ກໍເຊັ່ນດຽວກັບບັນດາປະເທດອື່ນໃນໂລກ, ບັນດານັກທຸລະກິດເລີ່ມດຳເນີນອາຊີບຂອງຫວຽດນາມ, ເກືອບໝົດທຸກຄົນໃນເບື້ອງຕົ້ນລ້ວນແຕ່ມີແນວຄວາມຄິດດຳເນີນທຸລະກິດເພື່ອພັດທະນາໃຫ້ຖືກທິດ. ທ່ານ ຫງວຽນຈ້ອງທ້ຽນ, ຮອງປະທານສະຫະສະມາຄົມວິສາຫະກິດຂະໜາດກາງ ແລະ ນ້ອຍຮ່າໂນ້ຍ ຖືວ່າ: ໃນເບື້ອງຕົ້ນ, ບັນດານັກທຸລະກິດເລີ່ມດຳເນີນອາຊີບແມ່ນປະສົບກັບຄວາມຫຍຸ້ງຍາກຫຼາຍຢ່າງ ຍ້ອນຄວາມຮູ້ໃນການຮ່ຳຮຽນແມ່ນບໍ່ແທດເໝາະກັບຄວາມຈິງ. ນອກນັ້ນ, ບົດຮຽນໃນການຄຸ້ມຄອງວິສາຫະກິດ, ການຕະຫຼາດ, ສື່ສານ, ການຜະລິດຜະລິດຕະພັນ… ລ້ວນແຕ່ຖືກຈຳກັດ. ເພື່ອດຳເນີນອາຊີບໃຫ້ບັນລຸຜົນສຳເລັດ, ກ່ອນອື່ນໝົດບັນດາວິສາຫະກິດຕ້ອງກະກຽມແຜນການຢ່າງລະອຽດ ນັບແຕ່ມີແນວຄວາມຄິດ ເຖິງເວລາສ້າງຕັ້ງໂຄງການລວມມີ: ພື້ນຖານ, ມີປະຖົມປັດໃຈເພື່ອດຳເນີນອາຊີບ, ຄັດເລືອກຂະແໜງອາຊີບດຳເນີນທຸລະກິດໃຫ້ເໝາະສົມ, ກົງຈັກບໍລິຫານຮັບປະກັນລັກສະນະກະທັດລັດແຕ່ມີປະສິດທິຜົນ. ເພື່ອໃຫ້ວິສາຫະກິດດຳເນີນອາຊີບບັນລຸໝາກຜົນທີ່ດີ ຄວນມີການໜູນຊ່ວຍຈາກລັດກ່ຽວກັບແຫຼ່ງທຶນ, ລະບຽບການບໍລິຫານກະທັດລັດ. ທ່ານ ຫງວຽນຈ້ອງທ້ຽນ ໃຫ້ຮູ້ວ່າ.
“ລັດຕ້ອງປັບປຸງລະບຽບການບໍລິຫານກວ່າອີກ ຍ້ອນວ່າ ການອອກໜັງສືອະນຸຍາດໃນປະຈຸບັນຂອງພວກເຮົາຍັງພົບກັບຂໍ້ຕິດຄັດຫຼາຍຢ່າງ. ອີກອັນໜຶ່ງ ແມ່ນຄວນສ້າງເງື່ອນໄຂດ້ານທຶນຮອນ. ພວກເຮົາຄວນມີການໜູນຊ່ວຍ ເມື່ອສ່ວນບຸກຄົນ, ຄອບຄົວດຳເນີນທຸລະກິດມີໂຄງການສາມາດເປັນໄປໄດ້ ແມ່ນຈະໄດ້ຮັບປະກັນໃຫ້ກູ້ຢືມທຶນ, ສ້າງເງື່ອນໄຂທາງດ້ານທຶນຮອນໃຫ້ວິສາຫະກິດ, ສ່ວນບຸກຄົນ ເລີ່ມດຳເນີນອາຊີບ, ບັນຫາທຶນຮອນແມ່ນສຳຄັນທີ່ສຸດ, ຍ້ອນວ່າ ບໍ່ມີທຶນຈະບໍ່ມີເຄື່ອງອຸປະກອນ, ບໍ່ມີເຕັກໂນໂລຊີ, ໂຮງງານ ແລະ ບໍ່ສາມາດຈ້າງກຳມະກອນໄດ້. ສະນັ້ນ, ຄວນບຸລິມະສິດກ່ຽວກັບແຫຼ່ງທຶນ, ສ້າງເງື່ອນໄຂໄດ້ສຳພັດກັບບັນດາແຫຼ່ງທຶນ, ໂດຍສະເພາະແມ່ນບັນດາແຫຼ່ງທຶນບຸລິມະສິດໃຫ້ວິສາຫະກິດດຳເນີິນອາຊີບ, ເພື່ອລະດົມໃຫ້ບັນດາວິສາຫະກິດເລີິ່ມດຳເນີນທຸລະກິດ ແລະ ຮຽກຮ້ອງບັນດານັກລົງທຶນຕ່າງປະເທດ”.
ເລື່ອງດຳເນີນອາຊີບໃນປະຈຸບັນຍັງປະສົບກັບຄວາມຫຍຸ້ງຍາກຫຼາຍຢ່າງ. ວິສາຫະກິດສ່ວນຫຼາຍເມື່ອດຳເນີນອາຊີບຕາມປົກກະຕິປະສົບກັບຄວາມຫຍຸ້ງຍາກດ້ານແຫຼ່ງການເງິນ, ຖັນແຖວບຸກຄະລາກອນຍັງຂາດຄວາມຮູ້ດ້ານວິຊາການ, ຄວາມສາມາດຮັບມືເມື່ອເຊື່ອມໂຍງຍັງອ່ອນຢູ່. ສະນັ້ນ, ບັນດາຄວາມຮູ້ກ່ຽວກັບລະບຽບການບໍລິຫານ, ກົດໝາຍ… ເຮັດໃຫ້ວິສາຫະກິດຫຼາຍແຫ່ງເມື່ອດຳເນີນອາຊີບປະສົບກັບຄວາມຫຍຸ້ງຍາກຫຼາຍຢ່າງ. ທ່ານ ໂດ້ຮ່ວາຍນາມ, ຜູ້ຮ່ວມສ້າງຕັ້ງ Co-workinh Space, ວິສາຫະກິດເຄື່ອນໄຫວໃນຂົງເຂດສະໜອງຂໍ້ມູນຂ່າວສານໜູນຊ່ວຍໃຫ້ວິສາຫະກິດເລີ່ມດຳເນີນອາຊີບຖືວ່າ.
“ວິສາຫະກິດເລີ່ມດຳເນີນອາຊີບປະສົບກັບຄວາມຫຍຸ້ງຍາກຫຼາຍທີ່ສຸດ, ບັນດາຄວາມຫຍຸ້ງຍາກພື້ນຖານຄື: ຄ່າໃຊ້ຈ່າຍໃນການປຸກສ້າງຫ້ອງການ, ຄ່າໃຊ້ຈ່າຍທີ່ບໍ່ກ່ຽວຂ້ອງເຖິງມະນຸດສູງທີ່ສຸດເຖິງ 40 – 50% ຄ່າໃຊ້ຈ່າຍຂອງວິສາຫະກິດ, ເຮັດໃຫ້ລັກສະນະແກ່ງແຍ້ງຂອງວິສາຫະກິດເລີ່ມດຳເນີນອາຊີບຂອງປະເທດເຮົາຫຼຸດຜ່ອນລົງ. ໃນຂະນະນັ້ນ, ບັນດາວິສາຫະກິດຂະໜາດໃຫຍ່, ຄ່າໃຊ້ຈ່າຍໃຫ້ບັນຫານີ້ພັດຕ່ຳກວ່າຫຼາຍ, ສ່ວນບັນດາວິສາຫະກິດຂະໜາດນ້ອຍພັດໃຊ້ຈ່າຍເຂົ້າໃນວຽກງານທີ່ບໍ່ສ້າງເປັນມູນຄ່າຫຼາຍສົມຄວນ. ນີ້ແມ່ນບັນດາຄວາມຫຍຸ້ງຍາກສຳລັບວິສາຫະກິດເລີ່ມດຳເນີນອາຊີບ. ນອກນັ້ນ, ຄວາມຮູ້ຂອງບັນດາວິສາຫະກິດເລີ່ມດຳເນີນອາຊີບຢູ່ໃນລະດັບບໍ່ສູງ, ຖ້າມີການປະຕິບັດຕົວຈິງແມ່ນຈະມີບົດຮຽນຫຼາຍຢ່າງ, ອັນຈະຊ່ວຍໃຫ້ເລື່ອງດຳເນີນອາຊີບບັນລຸຜົນສຳເລັດກວ່າ”.
ທ່ານນາງຟ້າມທູຮັ່ງ, ເລຂາທິການໃຫຍ່ຫ້ອງການການຄ້າ ແລະ ອຸດສາຫະກຳຫວຽດນາມ ໃຫ້ຮູ້ວ່າ: ໃນໄລຍະຜ່ານມາ, ລັດຖະບານ ມີຄວາມມານະພະຍາຍາມຫຼາຍຢ່າງໃນການສ້າງສະພາບແວດລ້ອມແຫ່ງການດຳເນີນທຸລະກິດທີ່ສະດວກ ແລະ ສ້າງນະໂຍບາຍໜູນຊ່ວຍບັນດາສ່ວນບຸກຄົນ, ວິສາຫະກິດດຳເນີນອາຊີບ ແລະ ພັດທະນາວິສາຫະກິດພາຍຫຼັງດຳເນີນອາຊີບ. ໃນນັ້ນເອົາໃຈໃສ່ເປັນພິເສດເຖິງການພັດທະນາຂອງວິສາຫະກິດ ພາຍຫຼັງດຳເນີນອາຊີບພັດທະນາຂອບຂະໜາດການຜະລິດ. ທ່ານນາງ ຟ້າມທິທູຮັ່ງ ໃຫ້ຮູ້ວ່າ, ລັດຖະບານຫວຽດນາມ ໄດ້ມີນະໂຍບາຍໜູນຊ່ວຍນັກທຸລະກິດເມື່ອດຳເນີນອາຊີບ ແລະ ພາຍຫຼັງການດຳເນີນອາຊີບ. ລັດຖະບານກໍ່ເອົາໃຈໃສ່ເຖິງການເຊື່ອມຕໍ່ລະຫວ່າງບັນດາວິສາຫະກິດເລີ່ມດຳເນີນອາຊີບນຳກັນກັບບັນດານັກລົງທຶນ ເພື່ອໃຫ້ວິສາຫະກິດມີເງື່ອນໄຂພັດທະນາເປັນຢ່າງດີທີ່ສຸດ.
“ພວກຂ້າພະເຈົ້າພວມມີແຜນການ, ກ່ອນອື່ນໝົດແມ່ນສົມທົບກັບບັນດາສະຫະສະມາຄົມວິສາຫະກິດ, ບັນດາຄະນະກຳມະການປະຊາຊົນແຂວງ ສ້າງແຜນການເພື່ອໜູນຊ່ວຍໃຫ້ບັນດາວິສາຫະກິດໃນແຕ່ລະບໍລິເວນ ກໍຄືໃນທົ່ວປະເທດ. ທີ່ 2 ແມ່ນຈະເພີ່ມທະວີກຳລັງຄວາມສາມາດໃຫ້ບັນດາການເຄື່ອນໄຫວຂອງບັນດາສະຫະສະມາຄົມວິສາຫະກິດ. ພ້ອມທັງ, ຈະດຳເນີນການຄົ້ນຄວ້າຄ່າໃຊ້ຈ່າຍໃນການດຳເນີນທຸລະກິດ, ເມື່ອທຽບໃສ່ບັນດາປະເທດຕ່າງໆໃນໂລກ ເພື່ອຈາກນັ້ນກໍ່ສະເໜີຕໍ່ລັດຖະບານກ່ຽວກັບບັນດາມາດຕະການແກ້ໄຂຕໍ່ໄປ ເພື່ອສືບຕໍ່ໜູນຊ່ວຍບັນດາວິສາຫະກິດດຳເນີນອາຊີບໃຫ້ພັດທະນາ”.
ປະຈຸບັນ, ຫວຽດນາມ ມີວິສາຫະກິດດຳເນີນອາຊີບລຸ້ນໃໝ່ທີ່ໜຸ່ມແໜ້ນ ແລະ ມີຄວາມຕັດສິນໃຈປະຕິບັດບັນດາຄວາມໄຝ່ຝັນ, ຄວາມເຊື່ອໝັ້ນໃນການດຳເນີນທຸລະກິດ. ເຖິງຢ່າງໃດກໍ່ຕາມ, ເພື່ອບັນລຸຜົນສຳເລັດດັ່ງກ່າວບັນດາວິສາຫະກິດເຫຼົ່ານີ້ ນອກຈາກເລື່ອງປະກອບບົດຮຽນໃນການດຳເນີນທຸລະກິດ, ມີຄວາມຮູ້ກ່ຽວກັບຕະຫຼາດ, ຮູບແບບຄຸ້ມຄອງການດຳເນີນທຸລະກິດ, ເຈດຈຳນົງດຳເນີນອາຊີບຂອງຕົນເອງ… ແລ້ວ. ບັນດາວິສາຫະກິດດຳເນີນອາຊີບ ຍັງຕ້ອງການມີສະພາບແວດລ້ອມແຫ່ງການດຳເນີນອາຊີບຢ່າງມີວິຊາຊີບ ແລະ ປອດໂປ່ງ. ເລື່ອງລັດ ໄດ້ ແລະ ພວມສ້າງສະພາບແວດລ້ອມແຫ່ງການດຳເນີນທຸລະກິດຢ່າງສະດວກ, ກະຈ່າງແຈ້ງ, ຮັບປະກັນສິດເສລີໃນການປະດິດສ້າງ… ຈະປະກອບສ່ວນໜູນຊ່ວຍໃຫ້ບັນດານັກທຸລະກິດດຳເນີນອາຊີບປະສົບຜົນສຳເລັດ.