(vovworld)- ປີ 2014, ເສດຖະກິດຫວຽດນາມ ບັນລຸລະດັບເຕີບໂຕ 5,98%, ລື່ນກາຍຄາດໝາຍຊື່ງສະພາແຫ່ງຊາດໄດ້ວາງອອກແມ່ນ 5,8%. ປີ 2015, ລັດຖະບານໄດ້ວາງຄາດໝາຍການເຕີບໂຕເສດຖະກິດບັນລຸປະມານ 6,2%. ເຖິງວ່າເສດຖະກິດໂລກກໍຄືພາຍໃນປະເທດ ຍັງປະສົບກັບຄວາມຫຍຸ້ງຍາກບໍ່ແມ່ນຫນອ້ຍ ແຕ່ມາຮອດປະຈຸບັນ ປະກົດອອກບັນດາປັດໄຈຕັ້ງຫນ້າ, ສ້າງເງື່ອນໄຂເພື່ອບັນລຸລະດັບເຕີບໂຕດັ່ງກ່າວໃຫ້ໄດ້.
ພາບປະກອບ:internet
|
ປີ 2014 ແມ່ນປີທີ່ຫວຽດນາມ ສຳເລັດ ແລະລື່ນກາຍຫລາຍຄາດໝາຍພັດທະນາເສດຖະກິດສັງຄົມສຳຄັນ. ໄພເງິນເຟີ້ຫລຸດລົງພໍສົມຄວນ, ອັດຕາດອກເບ້ຍສິນເຊື່ອຫລຸດລົງ, ການສົ່ງອອກຮັກສາລະດັບເຕີບໂຕສູງ, ມີການສົ່ງອອກເກີນດຸ່ນ. ຍອດວົງເງິນສົ່ງອອກບັນລຸລະດັບ 150 ຕື້ USD, ຊື່ງແມ່ນລະດັບສູງສຸດນັບແຕ່ກອ່ນມາຮອດປະຈຸບັນ. ບົນພື້ນຖານບັນດາໝາກຜົນທີ່ບັນລຸໄດ້ ພ້ອມກັບຫລາຍປັດໄຈສະດວກໃນປີໃຫມ່, ບັນດາຜູ້ຊ່ຽວຊານເສດຖະກິດຖືວ່າ: ການສົ່ງອອກຍັງສືບຕໍ່ແມ່ນກຳລັງຫນູນສຳຄັນໃຫ້ແກ່ການເຕີບໂຕເສດຖະກິດຂອງຫວຽດນາມ. ໄລ່ມາຮອດປະຈຸບັນ, ນອກຈາກສັນຍາຫລາຍຝ່າຍກັບອົງການການຄ້າໂລກ (WTO), ຫວຽດນາມ ໄດ້ກາຍເປັນສະມາຊິກຂອງ 7 ສັນຍາການຄ້າເສລີສອງຝ່າຍ ແລະ ຫລາຍຝ່າຍ ກັບບັນດາຄູ່ຮ່ວມມືສຳຄັນ. ໃນປີ 2015, ຫວຽດນາມ ຈະປະຕິບັດບັນດາຄຳໝັ້ນສັນຍາຕາມບັນດາສັນຍາຫາກໍລົງນາມໂດຍໄວຄື: ສັນຍາການຄ້າເສລີ ຫວຽດນາມ- ສເກົາຫລີ, ສັນຍາການຄ້າເສລີລະຫວ່າງ ຫວຽດນາມ ແລະ ພັນທະມິດພາສີ ລັດເຊຍ- ເບລາຣຸດ - ກາຊັກສະຖານ. ພ້ອມກັນນັ້ນ, ສືບຕໍ່ເຈລະຈາສັນຍາການຄ້າເສລີ ຫວຽດນາມ - ອີຢູ, ສັນຍາຄູ່ຮ່ວມມືເສດຖະກິດຍຸດທະສາດຂ້າມປາຊີຟີກ (TPP) ແລະ ເຂົ້າຮ່ວມປະຊາຄົມເສດຖະກິດ ອາຊຽນ. ການເຊື່ອມໂຍງເຂົ້າກັບເສດຖະກິດໂລກ ນັບມື້ນັບເລິກເຊິ່ງ ຈະສ້າງເງື່ອນໄຂສະດວກເພື່ອເພີ່ມວົງເງິນສົ່ງອອກ, ຈາກນັ້ນ ຊຸກຍູ້ການເຕີບໂຕຍອດຜະລິດຕະພັນພາຍໃນ GDP. ດຣ ຟ້າມເຕີດທັງ, ຜູ້ຊ່ຽວຊານຂັ້ນສູງ ສະຖາບັນຄົ້ນຄ້ວາດ້ານການຄ້າ, ສັງກັດກະຊວງອຸດສາຫະກຳ ການຄ້າ ຖືວ່າ:
“ການເຄື່ອນໄຫວສົ່ງອອກຂອງຫວຽດນາມ ຟົດຟື້ນກວ່າ ຍ້ອນບັນດາສັນຍາການຄ້າເສລີທີ່ໄດ້ລົງນາມກັບຄູ່ຮ່ວມມື ແລະ ຄາດວ່າໃນໄຕມາດທີ 1 ປີນີ້, ສັນຍາ TPP ອາດຈະໄດ້ຮັບການລົງນາມ. ສິ່ງດັ່ງກ່າວຈະຊ່ວຍໃຫ້ການສົ່ງອອກຂອງຫວຽດນາມ ກ້າວເດີນອີກບາດຫນຶ່ງ”
ປັດໄຈຫນຶ່ງທີ່ສຳຄັນ ແມ່ນຊຸກຍູ້ການເຕີບໂຕເສດຖະກິດຫວຽດນາມ ໃນປີ 2015 ນັ້ນແມ່ນເສດຖະກິດມະຫາພາກສືບຕໍ່ໄດ້ຮັບການຮັກສາເປັນປົກກະຕິ. ຕາມນັ້ນແລ້ວ, ໄພເງິນເຟີ້ ໄດ້ຮັບການຄາດຄະເນວ່າ ຍັງຢູ່ໃນລະດັບຕ່ຳ, ປະມານ 4%, ຮັບປະກັນການດຸ່ນດ່ຽງເສດຖະກິດເປັນປົກກະຕິ ແລະ ສ້າງເງື່ອນໄຂເພື່ອປະຕິບັດຈຸດໝາຍສ້າງໂຄງປະກອບພື້ນຖານເສດຖະກິດຄືນໃຫມ່. ນີ້ກໍແມ່ນກາລະໂອກາດສ້າງສະພາບແວດລ້ອມແຫ່ງການດຳເນີນທຸລະກິດຢ່າງສະດວກໃຫ້ແກ່ບັນດານັກລົງທຶນ, ພິເສດ ແມ່ນການລົງທຶນຕ່າງປະເທດ. ຄາດຄະເນວ່າ ເງິນລົງທຶນໂດຍກົງຂອງຕ່າງປະເທດ FDI ອາດຈະເພີ່ມຈຳນວນການປ່ອຍເງິນຂຶ້ນເຖິງ 17 ຕື້ USD. ດ້ວຍການປ່ອຍເງິນ FDI ນີ້, ການເຕີບໂຕໃນຊຸມປີຕໍ່ໄປຂອງຫວຽດນາມ ຈະໄດ້ຮັບການປັບປຸງ. ດຣ ຫງວຽນງອກຕວຽນ, ຫົວຫນ້າສະຖາບັນເສດຖະກິດ - ການເງິນ, ສະຖາບັນການເງິນ ໄດ້ໃຫ້ຂໍ້ສັງເກດວ່າ:
“ເມື່ອໄພເງິນເຟີ້ຢູ່ໃນລະດັບຕ່ຳ, ພື້ນຖານເສດຖະກິດມະຫາພາກເປັນປົກກະຕິ, ສະພາບແວດລ້ອມແຫ່ງການລົງທຶນສະດວກ, ນອກນັ້ນ ພື້ນຖານເສດຖະກິດນັບມື້ນັບເຊື່ອມໂຍງຢ່າງກວ້າງຂວາງເຂົ້າກັບເສດຖະກິດໂລກ ການດຶງດູດເງິນລົງທຶນໂດຍກົງຂອງຕ່າງປະເທດຂອງຫວຽດນາມ ໃນປີ 2015 ນັບມື້ນັບເພີ່ມຂຶ້ນ. ພວກຂ້າພະເຈົ້າຕີລາຄາວ່າ ທຶນ FDI ໃນ 5 ປີຈະມາເຖິງ ແມ່ນແຫລ່ງກຳລັງຫລັກແຫລ່ງໃຫ້ແກ່ການເຕີບໂຕເສດຖະກິດຫວຽດນາມ. ໄພເງິນເຟີ້ຮັບປະກັນການດຸ່ນດ່ຽງເສດຖະກິດມະຫາພາກເປັນປົກກະຕິ, ສ້າງເງື່ອນໄຂໃຫ້ແກ່ການສ້າງພື້ນຖານເສດຖະກິດຄືນໃຫມ່, ສ້າງຄວາມໄວ້ເນື້ອເຊື່ອໃຈໃຫ້ແກ່ນັກລົງທຶນກັບຄືນຫວຽດນາມ.”
ຈຸດທີ່ພົ້ນເດັ່ນອີກໃນປີ 2015 ນັ້ນແມ່ນ ມີຮ່າງກົດໝາຍສະບັບປັບປຸງຫລາຍສະບັບ ຈະໄດ້ຮັບການປະຕິບັດຕົວຈິງ. ລະອຽດແມ່ນ ກົດໝາຍປັບປຸງ, ເພີ່ມເຕີມບາງຂໍ້ມາດຕາຂອງບັນດາກົດໝາຍວ່າດ້ວຍພາສີ, ກົດໝາຍວ່າດ້ວຍອາກອນ, ກົດໝາຍວ່າດ້ວຍການລົງທຶນ, ກົດໝາຍວ່າດ້ວຍວິສາຫະກິດ.. ຈະສົ່ງຜົນກະທົບໃຫຍ່ເຖິງສະພາບແວດລ້ອມແຫ່ງການດຳເນີນທຸລະກິດເວົ້າລວມ ກໍຄື ກາລະໂອກາດເພື່ອດຶງດູດກະແສເງິນລົງທຶນເວົ້າສະເພາະ. ທ່ານ ເລດັງຢວານ, ຜູ້ຊ່ຽວຊານດ້ານເສດຖະກິດໄຈ້ແຍກວ່າ:
“ການເຕີບໂຕປີນີ້ອາດຈະບັນລຸ ແຕ່ 5,5%-6%. ສຳລັບຄາດໝາຍວາງອອກ 6,2% ພວກເຮົາຕ້ອງພະຍາຍາມຈຶ່ງບັນລຸ. ນັ້ນແມ່ນ ລັດຖະບານຕ້ອງຍູ້ແຮງກິດຈະການປະຕິຮູບດ້ານບໍລິຫານ, ຫລຸດຜ່ອນລາຍຈ່າຍ, ລະບຽບການໃຫ້ແກ່ວິສາຫະກິດ ເພື່ອສາມາດຍູ້ແຮງການຜະລິດດຳເນີນທຸລະກິດ. ຄວນມີການກະທຳລະອຽດ ຈຶ່ງສາມາດບັນລຸໄດ້ຄາດໝາຍເຕີບໂຕ 6,2%, ເພາະວ່າສະພາບການເສດຖະກິດໂລກ ຍັງມີການຜັນແປຫລາຍຢ່າງຍາກທີ່ຄາດຄະເນໄດ້. ປີ 2015 ແມ່ນປີເຊື່ອມໂຍງເຂົ້າກັບໂລກ, ບັນດາວິສາຫະກິດຕ້ອງແກ້ງແຍ້ງຢ່າງແຮງຈຶ່ງຮັກສາຕະຫລາດໄດ້.”
ຄວາມຈິງໃນໄລຍະຜ່ານມາ, ເສດຖະກິດຫວຽດນາມ ຍັງຄົງອີງໃສ່ສ່ວນຫລາຍຈາກເງິນລົງທຶນ, ຈ້າງຄ່າແຮງງານຕ່ຳ, ສະມັດຕະພາບຕ່ຳ ແລະ ຂຸດຄົ້ນຊັບພະຍາກອນ. ເພື່ອບັນລຸບາດກ້າວບຸກທະລຸ, ຫວຽດນາມ ພວມຫັນໄປສູ່ຮູບແບບເຕີບໂຕໃຫມ່, ອີງໃສ່ສະມັດຕະພາບແຮງງານ, ສ້າງມູນຄ່າເພີ່ມຜະລິດຕະພັນສິນຄ້າໃຊ້ສອຍພາຍໃນປະເທດ ແລະ ເພີ່ມທະວີການສົ່ງອອກ. ນີ້ແມ່ນທິດກ້າວເດີນຕັ້ງຫນ້າ, ສ້າງທ່ວງທ່າໃຫ້ແກ່ພື້ນຖານເສດຖະກິດພັດທະນາແບບຍືນຍົງກວ່າໃນອະນາຄົດ.