(vovworld)- ວິວັດທະນາການຫັນບັນດາວິສາຫະກິດຢູ່ຫວຽດນາມເປັນຫຸ້ນສ່ວນ ໄດ້ຮັບການປະຕິບັດໃນຫລາຍປີມານີ້, ພິເສດ ໃນຊຸມປີມໍ່ໆມານີ້ ໃນທ່າອ່ຽງເຊື່ອມໂຍງເຂົ້າກັບສາກົນ ດ້ວຍການສ້າງປະຊາຄົມເສດຖະກິດອາຊຽນ, ເຂົ້າຮ່ວມການເຈລະຈາສັນຍາຄູ່ຮ່ວມມືຂ້າມປາຊີຟີກ TPP ນັ້ນ, ເລື່ອງຍູ້ແຮງການຫັນບັນດາວິສາຫະກິດເປັນຫຸ້ນສ່ວນ, ເປັນຕົ້ນແມ່ນບັນດາລັດວິສາຫະກິດ ຍິ່ງມີຄວາມຈຳເປັນ. ນີ້ກໍແມ່ນຄວາມຕັດສິນໃຈຂອງລັດຖະບານຫວຽດນາມ ເພື່ອຈຸດໝາຍສ້າງໂຄງປະກອບພື້ນຖານເສດຖະກິດຄືນໃຫມ່ ຕາມທິດພັດທະນາຢ່າງມີປະສິດທິຜົນ ແລະ ໝັ້ນຄົງ, ກຽມພ້ອມໃຫ້ວິວັດທະນາການເຊື່ອມໂຍງເຂົ້າກັບເສດຖະກິດສາກົນ.
ພາບປະກອບ:internet
|
ປີ 2014, ເປັນຄັ້ງທຳອິດ ມີລັດວິສາຫະກິດໃຫຍ່ຫລາຍແຫ່ງ ໄດ້ດຳເນີນການຂາຍຫຸ້ນສ່ວນ, ມີວິສາຫະກິດຫລາຍແຫ່ງ ໄດ້ປະກາດມູນຄ່າໃບຫຸ້ນ, ໃນນັ້ນ ມີວິສາຫະກິດໃຫຍ່ຫລາຍແຫ່ງກ່ອນນີ້ປະຕິບັດການຫັນເປັນຫຸ້ນສ່ວນຢ່າງຊັກຊ້າ ກໍໄດ້ປະກົດອອກໃນຕະຫລາດຫລັກຊັບ. ສະເພາະ 6 ເດືອນຕົ້ນປີ ມີວິສາຫະກິດ 58 ແຫ່ງ ໄດ້ຮັບການສັບຊ້ອນ, ໃນນັ້ນ 38 ແຫ່ງໄດ້ຫັນເປັນຫຸ້ນສ່ວນ. ສິ່ງດັ່ງກ່າວສະແດງໃຫ້ເຫັນຄວາມຕັດສິນໃຈຂອງລັດຖະບານ ແມ່ນຍູ້ໄວວິວັດການຫັນເປັນຫຸ້ນສ່ວນ. ທີ່ກອງປະຊຸມຜັນຂະຫຍາຍຫນ້າທີ່ສ້າງໂຄງປະກອບລັດວິສາຫະກິດຄືນໃຫມ່ ຊື່ງຖືກຈັດຂຶ້ນໃນໄລຍະຕົ້ນປີ, ທ່ານນາຍົກລັດຖະມົນຕີ ຫງວຽນເຕີນຢູງ ໄດ້ສະເຫນີບັນດາກະຊວງ, ຂະແຫນງການ, ທ້ອງຖິ່ນ, ລັດວິສາຫະກິດ ປະຕິບັດບັນດາມາດຕະການຢ່າງຄົບຊຸດ ເພື່ອສ້າງການຫັນປ່ຽນຢ່າງແຂງແຮງ ແລະ ໄດ້ຮັບຜົນງານໃນແຜນຮ່າງສ້າງໂຄງປະກອບລັດວິສາຫະກິດຄືນໃຫມ່.
“ຫັນລັດວິສາຫະກິດ 432 ແຫ່ງ ເປັນຫຸ້ນສ່ວນໃຫ້ໄດ້ ແລະ ຂັ້ນທີ່ມີອຳນາດ ໄດ້ເຊັນອະນຸມັດແລ້ວ. ປະຈຸບັນ ພວກເຮົາຕ້ອງກຳນົດວ່າ ນີ້ແມ່ນຫນ້າທີ່ການເມືອງຈຸດສຸມຂອງລັດຖະບານ.”
ເພື່ອຍູ້ໄວວິວັດການຫັນວິສາຫະກິດເປັນຫຸ້ນສ່ວນ, ລັດຖະບານ ໄດ້ຊີ້ນຳບັນດາກະຊວງ, ຂະແຫນງການ ປະຕິບັດຫລາຍມາດຕະການລະອຽດ ມີລັກສະນະບຸກທະລຸຄື: ລົບຫນີ້ໃຫ້ແກ່ 4 ໝວດເປົ້າໝາຍລັດວິສາຫະກິດ, ອະນຸຍາດຖອນແຫລ່ງທຶນດ້ວຍມູນຄ່າຕຳ່ກວ່າມູນຄ່າໃບຫຸ້ນ ຫລືຕຳ່ກວ່າມູນຄ່າໃນປື້ມໄລ່ລຽງບັນຊີ, ຫລຸດຜ່ອນມູນຄ່າເພດານຫຸ້ນສ່ວນໂດຍລັດຖືຫຸ້ນໃນວິສາຫະກິດຫັນເປັນຫຸ້ນສ່ວນ. ນີ້ແມ່ນບັນດາມາດຕະການມີລັກສະນະຮີບດ່ວນ ທັງປະກອບສ່ວນແກ້ໄຂບັນດາຄວາມຫຍຸ້ງຍາກ, ຊ່ວຍບັນດາວິສາຫະກິດໃນວິວັດທະນາການ ຫັນເປັນຫຸ້ນສ່ວນ. ທ່ານນາຍົກລັດຖະມົນຕີ ກໍໄດ້ຊີ້ນຳມອບຫນ້າທີ່ລະອຽດໃຫ້ແກ່ບັນດາທ່ານລັດຖະມົນຕີ, ປະທານຄະນະກຳມະການປະຊາຊົນແຂວງ, ນະຄອນ, ປະທານສະພາສະມາຊິກກຸ່ມບໍລິສັດເສດຖະກິດ ຕ້ອງຮັບຜິດຊອບຕໍ່ຫນ້າທ່ານນາຍົກລັດຖະມົນຕີ ກ່ຽວກັບວິວັດທະນາການສ້າງໂຄງປະກອບ ຫັນວິສາຫະກິດເປັນຫຸ້ນສ່ວນ ທີ່ຂຶ້ນກັບຂອບເຂດຕົນເອງຮັບຜິດຊອບ, ແກ້ໄຂຢ່າງເຂັ້ມງວດ, ປົດຕຳແຫນ່ງ, ພົ້ນຕຳແຫນ່ງ ການນຳທີ່ບໍ່ປະຕິບັດຢ່າງເຂັ້ມງວດ, ປະຕິບັດການຫັນລັດວິສາຫະກິດເປັນຫຸ້ນສ່ວນ ບໍ່ໄດ້ຮັບຜົນ. ກະຊວງຄົມມະນາຄົມຂົນສົ່ງ ແມ່ນຫນຶ່ງໃນບັນດາຫົວຫນ່ວຍນຳຫນ້າໃນວິວັດທະນາການ ຫັນລັດວິສາຫະກິດເປັນຫຸ້ນສ່ວນ. ໃນຮອບເວລາ 3 ປີ, ກະຊວງຄົມມະນາຄົມຂົນສົ່ງໄດ້ຍູ້ແຮງການຫັນວິສາຫະກິດນອກລັດແຕ່ຖືທຶນດຳລັດ 100% ເປັນຫຸ້ນສ່ວນ, ສຸມໃສ່ສ້າງສຳເລັດບັນດາລະບຽບການ ຫັນບັນດາວິສາຫະກິດຂົນສົ່ງທາງລົດໄຟເປັນຫຸ້ນສ່ວນ. ທ່ານ ດີງລາທັງ, ລັດຖະມົນຕີກະຊວງຄົມມະນາຄົມ ແລະ ຂົນສົ່ງ ໃຫ້ຮູ້ວ່າ:
“ບົນພື້ນຖານບັນດາໝາກຜົນຂອງການ ຫັນເປັນຫຸ້ນສ່ວນ, ສ້າງໂຄງປະກອບວິສາຫະກິດຄືນໃຫມ່ໃນ 3 ປີຜ່ານມາ, ພວກຂ້າພະເຈົ້າຈະສືບຕໍ່ປະຕິບັດການຊີ້ນຳຂອງລັດຖະບານ, ຂອງທ່ານນາຍົກລັດຖະມົນຕີ ກ່ຽວກັບການສັບຊ້ອນ ແລະ ຫັນວິສາຫະກິດເປັນຫຸ້ນສ່ວນ ໃຫ້ຂ້ຽວຂາດກວ່າ. ພວກຂ້າພະເຈົ້າຈະຕັດສິນໃຈສຳເລັດຫນ້າທີ່ຫັນບັນດາວິສາຫະກິດທີ່ຍັງເຫລືອເປັນຫຸ້ນສ່ວນໃນປີ 2014-2015. ອາດຈະເວົ້າໄດ້ວ່າ ສຳລັບບັນດາລັດວິສາຫະກິດສັງກັດກະຊວງຄົມມະນາຄົມຂົນສົ່ງ, ລັດບໍ່ຄວນຖືຫຸ້ນ ແນ່ນອນວ່າ ຈະບໍ່ຄົງຕົວລັດວິສາຫະກິດ ຫາກຫັນມາເຄື່ອນໄຫວຕາມຮູບແບບບໍລິສັດຫຸ້ນສ່ວນທັງໝົດ.”
ສຳລັບບັນດາມາດຕະການຢ່າງຄົບຊຸດ, ມາຮອດປະຈຸບັນ ມີຫລາຍຫົວຫນ່ວຍໄດ້ຕັ້ງຫນ້າຜັນຂະຫຍາຍວິວັດທະນາການຫັນເປັນຫຸ້ນສ່ວນຄື: ກະຊວງຄົມມະນາຄົມຂົນສົ່ງ, ກະຊວງກໍ່ສ້າງ, ກະຊວງອຸດສາຫະກຳ ແລະ ການຄ້າ, ກະຊວງກະສິກຳ ແລະ ພັດທະນາຊົນນະບົດ. ໃນໄຕມາດ 1/2014, ຄວາມຄືບຫນ້າໃນການຫັນເປັນຫຸ້ນສ່ວນໄດ້ຮັບການປັບປຸງດີພໍສົມຄວນ ຢູ່ ກຸ່ມບໍລິສັດ, ບໍລິສັດໃຫຍ່ ແລະ ລັດວິສາຫະກິດ 16 ແຫ່ງ ໂດຍນາຍົກລັດຖະມົນຕີ ເຊັນອະນຸມັດວິທີການ ຫັນເປັນຫຸ້ນສ່ວນ.
ເພື່ອປະຕິບັດຈຸດໝາຍຫັນວິສາຫະກິດ 400 ແຫ່ງ ຫັນເປັນຫຸ້ນສ່ວນ ໃນໄລຍະ 2 ປີ ຄືປີ 2014-2015, ຮຽກຮ້ອງໃຫ້ບັນດາກະຊວງຕ້ອງປະຕິບັດບັນດາມາດຕະການຢ່າງຂ້ຽວຂາດກວ່າ ເພື່ອຍູ້ແຮງວິວັດການ ຫັນເປັນຫຸ້ນສ່ວນ ຕາມວິວັດທະນາການ. ຄຽງຄູ່ກັນນັ້ນ ລັດຖະບານ ໄດ້ຊີ້ນຳໃຫ້ບັນດາກະຊວງ, ຂະແຫນງການ ເປັນເຈົ້າການແກ້ໄຂບັນດາຄວາມຫຍຸ້ງຍາກທີ່ຫາກໍເກີດຂຶ້ນ, ສ້າງເງື່ອນໄຂເພື່ອໃຫ້ວິວັດການ ຫັນເປັນຫຸ້ນສ່ວນກາຍເປັນຈຸດໝາຍທີ່ວາງອອກ, ຕອບສະຫນອງຄວາມຮຽກຮ້ອງຕ້ອງການເຊື່ອມໂຍງເຂົ້າກັບເສດຖະກິດສາກົນ.