(vovworld)- ເຖິງວ່າ ຖືກຜົນສະທ້ອນຈາກວິກິດການເສດຖະກິດໂລກກໍຕາມ, ແຕ່ໃນຊຸມປີມໍ່ໆມານີ້, ການລົງທຶນໂດຍກົງຈາກຕ່າງປະເທດ (FDI) ເຂົ້າບັນດາແຂວງພາກເຫນືອຫວຽດນາມຫລາຍພໍສົມຄວນ, ໃນນັ້ນ ມີຫລາຍໂຄງການລົງທຶນເຂົ້າບັນດາເຂດອຸດສາຫະກຳ. ສິ່ງດັ່ງກ່າວສະແດງໃຫ້ເຫັນວ່າ: ບັນດານັກລົງທຶນຕ່າງປະເທດເຫັນໄດ້ກາລະໂອກາດທີ່ສະດວກຢູ່ບັນດາແຂວງທາງພາກເຫນືອເພື່ອລົງທຶນໃຫມ່ຫລືເປີດກວ້າງການລົງທຶນ.
ປີ 2012, ບັນດາແຂວງທາງພາກເຫນືອຫວຽດນາມ ໄດ້ດຶງດູດເງິນລົງທຶນໂດຍກົງຂອງຕ່າງປະເທດ (FDI) ປະມານ 6 ຕື້ USD ໃນຈຳນວນທຶນ FDI 13 ຕື້ USD ຂອງທັງປະເທດ. ໃນຈຳນວນ 10 ແຂວງນຳຫນ້າໃນການດຶງດູດທຶນ FDI, ມີ 6 ແຂວງທາງພາກເຫນືອ, ຊື່ງລວມມີ: ຮ່າໂນ້ຍ, ຫາຍຟ່ອງ, ບັກນີງ, ບັກຢາງ, ກວ໋າງນີງ ແລະ ຮືງອຽນ ດຶງດູດທຶນ FDI ກວ່າ 5 ຕື້ USD. ບາງແຂວງພູດອຍທາງພາກເຫນືອ ເຖິງວ່າຍັງປະສົບກັບຄວາມຫຍຸ້ງຍາກກໍຕາມ ແຕ່ກໍ່ມີການຫັນປ່ຽນເມື່ອດຶງດູດທຶນຈົດທະບຽນໃຫມ່ ແລະ ທຶນເພີ່ມເຕີມຕື່ມອີກເກືອບ 1 ຕື້ USD. ເປັນອັນກວ່າ ໃນປີ 2012, ບັນດາແຂວງທາງພາກເຫນືອລ້ວນແຕ່ດຶງດູດໂຄງການລົງທຶນຂອງຕ່າງປະເທດ ແລະ ທຶນ FDI ໃຫມ່. ເພື່ອບັນລຸໄດ້ໝາກຜົນດັ່ງກ່າວ, ໃນໄລຍະຜ່ານມາ, ລັດຖະບານຫວຽດນາມໄດ້ຊີ້ນຳໃຫ້ບັນດາກະຊວງ, ຂະແຫນງການ ແລະ ທ້ອງຖິ່ນປະຕິບັດວຽກງານວາງແຜນກຳນົດ, ສ້າງການພັດທະນາຕິດພັນກັບການກໍ່ສ້າງພື້ນຖານໂຄງລ່າງສັງຄົມເປັນຢ່າງດີ. ນອກຈາກສ້າງບັນດາເອກະສານນິຕິກຳເພີ່ມສິດເປັນເຈົ້າການສຳລັບບັນດາເຂດອຸດສາຫະກຳໃຫ້ສົມບູນແບບ, ລັດຍັງຍູ້ແຮງການຫນູນຊ່ວຍດ້ານທຶນຮອນເຂົ້າຂົງເຂດກໍ່ສ້າງພື້ນຖານໂຄງລ່າງ, ສ້າງເງື່ອນໄຂເພື່ອດຶງດູດການລົງທຶນເຂົ້າບັນດາເຂດອຸດສາຫະກຳອີກດ້ວຍ. ທ່ານ ບູ່ຍກວາງວີງ, ລັດຖະມົນຕີແຜນການ ແລະ ການລົງທຶນ ຫວຽດນາມໃຫ້ຮູ້ວ່າ:
“ລັດ ຫນູນຊ່ວຍສ່ວນໃດສ່ວນຫນຶ່ງເທົ່ານັ້ນ, ບັນດານັກຄຸ້ມຄອງ ແລະ ດຳເນີນທຸລະກິດຢູ່ບັນດາເຂດອຸດສາຫະກຳຕ້ອງມີຄວາມຂະຫຍັນຂັນເຄື່ອນກວ່າໃນການແກ້ໄຂບັນດາແຫລ່ງທຶນອື່ນ ນອກຈາກທຶນຂອງລັດເພື່ອລົງທຶນ, ຈາກນັ້ນສ້າງບາດກ້າວບຸກທະລຸໃນການດຶງດູດການລົງທຶນ.”
ບໍລິສັດ Kyocera ຂອງຍີ່ປຸ່ນ ຢູ່ເຂດອຸດສາຫະກຳ VSIP ຫາຍຟ່ອງ
ພາບ: HPO
|
ການຫັນປ່ຽນຢ່າງຈະແຈ້ງທີ່ສຸດພາຍຫລັງຜັນຂະຫຍາຍບັນດານະໂຍບາຍດຶງດູດການລົງທຶນເຂົ້າບັນດາເຂດອຸດສາຫະກຳໃນໄລຍະຜ່ານມາ, ນັ້ນແມ່ນ ມີຫລາຍໂຄງການໃຫຍ່ໄດ້ຮັບການຜັນຂະຫຍາຍຢ່າງວ່ອງໄວ. ພົ້ນເດັ່ນແມ່ນໂຮງງານ Kyocera ຢູ່ເຂດອຸດສາຫະກຳ VSIP ຫາຍຟ່ອງ. ພາຍຫລັງໄດ້ຮັບຫນັງສືອະນຸຍາດລົງທຶນ ແລະ ນຳເຂົ້າເຄື່ອນໄຫວກວ່າ 1 ປີ, ໂຮງງານໄດ້ຜະລິດເຄື່ອງພິມຫລາຍເຄື່ອງທີ່ມີຍີ່ຫໍ້ Kyovera Made in Viet Nam ທຳອິດ. ນອກນັ້ນການຫັນປ່ຽນອີກອັນຫນຶ່ງທີ່ເປັນຫນ້າສົນໃຈນັ້ນແມ່ນ ໂຄງການລົງທຶນເຂົ້າເຂດອຸດສາຫະກຳຢູ່ພາກເຫນືອສ່ວນຫລາຍແມ່ນບັນດາໂຄງການນຳໃຊ້ເຕັກໂລໂລຊີປອດໄພ, ເຕັກໂນໂລຊີສູງ ແລະ ບໍ່ກໍ່ມົນລະພິດຕໍ່ສິ່ງແວດລ້ອມ ຕົວຢ່າງຄື: ໂຄງການ Nipro Pharma ເຂົ້າເຂດອຸດສາຫະກຳ VSIP ຫາຍຟ່ອງ ຜະລິດຢຸກຢາ ແລະ ອຸປະກອນການແພດດ້ວຍເຕັກໂນໂລຊີໃຫມ່ສຸດ ແລະ ທັນສະໄຫມທີ່ສຸດຂອງຍີ່ປຸ່ນ ຫລືໂຄງການຂອງກຸ່ມບໍລິສັດຊັ້ນນຳຂອງໂລກ Bridgestone ຜະລິດຢາງລົດໂອໂຕຢູ່ເຂດອຸດສາຫະກຳ ດີງຫວູ ນະຄອນຫາຍຟ່ອງ. ຕາມທ່າອ່ຽງນີ້, ແຂວງກວ໋າງນີງ ຊື່ງແມ່ນແຂວງທີ່ມີທີ່ຕັ້ງສຳຄັນໃນເຂດສາມຫລ່ຽມພັດທະນາເສດຖະກິດທາງພາກເຫນືອຫວຽດນາມ ກໍມານະພະຍາຍາມຊອກຫາ, ດຶງດູດການລົງທຶນຕ່າງປະເທດນຳໃຊ້ເຕັກໂນໂລຊີສູງ, ບໍ່ກໍ່ມົນລະພິດເຖິງສິ່ງແວດລ້ອມ, ພິເສດແມ່ນບັນດາວິສາຫະກິດຍີ່ປຸ່ນລົງທຶນເຂົ້າບັນດາເຂດອຸດສາຫະກຳຈຸດສຸມຄື: ເຂດອຸດສາຫະກຳ ຫວຽດຮືງ, ເຂດອຸດສາຫະກຳ ດົງມາຍ. ປີ 2013 ແຂວງກວ໋າງນີງສູ້ຊົນດຶງດູດ 7 ໂຄງການ FDI ດ້ວຍຍອດຈຳນວນທຶນຄາດວ່າ 500 ລ້ານ USD, ໃນນັ້ນ ມີ 2 ໂຄງການພວມຊຸກຍູ້ການປະຕິບັດນັ້ນແມ່ນ ໂຄງການລົງທຶນເປີດກວ້າງທ່າກຳປັ່ນທະເລ ຫາຍຫ່າ ດ້ວຍເງິນລົງທຶນ 150 ລ້ານ USD ແລະ ໂຮງງານຜະລິດດິນຫາຍາກດ້ວຍເງິນລົງທຶນ 35,5 ລ້ານ USD. ນອກນັ້ນ ແຂວງກວ໋າງນີງ ພວມກະກຽມຜັນຂະຫຍາຍບັນດາໂຄງການສຳຄັນອື່ນຄື: ໂຄງການເສັ້ນທາງຄວາມໄວສູງ ຫ້າລອງ-ມອງກາຍ, ໂຄງການເສັ້ນທາງສຳຮອງ ແລະ ຂົວບັກລວນ 2, ໂຄງການສະຫນາມບິນສາກົນ ເວີນດົນ… ເພື່ອດຶງດູດກະແສລົງທຶນໃຫມ່.
ມີການຫັນປ່ຽນອີກອັນຫນຶ່ງໃນການດຶງດູດທຶນ FDI ຂອງບັນດາເຂດອຸດສາຫະກຳທາງພາກເຫນືອ ນັ້ນແມ່ນ ມີວິສາຫະກິດຫລາຍແຫ່ງໄດ້ເອົາໃຈໃສ່ການເປັນເຈົ້າການໃນການສ້າງພື້ນຖານໂຄງລ່າງເປັນຢ່າງດີ, ຮັບປະກັນວຽກງານຫນູນຊ່ວຍວິສາຫະກິດມາລົງທຶນ ຕົວຢ່າງຄື: ເຂດອຸດສາຫະກຳ ນາມແຊກ(Nam Sách) ຂຶ້ນກັບແຂວງ ຫາຍເຢຶອງ. ເຖິງວ່າບໍ່ມີທ່າແຮງກ່ຽວກັບທາງທະເລຄືຫາຍຟ່ອງ ຫລື ກວ໋າງນີງ ກໍຕາມ, ແຕ່ເຂດອຸດສາຫະກຳ ນາມແຊກ ພັດມີທ່າໄດ້ປຽບຍ້ອນມາດຕະຖານການລົງທຶນກໍ່ສ້າງເຂດອຸດສາຫະກຳລະດັບສາກົນ. ເພາະສະນັ້ນ ເຂດອຸດສາຫະກຳນີ້ມີອັດຕາສ່ວນນຳໃຊ້ເນື້ອທີ່ດິນ 100% ດ້ວຍ 19 ໂຄງການພາຍໃນປະເທດ ແລະ ຕ່າງປະເທດ ດ້ວຍຍອດຈຳນວນເງິນລົງທຶນກວ່າ 230 ລ້ານ USD. ທ່ານ ຟ້າມວັນຮົ່ງ, ຜູ້ອຳນວຍການເຂດອຸດສາຫະກຳ ນາມແຊກ ຖືວ່າ:
“ໃນການວາງແຜນກຳນົດ ຕ້ອງຄິດໄລ່ຢ່າງຄົບຊຸດ, ຮອບດ້ານ, ບໍ່ພຽງແຕ່ພື້ນຖານດ້ານເຕັກນິກເທົ່ານັ້ນ ຫາກນັບທັງພື້ນຖານໂຄງລ່າງສັງຄົມ ແລະ ບັນຫາກ່ຽວກັບແຮງງານອີກດ້ວຍ, ເພາະວ່າ ເມື່ອບັນດານັກລົງທຶນເຂົ້າເຂດອຸດສາຫະກຳນີ້, ເຂົາເຈົ້າໄດ້ຄິດໄລ່ຊັ່ງຊາຢ່າງລະອຽດ ແລະ ພວກຂ້າພະເຈົ້າ ຫນູນຊ່ວຍເຂົາເຈົ້າຢ່າງທັນການ, ຈາກການສ້າງໂຄງການທຳອິດຕະຫລອດຮອດບັນຫາກະກຽມລະບຽບການດ້ານນິຕິກຳທີ່ກ່ຽວຂ້ອງ ແລະ ເມື່ອໂຄງການນຳເຂົ້າເຄື່ອນໄຫວ, ພວກຂ້າພະເຈົ້າຍັງຈັດພາກສ່ວນຫນຶ່ງໃຫ້ຄຳປຶກສາ, ແກ້ໄຂທຸກບັນຫາທີ່ກ່ຽວຂ້ອງເພື່ອໃຫ້ເຂົາເຈົ້າອຸ່ນອຽນໃຈໃນວິວັດການຜະລິດດຳເນີນທຸລະກິດ.”
ແຂວງກວ໋າງນີງ ພວມດຶງດູດທຶນ FDI ຈາກຕ່າງປະເທດ
ພາບ:internet
|
ຄວາມຈິງໃນໄລຍະຜ່ານມາໃຫ້ເຫັນວ່າ, ການດຶງດູດທຶນ FDI ເຂົ້າເຂດອຸດສາຫະກຳບໍ່ພຽງແຕ່ປະກອບສ່ວນເຂົ້າໃນການເຕີບໂຕເສດຖະກິດລວມເທົ່ານັ້ນ ຫາກຍັງຊ່ວຍຫວຽດນາມ ປັບປຸງແຫລ່ງຊັບພະຍາກອນມະນຸດທີ່ມີຄຸນນະພາບດີພໍສົມຄວນອີກດ້ວຍ. ບັນດາຜົນງານໃນການດຶງດູດການລົງທຶນຕ່າງປະເທດເຂົ້າໃນຂະແຫນງອຸດສາຫະກຳຈຳນວນຫນຶ່ງຢູ່ບັນດາແຂວງພາກເຫນືອ ແມ່ນຕົວຢ່າງທີ່ພົ້ນເດັ່ນ ໃນນະໂຍບາຍພັດທະນາບັນດາເຂດອຸດສາຫະກຳຫວຽດນາມ ແບບຍືນຍົງ, ຊຸກຍູ້ການພັດທະນາເສດຖະກິດສັງຄົມທ້ອງຖິ່ນ, ປະກອບສ່ວນນຳພື້ນຖານເສດຖະກິດຫວຽດນາມ ເຊື່ອມໂຍງເຂົ້າກັບສາກົນໃນທ່າອ່ຽງໂລກາພິວັດຢ່າງວ່ອງໄວ.