(vov) - ທ່ານນາຍົກລັດຖະມົນຕີ ຫງວຽນເຕີນຢູງ ຫາກໍມອບໃຫ້ກະຊວງ, ຂະແຫນງການກ່ຽວຂ້ອງ ສ້າງ, ປະກອບຄຳເຫັນເພື່ອຮອດເດືອນ 6/2012 ຕ້ອງສຳເລັດຮ່າງຍຸດທະສາດການເຕີບໂຕຂຽວ ຂອງຫວຽດນາມ ຮອດປີ 2030 ວິໄສທັດຮອດ ປີ 2050. ຕາມການກຳນົດທິດແລ້ວ ຫວຽດນາມ ຈະກາຍເປັນປະເທດອຸດສາຫະກຳຕາມທິດທັນສະໄຫມໃນປີ 2020,ໃນຊຸມປີທີ່ຈະມາເຖິງ, ຄວາມຕ້ອງການລົງທຶນຢູ່ຫວຽດນາມ ຈະໃຫຍ່ຫລວງ, ເປັນຕົ້ນແມ່ນໃນຂົງເຂດອຸດສາຫະກຳ, ຄົມມະນາຄົມຂົນສົ່ງ, ການພັດທະນາເຂດຕົວເມືອງ. ເພື່ອປະຕິບັດຈຸດໝາຍນີ້, ຫວຽດນາມ ມີແຜນນະໂຍບາຍປັບປຸງຍຸດທະສາດການເຕີບໂຕຂຽວ, ບໍ່ພຽງແຕ່ເພື່ອເປັນການຍົກສູງປະສິດທິຜົນ ແລະ ລັກສະນະແກ້ງແຍ້ງຂອງພື້ນຖານເສດຖະກິດເທົ່ານັ້ນ ຫາກຍັງຮັບມືກັບການປ່ຽນແປງຂອງດິນຟ້າອາກາດຢ່າງມີປະສິດທິຜົນອີກດ້ວຍ ພ້ອມທັງບັນເທົາມົນລະພິດເຮືອນແກ້ວ, ພ້ອມກັບທົ່ວໂລກ ໃນຄວາມມານະພະຍາຍາມ ຮັບມືກັບການປ່ຽນແປງຂອງດິນຟ້າອາກາດ.
ປະຈຸບັນ ການເຕີບໂຕຂຽວພວມແມ່ນການເລືອກເຟັ້ນບຸລິມະສິດໃນນະໂຍບາຍພັດທະນາຂອງຫລາຍປະເທດ ໃນສະພາບການປ່ຽນແປງຂອງດິນຟ້າອາກາດນັບທີ່ມື້ນັບຮ້າຍແຮງ ແລະ ສົ່ງຜົນສະທ້ອນຢ່າງຫນັກຫນ່ວງ. ສຳລັບປະເທດພວມພັດທະນາຄືຫວຽດນາມ ການເຕີບໂຕຂຽວ ຈະເປີດກາລະໂອກາດອັນໃຫຍ່ຫຼວງໃນການຫັນປ່ຽນອົງປະກອບເສດຖະກິດ, ສ້າງວຽກເຮັດງານທຳ, ເພີ່ມລາຍຮັບໃຫ້ແກ່ປະຊາຊົນ. ຕາມການສະຖິຕິຂອງໂຄງການພັດທະນາສະປະປະຊາຊາດ (UNDP) ແລ້ວ, ຍອດລະດັບປ່ອຍອາຍພິດເຮືອນແກ້ວຂອງຫວຽດນາມໃນ ປີ 2000 ແມ່ນເທົ່າກັບ ປະລິມານ cacbonnic 150 ລ້ານໂຕນ. ເຖິງຢ່າງໃດກໍຕາມ ລະດັບປ່ອຍອາຍພິດເຮືອນແກ້ວຄິດໄລ່ຕາມຫົວຄົນຢູ່ຫວຽດນາມ ຍັງຕ່ຳກວ່າຫລາຍເມື່ອທຽບໃສ່ກັບບັນດາປະເທດພວມພັດທະນາ ແຕ່ກໍເພີ່ມຂຶ້ນຢ່າງວ່ອງໄວໃນໄລຍະມໍ່ໆມານີ້. ພ້ອມກັນນັ້ນ ຊັບພະຍາກອນທຳມະຊາດ ກໍຍັງບໍ່ທັນໄດ້ຮັບຖືວ່າ ແມ່ນແຫລ່ງກຳລັງສຳຄັນຕົ້ນຕໍ ດັ່ງນັ້ນຈຶ່ງພາໃຫ້ເກີດບັນຫາຕ່າງໆຄື: ປະສິດທິຜົນການນຳໃຊ້ຍັງຕ່ຳ, ເກີດການຮົ່ວໄຫລ, ຟຸມເຟືອຍ ແລະ ເຮັດໃຫ້ມົນລະພິດສ່ິງແວດລ້ອມເພີ່ມຂຶ້ນ.
ທ່ານ ຫງວຽນວັນຕາຍ, ຫົວຫນ້າສະຖານບັນຍຸດທະສາດນະໂຍບາຍຊັບພະຍາກອນ ແລະ ສິ່ງແວດລ້ອມ, ສັງກັດກະຊວງຊັບພະຍາກອນ ແລະ ສິ່ງແວດລ້ອມ ໄດ້ໃຫ້ຂໍ້ສັງເກດວ່າ ໃນຊຸມປີຈະມາເຖິງ ບັນດາການເຄື່ອນໄຫວຜະລິດ ນັບມື້ນັບເພີ່ມຂຶ້ນຢ່າງແຮງ ແລະ ຄວາມຕ້ອງການນຳໃຊ້ພະລັງງານຈະຫລາຍທີ່ສຸດ. ສະນັ້ນ ການເຕີບໂຕຂຽວ ແມ່ນວິທີການພັດທະນາທີ່ເໝາະສົມກັບຄວາມຮຽກຮ້ອງຕ້ອງການປ່ຽນໃຫມ່ຮູບແບບການເຕີບໂຕຂຽວ ແລະ ການສ້າງໂຄງປະກອບພື້ນຖານເສດຖະກິດຄືນໃຫມ່. ທ່ານ ຫງວຽນວັນຕ່າຍ ເວົ້າວ່າ:
“ການເຕີບໂຕຂຽວ ໄດ້ກາຍເປັນທ່າອ່ຽງທີ່ຈຳເປັນ. ຫວຽດນາມ ຕ້ອງເຂົ້າຮ່ວມທ່າອ່ຽງນັ້ນ. ສະນັ້ນ ໜ້າວຽກທຳອິດນັ້ນແມ່ນ ຫວຽດນາມ ຕ້ອງກຳນົດໄດ້ ທີ່ຕັ້ງບົດບາດຂອງຕົນໃນພື້ນຖານເສດຖະກິດຂຽວ ຈາກນັ້ນຈະເປັນການຫັນປ່ຽນພື້ນຖານເສດຖະກິດຂອງຕົນ ຕາມທິດເສດຖະກິດຂຽວ. ແຕ່ເຖິງຢ່າງໃດກໍຕາມ, ປະຈຸບັນ ແຕ່ລະປະເທດ ພວມເລືອກເຟັ້ນວິທີສຳພັດຕ່າງກັນ ອີງຕາມລະດັບການ ພັດທະນາ ກໍຄືບັນຫາເສດຖະກິດ, ຊັບພະຍາກອນສິ່ງແວດລ້ອມເພື່ອມີການເລືອກເຟັ້ນໃຫ້ເໝາະສົມ.”
ໂດຍອີງໃສ່ 11 ຂົງເຂດຂອງພື້ນຖານເສດຖະກິດຂຽວຕາມໂຄງການປົກປັກຮັກສາສິ່ງແວດລ້ອມຂອງ ສະຫະປະຊາຊາດ, ຫວຽດນາມ ມີທ່າໄດ້ປຽບຫລາຍຢ່າງ ດ້ວຍລັກສະນະຊີວະນາໆພັນສູງ, ການຜະລິດກະສິກຳກວມອັດຕາສ່ວນໃຫຍ່ໃນພື້ນຖານເສດຖະກິດ. ຄວາມຈິງແລ້ວ, ການລົງທຶນຍົກລະດັບກະສິກຳ ໃຫ້ກາຍເປັນພື້ນຖານເສດຖະກິດຂຽວທີ່ຜະລິດ ຜະລິດຕະພັນກະເສດທີ່ມີຄຸນນະພາບສູງ ຈະປະກອບສ່ວນປັບປຸງທີ່ຕັ້ງຂອງຫວຽດນາມໃຫ້ຢືນອັນດັບຕົ້ນໃນແຜນການຮັບມືກັບວິກິດການໃນບັນຫາຄ້ຳປະກັນດ້ານສະບຽງອາຫານ. ຄຽງຂ້າງນັ້ນ ການປະມົງ, ສິນໃນນ້ຳ ກໍແມ່ນທ່າແຮງຄວນໄດ້ຮັບການຂຸດຄົ້ນ ປຸງແຕ່ງຕາມທິດສະອາດກວ່າ ເປີດແງ່ຫວັງໃນການສົ່ງອອກໄປສູ່ຕະຫລາດໃຫມ່ຫລາຍແຫ່ງ. ການທ່ອງທ່ຽວຊີວະພາບ, ພັກຜ່ອນບຳລຸງສຸຂະພາບ, ພະລັງງານຜະລິດຄືນໃຫມ່ ແລະ ອື່ນໆ ລ້ວນແຕ່ແມ່ນຂົງເຂດທີ່ມີຄວາມສາມາດບົ່ມຊ້ອນແຕ່ບໍ່ທັນໄດ້ຮັບການຂຸດຄົ້ນເທື່ອ. ທ່ານ ດ່າວຊວນລາຍ, ຫົວຫນ້າຫ້ອງການພັດທະນາແບບຍືນຍົງ ຂຶ້ນກັບໂຄງການພັດທະນາ ສປຊ ຢູ່ ຫວຽດນາມ ຖືວ່າ: ດ້ວຍທ່າໄດ້ປຽບນັ້ນ, ຫວຽດນາມ ສາມາດກໍ່ສ້າງ ແລະ ພັດທະນາພື້ນຖານເສດຖະກິດຂຽວໄດ້.
“ການເຕີບໂຕຂຽວ ກ່ອນອື່ນໝົດແມ່ນສຸມໃສ່ການນຳໃຊ້ແຫລ່ງກຳລັງ, ຊັບພະຍາ ກອນທຳມະຊາດທີ່ມີຢູ່ແລ້ວໃນປະຈຸບັນ ແລະ ນຳໃຊ້ຢ່າງມີປະສິດທິຜົນກວ່າ. ສະນັ້ນ ບໍ່ແມ່ນວ່າ ເມື່ອພວກເຮົາມີແຫລ່ງງົບປະມານ, ພວກເຮົາຈຶ່ງສາມາດສ້າງ ການໂຕຂຽວໄດ້, ຫາກພວກເຮົາສາດມາດອີງໃສ່ວິທີການອື່ນທີ່ດີກວ່ານັ້ນແມ່ນວິທີການນຳໃຊ້ຊັບພະຍາກອນຢ່າງເໝາະສົມກວ່າ. ເຮັດໄດ້ຄືແນວນັ້ນ ການເຕີບໂຕຂຽວຈະບັນລຸໄດ້ສ່ວນໃດຫນ່ືງແລ້ວ.”
ຍຸດທະສາດການເຕີບໂຕຂຽວຂອງຫວຽດນາມ ໄດ້ຮັບການສ້າງຂຶ້ນ ແລະ ຈະໄດ້ຮັບການປະຕິບັດແຕ່ປີ 2001 - 2030 ແລະ ວິໄສທັດຮອດ ປີ2050. ຍຸດທະສາດນີ້ ແມ່ນວິວັດການສ້າງໂຄງປະກອບເສດຖະກິດຄືນໃຫມ່ ຕາມທິດຊຸກຍູ້ການພັດທະນາບັນດາຂະແຫນງເສດຖະກິດ ອີງໃສ່ລະບົບຊີວະພາບ, ການປ່ຽນໃຫມ່ເທັກໂນໂລຊີຜະລິດຕາມທິດຈຳກັດລະດັບ cacbon ແລະ ປ່ອຍອາຍພິດເຮືອນແກ້ວໃຫ້ຢູ່ໃນລະດັບຕ່ຳ, ຊຸກຍູ້ການນຳໃຊ້ແບບຍືນຍົງ, ພັດທະນາການບໍລິການສິ່ງແວດລ້ອມ ແລະ ອຸດສາຫະກຳຜະລິດຄືນໃຫມ່. ຕາມທ່ານ ທ້າຍກວາງຈູງ, ຜູ້ອຳນວຍການອົງການໂລກຂຽວແລວ້, ເພື່ອສ້າງວິຖີດຳລົງຊີວິດຂຽວ, ການຊົມໃຊ້ຂຽວໃນວົງຄະນາຍາດ ເພື່ອປະກອບສ່ວນສ້າງພື້ນຖານເສດຖະກິດຂຽວ ແມ່ນຈຳເປັນຕອ້ງຍົກສູງຄວາມຮັບຮູ້ຂອງປະຊາຄົມວິສາຫະກິດ ແລະ ປະຊາຊົນແຕ່ລະຄົນ.
“ພວກເຮົາຢາກຫັນປ່ຽນໄປສູ່ພື້ນຖານເສດຖະກິດຂຽວ ບັນຫາສຳຄັນ ນັ້ນແມ່ນ ການສຶກສາບຳລຸງສ້າງ ນັບແຕ່ສະຕິຄວາມຮັບຮູ້ຂອງວົງຄະນາຍາດ ຕະຫລອດຮອດການຄຸ້ມຄອງພື້ນຖານເສດຖະກິດໃຫມ່ ຕ້ອງໄດ້ຮັບການບຳລຸງສ້າງ. ພວກເຮົາບໍ່ສາມາດຫັນໄປສູ່ພື້ນຖານເສດຖະກິດຂຽວ ດ້ວຍຖັນແຖວຊັບພະຍາກອນມະນຸດທີ່ຍັງຄົງຮັບໃຊ້ຮູບແບບ, ເສດຖະກິດເກົ່າ. ຢາກຫັນປ່ຽນເປັນຢ່າງດີ ພວກເຮົາຕ້ອງວາງບັນຫາການສຶກສາຂຽວເປັນຕົ້ນຕໍ ແລະ ສຶກສາໃຫ້ລຸ້ນນັກທຸລະກິດ ແລະ ນັກຄຸ້ມຄອງລຸ້ນໃຫມ່ ເພື່ອສາມາດຫັນສູ່ພື້ນຖານເສດຖະກິດຂຽວໄດ້.”
ເປັນອັນວ່າ, ຫວຽດນາມ ພວມມີທ່າໄດ້ປຽບຫລາຍຢ່າງ ບົນເສັ້ນທາງມູ້ງໄປເຖິງພື້ນຖານເສດຖະກິດຂຽວ. ສະນັ້ນ ຈຳເປັນຕ້ອງຍາດແຍ່ງກາລະໂອກາດເພື່ອຫັນປ່ຽນຮູບແບບການເຕີບໂຕ, ສ້າງໂຄງປະກອບພື້ນຖານເສດຖະກິດຕາມທິດຂຽວກວ່າ, ຍົກສູງສະຕິຄວາມຮັບຮູ້ຂອງວົງຄະນາຍາດ, ສ້າງແບບແຜນການດຳລົງຊີວິດຂຽວ, ການອຸປະໂພກ ບໍລິໂພກຂຽວ, ປະກອບສ່ວນສ້າງການເຕີບໂຕເສດຖະກິດ ແລະ ປົກປັກຮັກສາສິ່ງແວດລ້ອມ ຕໍ່ຫນ້າບັນດາການກະທົບທີ່ນັບມື້ນັບເພີ່ມຂຶ້ນຈາກການປ່ຽນແປງຂອງດິນຟ້າອາກາດ.
ຫວິງຟອງ + ຜູ້ຮ່ວມງານ