(vovworld) - ຂະບວນວິວັດໄລຍະ10 ປີ ແຫ່ງການຊັບຊ້ອນປ່ຽນໃຫມ່ລັດວິສາຫະກິດຄືນໃຫມ່ (2001-2011) ໄດ້ປະກອບສ່ວນຊຸກຍູ້ບັນດາລັດວິສາຫະກິດພັດທະນາ, ມີວິສາຫະກິດຫລາຍແຫ່ງດຳເນີນທຸລະກິດຢ່າງມີປະສິດທິຜົນ ແລະ ມີການປະກອບສ່ວນຢ່າງຕັ້ງຫນ້າເຂົ້າໃນການພັດທະນາລວມຂອງພື້ນຖານເສດຖະກິດ. ໃນປີ 2012 ແລະ ຊຸມປີຕໍ່ໄປ, ເລື່ອງຍູ້ແຮງການຫັນລັດວິສາຫະກິດເປັນຫຸ້ນສ່ວນຍັງຄົງແມ່ນຫນ້າທີ່ຈຸດສຸມຂອງລັດຖະບານຫວຽດນາມ.
ວິສາຫະກິດແຫ່ງຫນຶ່ງຢູຫວຽດນາມ
ພາບປະກອບ:internet
|
ໃນໄລຍະ 10 ປີ ຜ່ານມາ, ນັບແຕ່ເມື່ອທົົ່ວປະເທດມີ ລັດວິສາຫະກິດ 5.655 ແຫ່ງເຄື່ອນໄຫວໃນບັນດາຂະແຫນງ, ຂົງເຂດເສດຖະກິດເກືອບທັງໝົດ, ມາຮອດປີ 2010 ຍັງເຫລືອພຽງເກືອບ 1.500 ວິສາຫະກິດ ແລະ ໝົດປີ 2011 ຍັງເຫລືອພຽງປະມານ 1.300 ລັດວິສາຫະກິດເຄື່ອນໄຫວຕົ້ນຕໍໃນຂົງເຂດຫລັກແຫລ່ງ ເພື່ອຮັບປະກັນການດຸນດ່ຽງເສດຖະກິດມະຫາພາກ, ປະໂຫຍດສ່ວນລວມ, ການປ້ອງກັນຊາດປ້ອງກັນຄວາມສະຫງົບ. ພິເສດ ໃນໄລຍະ 2003 - 2006, ວິວັດການຫັນເປັນຫຸ້ນສ່ວນໄດ້ດຳເນີນໄປຢ່າງແຂງແຮງທີ່ສຸດ, ປະກອບສ່ວນພໍສົມຄວນເຂົ້າໃນການຊຸກຍູ້ການພັດທະນາ, ການເຕີບໂຕລວມຂອງພື້ນຖານເສດຖະກິດ. ກະຊວງການເງິນຫວຽດນາມໃຫ້ຮູ້ວ່າ: ຜ່ານໄລຍະຫັນລັດວິສາຫະກິດເປັນຫຸ້ນສ່ວນນັ້ນໄດ້ລະດົມເງິນຈຳນວນກວ່າກວ່າ 47.000 ຕຶ້ດົ່ງ ຮັບໃຊ້ການເຄ່ືອນໄຫວຜະລິດດຳເນີນທຸລະກິດຂອງບັນດາວິສາຫະຫິດ. ເຖິງຢ່າງໃດກໍຕາມ, ໃນສາມປີມານີ້, ວິວັດການຫັນລັດວິສາຫະກິດເປັນຫຸ້ນສ່ວນມີທ່າອ່ຽງຊັກຊ້າລົງ ສາຍເຫດແມ່ນ ສ່ວນຫນຶ່ງຍ້ອນຜົນກະທົບຈາກວິກິດການເສດຖະກິດໂລກ, ດ້ານອື່ນບັນດາຄວາມຫຍຸ້ງຍາກພາຍໃນຍ້ອນວິທີການຄຸ້ມຄອງຍັງບໍ່ທັນເໝາະສົມກັບເງື່ອນໄຂພັດທະນາ, ການເຊື່ອມໂຍງເຂົ້າກັບເສດຖະກິດໂລກ. ໃນສະພາບການຄືແນວນັ້ນ, ແຜນນະໂຍບາຍສ້າງໂຄງປະກອບຄືນໃຫມ່, ຍູ້ແຮງວຽກງານຫັນເປັນຫຸ້ນສ່ວນຂອງລັດຖະບານບໍ່ພຽງແຕ່ເພື່ອປ່ຽນແປງບັນດາວິສາຫະກິດທີ່ພວມຖືກລົ້ມລະລາຍເທົ່ານັ້ນ ຫາກຍັງສືບຕໍ່ແກ້ໄຂຄວາມອ່ອນດ້ອຍ ເປັນຕົ້ນແມ່ນບັນດາລັດວິສາຫະກິດອີກດ້ວຍ. ດອກເຕີ Tran Dinh Thien ຫົວຫນ້າສະຖານບັນເສດຖະກິດສູນກາງຖືວ່າ:
“ຕ້ອງປ່ຽນແປງບົດບາດຫນ້າທີ່ຂອງພາກສ່ວນເສດຖະກິດນີ້ໃນພື້ນຖານເສດຖະກິດເວົ້າລວມ. ເມື່ອມີການປ່ຽນແປງແລ້ວ ຈຶ່ງກຳນົດທິດຢ່າງຖືກຕ້ອງໄດ້. ຍ້ອນວ່າ ໃນໄລຍະຜ່ານມາ ມີລັດວິສາຫະກິດຫລາຍແຫ່ງພັດທະນາເກີນຂອບເຂດ ຂອງຕົນ. ໄລຍະຈະມາເຖິງ ບັນດາວິສາຫະກິດພຽງແຕ່ປະຕິບັດພາລະບົດບາດໃນຂົງເຂດຂອງຕົນ, ກ້າວໄປເຖິງເລື່ອງລັດວິສາຫະກິດພຽງປະຕິບັດຫນ້າທີ່ມີລັກສະນະເສດຖະກິດການເມືອງ, ຮັບໃຊ້ການພັດທະນາ...”
ການຫັນເປັນຫຸ້ນສ່ວນນຳມາໃຫ້ວິສາຫະກິດຫລາຍແຫ່ງດຳເນີນທຸລະກິດ
ຢ່າງມີປະສິດທິຜົນ
ພາບ:internet
|
ເພື່ອປະຕິບັດຈຸດໝາຍນີ້, ນາຍົກລັດຖະມົນຕີຫວຽດນາມໄດ້ອອກຄຳສັ່ງສະເຫນີໃຫ້ບັນດາກະຊວງຈົ່ງຍູ້ແຮງການສ້າງໂຄງປະກອບລັດວິສາຫະກິດຄືນໃຫມ່, ຍູ້ແຮງວິວັດການຫັນເປັນຫຸ້ນສ່ວນ ດ້ວຍບັນດາຂໍ້ກຳນົດໃຫມ່ຂອງລັດຖະບານກ່ຽວກັບການຫັນລັດ ວິສາຫະກິດ ມີທຶນ 100% ຂອງລັດກາຍເປັນບໍລິສັດຫຸ້ນສ່ວນ(ມີຜົນສັກສິດປະຕິບັດນັບແຕ່ເດືອນ 9/2011ເປັນຕົ້ນໄປ). ນັ້ນແມ່ນການເປີດກ້ວາງວິທີການຂາຍຫຸ້ນ ໃຫ້ແກ່ບັນດານັກລົງທຶນຍຸດທະສາດ, ພິເສດແມ່ນເລື່ອງດຶງດູດບັນດານັກລົງທຶນຍຸດທະສາດມາຊື້ຫຸ້ນເພື່ອເຂົ້າຮ່ວມການສ້າງໂຄງປະກອບວິສາຫະກິດຄືນໃຫມ່. ໄລ່ມາຮອດຈຸດເວລານີ້ ມີ ລັດວິສາຫະກິດ, ກຸ່ມບໍລິສັດ, ບໍລິສັດໃຫຍ່ 7 ແຫ່ງ ໄດ້ຜັນຂະຫຍາຍບັນດາບາດກ້າວທຳອິດໃນກິດຈະການຊັບຊ້ອນ, ສ້າງໂຄງປະກອບການເຄື່ອນໄຫວຄືນໃຫມ່. ວັນທີ 22/2 ຜ່ານມາ, ກຸ່ມບໍລິສັດອຸດສາຫະກຳຖ່ານຫີນ ແຮ່ທາດຫວຽດນາມ (Vinacomin) ໄດ້ປຸກລະດົມການຜັນຂະຫຍາຍໂຄງການຫລຸດຜ່ອນລາຍຈ່າຍ, ສ້າງໂຄງປະກອບລັດວິສາຫະກິດຄືນໃຫມ່ໃນປີ 2012. ຕາມນັ້ນແລ້ວ, ກຸ່ມບໍລິສັດສືບຕໍ່ປະຕິບັດການຫັນບັນດາບໍລິສັດຈຳກັດຜູ້ດຽວຫລືວິສາຫະກິດຂຶ້ນກັບບໍລິສັດຈຳກັດຜູ້ດຽວເປັນຫຸ້ນສ່ວນ. ສຳລັບບັນດາບໍລິສັດຮ່ວມທຸລະກິດທີ່ມີເງິນລົງທຶນໄລຍະຍາວ ກຸ່ມບໍລິສັດພຽງຮັກສາການປະກອບເງິນລົງທຶນເຂົ້າບັນດາການເຄື່ອນໄຫວໃນຂົງເຂດທີ່ມີສ່ວນກ່ຽວຂ້ອງເຖິງຂະແຫນງອາຊີບຜະລິດດຳເນີນທຸລະກິດຕົ້ນຕໍ, ສ່ວນຍັງເຫລືອຈະຖອນທຶນອອກ. ກ່ອນຫນ້ານັ້ນ, ກຸ່ມບໍລິສັດໄຟຟ້າຫວຽດນາມ (EVN) ແລະ ກຸ່ມບໍລິສັດພັດທະນາເຮືອນຢູ່ ແລະ ຕົວເມືອງ (HUD) ກໍຜັນຂະຫຍາຍວິທີການຊັບຊ້ອນ, ສ້າງໂຄງປະກອບວິສາຫະກິດຄືນໃຫມ່. ຕາມນັ້ນແລ້ວ, EVN ກໍໃຫ້ຮູ້ວ່າ: ຈະສຸມໃສ່ເຂົ້າໃນບັນດາຂົງເຂດຕົ້ນຕໍ ນັ້ນແມ່ນການຜະລິດດຳເນີນທຸລະກິດພະລັງງານໄຟຟ້າ ແລະ ການລົງທຶນພັດທະນາຕາມການວາງແຜນກຳນົດພັດທະນາໄຟຟ້າແຫ່ງຊາດ, ສ່ວນບັນດາຂົງເຂດດຳເນີນທຸລະກິດນອກຂະແຫນງໃນໄລຍະກ່ອນນີ້ ຈະຖອນອອກທັງໝົດ. ໃນກາງເດືອນ 2/2012 ຜ່ານມາ, ບັນດາກຸ່ມບໍລິສັດຄື: BaoViet, ກຸ່ມບໍລິສັດຕຳແຜ່ນຕັດຫຍິບ ຫວຽດນາມ, ບໍລິສັດໃຫຍ່ການເດີນທະເລຫວຽດນາມ (Vinalines) ກໍໄດ້ເລີ່ມກິດຈະການສ້າງໂຄງປະກອບຄືນໃຫມ່, ປະຕິບັດບັນດາບາດກ້າວຫັນວິສາຫະກິດຂອງຕົນເປັນຫຸ້ນສ່ວນ. ຕາມທ່ານ ນາຍົກລັດຖະມົນຕີຫວຽດນາມ Nguyen Tan Dung ແລ້ວ, ເລື່ອງສ້າງໂຄງປະກອບລັດວິສາຫະກິດເປັນຫຸ້ນສ່ວນບໍ່ພຽງແຕ່ແມ່ນຫນ້າທີ່ຮີບດ່ວນ ເພື່ອນຳມາຊຶ່ງການປ່ຽນແປງຢ່າງຕັ້ງຫນ້າເທົ່ານັ້ນ ຫາກຍັງຊ່ວຍລັດວິສາຫະກິດມີບົດບາດພຽງພໍເພື່ອຊັກຈູງພື້ນຖານເສດຖະກິດໃນສະພາບການເຊື່ອມໂຍງເຂົ້າກັບສາກົນນັບມື້ນັບເລິກເຊິ່ງ ແລະ ກວ້າງຂວາງ. ທ່ານນາຍົກລັດຖະມົນຕີ Nguyen Tan Dung ຊີ້ແຈງວ່າ:
“ພວກເຮົາຕ້ອງສ້າງບັນດາກຸ່ມບໍລິສັດຢ່າງແຂງແຮງ ເພື່ອເຮັດຫນ້າທີ່ຊຶ່ງລັດມອບໝາຍໃຫ້, ພ້ອມກັນນັ້ນ ບັນດາກຸ່ມບໍລິສັດນີ້ ຕ້ອງປະຕິບັດຫນ້າທີ່ຫຍຸ້ງຍາກ ທັງຕ້ອງເຮັດສຳເລັດຫນ້າທີ່ໂດຍລັດມອບໃຫ້ກ່ຽວກັບການດຸນດຽງ, ຮັກສາເສດຖະກິດມະຫາພາກເປັນປົກກະຕິ, ເພ່ືອເປັນພື້ນຖານຊຸກຍູ້ການພັດທະນາ ແຕ່ຕ້ອງດຳເນີນທຸລະກິດຢ່າງມີປະສິດທິຜົນ.ໃນໄລຍະຈະມາເຖິງ ພວກເຮົາຕ້ອງສ້າງໂຄງປະກອບຄືນໃຫມ່, ສືບຕໍ່ຊັບຊ້ອນປ່ຽນໃຫມ່ວິສາຫະກິດຕາມຈິດໃຈດັ່ງກ່າວ.”
ອາດຈະເຫັນໄດ້ວ່າ, ເລື່ອງຊັບຊ້ອນ, ສ້າງວິສາຫະກິດຄືນໃຫມ່, ຍູ້ແຮງວິວັດການຫັນລັດວິສາຫະກິດເປັນຫຸ້ນສ່ວນໂດຍແມ່ນລັດຖະບານປະຕິບັດບໍ່ພຽງແຕ່ຊ່ວຍໃຫ້ບັນດາວິສາຫະກິດພັດທະນາຢ່າງຖືກທິດເທົ່ານັ້ນ ຫາກຍັງຕອບສະຫນອງຄຳຮຽກຮ້ອງຕ້ອງການສ້າງໂຄງປະກອບພື້ນຖານເສດຖະກິດຄືນໃຫມ່ໃນໄລຍະເຊື່ອມໂຍງເຂົ້າເສດຖະກິດສາກົນ ເພາະວ່າ ວິວັດການນີ້ແມ່ນຕິດພັນກັບຍຸດທະສາດສັງລວມມີລວງເລີກເພື່ອສ້າງທ່ວງທ່າພັດທະນາຢ່າງສູງກວ່າ ແລະ ໝັ້ນຄົງກວ່າ.
ໂຕຕວັນ