(vovworld)- ໃນຊຸມເດືອນຕົ້ນປີ 2013, ສະພາບການຜະລິດ, ສົ່ງອອກເຄື່ອງຕຳ່ແຜ່ນຕັດຫຍິບຂອງຫວຽດນາມ ບັນລຸລະດັບເຕີບໂຕດີພໍສົມຄວນ ໃນຂະນະທີ່ວິສາຫະກິດຫລາຍແຫ່ງໄດ້ຮັບໃບສັ່ງຊື້ສິນຄ້າໃຫ້ທັງປີ. ເຖິງຢ່າງໃດກໍຕາມ, ຕາມການຄາດຄະເນແລ້ວ, ຕະຫລາດໂລກຍັງສາມາດຟື້ນຕົວຢ່າງຊັກຊ້າ, ສະນັ້ນ ມີວິສາຫະກິດຫລາຍແຫ່ງໄດ້ເລືອກເຟັ້ນບັນດາມາດຕະການພັດທະນາເປັນປົກກະຕິ ແລະ ໝັ້ນຄົງ
ພາບປະກອບ:internet
|
ເມື່ອທຽບໃສ່ໄລຍະດຽວກັນຂອງປີກາຍ, ສະພາບການສົ່ງອອກເຄື່ອງຕຳ່ແຜ່ນຕັດຫຍິບຂອງ ຫວຽດນາມ ໃນຊຸມເດືອນຕົ້ນປີ 2013 ບັນລຸລະດັບເຕີບໂຕດີພໍສົມຄວນ. ມີວິສາຫະກິດສ່ວນຫລາຍໄດ້ຮັບໃບສັ່ງຊື້ສິນຄ້າໝົດໄຕມາດທີ 1, ຊ້ຳບໍ່ໜຳ ບາງວິສາຫະກິດ ຍັງໄດ້ຮັບໃບສັ່ງຊື້ສິນຄ້າຮອດໄຕມາດທີ 2, ທີ 3 ຂອງປີ 2013 ແລ້ວ. ພິເສດ ບາງຕະຫລາດໃຫຍ່ຄື ອາເມລິກາ, ຍີ່ປຸ່ນ, ພາຍຫລັງໄລຍະຫນຶ່ງທີ່ຫລຸດຜ່ອນໃບສັ່ງງຊື້ສິນຄ້າ, ມາຮອດປະຈຸບັນ ເຂົາເຈົ້າໄດ້ສະເຫນີເພີ່ມໃບຊ່ັງຊື້ສິນຄ້າຄືນໃຫມ່. ສິ່ງດັ່ງກ່າວໄດ້ເຮັດໃຫ້ບັນຍາກາດການຜະລິດໃນຊຸມເດືອນຕົ້ນປີຂອງຂະແຫນງຕຳ່ແຜ່ນຕັດຫຍິບຟົດຟື້ນຂຶ້ນຕື່ມ. ບັນດາບໍລິສັດໃຫຍ່ໃນກຸ່ມບໍລິສັດຕຳ່ແຜ່ນຕັດຫຍິບ ຫວຽດນາມ (Vinatex) ຄື: ບໍລິສັດໃຫຍ່ ຟອງຟູ, ຫວຽດຕຽນ, ບໍລິສັດຕັດຫຍິບເລກ 10, ດຶກຢາງ, ບໍລິສັດຕຳ່ແຜ່ນຕັດຫຍິບຮ່າໂນ້ຍ ຫລື ບັນດາບໍລິສັດຕຳ່ແຜ່ນຕັດຫຍິບ ເຫ້ວ, Vinatex ດາຫນັງ, ບໍລິສັດຕຳ່ແຜ່ນອຸດສາຫະກຳ ຮ່າໂນ້ຍ … ພວມສືບຕໍ່ສຸມກຳລັງແຮງເພື່ອຮັກສາທ່າເຕີບໂຕໃນການສົ່ງອອກ. ຕາມຕົວເລກຫລ້າສຸດຂອງກະຊວງອຸດສາຫະກຳການຄ້າຫວຽດນາມ ແລ້ວ, ວົງເງິນສົ່ງອອກເຄື່ອງຕຳ່ແຜ່ນຕັດຫຍິບໃນເດືອນ 1/2013 ຂອງຫວຽດນາມ ບັນລຸ 1,05 ຕື້ USD, ເພີ່ມຂຶ້ນ 28,4% ເມື່ອທຽບໃສ່ໄລຍະດຽວກັນຂອງປີກາຍ. ເຖິງຢ່າງໃດກໍຕາມ, ຕາມການຄາດຄະເນຂອງສະຫະສະມາຄົມຕຳ່ແຜ່ນຕັດຫຍິບຫວຽດນາມ ແລ້ວ, ຕະຫລາດຕຳ່ແຜ່ນຕັດຫຍິບຢູ່ບັນດາຕະຫລາດໃຫຍ່ຍັງຄົງສາມາດຟື້ນຕົວຢ່າງຊັກຊ້າ, ຮຽກຮ້ອງໃຫ້ບັນດາວິສາຫະກິດຕຳ່ແຜ່ນຕັດຫຍິບ ຫວຽດນາມ ຕ້ອງມີບັນດາມາດຕະການພັດທະນາແບບຍືນຍົງ. ຄຽງຄູ່ກັບການຮັກສາອັດຕາສ່ວນຢູ່ບັນດາຕະຫລາດເດີມແລ້ວ, ວິສາຫະກິດຫລາຍແຫ່ງກໍຕັ້ງຫນ້າຊອກຫາຕະຫລາດໃຫມ່, ພ້ອມທັງປະຕິບັດບັນດາມາດຕະການຢ່າງຄົບຊຸດ ເພື່ອສ້າງຜະລິດຕະພັນສິນຄ້າທີ່ມີມູນຄ່າເພີ່ມໃຫ້ສູງກວ່າ. ທ່ານນາງ ຫງວຽນທິແທງຮ່ວຽນ, ຜູ້ອຳນວຍການບໍລິສັດໃຫຍ່ຕຳ່ແຜ່ນຕັດຫຍິບເລກ 10 ຖືວ່າ:
“ໃນເງື່ອນໄຂປະຈຸບັນ, ເສັ້ນທາງຫນຶ່ງດຽວສາມາດຄົງຕົວ ແລະ ພັດທະນາໄດ້ ນັ້ນ, ດ້ານຫນຶ່ງແມ່ນຕ້ອງຫລຸດຜ່ອນລາຍຈ່າຍ, ດ້ານອື່ນອີກແມ່ນຕ້ອງເພີ່ມທະວີວຽກງານຄົ້ນຄ້ວາ, ພັດທະນາຮູບແບບຜະລິດຕະພັນ. ຄຽງຄູ່ກັນນັ້ນ ຕ້ອງຍົກສູງຄວາມສາມາດບໍລິຫານວິສາຫະກິດ, ຈັດຕັ້ງການຜະລິດຢ່າງເໝາະສົມ, ບຳລຸງສີມືການຊ່າງໃຫ້ແກ່ກຳມະກອນ, ພະນັກງານ, ລັດຖະກອນ ເພື່ອໃຫ້ເຂົາເຈົ້າມີຄວາມສາມາດຕອບສະໜອງໄລຍະເວລາມອບສິນຄ້າກໍຄືທຸກຄຳຮຽກຮ້ອງຕ້ອງການທີ່ນັບມື້ນັບສູງຂອງລູກຄ້າ, ແຕ່ລາຄາຕ້ອງເໝາະສົມ.”
ບໍລິສັດໃຫຍ່ຕຳ່ແຜ່ນຕັດຫຍິບ ດຶກຢາງ ແມ່ນຫນຶ່ງໃນບັນດາວິສາຫະກິດສົ່ງອອກຕົ້ນຕໍໄປຍັງຕະຫລາດອາເມລິກາ ແລະ ເອີລົບ, ໃນນັ້ນການສົ່ງອອກໄປຍັງ ອາເມລິກາ ກວມປະມານ 55% ແລະ ຕະຫລາດເອີລົບແມ່ນ 30%, ແຕ່ໃນປີກາຍນີ້ ໃບສັ່ງຊື້ສິນຄ້າຢູ່ຕະຫລາດສອງແຫ່ງດັ່ງກ່າວຖືກຫລຸດລົງ. ໂດຍອີງໃສ່ຄວາມສະດວກຍ້ອນມີໃບສັ່ງຊື້ສິນຄ້າໃນຕົ້ນປີ, ບໍລິສັດໃຫຍ່ຕຳ່ແຜ່ນຕັດຫຍິບ ດຶກຢາງ ໄດ້ວາງຄາດໝາຍສົ່ງອອກບັນລຸໃຫ້ໄດ້ປະມານ 50 ລ້ານ USD ໃນປີນີ້. ທ່ານ ຮ່ວາງເຫ້ວຢູງ (Hoang Ve Dung) , ປະທານສະພາບໍລິຫານ, ທັງເປັນຜູ້ອຳນວຍການໃຫຍ່ບໍລິສັດຕຳ່ແຜ່ນຕັດຫຍິບ ດຶກຢາງ ໃຫ້ຮູ້ວ່າ:
“ສຳລັບຕະຫລາດເດີມ ພວກຂ້າພະເຈົ້າຍັງຄົງສືບຕໍ່ສົ່ງອອກສິນຄ້າ, ບັນຫານັ້ນແມ່ນຕ້ອງມີມາດຕະການເຮັດແນວໃດເພື່ອສ້າງລະບົບສະຫນອງສິນຄ້າໃຫ້ໄດ້, ນັບແຕ່ການອອກແບບ, ການຜະລິດ, ຕະຫລອດຮອດການແຈກຢາຍ ແລະ ດີທີ່ສຸດແມ່ນຕ້ອງເພີ່ມປະລິມານການສົ່ງອອກສິນຄ້າໄປຍັງຕະຫລາດດັ່ງກ່າວ. ນອກນັ້ນ ພວກຂ້າພະເຈົ້າຍັງມຸ່ງໄປເຖິງບັນດາຕະຫລາດໃຫມ່ທີ່ມີຄວາມສາມາດບົ່ມຊ້ອນ, ພິເສດ ແມ່ນຕະຫລາດລັດເຊຍ, ເບລາຣຸດ, ກາຊັກສະຖານ…”
ການສົ່ງອອກເຄື່ອງຕຳ່ແຜ່ນຕັດຫຍິບ ຫວຽນາມ ໃນຊຸມເດືອນຕົ້ນປີບັນລຸການເຕີບໂຕດີພໍສົມຄວນ
ພາບ:tamnhin.net
|
ຄວາມຈິງໃຫ້ເຫັນວ່າ, ບັນດາຕະຫລາດໃຫມ່ ຊື່ງຂະແຫນງຕຳ່ແຜ່ນຕັດຫຍິບພວມມີຄື: ບັນດາຕະຫລາດ SNG, ຕາເວັນອອກກາງ, ອາຟຼິກາ ມູນຄ່າລາຍຮັບບັນລຸພຽງ 30- 50 ລ້ານ USD/ປີ, ສະນັ້ນ ຄວາມສາມາດບົ່ມຊ້ອນຂອງບັນດາຕະຫລາດໃຫມ່ແມ່ນບໍ່ຫລາຍ, ສະນັ້ນ ຄຽງຄູ່ກັບການຊອກຫາຕະຫລາດໃຫມ່ ຫນ້າທີ່ຂອງບັນດາວິສາຫະກິດສົ່ງອອກເຄື່ອງຕຳ່ແຜ່ນຕັດຫຍິບ ຍັງຄົງຕ້ອງຮັກສາຕະຫລາດເດີມ. ທ່ານ ເລຕຽນເຈື່ອງ, ຮອງປະທານປະຈຳກຸ່ມບໍລິສັດໃຫຍ່ຕຳ່ແຜ່ນຕັດຫຍິບ ຫວຽດນາມ ຖືວ່າ:
“ພວກເຮົາຕ້ອງຮັກສາບັນດາຕະຫລາດເດີມໄວ້ເປັນຢ່າງດີ ແລະ ຕ້ອງເພີ່ມອັດຕາສ່ວນສິນຄ້າຢູ່ຕະຫລາດນັ້ນ ເພື່ອປະຢັດລາຍຈ່າຍ ກໍຄືພັດທະນາຕະຫລາດໃຫມ່. ພວກເຮົາຮູ້ນຳກັນແລ້ວວ່າ: ສະເພາະຕະຫລາດ ອາເມລິກາ ກວມອັດຕາສ່ວນ ຈຳຫນ່າຍເຄື່ອງຕຳ່ແຜ່ນຕັດຫຍິບກວ່າ 50% ຂອງໂລກ, ສະນັ້ນ ຍາດໄດ້ 1-2% ອັດຕາສ່ວນຢູ່ຕະຫລາດອາເມລິກາ ກໍສວມບົດບາດສຳຄັນໃນການພັດທະນາລວມຂອງທົ່ວຂະແຫນງ.”
ໃນ 3 ປີມານີ້, ເຄື່ອງຕຳ່ແຜ່ນຕັດຫຍິບ ຫວຽດນາມ ໄດ້ປະສົບຜົນສຳເລັດໃນການພັດທະນາຕະຫລາດໃຫມ່ຄື: ສເກົາຫລີ, ໄຕ້ຫວັນ, ລັດເຊຍ, ປະກອບສ່ວນຍົກສູງວົງເງິນສົ່ງອອກຂອງທົ່ວຂະແຫນງ. ເຖິງຢ່າງໃດກໍຕາມ,ໃນປີ 2013 ຕະຫລາດຈຳຫນ່າຍຈຸດສຸມຂອງເຄື່ອງຕຳ່ແຜ່ນຕັດຫຍິບ ຫວຽດນາມ ຍັງຄົງແມ່ນອາເມລິກາ, ຍີ່ປຸ່ນ, ເອີລົບ. ຂະແຫນງຕຳ່ແຜ່ນຕັດຫຍິບ ຫວຽດນາມ ປາດຖະຫນາຢາກສູ້ຊົນຮັກສາລະດັບຈະເລີນເຕີບໂຕຈາກ 10% ຂຶ້ນເຖິງເກືອບ 12% ໃນປີ 2013.