຄງປະກອບເຂົ້າສານສົ່ງອອກຂອງຫວຽດນາມ. ປະຈຸບັນ, ເຂົ້າສານທີ່ມີຄຸນນະພາບສູງກວມເອົາ 27% ປະລິມານເຂົ້າສານສົ່ງອອກຂອງຫວຽດນາມ. ການສົ່ງອອກເຂົ້າສານທີ່ມີຄຸນນະພາບສູງ ໄດ້ຮັບຖືວ່າ ແມ່ນທິດທາງທີ່ສຳຄັນ, ຢືນຢັນເຄື່ອງໝາຍ ເຂົ້າສານຫວຽດນາມ ໃນຕະຫຼາດເທື່ອລະກ້າວ, ພ້ອມທັງປະກອບສ່ວນປ່ຽນແປງວິທີການຜະລິດເຂົ້າສານທີ່ມີຄຸນນະພາບຕ່ຳໃນຫຼາຍປີຜ່ານມາຂອງປະຊາຊົນ.
ບັນດາວິສາຫະກິດສົ່ງອອກເຂົ້າສານເກືອບທັງໝົດລ້ວນແຕ່ໃຫ້ຂໍ້ສັງເກດວ່າ, ເຂົ້າສານທີ່ມີຄຸນນະພາບສູງມີລາຄາສູງກວ່າຫຼາຍ ເມື່ອທຽບໃສ່ເຂົ້າສານທີ່ມີຄຸນນະພາບປານກາງ ແລະ ຕ່ຳ. ໂດຍລະອຽດແມ່ນ, ເຂົ້າສານທີ່ມີຄຸນນະພາບສູງ ມີລາຄາ 700 USD/ໂຕນ, ໃນຂະນະນັ້ນ ເຂົ້າສານທຳມະດາມີລາຄາພຽງແຕ່ 370 – 380 USD/ໂຕນເທົ່ານັ້ນ. ສະນັ້ນ, ກຸ່ມບໍລິສັດ ໂລກເຈີຍ ພວມຫັນໄປສູ່ການສົ່ງອອກເຂົ້າສານທີ່ມີຄຸນນະພາບສູງຢ່າງແຮງ. ທ່ານ ຟ້າມແທງທໍ້, ຮອງຜູ້ອຳນວຍການຂະແໜງທັນຍາຫານກຸ່ມບໍລິສັດ ໂລກເຈີຍ ໃຫ້ຮູ້ວ່າ.
“ການຜະລິດເຂົ້າສານຂອງກຸ່ມບໍລິສັດ ແມ່ນຕາມຮູບແບບຮ່ວມມືກັບຊາວກະສິກອນເພື່ອຜະລິດຕາມລະບົບມູນຄ່າ. ພວກຂ້າພະເຈົ້າລົງທຶນໃຫ້ຊາວກະສິກອນນັບແຕ່ດ້ານວັດຖຸອຸປະກອນກະສິກຳສົ້ນເຂົ້າ ແລະ ພ້ອມກັບຊາວກະສິກອນຈັດຕັ້ງການປູກເຂົ້າ ແລະ ລົງນາມໃນສັນຍາ, ຮອດໄລຍະເກັບກ່ຽວ ຈະເກັບຊື້ຕາມລາຄາຂອງຕະຫຼາດ. ກຸ່ມບໍລິສັດມຸ່ງໄປເຖິງບັນດາຕະຫຼາດຂັ້ນສູງຄື: ອາເມລິກາ, ຮົ່ງກົງ, ສິງກະໂປ ແລະ ບາງປະເທດອີຢູ”.
(ພາບປະກອບ)
ຕາມບັນດານັກຊ່ຽວຊານໃນຂະແໜງກະສິກຳແລ້ວ, ຄວາມຕ້ອງການເຂົ້າສານທີ່ມີຄຸນນະພາບສູງຂອງຕະຫຼາດໂລກນັບມື້ນັບສູງຂຶ້ນ, ແຕ່ຄວາມສາມາດຕອບສະໜອງຂອງວິສາຫະກິດຫວຽດນາມ ຍັງຈຳກັດຢູ່. ໜຶ່ງໃນບັນດາຄວາມຫຍຸ້ງຍາກໂດຍກົງນັ້ນແມ່ນຕ້ອງແກ່ງແຍ້ງກັບເຂົ້າສານຂອງໄທ, ເຊິ່ງແມ່ນປະເທດທີ່ມີເຄື່ອງໝາຍເຂົ້າສານຫອມທີ່ມີຊື່ສຽງ ນັບທັງທາງດ້ານຄຸນນະພາບ ແລະ ເຄື່ອງໝາຍການຄ້າແລ້ວ. ພ້ອມກັນນັ້ນ ແມ່ນເຂົ້າລະດູທີ່ມີຊື່ສຽງຂອງກຳປູເຈຍ. ແຕ່ວ່າ, ຖ້າຕິດພັນກັບຄວາມຕ້ອງການຂອງຕະຫຼາດຢ່າງໃກ້ຊິດ, ຍູ້ແຮງການຜະລິດ ແລະ ສົ່ງອອກເຂົ້າສານທີ່ມີຄຸນນະພາບສູງ, ໃນອະນາຄົດ, ຂະແໜງເຂົ້າສານຫວຽດນາມ ບໍ່ພຽງແຕ່ນຳມາເຊິ່ງຜົນກຳໄລສູງເທົ່ານັ້ນ ຫາກຍັງສ້າງເຄື່ອງໝາຍການຄ້າ ແລະ ພັດທະນາໄດ້ຢ່າງງ່າຍອີກດ້ວຍ. ເພື່ອເຮັດສິ່ງດັ່ງກ່າວໃຫ້ໄດ້, ນັບແຕ່ການຜະລິດ ຕະຫຼອດຮອດການຈຳໜ່າຍຕ້ອງມີຄວາມຄົບຊຸດ. ພິເສດ, ແມ່ນຕ້ອງປ່ຽນແປງຈີນຕະນາການໃນການສົ່ງອອກ ແລະ ເພີ່ມທະວີການຊອກຫາບັນດາຕະຫຼາດບໍ່ກວ້າງໃຫຍ່ແຕ່ນຳມາເຊິ່ງມູນຄ່າສູງ.
ຕາມປະລິຍາເອກ ຫງວຽນໂດ້ແອງຕວນ, ຫົວໜ້າສະຖາບັນນະໂຍບາຍ ແລະ ຍຸດທະສາດພັດທະນາກະສິກຳຊົນນະບົດ ແລ້ວ, ໃນສະພາບຕະຫຼາດເຂົ້າສານຂອງຫວຽດນາມ ຄືປະຈຸບັນ, ການສ້າງເຄື່ອງໝາຍການຄ້າ ແລະ ຜະລິດເຂົ້າສານມີຄຸນນະພາບສູງແມ່ນປັດໃຈສຳຄັນທີ່ສຸດ. ແຕ່ວ່າ, ວຽກງານນີ້ບໍ່ສາມາດປະຕິບັດໄດ້ໃນໄລຍະສັ້ນ, ຫາກຕ້ອງປະຕິບັດຕາມຂັ້ນຕອນຄົບວົງຈອນຈາກໂຄງປະກອບຜົນລະປູກ ເຖິງຊົນລະປະທານ, ການປູກຝັງ.
“ເພື່ອຜະລິດເຂົ້າສານໃໝ່ມີຄຸນນະພາບສູງ ຕ້ອງມີເວລາຢ່າງແນ່ນອນ. ແຜນນະໂຍບາຍຂອງຂະແໜງກະສິກຳ ແມ່ນຢາກຫັນໂຄງປະກອບຂະແໜງເຂົ້າສານຕາມທິດ ຫັນຈາກຕະຫຼາດຕ້ອງການເຂົ້າສານຄຸນນະພາບທຳມະຫາ ໄປສູ່ຕະຫຼາດຕ້ອງການເຂົ້າສານມີຄຸນນະພາບສູງ ເທື່ອລະກ້າວ. ຍ້ອນວ່າ ປະຈຸບັນ ບັນດາປະເທດຄູ່ແຂ່ງຂອງພວກເຮົາໃກ້ຈະທຽບທັນກັບພວກເຮົາແລ້ວ”.
ທ່ານເລວັນແບ່ງ, ຫົວໜ້າກົມຜະລິດປູງແຕ່ງຜະລິດຕະພັນກະເສດ, ເຄື່ອງປ່າຂອງດົງ, ສິນໃນນ້ຳ ແລະ ອາຊີບເກືອ, ກະຊວງກະສິກຳ ແລະ ພັດທະນາຊົນນະບົດ ຖືວ່າ, ຢາກຍູ້ແຮງການສົ່ງອອກ ຕ້ອງສ້າງບັນດາເຄື່ອງໝາຍການຄ້າເຂົ້າສານທີ່ມີຄຸນນະພາບສູງຢ່າງໝັ້ນຄົງໃຫ້ໄດ້.
“ປະຈຸບັນ, ກ່ຽວກັບແນວພັນເຂົ້າຫວຽດນາມ ບໍ່ອຶດ, ແຕ່ສິ່ງສຳຄັນທີ່ສຸດແມ່ນຕ້ອງມີເຄື່ອງໝາຍການຄ້າ, ມີຈຳນວນຫຼາຍ, ສະໝ່ຳສະເໝີ, ປະລິມານຢາຂ້າສັດຕູພືດຕ້ອງຮັບປະກັນຕາມມາດຕະຖານທີ່ໄດ້ຮັບອະນຸຍາດ. ຕ້ອງມີແນວພັນເຂົ້າໄດ້ດີ, ຄົບຊຸດ, ຍຸດທະສາດກໍ່ສ້າງເຄື່ອງໝາຍເຂົ້າສານ ຈຶ່ງໄດ້ຮັບຜົນສຳເລັດໄດ້”.
ແຜນຮ່າງພັດທະນາເຄື່ອງໝາຍເຂົ້າສານແຫ່ງຊາດຮອດປີ 2020, ວິໄສທັດເຖິງປີ 2030 ຂອງຫວຽດນາມ ໄດ້ວາງອອກຄາດໝາຍແມ່ນ ຮອດປີ 2030, ເຂົ້າສານຫອມ ແລະ ເຂົ້າສານພິເສດຈະກວມປະມານ 30% ຍອດຈຳນວນເຂົ້າສານສົ່ງອອກຂອງຫວຽດນາມ. ແຕ່ເພື່ອຍູ້ແຮງການສົ່ງອອກເຂົ້າສານເຂົ້າຕະຫຼາດອາເມລິກາ, ຍີ່ປຸ່ນ, ອົດສະຕາລີ ໃຫ້ໄດ້, ບັນດາວິສາຫະກິດ ແລະ ຊາວກະສິກອນຕ້ອງລົງທຶນຫຼາຍໃຫ້ການພັດທະນາແນວພັນເຂົ້າ, ຮັບປະກັນຄຸນນະພາບຂອງເຂົ້າສານ, ສ້າງເຄື່ອງໝາຍການຄ້າ ແລະ ສົ່ງເສີມດ້ານການຄ້າ. ນີ້ກໍແມ່ນບັນດາມາດຕະການແກ້ໄຂທີ່ຈຳເປັນໃນວິວັດແຫ່ງການຈັດຕັ້ງການຜະລິດເຂົ້າສານຄືນໃໝ່, ຍົກສູງຄຸນນະພາບ ແລະ ມູນຄ່າໃຫ້ເຂົ້າສານຫວຽດນາມ ເທື່ອລະກ້າວ.