(vovworld)- ກົນຈັກແມ່ນຂະແຫນງອຸດສາຫະກຳພື້ນຖານ, ມີບົດບາດສຳຄັນພິເສດໃນການປະຕິບັດພາລະກິດຫັນປະເທດຊາດເປັນປະເທດອຸດສາຫະກຳ ແລະ ທັນສະໄຫມຢູ່ຫວຽດນາມ. ຍຸດທະສາດພັດທະນາຂະແຫນງກົນຈັກຫວຽດນາມ ໄດ້ຮັບການເຊັນອະນຸມັດຈາກນາຍົກລັດຖະມົນຕີໃນຂໍ້ຕົກລົງເລກທີ186/2002/ຕລ-ນຍ ລົງວັນທີ 26/12/2002. ໂດຍປະຕິບັດຍຸດທະສາດນີ້, ໃນ 10 ປີຜ່ານມາ ຂະແຫນງກົນຈັກຫວຽດນາມ ໄດ້ມີການປ່ຽນແປງຫລາຍຢ່າງ ແລະ ພັດທະນາ, ເຊື່ອມໂຍງເຂົ້າກັບຂະແຫນງກົນຈັກໂລກເທື່ອລະກ້າວ. ນີ້ແມ່ນເນື້ອໃນບົດຂຽນຂອງນັກຂ່າວ ແທ່ງຈູງ ທີ່ມີຫົວຂໍ້ວ່າ: ຍຸດທະຍາດພັດທະນາຂະແຫນງກົນຈັກຫວຽດນາມ.
ພາບປະກອບ:internet
|
ໃນກິດຈະການພັດທະນາປະເທດຊາດ, ລັດຖະບານເອົາໃຈໃສ່ທີ່ສຸດເຖິງການພັດທະນາຂະແຫນງກົນຈັກ, ພິເສດ ແມ່ນກົນຈັກປະດິດສ້າງ. ໃນ 10 ປີຜ່ານມາ, ຂະແຫນງກົນຈັກບັນລຸໄດ້ຜົນງານຫລາຍຢ່າງ, ເປັນຕົ້ນແມ່ນກົນຈັກປະດິດສ້າງ, ການສົ່ງອອກເພີ່ມຂຶ້ນຢ່າງລຽນຕິດ, ກຳລັງແກ້ງແຍ້ງຂອງບັນດາຜະລິດຕະພັນກົນຈັກຢູ່ຕະຫລາດພາຍໃນປະເທດ ແລະ ຕະຫລາດສົ່ງອອກກໍນັບມື້ນັບເພີ່ມຂຶ້ນ. ປີ 2013, ມູນຄ່າການຜະລິດອຸດສາຫະກຳຂອງຂະແຫນງກົນຈັກບັນລຸກວ່າ 251.000 ຕື້ດົ່ງ, ເພີ່ມຂຶ້ນທົບ 7 ເທົ່າເມື່ອທຽບໃສ່ປີ 2000. ມູນຄ່າການສົ່ງອອກກົນຈັກກໍບັນລຸເກືອບ 35% ຍອດມູນຄ່າຂອງຂະແຫນງກົນຈັກ ແລະ ສູງກວ່າຄາດໝາຍທີ່ຍຸດທະສາດໄດ້ວາງອອກ. ບັນດາຂົງເຂດລະອຽດຄື: ການຜະລິດ, ການປະກອບລົດໂອໂຕ, ຜະລິດລົດຈັກ, ອຸປະກອນໃຫ້ແກ່ໂຮງງານໄຟຟ້າໃຊ້ພະລັງຄວາມຮ້ອນ, ອຸດສາຫະກຳ ສຳຮອງ ລ້ວນແຕ່ມີບາດກ້າວພັດທະນາ ແລະ ບັນລຸໝາກຜົນອັນຕັ້ງຫນ້າ. ກ່ຽວກັບການສົ່ງອອກ, ປີ 2013,ມູນຄ່າການສົ່ງອອກກົນຈັກບັນລຸກວ່າ 13 ຕື້ USD, ນຳຂະແຫນງກົນຈັກກາຍເປັນຫນຶ່ງໃນບັນດາຂະແຫນງສົ່ງອອກສຳຄັນຂອງປະເທດຊາດ. ຖ້າກ່ອນນີ້, ບັນດາວິສາຫະກິດກົນຈັກຫວຽດນາມ ຜະລິດກົນຈັກປະດິດສ້າງ, ແຕ່ໄລຍະມໍ່ໆມານີ້ ມີວິສາຫະກິດກົນຈັກຫລາຍແຫ່ງໄດ້ບັນລຸຄວາມຄືບຫນ້າໃນການຜະລິດອຸປະກອນຢ່າງຄົບຊຸດ, ສະຫນອງໃຫ້ແກ່ບັນດາຂະແຫນງອຸດສາຫະກຳສຳຄັນຄື: ໄຟຟ້າ, ຊີມັງ, ອຸດສາຫະກຳອ້ອຍ,ນ້ຳຕານ, ເຈ້ຍ, ຟຸ່ນເຄມີ…ໃນຊຸມປີມໍ່ໆມານີ້, ຂະແຫນງກົນຈັກປະດິດສ້າງພວມຢູ່ໃນທ່າພັດທະນາ, ເປັນຕົ້ນແມ່ນບັນດາຂະແຫນງຜະລິດກົນຈັກ, ອຸປະກອນ, ປະກອບສ່ວນຍົກສູງອັດຕານຳໃຊ້ກົນຈັກຜະລິດພາຍໃນປະເທດ ຢູ່ບັນດາຂະແຫນງອຸດສາຫະກຳ ແລະ ຂະແຫນງອຸດສາຫະກຳສຳຮອງ, ຮັບໃຊ້ການສົ່ງອອກ. ທ່ານ ລ້າຍວັນດາມ, ປະທານສະພາບໍລິຫານບໍລິສັດກົນຈັກ ດົງແອງ ແບ່ງປັນວ່າ:
“ແຕ່ລະປີ, ການຜະລິດອຸປະກອນລ້ວນແຕ່ພັດທະນາ, ສຳລັບການຜະລິດພາຍໃນປະເທດ, ເລື່ອງປະດິດສ້າງບັນດາກົນຈັກ, ອຸປະກອນແມ່ນສຳຄັນທີ່ສຸດ, ມັນທັງຮັບປະກັນໃຫ້ສະມັດຕະພາບຄຸນນະພາບຜະລິດຕະພັນດີກວ່າ ແລະ ຢາກເຂົ້າຮ່ວມຕະຫລາດໂລກ ມັນຮຽກຮ້ອງໃຫ້ມີກົນຈັກທັນສະໄຫມ, ກ້າວຫນ້າ ຈຶ່ງຕອບສະຫນອງຄວາມຕ້ອງການພັດທະນາ, ຍົກສູງກຳລັງແກ້ງແຍ້ງໃນການເຊື່ອມໂຍງ.”
ເຖິງວ່າ ບັນລຸໄດ້ບາດກ້າວໃຫຍ່ໃນການສຳພັດກັບເຕັກໂນໂລຊີໃຫມ່ກໍຕາມ, ແຕ່ຈຸດໝາຍຊື່ງຂະແຫນງກົນຈັກຕ້ອງຕອບສະຫນອງໃຫ້ໄດ້ແຕ່ 40-50% ຄວາມຕ້ອງການພາຍໃນປະເທດມາຮອດປະຈຸບັນ ຍັງບໍ່ທັນບັນລຸໄດ້ເທື່ອ. ເບິ່ງລວມແລ້ວ, ອັດຕາການນຳເຂົ້າເກີນດຸນຍັງສູງກວ່າເມ່ືອທຽບໃສ່ອັດຕາການສົ່ງອອກ, ໃນຂະນະນັ້ນ ຄຸນນະພາບຜະລິດຕະພັນກົນຈັກຍັງຈຳກັດຢູ່, ວິສາຫະກິດບໍ່ທັນເປັນເຈົ້າການໃນວຽກງານອອກແບບສຳລັບບັນດາໂຄງການໃຫຍ່, ນັ້ນບໍ່ທັນເວົ້າເຖິງກຳລັງຄວາມສາມາດ, ບໍລິຫານວິສາຫະກິດ, ການສົມທົບ, ຮ່ວມສຳພັນລະຫວ່າງບັນດາວິສາຫະກິດນຳກັນຍັງຈຳກັດຢູ່. ທີ່ກອງປະຊຸມສະຫລຸບ 10 ປີແຫ່ງການປະຕິບັດຍຸດທະສາດພັດທະນາຂະແຫນງກົນຈັກຫວຽດນາມ ໂດຍກະຊວງອຸດສາຫະກຳ ແລະ ການຄ້າຈັດຕັ້ງຂຶ້ນຢູ່ຮ່າໂນ້ຍ, ທ່ານນາຍົກລັດຖະມົນຕີ ຫງວຽນເຕີນຢູງ ຊີ້ແຈ້ງວ່າ: ກົນຈັກແມ່ນຂະແຫນງອຸດສາຫະກຳພື້ນຖານໃນວິວັດການຫັນປະເທດຊາດເປັນປະເທດອຸດສາຫະກຳ ແລະ ທັນສະໄຫມ, ເພາະສະນັ້ນ ລັດຖະບານເອົາໃຈໃສ່ເປັນພິເສດເຖິງການພັດທະນາຂະແຫນງກົນຈັກ, ເປັນຕົ້ນແມ່ນກົນຈັກປະດິດສ້າງ. ທ່ານນາຍົກລັດຖະມົນຕີ ຫງວຽນເຕີນຢູງ ເນັ້ນຫນັກວ່າ:
“ຍຸດທະສາດຕ້ອງຕິດພັນກັບການວາງແຜນກຳນົດ, ໃນນັ້ນ ກຳນົດຢ່າງຈະແຈ້ງບັນດາຜະລິດຕະພັນ ແລະ ຂົງເຂດບຸລິມະສິດ ຕິດພັນກັບກົນໄກນະໂຍບາຍລະອຽດເພື່ອປະຕິບັດ. ການສ້າງຍຸດທະສາດວາງແຜນກຳນົດ ຕ້ອງເອົາໃຈໃສ່ທີ່ສຸດ ໃນເງື່ອນໄຂໃຫມ່, ເງື່ອນໄຂເສດຖະກິດການຕະຫລາດ, ການເຊື່ອມໂຍງ ແລະ ແກ້ງແຍ້ງ ຫາກບໍ່ແມ່ນການວາງແຜນຄືໃນໄລຍະເກື້ອກູນກ່ອນນີ້.”
ທ່ານນາຍົກລັດຖະມົນຕີ ສະເຫນີ ຄະນະຊີ້ນຳລາຍການຜະລິດຕະພັນກົນຈັກຈຸດສຸມ ຄວນສຸມໃສ່ຫນ້າທີ່ສ້າງກົນໄກນະໂຍບາຍ. ຈາກນະໂຍບາຍຕະຫລອດຮອດພຶດຕິກຳ ເສີມຂະຫຍາຍບົດບາດເປັນຂົວເຊື່ອມຕໍ່ລະຫວ່າງວິສາຫະກິດກົນຈັກ ແລະ ອົງການຄຸ້ມຄອງລັດ, ສ້າງເງື່ອນໄຂໃຫ້ແກ່ວິສາຫະກິດ ແລະ ຂະແຫນງກົນຈັກພັດທະນາຢ່າງວ່ອງໄວໃນເງື່ອນໄຂໃຫມ່.