(vovworld)-ໃນສະພາບການດຶງດູດເງິນລົງທຶນໂດຍກົງຂອງຕ່າງປະເທດ(ຫລື FDI) ພວມປະສົບກັບຄວາມຫຍຸ້ງຍາກບໍ່ແມ່ນຫນ້ອຍຄືປະຈຸບັນ, ແຂວງ ດົງນາຍສືບຕໍ່ແມ່ນທ້ອງຖິ່ນພົ້ນເດັ່ນໃນຂົງເຂດນີ້. ໃນ 6 ເດືອນຕົ້ນປີ, ດົງນາຍ ໄດ້ສຳເລັດຄາດໝາຍດຶງດູດທຶນ FDI ຂອງທັງປີ ດ້ວຍ 826 ລ້ານ USD, ຖືກຈັດໃນກຸ່ມ 3 ທ້ອງຖິ່ນນຳຫນ້າທົ່ວປະເທດກ່ຽວກັບການດຶງດູດທຶນ FDI.
ແຂວງດົງນາຍແມ່ນທ້ອງຖິ່ນພົ້ນເດັນໃນການດຶງດູດທຶນ FDI
photo:baodautu.vn
|
ຢູ່ເຂດອຸດສາຫະກຳ ລອງດຶກ, ເມືອງ ລອງແທງ, ບໍລິສັດ PEGASUS-SHIMAMOTO AUTO PARTS VIETNAM ຈຳກັດ ພວມຜະລິດເຄື່ອງອາໄຫລ່ລົດໂອໂຕ. ແຕ່ລະເດືອນ, ບໍລິສັດນີ້ສົ່ງອອກ 1,75 ລ້ານຜະລິດຕະພັນໄປຍັງ ໄທ,ອິນໂດເນເຊຍ ແລະ ຍີ່ປຸ່ນ. ເພື່ອລົງທຶນຢູ່ທີນີ້, PEGASUS-SHIMAMOTO ເສຍເວລາພຽງ 10 ວັນ ເພື່ອເຮັດລະບຽບການຂໍຫນັງສືອະນຸຍາດການລົງທຶນ. ຫລັງຈາກນັ້ນ, ຄະນະຄຸ້ມຄອງບັນດາເຂດອຸດສາຫະກຳແຂວງ ແລະ ບັນດາຂະແຫນງການກ່ຽວຂ້ອງກໍໄດ້ສ້າງເງື່ອນໄຂສະດວກໃຫ້ແກ່ບໍລິສັດ ເພື່ອນຳໂຄງການເຂົ້າເຄື່ອນໄຫວໂດຍໄວໃນຊຸມເດືອນຕົ້ນປີ. ທ່ານ Masamichi Mina, ຜູ້ອຳນວຍການໃຫຍ່ບໍລິສັດ PEGASUS-SHIMAMOTO AUTO PARTS VIETNAM ຈຳກັດ ໃຫ້ຮູ້ວ່າ:
“ຄະນະຄຸ້ມຄອງເຂດອຸດສາຫະກຳແຂວງ ດົງນາຍ ໄດ້ສ້າງເງື່ອນໄຂສະດວກໃຫ້ແກ່ພວກຂ້າພະເຈົ້າໃນການເຮັດລະບຽບການຂໍຫນັງສືອະນຸຍາດລົງທຶນ. ວິສາຫະກິດພວກຂ້າພະເຈົ້າໄດ້ເລືອກເຟັ້ນແຂວງດົງນາຍເພື່ອລົງທຶນ ເພາະວ່າ ສະພາບແວດລ້ອມແຫ່ງການລົງທຶນຢູ່ທີ່ນີ້ສະດວກພໍສົມຄວນ, ໄລຍະຈະມາເຖິງ ຢູ່ທີ່ນີ້ ຈະມີສະຫນາມບິນ, ພື້ນຖານໂຄງລ່າງ, ບຳບັດນຳ້ເສຍ ແລະ ສິ່ງແວດລ້ອມຢູ່ບັນດາເຂດອຸດສາຫະກຳ ດີພໍສົມຄວນ.”
ໂຄງການຂອງບໍລິສັດ PEGASUS-SHIMAMOTO AUTO PARTS VIETNAM ຈຳກັດ ແມ່ນຫນຶ່ງໃນຈຳນວນ 37 ໂຄງການໃຫມ່ໄດ້ຮັບຫນັງສືອະນຸຍາດລົງທຶນຢູ່ແຂວງ ດົງນາຍໃນ 6 ເດືອນຕົ້ນປີນີ້. ບັນດາໂຄງການໃຫມ່ໄດ້ຮັບຫນັງສືອະນຸຍາດໃນ 6 ເດືອນຜ່ານມາຢູ່ແຂວງ ດົງນາຍສ່ວນຫລາຍແມ່ນ: ຂອງຍີ່ປຸ່ນ, ສເກົາຫລີ ແລະ ໄຕ້ຫວັນ(ປະເທດຈີນ), ເຊິ່ງຂຶ້ນກັບບັນດາຂະແຫນງເຕັກໂນໂລຊີສູງ ແລະ ອຸດສາຫະກຳຫນູນຊ່ວຍ. ເພື່ອດຶງດູດບັນດາໂຄງການລົງທຶນຕ່າງປະເທດ, ໃນໄລຍະຜ່ານມາ, ແຂວງ ດົງນາຍ ເພີ່ມທະວີການປະຕິຮູບລະບຽບການບໍລິຫານ, ຈາກການອອກຫນັງສືອະນຸຍາດການລົງທຶນຕະຫລອດຮອດລະບຽບການພາສີອາກອນ.. ຍ້ອນເຫດນັ້ນ ເວລາອອກຫນັງສືອະນຸຍາດໃຫ້ບັນດາໂຄງການ FDI ລົງທຶນເຂົ້າບັນດາເຂດອຸດສາຫະກຳຂອງແຂວງນີ້ ປະຈຸບັນ ເສຍເວລາພຽງ 9-25 ວັນ. ຄຽງຄູ່ການສຸມໃສ່ປະຕິຮູບລະບຽບການບໍລິຫານ, ໃນໄລຍະຜ່ານມາ, ແຂວງດົງນາຍ ສືບຕໍ່ສ້າງພື້ນຖານໂຄງລ່າງຢູ່ບັນດາເຂດອຸດສາຫະກຳ ແລະ ລະບົບຄົມມະນາຄົມເຊື່ອມຕໍ່ແຂວງອື່ນໃຫ້ສຳເລັດຜົນ ເພື່ອສ້າງເງື່ອນໄຂສະດວກໃຫ້ແກ່ວິສາຫະກິດ. ທ່ານ ມາຍວັນເຍີນ, ຮອງຫົວຫນ້າຄະນະຄຸ້ມຄອງບັນດາເຂດອຸດສາຫະກຳແຂວງ ດົງນາຍ ໃຫ້ຮູ້ວ່າ:
“ພວກເຮົາຕ້ອງພິສູດໃຫ້ບັນດານັກລົງທຶນເຫັນໄດ້ວ່າ ເມື່ອລົງທຶນເຂົ້າທີ່ນີ້ ແຫລ່ງທຶນຂອງເຂົາເຈົ້າຈະເສີມຂະຫຍາຍຢ່າງມີປະສິດທິຜົນ. ເພື່ອເຮັດໄດ້ຄືແນວນັ້ນ ຕ້ອງມີຫລາຍມາດຕະການຢ່າງຄົບຊຸດ ຈາກການກໍ່ສ້າງພື້ນຖານໂຄງລ່າງ, ບັນດາບໍລິການ.. ເສັ້ນທາງຄົມມະນາຄົມຕ້ອງເຊື່ອມຕໍ່ລະຫວ່າງດົງນາຍກັບນະຄອນ ໂຮ່ຈິມີນ ແລະ ບັນດາແຂວງ ໃກ້ຄຽງ, ແຕ່ຕົ້ນປີມາຮອດປະຈຸບັນ ບັນດາເສັ້ນທາງໃຫມ່ຢູ່ແຂວງດົງນາຍ ກໍໄດ້ນຳເຂົ້າເຄື່ອນໄຫວ ແລະ ເຊື່ອມຕໍ່ກັບບັນດາເສັ້ນທາງອ່ືນນອກແຂວງຢ່າງລຽນຕິດ.”
ສິ່ງພົ້ນເດັ່ນຂອງແຂວງດົງນາຍ ນັ້ນແມ່ນການນຳ ແລະ ຂະແຫນງການກ່ຽວຂ້ອງຂອງແຂວງ ຍາມໃດກໍຮ່ວມກັບບັນດາວິສາຫະກິດ, ແກ້ໄຂຄວາມຫຍຸ້ງຍາກໃຫ້ແກ່ວິສາຫະກິດຢ່າງທັນການໃນຕະຫລອດວິວັດການຜະລິດ, ດຳເນີນທຸລະກິດ. ສິ່ງດັງກ່າວສະແດງໃຫ້ເຫັນຢ່າງຈະແຈ້ງຜ່ານເລື່ອງ ຕົ້ນເດືອນ 4/ປີ 2014, ເມື່ອກຳມະກອນຖືກພວກຄົນບໍ່ດີຍຸແຍ່ກໍ່ຂາດສະຖຽນລະພາບ, ຄວາມເປັນລະບຽບຮຽບຮ້ອຍ, ກໍ່ຄວາມເສຍຫາຍໃຫ້ແກ່ບັນດາວິສາຫະກິດ, ການນຳແຂວງ ໄດ້ເປັນເຈົ້າການພົບປະກັບບັນດາວິສາຫະກິດທີ່ຖືກເສຍຫາຍ ເພື່ອແກ້ໄຂຄວາມຫຍຸ້ງຍາກ. ສ່ວນບັນດາຂະແຫນງການກ່ຽວຂ້ອງກໍແນະນຳໃຫ້ວິສາຫະກິດເຮັດລະບຽບການຊົດເຊີຍຢ່າງວ່ອງໄວ, ຫລຸດຜ່ອນ, ຍົກເວັ້ນພາສີ ແລະ ຫນູນຊ່ວຍບັນດາວິສາຫະກິດເຮັດບັນດາລະບຽບການພາສີ. ຍ້ອນເຫດນັ້ນ ບັນດາວິສາຫະກິດດັ່ງກ່າວໄດ້ກັບຄືນສູ່ສະພາບການຜະລິດເປັນປົກກະຕິໂດຍໄວ. ທ່ານ ຢາງຈີໝີງ, ປະທານສະມາຄົມວິສາຫະກິດ ໄຕ້ຫວັນ ປະເທດຈີນ ຢູ່ ແຂວງດົ່ງນາຍ ໃຫ້ຮູ້ວ່າ:
“ພວກຂ້າພະເຈົ້າຮູ້ສຶກພຶງພໍໃຈຕໍ່ການແກ້ໄຂຢ່າງທັນການຂອງບັນດາຂະແຫນງການກ່ຽວຂ້ອງຂອງແຂວງ ດົງນາຍ, ຫນູນຊ່ວຍພວກຂ້າພະເຈົ້າແກ້ໄຂເຫດການທີ່ເກີດຂຶ້ນຜ່ານມາ ເພື່ອໃຫ້ວິສາຫະກິດກັບຄືນສູ່ການຜະລິດເປັນປົກກະຕິ ເປັນຕົ້ນແມ່ນເຮັດລະບຽບການພາສີອາກອນ.”
ດ້ວຍຄວາມໄວ້ເນື້ອເຊື່ອໃຈຂອງວິສາຫະກິດ, ມາຮອດປະຈຸບັນ, ດົງນາຍ ມີກວ່າ 1.430 ໂຄງການ FDI ດ້ວຍຍອດຈຳນວນເງິນລົງທຶນຂຶ້ນເຖິງ 25 ຕື້ USD. ບໍ່ພຽງແຕ່ດຶງດູດທຶນ FDI ນັບມື້ນັບຫລາຍເທົ່ານັ້ນ ຫາກມີວິສາຫະກິດຫລາຍແຫ່ງພວມເຄື່ອນໄຫວຢູ່ ດົງນາຍ ສືບຕໍ່ເປີດກວ້າງການຜະລິດ, ເພີ່ມແຫລ່ງທຶນຕື່ມອີກ. ສະເພາະ 6 ເດືອນຕົ້ນປີ, ຈຳນວນທຶນເປີດກວ້າງການຜະລິດຂອງບັນດາວິສາຫະກິດ FDI ຢູ່ບໍລິເວນແຂວງ ດົງນາຍ ສະເລ່ຍແມ່ນ 16 ລ້ານ USD/ໂຄງການ.
ເພ່ືອເພີ່ມທະວີການດຶງດູດແຫລ່ງທຶນເຂົ້າທ້ອງຖິ່ນ, ໄລຍະຈະມາເຖິງ, ດົງນາຍ ເພີ່ມທະວີວຽກງານຮັກສາຄວາມເປັນລະບຽບຮຽບຮ້ອຍ, ຮັບປະກັນຄວາມປອດໄພໃຫ້ແກ່ບັນດາວິສາຫະກິດຢູ່ບັນເຂດອຸດສາຫະກຳ, ສຸມໃສ່ບຳລຸງສ້າງ ແຫລ່ງຊັບພະຍາກອນມະນຸດ ຕອບສະຫນອງໃຫ້ແກ່ຂະແຫນງເຕັກໂນໂລຊີສູງ, ອຸດສາຫະກຳສຳຮອງ. ທ່ານ ເຈີນມີງຟຸກ, ຮອງປະທານຄະນະກຳມະການປະຊາຊົນແຂວງ ດົງນາຍ ໃຫ້ຮູ້ວ່າ:
“ບັນຫາທີ່ພວກຂ້າພະເຈົ້າເອົາໃຈໃສ່ຕົ້ນຕໍ ນັ້ນແມ່ນປະຕິຮູບລະບຽບການບໍລິຫານ, ໃນນັ້ນ ປັບປຸງສະພາບແວດລ້ອມແຫ່ງການລົງທຶນ, ປະຕິຮູບຕາມທິດປະຕູດຽວ. ບັນຫານີ້ ພວກຂ້າພະເຈົ້າໄດ້ເຮັດແລ້ວ ແລະ ປະຈຸບັນ ສືບຕໍ່ປະຕິບັດ, ເປັນຕົ້ນຢູ່ຂັ້ນເມືອງ.ພວກເຮົາປະຕິບັດຕາມທິດເປີດເຜີຍໂປ່ງໃສ, ເຮັດແນວໃດແກ້ໄຂລະບຽບການໃຫ້ວ່ອງໄວ. ພວກຂ້າພະເຈົ້າສືບຕໍ່ຈັດຕັ້ງການພົບປະສັງສັນ ເພື່ອແກ້ໄຂຄວາມຫຍຸ້ງຍາກໃຫ້ແກ່ບັນດາວິສາຫະກິດ.”
ຍາມໃດກໍຮ່ວມກັບວິສາຫະກິດ ດ້ວຍບັນດາວຽກງານທີ່ແທດຈິງ, ລະອຽດຄື: ຍູ້ແຮງການປະຕິຮູບລະບຽບການບໍລິຫານ, ປັບປຸງພື້ນຖານໂຄງລ່າງ, ແກ້ໄຂຄວາມຫຍຸ້ງຍາກໃຫ້ແກ່ວິສາຫະກິດຢ່າງທັນການ ນັ້ນແມ່ນພື້ນຖານເພື່ອໃຫ້ ດົງນາຍ ສືບຕໍ່ດຶງດູດນັກລົງທຶນຕ່າງປະເທດເຂົ້າມາລົງທຶນຢູ່ແຂວງນີ້ຕື່ມອີກ.