(vovworld)-ຊື່ງແມ່ນປະເທດມີແຫລ່ງວັດຖຸດິບຜະລິດຕະພັນກະເສດ, ອາຫານ, ສົດ ແລະ ອຸດົມສົມບູນຕະຫລອດປີ, ຫວຽດນາມ ໄດ້ສົ່ງອອກຜະລິດຕະພັນກະເສດ, ອາຫານປຸງຫລາຍປະເພດ ເຂົ້າຕະຫລາດໂລກສຳເລັດຜົນ. ເຖິງຢ່າງໃດກໍຕາມ, ໃນວິວັດການເຊື່ອມໂຍງເຂົ້າກັບເສດຖະກິດໂລກ, ມີຜະລິດຕະພັນຂອງຫວຽດນາມຫລາຍປະເພດພວມປະສົບກັບສິ່ງທ້າທາຍຫລາຍຢ່າງ, ເປັນຕົ້ນແມ່ນຕະຫລາດເອີລົບ(EU), ຊື່ງແມ່ນຕະຫລາດຍາມໃດກໍມີຄວາມຮຽກຮອ້ງຕ້ອງການສູງ. ເພື່ອສ້າງເງື່ອນໄຂແກ່ບັນດາວິສາຫະກິດແຊກຊືມເຂົ້າຕະຫລາດເອີລົບຢ່າງໝັ້ນຄົງ, ກົມສົ່ງເສີມການຄ້າ ສັງກັດກະຊວງອຸດສາຫະກຳ ແລະ ການຄ້າຫວຽດນາມ ຫາກໍເລີ່ມປະຕິບັດໂຄງການສົ່ງເສີມການສົ່ງອອກອາຫານປຸງແຕ່ງຂອງຫວຽດນາມໄປຍັງຕະຫລາດເອີລົບ(2013-2016).
ໃນ 20 ກວ່າປີແຫ່ງການພັດທະນາ, ຂະແຫນງອຸດສາຫະກຳປຸງແຕ່ງອາຫານຂອງຫວຽດນາມ ໄດ້ສ້າງບາງຂົງເຂດປຸງແຕ່ງ ດ້ວຍບັນດາປະເພດສິນຄ້າທີ່ມີທ່າແຮງຄື: ເຄື່ອງດືມ, ນ້ຳນົມ, ຜະລິດຕະພັນອານກົນ, ຜະລິດຕະພັນຈາກນ້ຳນົມ, ນ້ຳມັນພືດ, ອຸດສາຫະກຳປຸງແຕ່ງອາຫານ; ປຸງແຕ່ງແປ້ງ ແລະ …ກະຊວງອຸດສາຫະກຳ ແລະ ການຄ້າ ຫວຽດນາມ ໄດ້ຈັດຂະແຫນງອຸດສາຫະກຳປຸງແຕ່ງອາຫານເຂົ້າໝວດຂະແຫນງມີທ່າໄດ້ປຽບໃນການແກ້ງແຍ້ງ, ມີການກຳນົດທິດຍຸດທະສາດພັດທະນາບົນພື້ນຖານນຳໃຊ້ເຕັກໂນໂລຊີກ້າວຫນ້າ, ທັນສະໄຫມ, ຂຸດຄົ້ນການນຳໃຊ້ວັດຖຸດິບພາຍໃນປະເທດຢ່າງສຸດຂີດ. ປະຈຸບັນ, ເອີລົບຍັງຄົງແມ່ນຕະຫລາດອາຫານ ແລະ ເຄື່ອງດືມໃຫຍ່ກວ່າໝູ່ຢູ່ໃນໂລກ ແລະ ກໍແມ່ນຕະຫລາດທີ່ມີຄວາມສາມາດບົ່ມຊ້ອນຂອງຫວຽດນາມ. ເຖິງຢ່າງໃດກໍຕາມ, ສິ່ງທ້າທາຍໃຫຍ່ສຸດຂອງບັນດາວິສາຫະກິດປຸງແຕ່ງອາຫານຢູ່ຫວຽດນາມ ປະຈຸບັນ ຍັງຄົງແມ່ນການສຳພັດກັບຕະຫລາດເອີລົບ. ທ່ານນາງ ຫງວຽນທິມີງຖູຍ, ຮອງຫົວຫນ້າສູນໃຫ້ຄຳປຶກສາ ບຳລຸງສ້າງທຸລະກຳ ຂຶ້ນກັບກົມສົ່ງເສີມການຄ້າ- ກະຊວງອຸດສາຫະກຳ ການຄ້າຫວຽດນາມໃຫ້ຮູ້ວ່າ:
“ຄວາມຫຍຸ້ງຍາກສຳລັບຂະແຫນງປຸງແຕ່ງອາຫານສົ່ງອອກຂອງຫວຽດນາມ ນັ້ນແມ່ນຄວາມຮຽກຮ້ອງຕ້ອງການຄຸນນະພາບສູງຂອງຫລາຍປະເທດໃນເອີລົບມີລັກສະນະກົດໝາຍ. ຕົວຢ່າງຄື: ຮຽກຮ້ອງໃຫ້ຜະລິດຕະພັນຂອງຫວຽດນາມຕ້ອງບັນລຸມາດຖານຕາມຂັ້ນຕອນການຜະລິດແບບຍືນຍົງ ແລະ ຫລາຍມາດຖານເຕັກນິກອື່ນ. ນອກນັ້ນ ຮຽກຮ້ອງຕ້ອງການລວມທີ່ມີລັກສະນະຮົ້ວກີດຂວາງດ້ານເຕັກນິກ, ກົດໝາຍແລ້ວ, ບໍລິສັດນຳເຂົ້າແຕ່ລະແຫ່ງກໍມີຄວາມຮຽກຮ້ອງຕ້ອງການສະເພາະ, ມາດຖານສະເພາະ, ຊ້ຳບໍ່ຫນຳຕ້ອງຕອບສະຫນອງບັນດາມາດຖານກ່ຽວກັບດ້ານສັງຄົມ, ສິ່ງແວດລ້ອມ.”
ເພື່ອຊ່ວຍໃຫ້ບັນດາວິສາຫະກິດສົ່ງອອກອາຫານປຸງແຕ່ງພັດທະນາຢູ່ຕະຫລາດເອີລົບສຳເລັດຜົນ, ສິ່ງສຳຄັນທີ່ສຸດນັ້ນແມ່ນ ຕ້ອງສະຫນອງຂໍ້ມູນຂ່າວສານຢ່າງຄົບຖ້ວນກ່ຽວກັບລະບອບກົດໝາຍ, ຄວາມຕອ້ງການຂອງຕະຫລາດບັນດາປະເທດເອີລົບ. ຄຽງຄູ່ກັນນັ້ນ ບັນດາວິສາຫະກິດເອງຕ້ອງຍົກສູງຄວາມຮັບຮູ້, ປ່ຽນແປງຈີນຕະນາການດຳເນີນທຸລະກິດເພື່ອສາມາດສຳພັດ ແລະ ເປີດກວ້າງຕະຫລາດ. ດຣ ຟ້າມວັນຈັດ ຜູ້ຊ່ຽວຊານດ້ານເສດຖະກິດຖືວ່າ:
“ມີວິສາຫະກິດຫລາຍແຫ່ງຂາດຕະຫລາດຈຳຫນ່າຍ, ແຕ່ເມື່ອມີຕະຫລາດ ແລະມີ ສັນຍາສົ່ງອອກສິນຄ້າແລ້ວ ພັດບໍ່ເອົາໃຈໃສ່ເຖິງລັກສະນະເຄ່ັງຄັດຂອງກົດໝາຍໃນສັນຍາ ສະນັ້ນ ນີ້ແມ່ນບັນຫາຕ້ອງໄດ້ຮັບການຫນູນຊ່ວຍກ່ຽວກັບດ້ານການຄ້າ. ຂ້າພະເຈົ້າຄິດວ່າ ຕ້ອງມີແຫລ່ງຂໍ້ມູນຂ່າວສານຢ່າງຊັດເຈນໃຫ້ແກ່ວິສາຫະກິດ. . ທີສອງແມ່ນຕ້ອງໄດ້ຮັບການຫນູນຊ່ວຍຈາກບັນດາອົງການການຄ້າເພື່ອໃຫ້ບັນດາວິສາຫະກິດປະຕິບັດວຽກງານດັ່ງກ່າວເປັນຢ່າງດີ.”
ພາບປະກອບ:internet
|
ເພື່ອສ້າງເງື່ອນໄຂໃຫ້ແກ່ຂະແຫນງອຸດສາຫະກຳອາຫານພັດທະນາແບບຍືນຍົງ ແລະ ກ້າວໄປເຖິງຢືດຄອງຕະຫລາດເທື່ອລະກ້າວ, ກົມສົ່ງເສີມການຄ້າ ແລະ ສູນຫນູນຊ່ວຍການສົ່ງອອກຈາກບັນດາປະເທດພວມພັດທະນາຂອງ ໂຮນລັງ ຫາກໍສົມທົບກັນເລີ່ມປະຕິບັດໂຄງການສົ່ງເສີມການສົ່ງອອກໃຫ້ແກ່ຂະແຫນງປຸງແຕ່ງອາຫານຂອງຫວຽດນາມ ແຊກຊືມເຂົ້າຕະຫລາດເອີລົບ ດ້ວຍຍອດງົບປະມານຫນູນຊ່ວຍວິສາຫະກິດແມ່ນ 1.5 ລ້ານ ເອີໂຣ. ຈຸດໝາຍຕົ້ນຕໍຂອງໂຄງການແມ່ນຫນູນຊ່ວຍຂະແຫນງປຸງແຕ່ງອາຫານຫວຽດນາມ ເຂົ້າຕະຫລາດເອີລົບ, ສຸມໃສ່ຫນູນຊ່ວຍບັນດາວິສາຫະກິດສົ່ງອອກບັນດາຜະລິດຕະພັນທີ່ມີມູນຄ່າເພີ່ມສູງຄື: ເຄື່ອງດືມ, ກາເຟ, ຊາ, ນ້ຳເຜີ້ງ, …. ທ່ານນາງ ຫງວຽນມີງຖູຍ ໃຫ້ຮູ້ຕື່ມອີກວ່າ:
“ໂຄງການຈະເລືອກເຟັ້ນວິສາຫະກິດ 30 – 40 ແຫ່ງທີ່ມີຄວາມສາມາດບົ່ມຊ້ອນກ່ຽວກັບການປຸງແຕ່ງອາຫານເພື່ອເຂົ້າຮ່ວມບັນດາຊຸດບຳລູງສ້າງ, ກຳນົດບັນດາຕະຫລາດຈຸດໝາຍ, ພົບປະກັບບັນດາຄູ່ຮ່ວມມືທີ່ມີຄວາມສາມາດບົ່ມຊ້ອນ. ບັນດາວິສາຫະກິດເຂົ້າຮ່ວມໂຄງການຈະໄດ້ຮັບຜົນປະໂຫຍດຫລາຍຢ່າງຈາກໂຄງການ, ພິເສດ ແມ່ນການຫນູນຊ່ວຍດ້ານເຕັກນິກ. ເມື່ອວິສາຫະກິດໝັ້ນໝາຍຮ່ວມກັບໂຄງການ, ໂຄງການຈະຫນູນຊ່ວຍຂັ້ນຕອນທັງໝົດ, ຮັບປະກັນໃຫ້ວິສາຫະກິດສາມາດ ສົ່ງ ຜະລິດຕະພັນໄປຂາຍຢູ່ຕະຫລາດເອີລົບຢ່າງສຳເລັດຜົນ.”
ບັນດາການເຄື່ອນໄຫວຂອງໂຄງການແມ່ນສຸມໃສ່ຫນູນຊ່ວຍຝຶກອົບຮົມໃຫ້ແກ່ບັນດາວິສາຫະກິດສົ່ງອອກ ຈາກການຜະລິດ, ປຸງແຕ່ງຜະລິດຕະພັນຕະຫລອດຮອດເວລາທີ່ວິສາຫະກິດບັນລຸຈຸດໝາຍສົ່ງອອກຂອງຕົນ. ໂຄງການຍັງຊ່ວຍບັນດາວິສາຫະກິດຍົກສູງກຳລັງຄວາມສາມາດໃນການ maketing, ລັກສະນະໝັ້ນຄົງ ແລະ ປັບປຸງຄຸນນະພາບຜະລິດຕະພັນ, ຕອບສະຫນອງຄວາມຮຽກຮ້ອງຕ້ອງການຂອງການສົ່ງອອກ ແລະ ແຊກຊືມເຂົ້າຕະຫລາດ. ໂຄງການຈະໃຫ້ຄຳປຶກສາແກ່ບັນດາວິສາຫະກິດ ເຂົ້າຮ່ວມງານຕະຫລາດນັດສາກົນສະເພາະຂະແຫນງປຸງແຕ່ງອາຫານໃນທ້າຍປີ 2014 ຢູ່ຫວຽດນາມ.