(vovworld)- ກ້າວເຂົ້າສູ່ປີ 2013, ສະພາບຕະຫລາດອະສັງຫາລິມະຊັບຢູ່ ຫວຽດນາມ ສືບຕໍ່ຖືກຕິດຂັດ. ສິນຄ້າຄ້າງສາງ ແລະ ຫນີ້ເສຍພວມແມ່ນບັນຫາໃຫຍ່ຕ້ອງແກ້ໄຂ. ທີ່ກອງປະຊຸມປະຈຳເດືອນ 3 ຂອງລັດຖະບານຫວຽດນາມ, ຫນຶ່ງໃນບັນດາເນື້ອໃນສຳຄັນຊື່ງໄດ້ຮັບຄວາມເອົາໃຈໃສ່ນັ້ນແມ່ນ ການຜັນຂະຫຍາຍບັນດາມາດຕະການເພື່ອແກ້ໄຂຄວາມຫຍຸ້ງຍາກໃຫ້ແກ່ຕະຫລາດອະສັງຫາລິມະຊັບ, ໃນນັ້ນມີນະໂຍບາຍຫນູນຊ່ວຍດ້ານສິນເຊື່ອໃຫ້ແກ່ບັນດາຄອບຄົວ, ສ່ວນບຸກຄົນຊື້ເຮືອນຢູ່ສັງຄົມ ແລະ ເຮືອນຢູ່ການຄ້າ.
ຕະຫລາດອະສັງຫາລິມະຊັບຖືກຢຸດສະຫງັກ, ສິນຄ້າຄ້າງສາງເປັນຈຳນວນຫລວງຫລາຍ, ນັ້ນແມ່ນສະພາບລວມຂອງຕະຫລາດອະສັງຫາລິມະຊັບໃນປີ 2012 ແລະ ກ້າວເຂົ້າສູ່ປີນີ້, ສະພາບຕະຫລາດອະສັງຫາລິມະຊັບກໍ່ບໍ່ທັນໄດ້ຮັບການແກ້ໄຂປານໃດ. ໃນສະພາບການນັ້ນ, ລັດຖະບານ ແລະ ຄະນະຊີ້ນຳສູນກາງກ່ຽວກັບນະໂຍບາຍເຮືອນຢູ່ ແລະ ຕະຫລາດອະສັງຫາລິມະຊັບໄດ້ວາງອອກບັນດາມາດຕະການພື້ນຖານເພື່ອແກ້ໄຂຄວາມຫຍຸ້ງຍາກໃຫ້ແກ່ຕະຫລາດອະສັງຫາລິມະຊັບ.ນັ້ນແມ່ນ ຕ້ອງສ້າງໂຄງປະກອບບັນດາບ້ວງເງິນກູ້ຢືມໃຫ້ແກ່ວິສາຫະກິດຄືນໃຫມ່, ຜູ້ຊື້ເຮືອນຢູ່ເປັນຄັ້ງທຳອິດຈະໄດ້ຮັບການກູ້ຢືມທຶນບຸລິມະສິດ ພ້ອມທັງສະເຫນີສ້າງເງື່ອນໄຂໃຫ້ຊາວຕ່າງປະເທດໄດ້ກຳມະສິດເຮືອນຢູ່ ຢູ່ຫວຽດນາມ. ລັດຖະບານຄາດວ່າຈະສະຫນອງບ້ວງເງິນປະມານ 20.000 -40.000 ຕື້ດົ່ງ, ໂດຍມີການຫນູນຊ່ວຍຂອງທະນາຄານແຫ່ງລັດ ເພື່ອປະຕິບັດການໃຫ້ກູ້ຢືມທຶນເພື່ອຊື້, ເຊົ່າເຮືອນຢູ່ສັງຄົມ. ພ້ອມກັນນັ້ນກໍ່ໃຫ້ບັນດາວິສາຫະກິດຊ່ືງເປັນເຈົ້າຂອງການລົງທຶນບັນດາໂຄງການນີ້ກູ້ຢືມທຶນ. ປີ 2013 ຄວນສຸມໃສ່ແກ້ໄຂຄວາມຫຍຸ້ງຍາກດ້ານທຶນຮອນ, ອັດຕາດອກເບ້ຍສິນເຊ່ືອໃຫ້ແກ່ບັນດາໂຄງການເຮືອນຢູ່, ພິເສດຄວບຄຸມ 20% ຈຳນວນທີ່ດິນທີ່ສະຫງວນໃຫ້ແກ່ການກໍ່ສ້າງເຮືອນຢູ່ສັງຄົມຢ່າງແຫນ້ນແຟ້ນ ເພື່ອໃຫ້ຜູ້ມີລາຍຮັບຕຳ່ກໍໄດ້ຊົມໃຊ້ບັນດາພື້ນຖານໂຄງລ່າງ ພ້ອມທັງສ້າງໂຄງປະກອບຕະຫລາດອະສັງຫາລິມະຊັບຄືນໃຫມ່. ທ່ານຮອງນາຍົກລັດຖະມົນຕີ ຮ່ວາງຈູງຫາຍ ສະເຫນີວ່າ:
“ຕ້ອງສຳຫລວດກວດຄືນບັນດາໂຄງການເຮືອນຢູ່ສັງຄົມທີ່ໄດ້ຮັບການກໍ່ສ້າງ ແຕ່ບໍ່ທັນມີຜູ້ມາຢູ່ ແລະ ຕ້ອງຂາຍຈຳນວນເຮືອນຢູ່ເຫົຼ່ານັ້ນຢູ່ຮ່າໂນ້ຍ, ນະຄອນໂຮ່ຈິມິນໃຫ້ໝົດ. ບັນດາເຮືອນຢູ່ສັງຄົມໄດ້ຮັບການກໍ່ສ້າງໃກ້ຈະສຳເລັດ, ແຕ່ຍັງຂາດດ້ານທຶນຮອນ ສະນັ້ນຕ້ອງຫນູນຊ່ວຍໃຫ້ແກ່ເຂົາເຈົ້າ.”
ພາບປະກອບ:internet
|
ບັນດາມາດຕະການດັ່ງກ່າວຂອງລັດຖະບານໄດ້ຮັບການເຫັນດີເຫັນພ້ອມຈາກຫາງສຽງຢ່າງຕັ້ງຫນ້າ. ທ່ານ ຫງວຽນຮ່ວາງເຈົາ, ປະທານສະຫະສະມາຄົມອະສັງຫາລິມະຊັບນະຄອນ ໂຮ່ຈິມິນ ຖືວ່າ: ບັນດາມາດຕະການທີ່ຍົກອອກມານັ້ນແມ່ນເໝາະສົມກັບສະພາບການ ແລະ ເງື່ອນໄຂປະຈຸບັນ. ເຖິງຢ່າງໃດກໍຕາມ, ຢາກເຮັດໃຫ້ການແກ້ໄຂຄວາມຫຍຸ້ງຍາກໃຫ້ແກ່ຕະຫລາດອະສັງຫາລິມະຊັບບັນລຸໝາກຜົນເປັນຢ່າງດີ ຄວນມີການປະສານສົມທົບຂອງຫລາຍກະຊວງ, ຂະແຫນງການ. ທ່ານ ຫງວຽນຮ່ວາງເຈົາ ສະເຫນີວ່າ:
“ເພື່ອໃຫ້ຕະຫລາດອະສັງຫາລິມະຊັບພັດທະນາຢ່າງໂປ່ງໃສ, ເປັນປົກກະຕິ ແລະ ໝັ້ນຄົງ, ຕ້ອງມີການປະສານສົມທົບຢ່າງແຫນ້ນແຟ້ນລະຫວ່າງ ລັດຖະບານ, ລະບົບທະນາຄານ, ບັນດາວິສາຫະກິດ ແລະ ນັກລົງທຶນ.”
ຕາມທ່ານ ຈີ້ງດີງຢູງ, ລັດຖະມົນຕີກະຊວງກໍ່ສ້າງຫວຽດນາມແລ້ວ, ຕ້ອງສ້າງທິດທາງໄລຍະຍາວໃຫ້ແກ່ຕະຫລາດອະສັງຫາລິມະຊັບ. ນັ້ນແມ່ນ ຕ້ອງປະຕິບັດຍຸດທະສາດເຮືອນຢູ່ແຫ່ງຊາດ, ຕິດພັນກັບການແກ້ໄຂຄວາມຫຍຸ້ງຍາກໃຫ້ແກ່ຕະຫລາດດ້ວຍການພັດທະນາເຮືອນຢູ່ສັງຄົມ. ທ່ານລັດຖະມົນຕີ ຈີ້ງດີງຢູງ ຊີ້ແຈງວ່າ:
“ເຮືອນຢູ່ສັງຄົມໄດ້ຮັບການຫນູນຊ່ວຍຈາກລັດຢ່າງໃຫຍ່ຫລວງ ໂດຍຜ່ານການບໍ່ເກັບຄ່ານຳໃຊ້ທີ່ດິນ, ການຫລຸດຜ່ອນອາກອນມູນຄ່າເພີ່ມ(VAT) ສົ້ນອອກ ໝາຍຄວາມວ່າຫລຸດຜ່ອນໃຫ້ແກ່ຜູ້ຊື້ເຮືອນຢູ່ ແລະ ມີການຫນູນຊ່ວຍອ່ືນໆອີກ, ສະນັ້ນ ນີ້ແມ່ນການຊຸກຍູ້ໂດຍທາງອ້ອມເພື່ອເພີ່ມຄວາມຕ້ອງການຊື້ເຮືອນຢູ່ ແລະ ຖ້າຫາກແກ້ໄຂຄວາມຫຍຸ້ງຍາກດັ່ງກ່າວໄດ້ ບໍ່ພຽງແຕ່ຂົງເຂດເຮືອນຢູ່, ອະສັງຫາລິມະຊັບເທົ່ານັ້ນ ຫາກຂະແຫນງກໍ່ສ້າງ, ວັດສະດຸກໍ່ສ້າງກໍ່ໄດ້ຮັບການແກ້ໄຂອີກດ້ວຍ.”
ເມື່ອເຕື້ອງເຖິງບັນດາມາດຕະການທັງມີລັກສະນະຮີບດ່ວນ ທັງມີລັກສະນະຍາວນານ, ທ່ານຮອງນາຍົກລັດຖະມົນຕີ ຮ່ວາງຈູງຫາຍ, ຫົວຫນ້າຄະນະຊີ້ນຳສູນກາງກ່ຽວກັບນະໂຍບາຍເຮືອນຢູ່ ແລະ ຕະຫລາດອະສັງຫາລິມະຊັບ ໄດ້ຖືວ່າ: ບັນດາມາດຕະການ ແລະ ກົນໄກແມ່ນມີຢູ່ແລ້ວ, ສິ່ງຍັງເຫລືອແມ່ນບັນດາວິສາຫະກິດ ແລະ ທ້ອງຖິ່ນຈະໝູນໃຊ້ຄືແນວໃດເພື່ອບັນລຸປະສິດທິຜົນສູງສຸດ. ດ້ວຍບັນດາມາດຕະການພື້ນຖານນີ້ ປາດຖະຫນາວ່າປີ 2013 ຈະເປັນປີບານພັບຂອງຕະຫລາດອະສັງຫາລິມະຊັບໃນວິວັດການປະຕິຮູບ, ຟື້ນຕົວ, ສ້າງຄວາມໄວ້ເນື້ອເຊື່ອໃຈ ແລະ ດຶງດູດນັກລົງທຶນ, ເປັນພື້ນຖານໃຫ້ແກ່ການພັດທະນາໃນຊຸມປີຕໍ່ໄປ.