(vovworld)- ໃນຊຸມປີມໍ່ໆມານີ້, ກົມພາສີ ແຂວງ ລ້າງເຊີນ ໄດ້ຍູ້ແຮງການປະຕິຮູບລະບຽບການບໍລິຫານເປັນປະຈຳ, ຫັນເປັນພາສີເອເລັກໂຕນິກທັນສະໄຫມເທື່ອລະກ້າວ. ດ້ວຍບັນດາຄວາມມານະພະຍາຍາມນີ້, ປະຈຸບັນ ກົມພາສີ ແຂວງ ລ້າງເຊີນ ແມ່ນຫນຶ່ງໃນບັນດາຫົວຫນ່ວຍນຳຫນ້າໃນການໝູນໃຊ້ເຕັກໂນໂລຊີຂໍ້ມູນຂ່າວສານເຂົ້າວິຊາສະເພາະ, ຫັນວຽກງານພາສີເປັນທັນສະໄຫມ.
ຫ້ອງການພາສີ ລ້າງເຊີນ
|
ລ້າງເຊີນ ແມ່ນແຂວງຫນຶ່ງມີດ່ານຊາຍແດນສາກົນທາງບົກທີ່ສຳຄັນ ລະຫວ່າງ ຫວຽດນາມ ແລະ ຈີນ ດ້ວຍ ດ່ານຊາຍແດນສາກົນ 2 ແຫ່ງ ດ່ານຊາຍແດນແຫ່ງຊາດ 2 ແຫ່ງ ແລະ ຕະຫລາດຊາຍແດນ 7 ແຫ່ງ, ໃນນັ້ນ ດ່ານຊາຍແດນຕົ້ນຕໍ 2 ແຫ່ງ ແມ່ນ ດ່ານຊາຍແດນ ຫຶວຫງີ້ ແລະ ເຕີນແທງ. ນີ້ກໍແມ່ນບັນດາດ່ານຊາຍແດນມີປະລິມານສິນຄ້າສົ່ງອອກນຳເຂົ້າ, ພາຫະນະຂົນສົ່ງສິນຄ້າ ແລະ ຜູ້ໂດຍສານເຂົ້າອອກເມືອງຫລາຍກວ່າໝູ່ໃນທົ່ວປະເທດ. ສະເພາະ ວົງເງິນສົ່ງອອກສິນຄ້າຜ່ານດ່ານຊາຍແດນ ຫືວງີ້ ແຕ່ລະປີບັນລຸປະມານ 1 ຕື້ USD ແລະ ສະເລ່ຍແຕ່ລະປີ ມີປະມານ 250 ວິສາຫະກິດ ເຮັດລະບຽບການຂາອອກຂາເຂົ້າຜ່ານນີ້. ຄາດວ່າ ປະລິມານສິນຄ້ານຳເຂົ້າສົ່ງອອກຜ່ານດ່ານຊາຍແດນຢູ່ແຂວງ ລ້າງເຊີນ ກວມ 60% ປະລິມານສິນຄ້ານຳເຂົ້າສົ່ງອອກຜ່ານບັນດາແຂວງ ຊາຍແດນທາງພາກເຫນືອ. ສິນຄ້ານຳເຂົ້າຜ່ານບັນດາດ່ານຊາຍແດນຢູ່ແຂວງ ລ້າງເຊີນ ສ່ວນຫລາຍແມ່ນອຸປະກອນກົນຈັກ, ເຄມີ, ເຄື່ອງອາໄຫລ່. ສ່ວນສິນຄ້າສົ່ງອອກນັ້ນແມ່ນ: ຜະລິດຕະພັນກະເສດ, ເຄື່ອງປາຂອງດົງ, ສິນໃນນ້ຳ, ເຄື່ອງສິລະປະຫັດຖະກຳ. ຢູ່ ດ່ານຊາຍແດນ ມິດຕະພາບ, ສະເລ່ຍແຕ່ລະມື້ ມີປະມານ 2.500 ເທື່ອຄົນເຮັດລະບຽບການເຂົ້າອອກເມືອງ ແລະ ພາຫະນະສັນຈອນ ເຮັດລະບຽບການຜ່ານແດນ 200 ເທື່ອ. ດ້ວຍປະລິມານສິນຄ້ານຳເຂົ້າສົ່ງອອກ ແລະຈຳນວນຜູ້ໂດຍສານເຂົ້າອອກເມືອງຫລາຍຄືແນວນັ້ນ ສະນັ້ນ ກົມພາສີ ແຂວງ ລ້າງເຊີນ ຍາມໃດກໍເອົາໃຈໃສ່ເຖິງວຽກງານປະຕິຮູບດ້ານບໍລິຫານ, ຕິດຕາມກວດກາ, ຄຸ້ມຄອງສິນຄ້ານຳເຂົ້າ ສົ່ງອອກ, ຜູ້ໂດຍສານເຂົ້າອອກເມືອງ. ພາຍຫລັງ 4 ປີແຫ່ງການ ຜັນຂະຫຍາຍລະບຽບການພາສີເອເລັກໂຕນິກ ຢູ່ ພາສີ ແຂວງ ລ້າງເຊີນ, ຮູບການນີ້ ໄດ້ນຳມາເຊິ່ງປະສິດທິຜົນຢ່າງຕັ້ງຫນ້າ, ໄດ້ຮັບການຕີລາຄາສູງຈາກປະຊາຄົມວິສາຫະກິດ. ທ່ານ ຫວູຫາຍຟອງ, ວິສາຫະກິດຂຶ້ນກັບ ບໍລິສັດ ຊວນເກືອງ ຈຳກັດ ຢູ່ ແຂວງ ລ້າງເຊີນ ໃຫ້ຮູ້ວ່າ:
“ອົງການພາສີ ໄດ້ສ້າງເງື່ອນໄຂສະດວກທີ່ສຸດໃຫ້ວິສາຫະກິດ ເຮັດແນວໃດຫລຸດຜ່ອນເວລາແຈ້ງລະບຽບການພາສີ ບົນຈິດໃຈປ່ຽນໃຫມ່. ການຜັນຂະຫຍາຍພາສີເອເລັກໂຕນິກ ໄດ້ສ້າງເງື່ອນໄຂຊ່ວຍວິສາຫະກິດຫລາຍຢ່າງ.”
ມາຮອດປະຈຸບັນ, ກົມພາສີລ້າງເຊີນໄດ້ຜັນຂະຫຍາຍການເຮັດລະບຽບການພາສີເອເລັກໂຕນິກ ສຳເລັດ 100% ຢູ່ບັນດາສາຂາພາສີສັງກັດ. ອັດຕາສ່ວນແຈ້ງພາສີ ດ້ວຍຮູບການນີ້ ບັນລຸກວ່າ 80% ຂອງວົງເງິນ ແລະ 80%ຂອງຈຳນວນໃບແຈ້ງພາສີສຳລັບບັນດາຮູບການສິນຄ້າສົ່ງອອກ-ນຳເຂົ້າ ໄດ້ຕິດຕັ້ງຊອບແວແຈ້ງພາສີເອເລັກໂຕນິກ. ຍ້ອນມີລະບົບແຈ້ງພາສີອັດຕະໂນມັດຄືແນວນັ້ນ, ບັນດາການເຄື່ອນໄຫວສົ່ງອອກ-ນຳເຂົ້າສິນຄ້າ, ການເຂົ້າ-ອອກເມືອງ, ໄດ້ຮັບປະກັນແຈ້ງພາສີຢ່າງໄວ. ຄຽງຂ້າງນັ້ນ, ລະບົບນີ້ ກໍ່ຈະຊ່ວຍໃຫ້ອົງການພາສີຄຸ້ມຄອງ ແລະ ປະຕິບັດກົດໝາຍຢ່າງມີປະສິດທິຜົນ ແລະ ຜົນສັກສິດສູງກວ່າ. ສຳລັບເຂດ ດ່ານຊາຍແດນ ເຕິນແທງ ການເຄື່ອນໄຫວເຂົ້າ-ອອກເມືອງຜ່ານດ່ານທີ່ນີ້ ກໍ່ໄດ້ຮັກສາຢ່າງໝັ້ນຄົງ. ກຳລັງທີ່ກ່ຽວຂ້ອງໃນບໍລິເວນສົມທົບກັນປະຕິບັດວຽກງານກວດກາຢ່າງມີປະສິດທິຜົນ ເພື່ອຮັບປະກັນໃຫ້ແກ່ການເຄື່ອນໄຫວພົວພັນຄ້າຂາຍ, ສົ່ງອອກ-ນຳເຂົ້າສິນຄ້າຜ່ານບໍລິເວນດັ່ງກ່າວ ຢ່າງວ່ອງໄວ. ບັນດາວິສາຫະກິດຂອງຫວຽດນາມ ແລະ ຈີນ ສືບຕໍ່ຍູ້ແຮງບັນດາການເຄື່ອນໄຫວພົບປະແລກປ່ຽນ, ຮ່ວມມື, ແລກປ່ຽນສິນຄ້າ. ບັນດາກຳລັງທີ່ກ່ຽວຂ້ອງໄດ້ສ້າງເງື່ອນໄຂທີ່ສະດວກກ່ຽວກັບເດີ່ນຈອດລົດ, ໜ້າວຽກ ແລະ ບັນດາ ລະບຽບການແຈ້ງພາສີ ໃຫ້ແກ່ ຄົນຂັບລົດ ແລະ ຊາວຜູ້ອອກແຮງງານຂອງສອງຝ່າຍ. ທ່ານ ຫງວຽນກວາງແບັກ ພະນັກງານກົມພາສີ ສາຂາດ່ານຊາຍແດນມິດຕະພາບ ໃຫ້ຮູ້ວ່າ:
“ ໃນໄລຍະຈະມາເຖິງ ພວກຂ້າພະເຈົ້າສືບຕໍ່ສຸມໃສ່ການປະຕິຮູບດ້ານບໍລິຫານ, ສ້າງເງື່ອນໄຂໃຫ້ແກ່ການເຄື່ອນໄຫວສົ່ງອອກ-ນຳເຂົ້າ, ການເຂົ້າ-ອອກເມືອງ, ບໍ່ພຽງແຕ່ໃຫ້ການນຳເຂົ້າ-ສົ່ງອອກສິນຄ້າຂອງຫວຽດນາມເທົ່ານັ້ນ ຫາກຍັງຂອງຈີນ, ແລະ ບັນດາປະເທດອາຊຽນ ຜ່ານຈີນ ແລະ ຈາກຈີນເຂົ້າ ບັນດາປະເທດອາຊຽນ ອີກດ້ວຍ. ໃນນັ້ນ ຍັງມີການຄຸ້ມຄອງສິນຄ້າຢ່າງເຂັ້ມງວດ ແລະ ຮັບປະກັນຄວາມສະດວກສະບາຍໃຫ້ແກ່ສິນຄ້າ ເມື່ອໄປຜ່ານດ່ານຊາຍແດນ”
ໃນໄລຍະຈະມາເຖິງ, ກົມພາສີລ້າງເຊີນ ຈະສືບຕໍ່ຍູ້ແຮງການປະຕິຮູບລະບຽບການບໍລິຫານດ້ວຍຄຳຂວັນທີ່ວ່າ: “ ວິຊາການ, ໂປ່ງໃສ, ມີປະສິດທິຜົນ”. ເລື່ອງຍູ້ແຮງການປະຕິຮູບດ້ານບໍລິຫານຕອບສະໜອງກົນໄກປະຕູດຽວ ແນໃສ່ ສ້າງເງື່ອນໄຂສະດວກທີ່ສຸດໃຫ້ບັນດາວິສາຫະກິດເມື່ອເຮັດລະບຽບການນຳເຂົ້າ-ສົ່ງອອກ ແລະ ປະກອບສ່ວນເພີ່ມ ລາຍຮັບເຂົ້າງົບປະມານ.