ຊຸກຍູ້ການຮ່ວມມືລະຫວ່າງພາກລັດແລະເອກະຊົນເພື່ອແກ້ໄຂຄວາມຫຍຸ້ງຍາກ ໃຫ້ແກ່ພື້ນຖານເສດຖະກິດ

ວັນສຸກ ທີ 3 ເມສາ ຄ.ສ. 2015 | 12:08:03

(vovworld)-ໃນສະພາບການພື້ນຖານເສດຖະກິດປະສົບກັບຄວາມຫຍຸ້ງຍາກຫລາຍຢ່າງ, ເລື່ອງຍູ້ແຮງການສົ່ງເສີມການລົງທຶນ ແລະ ຜັນຂະຫຍາຍໂຄງການຮ່ວມມືລົງທຶນຄູ່ຮ່ວມມືພາກລັດແລະເອກະຊົນ(PPP) ມີຄວາມໝາຍສຳຄັນ. ການກະທົບຢ່າງຕັ້ງຫນ້າຂອງການຮ່ວມມືພາກລັດ ແລະ ເອກະຊົນ ໄດ້ເປີດກາລະໂອກາດ, ລະດົມແຫລ່ງທຶນຂອງພາກເອກະຊົນລົງທຶນໃຫ້ການກໍ່ສ້າງພື້ນຖານໂຄງລ່າງ, ຫລຸດຜ່ອນລາຍຈ່າຍຈາກງົບປະມານແຫ່ງລັດ. ເລື່ອງສ້າງເງື່ອນໄຂສະດວກໃຫ້ແກ່ບັນດານັກລົງທຶນ ຜັນຂະຫຍາຍບັນດາໂຄງການ PPP ຍັງປະກອບສ່ວນຊຸກຍູ້ການພັດທະນາເສດຖະກິດຂອງປະເທດຊາດອີກດ້ວຍ.

ພາບປະກອບ:baomoi.com

ປີ 2010, ທ່ານນາຍົກລັດຖະມົນຕີ ຫວຽດນາມ ຫງວຽນເຕີນຢູງ ໄດ້ເຊັນຂໍ້ຕົກລົງເລກທີ 71 ປະກາດໃຊ້ “ກົດລະບຽບປະຕິບັດທົດລອງການລົງທຶນຕາມຮູບການຄູ່ຮ່ວມມື ພາກລັດ ແລະ ເອກະຊົນ. ນີ້ແມ່ນພື້ນຖານດ້ານກົດໝາຍທຳອິດ, ສ້າງເງື່ອນໄຂໃຫ້ການຮ່ວມມື ພາກລັດ ແລະ ເອກະຊົນ ໄດ້ຮັບການປະຕິບັດຢູ່ຫວຽດນາມ. ຕາມຂໍ້ຕົກລົງນີ້, ບັນດານັກລົງທຶນ, ນັກປະມູນເຂົ້າຮ່ວມໂຄງການຈະໄດ້ຮັບບຸລິມະສິດກ່ຽວກັບພາສີອາກອນຈຳນວນຫນຶ່ງ, ມີສິດຊື້ເງິນຕາຕ່າງປະເທດ, ໄດ້ຮັບປະກັນການສະຫນອງບັນດາບໍລິການສາທາລະນະ ແລະ ໄດ້ຮັບບຸລິມະສິດໃນການກູ້ຢືມທຶນ, ທຶນຊ່ວຍເຫລືອລ້າ. ພາຍຫລັງ 4 ປີແຫ່ງການຜັນຂະຫຍາຍ, ມາຮອດປະຈຸບັນ ມີຫລາຍໂຄງການທົດລອງຢູ່ຫວຽດນາມ ດຶງດູດແຫລ່ງທຶນຫລາຍສົມຄວນຈາກເສດຖະກິດພາກເອກະຊົນລົງທຶນກໍ່ສ້າງພື້ນຖານໂຄງລ່າງຢູ່ຫວຽດນາມ.

ໂຄງການເສັ້ນທາງຄວາມໄວສູງຈາກ ເຢົາໄຢ ແຂວງ ດົງນາຍ ເຖິງ ຟານທຽດ ແຂວງ ບີງທ້ວນ ແມ່ນໂຄງການທຳອິດໄດ້ຮັບການລົງທຶນຕາມຮູບການຮ່ວມມືລະຫວ່າງ ພາກລັດ ແລະ ເອກະຊົນ. ໂຄງການເສັ້ນທາງຄວາມໄວສູງ ເຢົາໄຢ- ຟານທຽດ ມີຄວາມຍາວປະມານ 100 ກິໂລແມັດ, ໄລຍະ 1 ດ້ວຍ 4 ລານລົດ ແລະ ໄລຍະ 2 ແມ່ນ 6 ລານ, ເມື່ອນຳເຂົ້າເຄື່ອນໄຫວຈະຕອບສະຫນອງການສັນຈອນຂອງຍານພາຫະນະໃນລະດັບສູງສຸດ, ຫລຸດຜ່ອນຄວາມຍາວຈາກນະຄອນ ໂຮ່ຈິມີນ ເຖິງບັນດາເຂດອຸດສາຫະກຳ, ທ່າກຳປັ່ນ, ສະຫນາມບິນ ແລະ ເຊື່ອມຕໍ່ບັນດາສູນເສດຖະກິດ, ທ່ອງທ່ຽວເຂດທາງທິດໃຕ້ພາກກາງ. ໂຄງການມີຍອດຈຳນວນເງິນລົງທຶນເກືອບ 15.900 ຕື້ດົ່ງ(757 ລ້ານ USD), ນັກລົງທຶນທີຫນຶ່ງໄດ້ຮັບການເລືອກເຟັ້ນແມ່ນກຸ່ມບໍລິສັດ Bitexco, ນັກລົງທຶນທີ 2 ແມ່ນຄັດເລືອກຜ່ານການປະມູນແກ້ງແຍ້ງສາກົນ. ຕາມການຄາດຄະເນແລ້ວ, ໂຄງການນີ້ຈະໄດ້ຮັບການກໍ່ສ້າງສຳເລັດໃນປີ 2018. ຕາມທ່ານ ຫງວຽນງອກດົງ, ລັດຖະມົນຕີຊ່ວຍວ່າການກະຊວງຄົມມະນາຄົມ ຂົນສົ່ງ ຫວຽດນາມແລ້ວ, ນີ້ເປັນຄັ້ງທຳອິດທີ່ຈັດຕັ້ງການປະຕິບັດທົດລອງການຮ່ວມມື ພາກລັດ ແລະ ເອກະຊົນ ສຳລັບໂຄງການເສັ້ນທາງຄວາມໄວສູງ, ສະນັ້ນ ບັນດາຂັ້ນຕອນໄດ້ຮັບການປະຕິບັດຢ່າງຮີບດ່ວນ, ເຂັ້ມງວດຈາກການສ້າງສຳເນົາເຊີນເຂົ້າຮ່ວມການປະມູນ.

“ວຽກງານການປະມູນໄດ້ຮັບການປະຕິບັດຕົ້ນປີ 2014. ຂັ້ນຕອນຄັດເລືອກທັງໝົດ ລ້ວນແຕ່ໄດ້ຮັບການປະຕິບັດຢ່າງເຂັ້ມງວດ. ການປະມູນດຳເນີນໄປຢ່າງເຂັ້ມງວດ, ໂປ່ງໃສ. ນັບທັງການບຸກເບີກຫນ້າພຽງຕ້ອງຜັນຂະຫຍາຍຢ່າງຂ້ຽວຂາດ, ຮັບປະກັນຫນ້າພຽງສະອາດເພື່ອມອບໃຫ້ນັກລົງທຶນກ່ອນປະຕິບັດການກໍ່ສ້າງເພື່ອຫລີກລ້ຽງຄວາມສ່ຽງ ຕາມການກຳນົດຂອງການປະມູນສາກົນ PPP ແລະ ຂໍ້ກຳນົດຂອງທະນາຄານໂລກ.”

ໃນໂຄງການນີ້, ລັດຖະບານ ຮັບຜິດຊອບວຽກງານບຸກເບີກຫນ້າພຽງ ດ້ວຍລາຍຈ່າຍຂຶ້ນເຖິງ 107 ລ້ານ USD, ພ້ອມກັນນັ້ນ ນາຍົກລັດຖະມົນຕີ ເຊັນຂໍ້ຕົກລົງກ່ຽວກັບ “ກົນໄກຄຸ້ມຄອງ ແລະ ປະຕິບັດໂຄງການລົງທຶນກໍ່ສ້າງທົດລອງເສັ້ນທາງຄວາມໄວສູງ ເຢົາໄຢ - ຟານທຽດ ຕາມຮູບການຄູ່ຮ່ວມມື ພາກລັດ ແລະ ເອກະຊົນ. ທ່ານປະທານກຸ່ມບໍລິສັດ Bitexco, ຫວູກວາງໂຮ້ຍ ໃຫ້ຮູ້ວ່າ: ໂຄງການທົດລອງທຳອິດ ແມ່ນກາລະໂອກາດທີ່ດີໃຫ້ແກ່ບັນດານັກລົງທຶນໃນອະນາຄົດ. ນີ້ຍັງແມ່ນກາລະໂອກາດເພື່ອເປີດແຫລ່ງລະດົມທຶນເຂົ້າຫວຽດນາມ ເພື່ອພັດທະນາບັນດາຂົງເຂດຍັງດ້ອຍພັດທະນາ, ຈາກນັ້ນ ຊຸກຍູ້ການພັດທະນາເສດຖະກິດສັງຄົມ. ທ່ານ ຫວູກວາງຫລາມ, ຮອງຜູ້ອຳນວຍການໃຫຍ່ ບໍລິສັດລົງທຶນການເງິນ ນະຄອນໂຮ່ຈິມີນ ໃຫ້ຮູ້ວ່າ:

“ຄວາມຈິງ ບໍ່ມີແຫລ່ງທຶນງົບປະມານທ້ອງຖິ່ນໃດສາມາດຕອບສະຫນອງຄວາມຕ້ອງການທຶນພັດທະນາ. ຄວນມີນະໂຍບາຍລະດົມທຶນສັງຄົມພ້ອມກັນລົງທຶນ, ພ້ອມກັນພັດທະນາ. ປະຈຸບັນ ພວກຂ້າພະເຈົ້າພວມປະຕິບັດສິ່ງດັ່ງກ່າວ ແລະ ພະຍາຍາມເປີດກວ້າງຫລາຍຮູບການເພື່ອດຶງດູດແຫລ່ງທຶນ. ເຖິງຢ່າງໃດກໍຕາມ, ສິ່ງສຳຄັນກວ່າໝູ່ປະຈຸບັນ ແມ່ນຕ້ອງປັບປຸງກອບກົດໝາຍໃຫ້ສົມບູນແບບຢ່າງຈະແຈ້ງ. ສິ່ງທີ່ເປັນຫນ້າຊື່ນຊົມ ນັ້ນແມ່ນ ແຕ່ປີ 2011, ນາຍົກລັດຖະມົນຕີ ໄດ້ອອກຄຳສັ່ງຮຽກຮ້ອງການລົງທຶນ ພາກລັດ ແລະ ເອກະຊົນ ຄືນໃຫມ່. ກະຊວງແຜນການ ແລະ ການລົງທຶນ ກໍໄດ້ສ້າງກອບກົດໝາຍໃຫ້ແກ່ການຮ່ວມມື ພາກລັດ ແລະ ເອກະຊົນ. ບັນດານະໂຍບາຍ, ກອບກົດໝາຍນີ້ຈະເຮັດໃຫ້ບັນດານັກລົງທຶນອຸ່ນອ່ຽນໃຈ.”

ຕາມກະຊວງຄົມມະນາຄົມຂົນສົ່ງແລ້ວ, ຄວາມຕ້ອງການດ້ານທຶນຮອນເພື່ອກໍ່ສ້າງພື້ນຖານໂຄງລ່າງຄົມມະນາຄົມຢູ່ຫວຽດນາມ ນັບມື້ນັບເພີ່ມຂຶ້ນ. ຖ້າຫາກໄລຍະ 2011-2015 ຕ້ອງການປະມານ 480.000 ຕື້ດົງ, ໄລຍະ 5 ປີຕໍ່ໄປ (2016-2020) ແມ່ນ 730.000 ຕື້ດົ່ງ. ໃນເງື່ອນໄຂຫຍຸ້ງຍາກຂອງເສດຖະກິດປະຈຸບັນ, ເລື່ອງດຶງດູດແຫລ່ງທຶນໃຫຍ່ຈາກງົບປະມານຄືດັ່ງກ່າວແມ່ນສິ່ງບໍ່ອາດປະຕິບັດໄດ້, ສະນັ້ນ ບັນຫາເປີດກວ້າງການຮ່ວມມື ພາກລັດ ແລະ ເອກະຊົນ ຄວນໄດ້ຮັບການຍູ້ແຮງກວ່າອີກ. ນອກຈາກໂຄງການເຢົາໄຢ- ຟານທຽດ, ຍັງມີໂຄງການຄົມມະນາຄົມຂະຫນາດໃຫຍ່ຈຳນວນຫນຶ່ງອີກຄື: ເສັ້ນທາງຄວາມໄວສູງ ບຽນຮ່ວາ- ຫວູງເຕົາ, ເສັ້ນທາງຄວາມໄວສູງ ຈູງເລືອງ- ໝີທ້ວນ, ໂຄງການທ່າອາກາດສະຍານສາກົນ ລອງແທ່ງ ຊື່ງກະຊວງຄົມມະນາຄົມຂົນສົ່ງໄດ້ສະເຫນີລັດຖະບານເພື່ອຍື່ນສະເຫນີຕໍ່ສະພາແຫ່ງຊາດໝູນໃຊ້ຕາມຮູບການຮ່ວມມື ພາກລັດ ແລະ ເອກະຊົນ.