(vovworld) - ຂະແໜງຕຳແຜ່ນຕັດຫຍິບຫວຽດນາມ ໄດ້ ແລະ ພວມປະກອບສ່ວນບໍ່ແມ່ນນ້ອຍເຂົ້າໃນລະດັບເພີ່ມຍອດຜະລິດຕະພັນພາຍໃນ (GDP), ຮັບປະກັນຊີວິດສັງຄົມ ແລະ ສ້າງວຽກເຮັດງານທຳໃຫ້ຄົນງານປະມານ 3 ລ້ານຄົນ. ໃນວິວັດແຫ່ງການເຂົ້າຮ່ວມບັນດາສັນຍາການຄ້າ ແລະ ເຊື່ອມໂຍງເຂົ້າກັບເສດຖະກິດສາກົນໃນປະຈຸບັນ, ເລື່ອງຍົກສູງມູນຄ່າດ້ວຍເຄື່ອງມືຊັບສິນທາງປັນຍາພວມໄດ້ຮັບຄວາມເອົາໃຈໃສ່ເປັນພິເສດເຊິ່ງບັນດາວິສາຫະກິດຕ່ຳແຜ່ນຕັດຫຍິບຫວຽດນາມ ນັ້ນແມ່ນເພື່ອແນໃສ່ຢັ້ງຢືນເຄື່ອງໝາຍການຄ້າ ແລະ ເພີ່ມຄວາມສາມາດແກ່ງແຍ້ງໃນຕະຫຼາດສົ່ງອອກ. ບົດຂຽນຂອງ ເວີນແອງ, ນັກຂ່າວ VOV.
.jpg)
ບໍລິສັດໃຫຍ່ຕັດຫຍິບເລກ 10
(ພາບປະກອບອີນເຕີແນັດ)
ບໍລິສັດໃຫຍ່ຕັດຫຍິບເລກ 10 ແມ່ນໜຶ່ງໃນບັນດາຫົວໜ່ວຍທຳອິດຂອງກຸ່ມບໍລິສັດຕ່ຳແຜ່ນຕັດຫຍິບຫວຽດນາມ ມີສະຕິກ່ຽວກັບບົດບາດຂອງເຄື່ອງໝາຍການຄ້າໂດຍໄວ ແລະ ໄດ້ຈົດທະບຽນປົກປ້ອງເຄື່ອງໝາຍການຄ້າ ນັບແຕ່ປີ 1992. ເຖິງຢ່າງໃດກໍ່ຕາມ, ມາຮອດປະຈຸບັນຫົວໜ່ວຍນີ້ຍັງແມ່ນໜຶ່ງໃນຈຳນວນ 50 ວິສາຫະກິດຕ່ຳແຜ່ນຕັດຫຍິບ ຍັງບໍ່ທັນຈົດທະບຽນປົກປ້ອງຮູບແບບອຸດສາຫະກຳ ແລະ ການປະດິດສ້າງໃຫ້ຜະລິດຕະພັນຂອງຕົນເທື່ອ. ທ່ານ ເທີນດຶກວຽດ, ຮອງຜູ້ອຳນວຍການໃຫຍ່ ບໍລິສັດໃຫຍ່ຕັດຫຍິບເລກ 10 ໄດ້ອະທິບາຍວ່າ:
“ພວກຂ້າພະເຈົ້າຮູ້ຈັກເລື່ອງຈົດທະບຽນ ແລະ ປົກປ້ອງການອອກແບບ ຫຼື ຮູບແບບດ້ານອຸດສາຫະກຳ ແມ່ນໜຶ່ງໃນບັນດາປັດໃຈຕັດສິນ ເພື່ອປົກປ້ອງເຄື່ອງໝາຍການຄ້າ ຕໍ່ເປົ້າໝາຍຜູ້ທີ່ຜະລິດສິນຄ້າປອມ. ແຕ່ວ່າ, ຄວາມຈິງແລ້ວຜະລິດຕະພັນແຟຊັນ ເຊິ່ງແມ່ນຜະລິດຕະພັນທີ່ເປັນເອກະລັກສະເພາະທີ່ສຸດ. ແຕ່ລະລະດູການ ອາດຈະອອກແບບຜະລິດຕະພັນນັບຮ້ອຍແບບທີ່ແຕກຕ່າງກັນ. ເພື່ອຈົດທະບຽນໃຫ້ຜະລິດຕະພັນນັບຮ້ອຍ, ພັນແບບຄືແນວນັ້ນ, ທີ່ໜຶ່ງແມ່ນໄດ້ກ່ຽວຂ້ອງເຖິງລາຍຈາຍ, ທີ່ 2 ແມ່ນເລື່ອງຢັ້ງຢືນ ແລະ ທີ່ 3 ແມ່ນກ່ຽວຂ້ອງເຖິງຄວາມຄືບໜ້າໃນການນຳຜະລິດຕະພັນອອກສູ່ຕະຫຼາດ”.
ທ່ານ ຫງວຽນຊິ້ເຟືອງ, ຫົວໜ້າພະແນກເຕັກນິກເຕັກໂນໂລຊີ ຂອງກຸ່ມບໍລິສັດຕ່ຳແຜ່ນຕັດຫຍິບຫວຽດນາມ ໃຫ້ຮູ້ວ່າ: ສະເພາະຕະຫຼາດພາຍໃນປະເທດດ້ວຍພົນລະເມືອງກວ່າ 90 ລ້ານຄົນ, ເລື່ອງນຳໃຊ້ເຄື່ອງມືຊັບສິນທາງປັນຍາຄື: ປົກປ້ອງເຄື່ອງໝາຍການຄ້າ, ການປະດິດສ້າງ, ການອອກແບບອຸດສາຫະກຳ… ບໍ່ພຽງແຕ່ຊ່ວຍໃຫ້ຄວາມສາມາດແກ່ງແຍ້ງຂອງວິສາຫະກິດເທົ່ານັ້ນ, ຫາກຍັງປົກປ້ອງສິດຜົນປະໂຫຍດຂອງເຈົ້າຂອງກຳມະສິດຖືກຕ້ອງຕາມກົດໝາຍ ເມື່ອເກີດມີການຂັດແຍ້ງກັນອີກດ້ວຍ. ເມື່ອວິສາຫະກິດມີທີ່ຕັ້ງໃດໜຶ່ງຢ່າງແນ່ນອນຢູ່ຕະຫຼາດແລ້ວ, ອີ່ງໃສ່ເຄື່ອງມືຊັບສິນທາງປັນຍາ, ວິສາຫະກິດຈະມີຄວາມສະດວກກວ່າໃນວິວັດການມອບໂອນເຄື່ອງໝາຍການຄ້າພາຍໃນປະເທດ ແລະ ສາກົນ. ເຖິງຢ່າງໃດກໍ່ຕາມ, ທ່ານ ຫງວຽນຊິ້ເຟືອງ ກໍໃຫ້ຮູ້ວ່າ, ປະຈຸບັນມີຫຼາຍວິສາຫະກິດຕ່ຳແຜ່ນຕັດຫຍິບຫວຽດນາມ ມີຈິດຕະສຸມໃສ່ການຂາຍເຄື່ອງ ແລະ ແຈກຢາຍແຮງ ກວ່າການສ້າງເຄື່ອງໝາຍການຄ້າ ແລະ ທີ່ຕັ້ງຂອງວິສາຫະກິດ. ສະນັ້ນ, ຕ້ອງຍົກສູງຄວາມຮັບຮູ້ໃຫ້ແກ່ບັນດາວິສາຫະກິດກ່ຽວກັບສັບສິນສິດທາງປັນຍາ, ໂດຍສະເພາະແມ່ນຍົກສູງມູນຄ່າຜະລິດຕະພັນສົ່ງອອກ ດ້ວຍເຄື່ອງມືຊັບສິນທາງປັນຍາ ແລະ ຕ້ອງຖືນີ້ວ່າ ແມ່ນກຳລັງໜູນເພື່ອສ້າງເຄື່ອງໝາຍການຄ້າຂອງວິສາຫະກິດ.
“ຂະແໜງຕຳແຜ່ນຕັດຫຍິບຫວຽດນາມ ຍັງຕ້ອງປະເຊີນໜ້າກັບສິ່ງທ້າທາຍຢູ່ຕະຫຼາດພາຍໃນຫຼາຍຢ່າງ ເມື່ອຄວາມດັນກ່ຽວກັບດ້ານລາຄາ, ຄຸນນະພາບ ແລະ ຮູບແບບຜະລິດຕະພັນຈາກຝ່າຍລູກຄ້າ, ຜູ້ອຸປະໂພກບໍລິໂພກ ນັບມື້ນັບໃຫຍ່ຫຼວງ. ບໍ່ພຽງແຕ່ເທົ່ານັ້ນ, ວິສາຫະກິດຕ່ຳແຜ່ນຕັດຫຍິບພາຍໃນປະເທດຍັງຕ້ອງປະເຊີນໜ້າກັບກຳລັງແກ່ງແຍ້ງຈາກບັນດາວິສາຫະກິດລົງທຶນຕ່າງປະເທດ. ສິນຄ້ານຳເຂົ້າເຖື່ອນ, ສິນຄ້າປອມ ແລະ ມີຄຸນນະພາບຕ່ຳທີ່ຕິດເຄືຶຶ່ອງໝາຍສິນຄ້າຫວຽດນາມ ໃນທ້ອງຕະຫຼາດນັ້ນໄດ້ສົ່ງຜົນສະທ້ອນເຖິງບັນດາວິສາຫະກິດຜະລິດເຄື່ອງຕຳແຜ່ນຕັດຫຍິບທີ່ແບບສັດຈະທຳ”.
ໃນສະພາບການເຊື່ອມໂຍງຄືໃນປະຈຸບັນ, ສິນຄ້າຂອງຕ່າງປະເທດເຂົ້າຫວຽດນາມ ແລະ ສິນຄ້າທີ່ນຳພາຍໃນປະເທດ ສົ່ງອອກຕ່າງປະເທດນັບມື້ນັບຫຼາຍນັ້ນ, ບັນຫາປົກປ້ອງຊັບສິນທາງປັນຍາ ກໍແມ່ນສິ່ງບັງຄັບສຳລັບບັນດາວິສາຫະກິດ. ທ່ານ ເລຫງອກເລີມ, ຮອງຫົວໜ້າກົມຊັບສິນທາງປັນຍາ, ໃຫ້ຮູ້ວ່າ, ຂະແໜງຕຳແຜ່ນຕັດຫຍິບ ກໍຄືບັນດາຜະລິດຕະພັນສິນຄ້າອື່ນ ລ້ວນແຕ່ສາມາດເຮັດປອມໄດ້ຢູ່ພາຍໃນ ແລະ ຕ່າງປະເທດ. ເວລານັ້ນ, ຊັບສິນທາງປັນຍາ ແມ່ນເຄື່ອງມືທີ່ມີປະໂຫຍດເພື່ອປົກປ້ອງໃຫ້ແກ່ວິສາຫະກິດ.
“ວິສາຫະກິດຕ້ອງປົກປ້ອງຊັບສິນທາງປັນຍາທັງຢູ່ພາຍໃນ ແລະ ຕ່າງປະເທດ ຍ້ອນຊັບສິນທາງປັນຍາພຽງແຕ່ມີຄຸນຄ່າພາຍໃນປະເທດ. ເມື່ອຈົດທະບຽນປົກປ້ອງຊັບສິນທາງປັນຍາ ຢູ່ບັນດາປະເທດປະຈຳຖິ່ນ, ຖ້າຫາກຜະລິດຕະພັນຂອງວິສາຫະກິດຖືກລະເມີດ, ເວລານັ້ນ, ວິສາຫະກິດຫວຽດນາມ ຈະໄດ້ຮັບການປົກປ້ອງຈາກລະບົບກົດໝາຍຂອງປະເທດນັ້ນ. ໃນໄລຍະຈະມາເຖິງນີ້, ເມື່ອສັນຍາຄູ່ຮ່ວມມືຂ້າມປາຊີຟິກ (TPP) ມີຜົນສັກສິດຢ່າງເປັນທາງການ, ການລະເມີດຊັບສິນທາງປັນຍາລ້ວນແຕ່ຖືກປັບໄໝລົງໂທດດ້ວຍກົດໝາຍອາຍາ”
ໃນວິວັດແຫ່ງການເຂົ້າຮ່ວມບັນດາສັນຍາການຄ້າໃຫຍ່ ແລະ ເຊື່ອມໂຍງເສດຖະກິດສາກົນໃນປະຈຸບັນ, ບັນດາວິສາຫະກິດຕ່ຳແຜ່ນຕັດຫຍິບຫວຽດນາມ ໄດ້ ແລະ ພວມຫັນປ່ຽນຢ່າງແຮງ ຈາກແບບວິທີຜະລິດຕາມແບບທີ່ມີຢູ່ແລ້ວ ໄປສູ່ການຜະລິດ ແລະ ພັດທະນາເຄື່ອງໝາຍການຄ້າຂອງຕົນຢ່າງແຮງ. ໃນສະພາບການນັ້ນ, ເລື່ອງເພີ່ມທະວີການນຳໃຊ້ເຄື່ອງມືຊັບສິນທາງປັນຍາຄືດັ່ງປົກປ້ອງເຄື່ອງໝາຍການຄ້າ, ການປະດິດສ້າງ, ຮູບແບບອຸດສາຫະກຳ… ບໍ່ພຽງແຕ່ຊ່ວຍໃຫ້ວິສາຫະກິດຕຳ່ແຜ່ນຕັດຫຍິບເພີ່ມລັກສະນະແກ່ງແຍ້ງ, ຍົກສູງມູນຄ່າຂອງຜະລິດຕະພັນເທົ່ານັ້ນ, ຫາກຍັງຊ່ວຍໃຫ້ວິສາຫະກິດຫວຽດນາມຫຼີກລ້ຽງອອກຈາກສະພາບຖືກວິສະຫະກິດຕ່າງປະເທດບັງບຽດຢູ່ຕະຫຼາດພາຍໃນປະເທດອີກດ້ວຍ.