(vovworld) - ຜູ້ອຸປະໂພກບໍລິໂພກ ຫວຽດນາມ ນັບມື້ນັບຕີລາຄາສູງ ແລະ ບຸລິມະສິດຊົມໃຊ້ສິນຄ້າຜະລິດພາຍໃນປະເທດ, ປະກອບສ່ວນຊຸກຍູ້ການພັດທະນາຜະລິດ ແລະ ຈຳຫນ່າຍສິນຄ້າພາຍໃນປະເທດ. ນີ້ແມ່ນຂໍ້ສັງເກດທີ່ຍົກອອກມາໃນກອງປະຊຸມສະຫລຸບ 3 ປີ ແຫ່ງການຜັນຂະຫຍາຍການປະຕິບັດບັ້ນຂົນຂວາຍ “ຊາວ ຫວຽດນາມ ບຸລິມະສິດຊົມໃຊ້ສິນຄ້າ ຫວຽດນາມ” ຊຶ່ງຫາກໍ່ດຳເນີນຢູ່ ຮ່າໂນ້ຍ.
ພິທີໄຂງານຕະຫລາດນັດສົ່ງສິນຄ້າ ຫວຽດນາມ ລົງໄປຂາຍຢູ່ເຂດຊົນນະບົດ
ພາບ:laocai.com.vn |
ສິ່ງທີ່ເປັນຫນ້າຊື່ນຊົມນັ້ນແມ່ນ ພາຍຫລັງ 3 ປີແຫ່ງການຜັນຂະຫຍາຍການປະຕິບັດບັ້ນຂົນຂວາຍ “ຊາວ ຫວຽດນາມ ບຸລິມະສິດຊົມໃຊ້ສິນຄ້າ ຫວຽດນາມ” ນັບມື້ນັບມີຜູ້ອຸປະໂພກບໍລິໂພກຫຼາຍຄົນຮັບຮູ້ຢ່າງເລິກເຊິ່ງກ່ຽວກັບຈຸດປະສົງ ແລະ ຄວາມໝາຍຂອງບັ້ນຂົນຂວາຍທີ່ມີລັກສະນະຮັກຊາດນີ້ ແລະ ໄດ້ຫັນປ່ຽນການໃຊ້ສອຍຕາມທິດບຸລິມະສິດສິນຄ້າຫວຽດນາມ. ຄວາມຈິງສະແດງໃຫ້ເຫັນວ່າ ໃນໄລຍະມໍ່ໆມານີ້ ຜູ້ອຸປະໂພກບໍລິໂພກ ຫວຽດນາມ ນັບມື້ນັບຕີລາຄາສູງສິນຄ້າຂອງຫວຽດນາມ. ປະຈຸບັນ ມີຜູ້ອຸປະໂພກບໍລິໂພກກວ່າ 70% ເຊື່ອໝັ້ນວ່າ ສິນຄ້າ ຫວຽດນາມ ມີຄຸນນະພາບສູງ. ຕາມການຄົ້ນຄ້ວາຂອງບໍລິສັດ Nielsen ຊຶ່ງແມ່ນບໍລິສັດໄຈ້ແຍກຕະຫລາດແລ້ວ: ປີ 2011 ມີ 90% ຈຳນວນຜູ້ອຸປະໂພກບໍລິໂພກ ຢູ່ ນະຄອນໂຮ່ຈິມິນ ເລືອກເຟັ້ນຊົມໃຊ້ສິນຄ້າ ຫວຽດນາມ, ສ່ວນຢູ່ ຮ່າໂນ້ຍ ແມ່ນ 83%. ຢູ່ ທ້ອງຖິ່ນຫລາຍແຫ່ງ, ບັນດາປະເພດສິນຄ້າຄື: ເຄື່ອງຕຳແຜ່ນຕັດຫຍິບ, ເກີບຫນັງ ມີ 80% ຈຳນວນຜູ້ອຸປະໂພກບໍລິໂພກນິຍົມຊົມໃຊ້. ໝາກຜົນຂອງ ບັ້ນຂົນຂວາຍ “ຊາວ ຫວຽດນາມ ບຸລິມະສິດຊົມໃຊ້ສິນຄ້າ ຫວຽດນາມ” ໄດ້ປະກອບສ່ວນຢ່າງຕັ້ງຫນ້າເຂົ້າໃນການຊຸກຍູ້ການຜະລິດ ແລະ ການໃຊ້ສອຍພາຍໃນປະເທດ, ເພີ່ມຂອບຂະຫນາດການສະຫນອງ ແລະ ຄວາມຕ້ອງການຂອງພື້ນຖານເສດຖະກິດ, ເປີດກວ້າງຕະຫລາດສົ່ງອອກ ແລະ ຫລຸດຜ່ອນສິນຄ້ານຳເຂົ້າຈາກຕ່າງປະເທດ. ໃນ 10 ເດືອນຂອງປີນີ້, ສິນຄ້າຂາຍຍ່ອຍ ແລະ ລາຍຮັບຈາກການບໍລິການໃຊ້ສອຍພາຍໃນປະເທດທັງໝົດ ຄາດວ່າບັນລຸກວ່າ 2.117 ຕື້ດົ່ງ, ເພີ່ມຂຶ້ນກວ່າ 17% ເມື່ອທຽບໃສ່ປີກາຍ. ທີ່ກອງປະຊຸມສະຫລຸບ 3 ປີແຫ່ງການປະຕິບັດ ບັ້ນຂົນຂວາຍ “ຊາວ ຫວຽດນາມ ບຸລິມະສິດຊົມໃຊ້ສິນຄ້າ ຫວຽດນາມ”, ທ່ານ ຮູ່ນດ໋າມ, ປະທານຄະນະກຳມະການສູນກາງແນວໂຮມປະເທດຊາດ ຫວຽດນາມ ຢັ້ງຢືນວ່າ:
“ບັ້ນຂົນຂວາຍ “ຊາວ ຫວຽດນາມ ບຸລິມະສິດຊົມໃຊ້ສິນຄ້າ ຫວຽດນາມ ມີຄວາມໝາຍຢ່າງເລິກເຊິ່ງ, ມີຄວາມສຳຄັນໃນໄລຍະສະເພາະຫນ້າ ແລະ ຍາວນານ, ປະກອບສ່ວນຍົກສູງສະຕິຄວາມຮັບຜິດຊອບໃນການຜະລິດ ແລະ ບຸລິມະສິດຊົມໃຊ້ສິນຄ້າຫວຽດນາມ. ໃນສະພາບການເສດຖະກິດຍັງປະສົບກັບຄວາມຫຍຸ້ງຍາກ, ຍິ່ງກວ່າເວລາໃດໝົດ, ການຜັນຂະຫຍາຍບັ້ນຂົນຂວາຍນີ້ແມ່ນຫນຶ່ງໃນບັນດາເນື້ອໃນ, ມາດຕະການສຳຄັນເພື່ອພັດທະນາເສດຖະກິດຂອງປະເທດຊາດ.”
ສະຖານທີ່ຂາຍສິນຄ້າຜະລິດພາຍໃນປະເທດ
ພາບ:internet
|
ໄປຄຽງຄູ່ກັບການເພີ່ມທະວີບັນດາສະຖານທີ່ຂາຍສິນຄ້າ ຫວຽດນາມ, ຈຳນວນວິສາຫະກິດຜະລິດ, ດຳເນີນທຸລະກິດ ສິນຄ້າຫວຽດນາມ ມີຄຸນນະພາບສູງກໍນັບມືນັບເພີ່ມຂຶ້ນ. ມີວິສາຫະກິດຫລາຍແຫ່ງໄດ້ເພີ່ມທະວີການສົ່ງສິນຄ້າໄປຂາຍຢູ່ເຂດຊົນນະບົດ, ຢູ່ເຂດຫ່າງໄກສອກຫລີກ ແລະ ຕະຫລາດນັດ, ສິນຄ້າຜະລິດພາຍໃນປະເທດກໍໄດ້ຮັບ ຄວາມເຊື່ອໝັ້ນຈາກຜູ້ອຸປະໂພກບໍລິໂພກ. ລະບົບສັບພະສິນຄ້າ, ສິນຄ້າຜະລິດພາຍໃນປະເທດຍັງຄົງກວມອັດຕາສ່ວນຫລາຍ ຈາກ 80 - 90%. ທີ່ກອງປະຊຸມ, ທ່ານຮອງນາຍົກລັດຖະມົນຕີ ຮ່ວາງຈູງຫ໋າຍ ຊີ້ແຈງວ່າ:
“ຈຸດປະສົງຂອງ ບັ້ນຂົນຂວາຍ “ຊາວ ຫວຽດນາມ ບຸລິມະສິດຊົມໃຊ້ສິນຄ້າ ຫວຽດນາມ ແມ່ນເສີມຂະຫຍາຍນ້ຳໃຈຮັກຊາດຢ່າງແຂງແຮງ, ສ້າງວັດທະນະທຳໃຊ້ສອຍໃຫ້ແກ່ ຊາວຫວຽດນາມ ແລະ ຊຸກຍູ້ການຜະລິດສິນຄ້າທີ່ມີຄຸນນະພາບສູງ ມີກຳລັງແກ້ງແຍ້ງສູງ ແລະ ຕອບສະຫນອງຄວາມຕ້ອງການພາຍໃນປະເທດ ແລະ ສົ່ງອອກ. ຈຸດໝາຍດັ່ງກ່າວມີຄວາມໝາຍຍຸດທະສາດອັນໃຫຍ່ຫລວງ ພິເສດແມ່ນໃນໄລຍະເຊື່ອມໂຍງເຂົ້າກັບສາກົນປະຈຸບັນນີ້.”
ຈຸດໝາຍຂອງບັ້ນຂົນຂວາຍ “ຊາວຫວຽດນາມ ບຸລິມະສິດຊົມໃຊ້ສິນຄ້າຂອງຫວຽດນາມ” ທີ່ວາງອອກຮອດປີ 2015 ນັ້ນແມ່ນ: ມີ 80% ຈຳນວນຜູ້ອຸປະໂພກບໍລິໂພກ ຫວຽດນາມ ບຸລິມະສິດຊົມໃຊ້ສິນຄ້າຜະລິດພາຍໃນປະເທດ; 90% ຈຳນວນຕາແສງຢູ່ເຂດຊົນນະບົດ, ເຂດພູດອຍ, ເຂກຫ່າງໄກສອກຫລີກ ມີຮ້ານຂາຍສິນຄ້າ ຫວຽດນາມ ເພື່ອຮັບໃຊ້ຄວາມຕ້ອງການຊື້ເຄື່ອງຂອງຂອງປະຊາຊົນ. ຄາດຄະເນວ່າ ຕະຫລາດຈໍລະຈອນສິນຄ້າໄລຍະທ້າຍປີຍັງປະສົບກັບຄວາມຫຍຸ້ງຍາກຫລາຍຢ່າງ, ສິນຄ້າຄ້າງສາງຍັງເພີ່ມຂຶ້ນສູງ, ການຈຳຫນ່າຍສິນຄ້າຍັງຊັກຊ້າ. ເພາະສະນັ້ນ ຈຸດໝາຍຂອງບັ້ນຂົນຂວາຍໃນໄລຍະຈະມາເຖິງຈະປະກອບສ່ວນກະຕຸກຊຸກຍູ້ການໃຊ້ສອຍ, ຍູ້ແຮງການຈຳຫນ່າຍຜະລິດຕະພັນເພື່ອແກ້ໄຂສິນຄ້າຄ້າງສາງ, ແກ້ໄຂຄວາມຫຍຸ້ງຍາກໃຫ້ແກ່ການຜະລິດ.