(vovworld)-ປະຈຸບັນ ການໝູນໃຊ້ການຄ້າເອເລັກໂຕນິກເຂົ້າໃນການເຄື່ອນໄຫວດຳເນີນທຸລະກິດ ແມ່ນທ່າອ່ຽງຢູ່ໃນໂລກ ແລະ ຫວຽດນາມກໍນອນໃນທ່າອ່ຽງນັ້ນ. ການດຳເນີນທຸລະກິດ ທາງເຄືອຂ່າຍອິນເຕີແນັດ ບໍ່ແມ່ນສິ່ງໃຫມ່ອ່ຽມສຳລັບຜູ້ອຸປະໂພກບໍລິໂພກຫວຽດນາມ. ພ້ອມກັບລະດັບການພັດທະນາ ອິນເຕີແນັດຢ່າງວອ່ງໄວ, ການໝູນໃຊ້ ອິນເຕີແນັດເພື່ອເປີດກວ້າງການຜະລິດ, ດຳເນີນທຸລະກິດພວມໄດ້ຮັບຄວາມສົນໃຈຈາກວິສາຫະກິດຫລາຍແຫ່ງ. ໃນລາຍການເສດຖະກິດພາກນີ້, ເຊີນທ່ານຮັບຟັງບົດຂຽນຂອງນັກຂ່າວໂຕຕວນ ທີ່ພາດຫົວເລື່ອງວ່າ: ຄວາມສາມາດບົ່ມຊ້ອນຂອງການພັດທະນາການຄ້າເອເລັກໂຕນິກຢູ່ຫວຽດນາມ.”
ຮ້ານຖ່າຍຮູບງານດອງ Abube ຂອງອ້າຍ ຫງວຽນຢູຍລີງ ຊື່ງແມ່ນນັກທຸລະກິດຫນຸ່ມ ເຖິງວ່າຖືກຕັ້ງຢູ່ໃນຮ່ອມທາງນ້ອຍ ເມືອງ ບາດີ່ງ ນະຄອນຫລວງ ຮ່າໂນ້ຍ ກໍ່ຕາມ ແຕ່ມີລູກຄ້າຫລາຍຄົນຮູ້ຈັກເຖິງ. ສິ່ງພິເສດນັ້ນແມ່ນ, ປະຈຸບັນ ມີ 70% ຈຳນວນລູກຄ້າມາຮ້ານນີ້ແມ່ນຮູ້ຂ່າວຄາວຈາກເຄືອຂ່າຍ ອິນເຕີແນັດ, ເປັນຕົ້ນແມ່ນຫນ້າເວັບສັງຄົມ (Facebook). ອ້າຍ ຫງວຽນຢູຍລີງ ເຈົ້າຂອງຮ້ານຖ່າຍຮູບໃຫ້ຮູ້ວ່າ:
“ຜ່ານ Facebook ຂ້າພະເຈົ້າສາມາດສຳພັດກັບລູກຄ້າໄດ້ຫລາຍກວ່າ. ຕົວຢ່າງ ຖ້າໂຄສະນາຕາມທ້ອງຖະຫນົນ ພຽງແຕ່ສຳພັດໄດ້ກັບລູກຄ້າຢູ່ບໍລິເວນນະຄອນ ຮ່າໂນ້ຍ ເທົ່ານັ້ນ, ໃນຂະນະນັ້ນ 70% ຈຳນວນລູກຄ້າຂອງຂ້າພະເຈົ້າແມ່ນມາຈາກ ຫາຍຟ່ອງ, ບັກນີງ, ນາມດີ້ງ”
ຜ່ານ ອິນເຕີແນັດ, ລູກຄ້າຂອງອ້າຍ ລີງ ຫລາຍຄົນໄດ້ຮູ້ຈັກເຖິງຂ່າວຄາວກ່ຽວກັບບັນດາຜະລິດຕະພັນຂອງຮ້ານຖ່າຍຮູບງານດອງ Abube . ນາງ ກາວທິແຫ້ງ ຢູ່ ແຂວງ ນາມດີ້ງ ໃຫ້ຮູ້ວ່າ:
“ຂ້າພະເຈົ້າຫາກໍ່ນຳໃຊ້ facebook ພຽງ 3-4 ເດືອນເທົ່ານັ້ນ ແລະ ໄດ້ພົບເຫັນຮູບພາບທີ່ຕົນມັກ. ສະນັ້ນ ຂ້າພະເຈົ້າຈຶ່ງເຂົ້າ facebook ຂອງ Aube ເພື່ອຊົມຮູບຖ່າຍຕ່າງໆ ແລະ ເຫັນວ່າ ວິທີຖ່າຍຮູບຂອງອ້າຍລີງ ແມ່ນງາມແບບພິເສດສະເພາະ.”
ພາບປະກອບ
ກໍເຊັນດຽວກັນກັບອ້າຍ ຫງວຽນຢູຍລີງ, ນັກທຸລະກິດຫນຸ່ມ ໂດກີມທິ້ງ ມີຮ້ານຂາຍຊຸດແຟຊັນຢູ່ເມືອງ 3 ນະຄອນ ໂຮ່ຈິມີນ, ບັນດາຜະລິດຕະພັນໃນຮ້ານຂອງທິ້ງ ສ່ວນຫລາຍແມ່ນຂາຍໃຫ້ລູກຄ້າຢູ່ຫລາຍແຂວງ, ນະຄອນໃນທົ່ວປະເທດ. ສິນຄ້າໃນຮ້ານບໍ່ມີຫຍັງເປັນພິເສດ ສ່ວນຫລາຍແມ່ນເກີບ, ໂສ້ງເສື້ອ ແລະ ເຄື່ອງສຳອາງ ແຕ່ອ້າຍທີ້ງ ໄດ້ໂຄສະນາແນະນຳສິນຄ້າຜ່ານບາງຫນ້າເວັບສັງຄົມ. ພາຍຫລັງຂາຍເຄື່ອງດ້ວຍຮູບການດັ່ງກ່າວມາເປັນເວລາ 3 ປີ, ມາຮອດປະຈຸບັນ ການດຳເນີນທຸລະກິດຂອງອ້າຍແມ່ນສະດວກຫລາຍ. ອ້າຍໂດກີມທີ້ງ ໃຫ້ຮູ້ວ່າ:
“ປະຈຸບັນ, ອິນເຕີແນັດ ພວມພັດທະນາຢ່າງກວ້າງຂວາງໃນທົ່ວໂລກ ແລະ ການຂາຍສິນຄ້າ online ແມ່ນມີຄວາມສະດວກໃຫ້ທຸກຄົນ. ເປັນຕົ້ນແມ່ນໄວຫນຸ່ມ ແລະ ບັນດາພາລະກອນເຮັດວຽກໃນຫ້ອງການ ເຂົາເຈົ້າສາມາດຊຶ້ເຄື່ອງຂອງຜ່ານອິນເຕີແນັດຢ່າງງາຍດາຍ.”
ຕາມບັນດານັກທຸລະກິດຫນຸ່ມຄື ຫງວຽນຢູຍລີງ ແລະ ໂດກີມທີ້ງ ແລ້ວ,ເລື່ອງດຳເນີນທຸລະກິດທາງ ອິນເຕີແນັດ ໄດ້ນຳມາເຊິ່ງຜົນປະໂຫຍດຫລາຍຢ່າງຄື: ລາຍຈ່າຍຫນ້ອຍ, ສາມາດໂຄສະນາໄດ້ຢ່າງກວ້າງຂວາງ ແລະ ວອ່ງໄວ, ໄດ້ຮັບຄວາມສົນໃຈຈາກຫລາຍຄົນກວ່າ ແລະ ຍິ່ງກວ່ານັ້ນ ຜູ້ຂາຍເຄື່ອງສາມາດພົວພັນຕິດຕໍ່ກັບລູກຄ້າໄດ້. ນີ້ກໍແມ່ນຄວາມສະດວກເພື່ອໃຫ້ບັນດາລູກຄ້າສະຫນັບສະຫນູນວິທີຊື້ເຄື່ອງຂອງແບບນີ້.
ປະຈຸບັນ ຢູ່ ຫວຽດນາມ ຜູ້ນຳໃຊ້ອິນເຕີແນັດມີກວ່າ 31 ລ້ານຄົນ, ກວມ 35,5% ຈຳນວນພົນລະເມືອງຫວຽດນາມ. ໃນຂົງເຂດຜະລິດດຳເນີນທຸລະກິດ, ຈຳນວນວິສາຫະກິດມີ ເວັບໄຊສະເພາະເພື່ອໂຄສະນາສິນຄ້າກວມປະມານ 42%, ອັດຕາສ່ວນວິສາຫະກິດຮັບການຊັ່ງຊື້ຜ່ານເວັບໄຊແມ່ນ 29%, ໃນຂະນະນັ້ນ ມີເຖິງ 47% ວິສາຫະກິດຊອກຫາຄູ່ຮ່ວມມື, ແຫລ່ງວັດຖຸດິບຜ່ານເຄືອຂ່າຍອິນເຕີແນັດ. ພິເສດ ບັນດາຫນ້າເວັບສັງຄົມປະຈຸບັນ ພວມດຶງດູດຜູ້ເຂົ້າຮ່ວມເປັນຈຳນວນຫລວງຫລາຍ, ໃນນັ້ນ ມີ 8,5 ລ້ານຄົນນຳໃຊ້ Facebook. ນີ້ຈະເປັນຫນ້າເວັບທີ່ເຕັມໄປດ້ວຍຄວາມສາມາດບົ່ມຊ້ອນສຳລັບບັນດາວິສາຫະກິດ. ເຈີນຕວນຫວຽດ ພະນັກງານບໍລິສັດຫຸ້ນສ່ວນ V&A ຫວຽດນາມ ໃຫ້ຮູ້ວ່າ:
“ບັນດາວິສາຫະກິດຫວຽດນາມ ໄດ້ມີການລົງທຶນພັດທະນາວິທີຂາຍເຄື່ອງຫລືເບິ່ງແຍງດູແລລູກຄ້າຜ່ານຫນ້າເວັບສັງຄົມ, ພິເສດແມ່ນ Facebook. ປະຈຸບັນ ຕະຫລາດແບບນີ້ແມ່ນໃຫມ່ອ່ຽມ. ມີວິສາຫະກິດຫລາຍແຫ່ງ ພິເສດ ແມ່ນບັນດາວິສາຫະກິດຂະຫນາດກາງ ແລະ ນ້ອຍ ສາມາດນຳໃຊ້ Facebook ເພື່ອຂາຍເຄື່ອງ ແລະ ຮູບການນີ້ທັງແມ່ນວິທີປະຢັດ ທັງນຳມາເຊິ່ງປະສິດທິຜົນ.”
ໃນຊຸມປີມໍ່ໆມານີ້ ການພັດທະນາຢ່າງແຮງຂອງເຄືອຂ່າຍສັງຄົມ ກໍຄືການພັດທະນາຂອງບັນດາອຸປະກອນເຄື່ອນທີ່ ໄດ້ປະກອບສ່ວນສ້າງເງື່ອນໄຂສະດວກໃຫ້ແກ່ການພົວພັນຄ້າຂາຍທາງເຄືອຂ່າຍອິນເຕີແນັດ, ເຮັດໃຫ້ຜູ້ຂາຍສິນຄ້າໃກ້ຊິດກັບລູກຄ້າກວ່າ. ຍ້ອນເຫດນັ້ນ ການຄ້າເອເລັກໂຕນິກນັບມື້ນັບພັດທະນາ ແລະ ໄດ້ຮັບການໝູນໃຊ້ຢ່າງກວ້າງຂວາງຢູ່ຫວຽດນາມ.