(vovworld) ເລື່ອງ 12 ປະເທດ ສະມາຊິກ ບັນລຸຂໍ້ຕົກລົງສິ້ນສຸດການເຈລະຈາສັນຍາຄູ່ຮ່ວມມືຂ້າມປາຊີຟີກ TPP ໄດ້ເປີດບັນດາກາລະໂອກາດໃນການພັດທະນາເສດຖະກິດ. ເມື່ອເຂົ້າຮ່ວມ TPP, ຂະແຫນງຕ່ຳແຜ່ນຕັດຫຍິບ ຫວຽດນາມ ໄດ້ຮັບການຕີລາຄາວ່າ ແມ່ນຫນຶ່ງໃນບັນດາຂະແຫນງໄດ້ຮັບຜົນປະໂຫຍດຫລາຍກວ່າໝູ່. ເຖິງຢ່າງໃດກໍຕາມ, ຄຽງຄູ່ບັນດາກາລະໂອກາດຍັງມີການທ້າທາຍ, ສິ່ງທີ່ບັນດາວິສາຫະກິດຕ່ຳແຜ່ນຕັດຫຍິບ ຫວຽດນາມ ສົນໃຈ ນັ້ນແມ່ນແຫລ່ງວັດຖຸດິບ ຮັບໃຊ້ການຜະລິດສິນຄ້າສົ່ງອອກ.
ປະຈຸບັນ ທົ່ວປະເທດ ມີວິສາຫະກິດຕ່ຳແຜ່ນຕັດຫຍິບ ປະມານ 2000 ແຫ່ງ ແຕ່ເພື່ອເຂົ້າຮ່ວມ TPP, ການອອກແບບ ແລະ ການຜະລິດເຄື່ອງຕ່ຳແຜ່ນຕັດຫຍິບ, ການຂາຍສິນຄ້າໂດຍກົງໃຫ້ຄູ່ຮ່ວມມືຕ່າງປະເທດ ແມ່ນສິ່ງທີ່ຫລາຍວິສາຫະກິດບໍ່ສາມາດປະຕິບັດໄດ້. ເພາະວ່າ ໃນຫລາຍປີຜ່ານມາ ວິສາຫະກິດຕ່ຳແຜ່ນຕັດຫຍິບຫລາຍແຫ່ງ ສ່ວນຫລາຍແມ່ນຜະລິດແບບຮັບຈ້າງ ແລະ ອີງໃສ່ທັງແຫລ່ງວັດຖຸດິບ ແລະ ການອອກແບບຜະລິດຕະພັນ. ແຕ່ເມື່ອເຂົ້າຮ່ວມ TPP, ຢາກໄດ້ຮັບຜົນສຳເລັດ, ບັນດາວິສາຫະກິດຕ້ອງຍູ້ແຮງການປະຕິບັດ FOB, ໝາຍຄວາມວ່າ ເປັນເຈົ້າການແຫລ່ງ ວັດຖຸດິບໃຫ້ແກ່ການຜະລິດ ແລະ ຜະລິດຕະພັນເຄິ່ງສຳເລັດຮູບ, ຈຳກັດຜະລິດແບບຮັບຈ້າງ. ເພາະສະນັ້ນ ບັນຫາທີ່ວິສາຫະກິດຕ່ຳແຜ່ນ ຕັດຫຍິບຫ້າງຫາກະກຽມເຂົ້າຮ່ວມ TPP ແມ່ນສ້າງຕັ້ງບັນດາເຂດຜະລິດວັດຖຸດິບຮັບໃຊ້ໃຫ້ການຜະລິດສິນຄ້າສົ່ງອອກ ແລະ ຈຳຫນ່າຍພາຍໃນປະເທດ. ທ່ານ ຫງວຽນຫຶວຕວານ, ຮອງຜູ້ອຳນວຍການບໍລິສັດຫຸ້ນສ່ວນຕັດຫຍິບ ໄຊງ່ອນ 2 ໃຫ້ຮູ້ວ່າ:
ພາບປະກອບ:internet
|
“ຍາກທີ່ສຸດແມ່ນແຫລ່ງວັດຖຸດິບ. ວັດຖຸດິບເພື່ອນຳມາຜະລິດເປັນແຟຊັນ ຢູ່ ຫວຽດນາມ ສ່ວນຫລາຍແມ່ນນຳເຂົ້າຈາກຕ່າງປະເທດ ຫລືຊອກຊື້ວັດຖຸດິບ ຈາກບັນດາບໍລິສັດຂາຍຍ່ອຍ . ຄວາມຈິງ ແຫລ່ງແຜ່ນແພທີ່ນຳມາຜະລິດພາຍໃນປະເທດຍັງບໍໍໍ່ທັນຕອບສະຫນອງຄວາມຕ້ອງການໄດ້.”
ເມື່ອເຂົ້າຮ່ວມ TPP, ບັນດາຜະລິດຕະພັນຕ່ຳແຜ່ນຕັດຫຍິບ ຂອງຫວຽດນາມ ຕ້ອງມີອັດຕາສ່ວນໃດຫນຶ່ງ ຈາກແຫລ່ງວັດຖຸດິບເສັ້ນຝ້າຍ, ການຍ້ອມສີ ຈາກຫວຽດນາມ ຫລື ຈາກບັນດາປະເທດເຂົ້າຮ່ວມສັນຍາ TPP ເພື່ອໄດ້ຊົມໃຊ້ອັດຕາພາສີ 0%. ບໍ່ພຽງແຕ່ແກ້ໄຂແຫລ່ງວັດຖຸດິບເທົ່ານັ້ນ ຂະແຫນງຕ່ຳແຜ່ນຕັດຫຍິບ ຍັງຕ້ອງແກ້ໄຂບັນດາຂອດກ່ຽວຂ້ອງເຖິງການຕ່ຳແຜ່ນ, ການຍ້ອມແຜ່ນແພ, ເສັ້ນຝ້າຍ ສະນັ້ນ ຕ້ອງກະກຽມ ດ້ານທຶນຮອນ, ທີ່ດິນເພື່ອຮັບໃຊ້ການກໍ່ສ້າງລົງທຶນໂຮງງານ ຮັບປະກັນຄຸນນະພາບຜະລິດຕະພັນ ແລະ ສິ່ງແວດລ້ອມ ຕາມຄຳໝັ້ນສັນຍາຂອງສັນຍາ TPP. ທ່ານ ລີຮວ່າງງວຽນ, ຜູ້ອຳນວຍການບໍລິສັດ ຫງວຽດເຍີນ ຈຳກັດ ໃຫ້ຮູ້ວ່າ:
“ເມື່ອຜະລິດແຜ່ນແພ ແມ່ນຕ້ອງຍ້ອມສີ ແຕ່ການລົງທຶນກໍ່ສ້າງໂຮງງານຍ້ອມສີແມ່ນຕ້ອງການແຫລ່ງທຶນຮອນຫລວງຫລາຍ. ຕາມຂ້າພະເຈົ້າແລ້ວ ການລົງທຶນກໍ່ສ້າງໂຮງງານຍ້ອມສີຕ້ອງການເນື້ອທີ່ດິນ ເຖິງ 10 ເຮັກຕາ. ສຳລັບວິສາຫະກິດຂະຫນາດກາງ ແລະ ນ້ອຍ ແມ່ນບໍ່ປະຕິບັດໄດ້. ສະນັ້ນ ຂ້າພະເຈົ້າສະເຫນີໃຫ້ ລັດ ແລະ ບັນດາທ້ອງຖິ່ນ ຄວນຫນູນຊ່ວຍບັນດາວິສາຫະກິດ.”
ທ່ານຟ້າມຊວນຮົ່ງ, ປະທານ ສະມາຄົມຕ່ຳແຜ່ນຕັດຫຍິບ ຖັກແສ່ວ ນະຄອນໂຮ່ຈິມີນ ໃຫ້ຮູ້ວ່າ: ບັນດາຂະແຫນງຕ່ຳແຜ່ນຕັດຫຍິບໄດ້ຄາດຄະເນບັນຫາວັດຖຸດິບແລ້ວ. ສະນັ້ນ ລັດ ໄດ້ ແລະ ພວມມີໂຄງການຫນູນຊ່ວຍວັດຖຸດິບໃຫ້ຂະແຫນງຕ່ຳແຜ່ນຕັດຫຍິບ. ບັນດາວິສາຫະກິດພາຍໃນປະເທດ ປະຈຸບັນ ໄດ້ຮ່ວມສຳພັນນຳກັນ ເພື່ອຍາດແຍ່ງເງື່ອນໄຂຕ່າງໆເພື່ອຂຸດຄົ້ນທ່າໄດ້ປຽບ TPP. ດ້ວຍຄວາມດູດດື່ມຂອງ TPP ມີບໍລິສັດລົງທຶນຕ່າງປະເທດຫລາຍແຫ່ງໄດ້ມາສຳຫລວດ ເພື່ອລົງທຶນເຂດວັດຖຸດິບ ແລະ ອຸດສາຫະກຳຫນູນຊ່ວຍໃຫ້ຂະແຫນງຕ່ຳແຜ່ນຕັດຫຍິບຢູ່ ຫວຽດນາມ. ການປະສານສົມທົບນີ້ ຈະປັບປຸງສະພາບການຂາດວັດຖຸດິບໃນຂະແຫນງຕ່ຳແຜ່ນຕັດຫຍິບໄລຍະຈະມາເຖິງ. ທ່ານ ຟ້າມຊວນຮົ່ງ ຢືນຢັນວ່າ:
“ພວກເຮົາໄດ້ມີບາດກ້າວກະກຽມກ່ອນນີ້ສອງສາມປີແລ້ວ ແຕ່ຄວາມຄືບຫນ້າຍັງຊັກຊ້າຢູ່. ການຜະລິດວັດຖຸດິບພາຍໃນປະເທດ ກໍໄດ້ຮັບການເປີດກວ້າງ ແຕ່ ສາມາດຕອບສະຫນອງຄວາມຕ້ອງການໄດ້ພຽງແຕ່ 20-25%. ປະຈຸບັນ ລັດ ກໍໄດ້ສົ່ງເສີມການລົງທຶນຂອງຕ່າງປະເທດໃຫ້ແກ່ວັດຖຸດິບ. ການເຊື່ອມຕໍ່ຂອງສອງແຫລ່ງດັ່ງກ່າວ ຫວັງວ່າ ປະລິມານການຜະລິດວັດຖຸດິບຈະເພີ່ມຂຶ້ນ.”
ຕາມບັນດາຜູ້ຊ່ຽວຊານເສດຖະກິດແລ້ວ, ຕ່ຳແຜ່ນຕັດຫຍິບ ຫວຽດນາມ ພວມແມ່ນຂະແຫນງມີທ່າໄດ້ປຽບຫລາຍຢ່າງເມື່ອທຽບໃສ່ປະເທດຈຳນວນຫນຶ່ງຢູ່ ອາຊີກາງ ແລະ ອາຊີຕາເວັນອອກສ່ຽງໃຕ້ ກ່ຽວກັບສີມືແຮງງານ ແລະ ບົດຮຽນ. ເພາະສະນັ້ນ ເມື່ອເຂົ້າຮ່ວມ TPP, ບັນດາວິສາຫະກິດພວມຊຸກຍູ້ການຊອກຮູ້ລະອຽດກ່ຽວກັບ TPP, ເຂົ້າໃຈແຈ້ງບັນດາບັນຫາຊື່ງ TPP ວາງອອກໃຫ້ວິສາຫະກິດ. ຄຽງຄູ່ກັນນັ້ນ ຄວນມີການລົງທຶນກະກຽມແຫລ່ງຊັບພະຍາກອນມະນຸດ, ອຸປະກອນເຕັກໂນໂລຊີໃຫມ່ ແລະ ຊັບສິນທາງປັນຍາ, ອຸປະກອນບັນດາຄວາມຮູ້ກ່ຽວຂ້ອງເຖິງ TPP ຮັບໃຊ້ການເຊື່ອມໂຍງ.
ຫວ່າງແລ້ວນີ້, ຫວຽດນາມ ພ້ອມກັບ 11 ປະເທດສະມາຊິກອື່ນ ໄດ້ປະກາດເນື້ອໃນທັງໝົດຂອງສັນຍາ TPP. ລັດຫວຽດນາມ ແລະ ບັນດາຂະແຫນງການກ່ຽວຂ້ອງ ແລະ ວິສາຫະກິດ ພວມອັບເດັດ, ເຜີຍແຜ່ ແລະ ແນະນຳລະອຽດບັນດາເນື້ອໃນກຳນົດກ່ຽວກັບພາສີ, ມາດຖານຂອງ TPP ເພື່ອຊ່ວຍບັນດາວິສາຫະກິດຕ່ຳແຜ່ນຕັດຫຍິບ ຍາດແຍ່ງບັນດາກາລະໂອກາດສົ່ງອອກ, ຍາດແຍ່ງການຊົມໃຊ້ບັນດາບຸລິມະສິດພາສີ. ຄຽງຄູ່ກັນນັ້ນ ການຜັນຂະຫຍາຍບັນດາໂຄງການກະກຽມ, ລັດ ກໍປະກາດໃຊ້ບັນດານະໂຍບາຍທັນການເພື່ອຊຸກຍູ້ການພັດທະນາ ເປັນຕົ້ນໃນຂົງເຂດອຸດສາຫະກຳຫນູນຊ່ວຍ, ຂົງເຂດຜະລິດຝ້າຍ, ຕ່ຳແຜ່ນ, ຍ້ອມສີ.. ຊ່ວຍວິສາຫະກິດຂະແຫນງຕ່ຳແຜ່ນຕັດຫຍິບເຊື່ອມໂຍງສຳເລັດຜົນ.