(vovworld) - ໃນຊຸມປີມໍ່ໆມານີ້, ບັນດາຜະລິດຕະພັນສ່ົງອອກ ຄື: ໂທລະສັບ, ເອເລັກໂຕນິກ, ຊິ້ນສ່ວນເອເລັກໂຕນິກ ຂອງ ຫວຽດນາມ ບັນລຸລະດັບຈະເລີນເຕີບໂຕດີພໍສົມຄວນ. ພິເສດ ໄລ່ຮອດທ້າຍເດືອນ 8 ປີນີ້, ການສົ່ງອອກບັນດາປະເພດສິນຄ້າດັ່ງກ່າວບັນລຸລະດັບເຕີບໂຕກະໂດດຂັ້ນ, ມູນຄ່າການສົ່ງອອກປະເພດສິນຄ້າ ອຸດສາຫະກຳເອເລັກໂຕນິກຢືນອັນດັບທີ 2, ຖັດຈາກການສົ່ງອອກເຄື່ອງຕ່ຳແຜ່ນຕັດຫຍິບ.
ການສົ່ງອອກໂທລະສັບ ແລະ ຊິ້ນສ່ວນເອເລັກໂຕນິກ ຂອງຫວຽດນາມ ບັນລຸລະດັບຈະເລີນເຕີບໂຕດີພໍສົມຄວນ
ພາບ: internet |
ໃນ 3 ປີມານີ້, ບັນດາຜະລິດຕະພັນ ໂທລະສັບ, ເຄື່ອງເອເລັກໂຕນິກ, ຊິ້ນສ່ວນເອເລັກໂຕນິກ ສ່ົງອອກ ຂອງ ຫວຽດນາມ ຍາມໃດກໍນອນໃນຈຳນວນສິນຄ້າ 10 ປະເພດມີວົງເງິນສົ່ງອອກຫລາຍກວ່າໝູ່ຢູ່ ຫວຽດນາມ. ໃນນັ້ນ, ລະດັບຈະເລີນເຕີບໂຕຂອງໝວດຜະລິດຕະພັນເອເລັກໂຕນິກ ແລະ ຊິ້ນສ່ວນເອເລັກໂຕນິກປີນີ້ແມ່ນສູງກວ່າປີກ່ອນ. ຈາກ 2,76 ຕື້ USD ໃນປີ 2009 ຂຶ້ນເຖິງ 4,66 ຕື້ USD ໃນປີ 2011. ກ້າວເຂົ້າສູ່ປີ 2012, ໄລ່ຮອດທ້າຍເດືອນ 8, ຍອດມູນຄ່າການສົ່ງອອກໂທລະສັບ ແລະ ເຄື່ອງອາໄຫລ່ບັນລຸ 7,41 ຕື້ USD, ໃນຂະນະ ທີ່ ຄອມພິວເຕີ, ເອເລັກໂຕນິກ ແລະ ເຄື່ອງອາໄຫລ່ເອເລັກໂຕນິກກໍບັນລຸ 4,76 ຕື້ USD. ຄາດວ່າໝົດປີນີ້ ໝວດສິນຄ້າສົ່ງອອກທັງສອງດັ່ງກ່າວສາມາດບັນລຸວົງເງິນສົ່ງອອກປະມານ 15 - 16 ຕື້ USD. ການຂະຫຍາຍຕົວຂອງການສົ່ງອອກໂທລະສັບ, ເອເລັກໂຕນິກ ແລະ ຊິ້ນ ສ່ວນໃນໄລຍະຜ່ານມາບໍ່ພຽງແຕ່ພິສູດໃຫ້ເຫັນທິດທາງອັນຖືກຕ້ອງໃນການພັດທະນາຂະແຫນງເອເລັກໂຕນິກ ຫວຽດນາມເທົ່ານັ້ນ ຫາກຍັງສະແດງໃຫ້ເຫັນການຫັນປ່ຽນສຳຄັນຂອງ ຫວຽດນາມ ເພື່ອນຳຂະແຫນງເອເລັກໂຕນິກກາຍເປັນຂະແຫນງຈຸດສຸມບັນລຸປະສິດທິຜົນສູງ. ຈາກການຕິດຕັ້ງບັນດາຜະລິດຕະພັນເອເລັກໂຕນິກໃຊ້ສອຍທຳມະດາຮັບໃຊ້ຕະຫລາດພາຍໃນເທົ່ານັ້ນ, ມາຮອດປະຈຸບັນ ຂະແຫນງເອເລັກໂຕນິກ ຫວຽດນາມ ໄດ້ຫັນໄປສູ່ການຜະລິດບັນດາ ຊິ້ນສ່ວນເອເລັກໂຕນິກຮັບໃຊ້ການສົ່ງອອກ ແລະ ອອກແບບເອງ, ຜະລິດຕະພັນເອເລັກໂຕນິກເຕັກໂນໂລຊີຂໍ້ມູນຂ່າວສານຊ່ືງໄດ້ຮັບການຮັບຮູ້ຈາກຕະຫລາດພາຍໃນ ແລະ ໂລກ. ທ່ານ Nguyen Duc Thang ປະທານສະພາສະມາຊິກບໍລິສັດເອເລັກໂຕນິກ Tien Dat ຖືວ່າ:
“ປະຈຸບັນ ການສົ່ງອອກເອເລັກໂຕນິກ ຫວຽດນາມ ພວມເຕີບໂຕຢ່າງວ່ອງໄວ, ສາມາດບັນລຸ 50%/ປີ. ລະອຽດແມ່ນ ປະຈຸບັນ ການສົ່ງອອກເອເລັກໂຕນິກ ບັນລຸກວ່າ 10 ຕື້ USD ໃນຂະນະທີ່ສອງສາມປີກ່ອນ ພຽງບັນລຸໄດ້ 2 - 3 ຕື້ເທົ່ານັ້ນ USD. ພິເສດ ປີ 2011 ບັນລຸກວ່າ 10 ຕື້ USD ແລະ ປີນີ້ ສາມາດບັນລຸລະດັບ 15 ຕື້ USD, ນັ້ນແມ່ນມີຜົນສຳເລັດອັນໃຫຍ່ຫລວງຂອງຂະແຫນງເອເລັກໂຕນິກ ຫວຽດນາມ.”
ລະດັບຈະເລີນເຕີບໂຕໃນການສົ່ງອອກຂອງຂະແຫນງເອເລັກໂຕນິກ ໄລຍະຜ່ານມານັບມື້ນັບດີຂຶ້ນ, ເປັນຕົ້ນແມ່ນໃນສະພາບເສດຖະກິດທົ່ວໂລກໄລຍະຜ່ານມາປະສົບກັບຄວາມຫຍຸ້ງຍາກຫລາຍຢ່າງ. ເຖິງຢ່າງໃດກໍຕາມ, ໄປຄຽງຄູ່ກັບບັນດາຜົນງານນັ້ນ, ຂະແຫນງເອເລັກໂຕນິກ ຫວຽດນາມ ຍັງມີຂໍ້ຂາດຕົກບົກຜ່ອງບາງຢ່າງໃນອົງປະກອບຜະລິດຕະພັນ, ເປັນຕົ້ນແມ່ນຂາດຄວາມດຸນດຽງລະຫວ່າງເຄື່ອງເອເລັກໂຕນິກໃຊ້ສອຍ (70%) ແລະ ເຄື່ອງເອເລັກໂຕນິກສະເພາະຂະແໜງ (30%). ສະນັ້ນ ເພື່ອພັດທະນາຂະແຫນງເອເລັກໂຕນິກກວ່າອີກ ຕ້ອງມີການຫນູນຊ່ວຍຈາກລັດ ແລະ ສະຫະສະມາຄົມໃນການເປີດກວ້າງກາລະໂອກາດລົງທຶນໃຫ້ແກ່ຂະແຫນງ. ທ່ານ Le Ngoc Son, ປະທານສະຫະສະມາຄົມ ເອເລັກໂຕນິກ ຫວຽດນາມ ໃຫ້ຮູ້ວ່າ:
“ປະຈຸບັນ ເຄື່ອງເອເລັກໂຕນິກຊົມໃຊ້ ແລະ ເຄື່ອງເອເລັກໂຕນິກສະເພາະຂະແໜງ ກວມອັດຕາສ່ວນ 7/3 ໃນຂະນະບັນດາປະເທດພັດທະນານັ້ນທັງພັດທະນາ ເຄື່ອງເອເລັກໂຕນິກຊົມໃຊ້ ແລະ ເຄື່ອງເອເລັກໂຕນິກສະເພາະຂະແໜງ ຕົວຢ່າງຄື: ໂທລະພາບ, Audio, ໄຟຟ້າ... ໄປຄຽງຄູ່ກັນນັ້ນ ຍັງມີເອເລັກໂຕນິກການແພດ, ເອເລັກໂຕນິກອຸດສາຫະກຳ. ສະນັ້ນ ຄວນມີການພັດທະນາເພື່ອສ້າງຄວາມສົມດູນກວ່າອີກ.”
ໃນທ່າອ່ຽງພັດທະນາ, ຂະແຫນງເອເລັກໂຕນິກ ຫວຽດນາມ ໄລຍະຜ່ານມາໄດ້ມີຫລາຍໂຄງການໃຫຍ່ທີ່ນຳໃຊ້ເຕັກໂນໂລຊີສູງຈາກບັນດາບໍລິສັດເອເລັກໂຕນິກຊັ້ນນຳຄື: Intell, Canon, Samsung, Nokia… ພ້ອມກັນນັ້ນຍັງຂະຫຍາຍຫລາຍໂຄງການຜະລິດເຄື່ອງອາໄຫລ່, ຊິ້ນສ່ວນອື່ນ. ນີ້ກໍແມ່ນທິດເດີນສະດວກເພ່ືອດຶງດູດບັນດາໂຄງການລົງທຶນຂອງຕ່າງປະເທດເຂົ້າໃນຂົງເຂດອຸດສາຫະກຳເອເລັກໂຕນິກ. ບັນດາຕະຫລາດສົ່ງອອກຊິ້ນສ່ວນເອເລັກໂຕນິກຂອງ ຫວຽດນາມ ປະຈຸບັນ ແມ່ນ: ຍີ່ປຸ່ນ, ສເກົາຫລີ, ສິງກະໂປ, ມາເລເຊຍ. ເຄື່ອງເອເລັກໂຕນິກຂອງ ຫວຽດນາມ ກໍແຊກຊືມເຂົ້າຕະຫລາດອາເມລິກາ, ອາເມລິກາລາຕີນ, ເອີລົບ, ອາຟຼີກາ ເທື່ອລະກ້າວ. ເຖິງວ່າ ປະລິມານການສົ່ງອອກສິນຄ້າປະເພດນີ້ຂອງຫວຽດນາມ ຍັງຈຳກັດຢູ່ເມ່ືອທຽບໃສ່ບັນດາປະເທດໃນພາກພື້ນກໍຕາມ ແຕ່ລະດັບຈະເລີນເຕີບໂຕໃນໄລຍະມໍ່ໆມານີ້ແມ່ນວ່ອງໄວພໍສົມຄວນ. ພິເສດ ປະຈຸບັນ ຫວຽດນາມ ໄດ້ດຶງດູດ ແຫລ່ງເງິນລົງທຶນຂອງຕ່າງປະເທດເປັນຈຳນວນຫລວງຫລາຍ ແລະ ໄດ້ຮັບການຕີລາຄາວ່າ ແມ່ນຫນຶ່ງໃນບັນດາສະຖານທີ່ໄວ້ຫນ້າເຊື່ອຖືຂອງບັນດານັກລົງທຶນເຂົ້າຂົງເຂດອຸດສາຫະກຳເອເລັກໂຕນິກ. ທ່ານ Le Ngoc Son, ປະທານສະຫະສະມາຄົມ ເອເລັກໂຕນິກ ຫວຽດນາມ ໃຫ້ຮູ້ວ່າ:
“ລັດຖະບານ ຫວຽດນາມ ຈະສ້າງຍຸດທະສາດພັດທະນາໃຫ້ແກ່ຂະແຫນງອຸດສາຫະກຳສຳຮອງ. ເມື່ອບັນດາວິສາຫະກິດເອເລັກໂຕນິກໃຫຍ່ເຂົ້າມາລົງທຶນຢູ່ ຫວຽດນາມ ຕ້ອງມີບັນດາວິສາຫະກິດຜະລິດຊິ້ນສ່ວນຫລືກຸ່ມອຸດສາຫະກຳສຳຮອງເພື່ອສ້າງເງື່ອນໄຂໃຫ້ເຂົາເຈົ້າ. ຕາມທິດກ້າວເດີນນີ້, ຫວຽດນາມ ຈະເຂົ້າຮ່ວມບັນດາວິສາຫະກິດຜະລິດຊິ້ນສ່ວນສະຫນອງຜະລິດຕະພັນໃຫ້ແກ່ວິສາຫະກິດຕ່າງປະເທດ.”
ພາບປະກອບ:baodautu.vn
|
ໃນໄລຍະຈະມາເຖິງ, ເພື່ອເພີ່ມທະວີກຳລັງຄວາມສາມາດແກ້ງແຍ້ງໃຫ້ແກ່ຂະແຫນງເອເລັກໂຕນິກຢູ່ທັງຕະຫລາດພາຍໃນ ແລະ ຕ່າງປະເທດ, ຫວຽດນາມ ພວມເອົາໃຈໃສ່ເປັນພິເສດເຖິງການພັດທະນາອຸດສາຫະກຳ, ຄົ້ນຄ້ວາພັດທະນາຜະລິດຕະພັນໃຫມ່ ແລະ ເພີ່ມມູນຄ່າເພ່ີມຂອງຜະລິດຕະພັນ. ເພື່ອສ້າງພື້ນຖານ ແລະ ຄວາມເປັນປົກກະຕິເພື່ອໃຫ້ຂະແຫນງອຸດສາຫະກຳເອເລັກໂຕນິກພັດທະນາ, ຫວຽດນາມ ພວມສ້າງນະໂຍບາຍສະດວກກວ່າເພື່ອດຶງດູດວິສາຫະກິດໃຫຍ່ຢູ່ໃນໂລກລົງທຶນເຂົ້າຫວຽດນາມ ກໍຄືສ້າງເງື່ອນໄຂເພື່ອໃຫ້ວິສາຫະກິດພາຍໃນປະເທດເຂົ້າຮ່ວມວິວັດການນີ້. ເພື່ອບັນລຸໄດ້ຈຸດໝາຍນີ້ ບັນຫາການລົງທຶນດ້ານພື້ນຖານໂຄງລ່າງ ແລະ ປະຕິບັດບັນດາປັດໃຈສ້າງວິສາຫະກິດສຳຮອງຢ່າງຄົບຊຸດພວມໄດ້ຮັບຄວາມເອົາໃຈໃສ່ຈາກລັດ ແລະ ວິສາຫະກິດ. ນີ້ແມ່ນບັນດາພື້ນຖານສຳຄັນເພື່ອໃຫ້ຂະແຫນງເອເລັກໂຕນິກ ແລະ ຊິ້ນສ່ວນເອເລັກໂຕນິກບັນລຸມູນຄ່າການສົ່ງອອກເພີ່ມຂຶ້ນຢ່າງແຮງ ແລະ ໝັ້ນຄົງໃນໄລຍະຈະມາເຖິງ.