(vovworld) - ດາວທຽມໂທລະຄົມຫນ່ວຍທີ 2 ຂອງ ຫວຽດນາມ (Vinasat 2) ຫາກໍຖືກຍິງຂຶ້ນສູ່ວົງໂຄຈອນ ຈາກສູນຍິງ ດາວທຽມ Kouru (Guyana, ອາເມລິກາໃຕ້). ຮອດເດືອນ 7/2012, ພາຍຫລັງໄດ້ຮັບການ ຖ່າຍທອດເຕັກໂນໂລຊີ ຈາກ ອາເມລິກາ ຫວຽດນາມ ຈະນຳໃຊ້, ຂຸດຄົ້ນດາວທຽມ Vinasat 2 ຢ່າງເປັນທາງການ. ດ້ວຍປະລິມານຫລາຍກວ່າ ແລະ ສັນຍານປົກຄຸມຢ່າງກວ້າງຂວາງກວ່າ ດາວທຽມ Vinasat 1, ດາວທຽມ Vinasat 2 ຈະຮັບໃຊ້ການພັດທະນາເສດຖະກິດສັງຄົມຂອງປະເທດຊາດ ຢ່າງມີປະສິດທິຜົນ.
Vinasat 2 ຢູ່ສູນຍິງດາວທຽມ Kouru (Guyana, ອາເມລິກາໃຕ້)
ພາບ:internet
|
ໂຄງການ Vinasat 2 ໄດ້ຮັບການອະນຸມັດຈາກນາຍົກລັດຖະມົນຕີເມື່ອເດືອນ 12/2009 ແລະ ມອບໃຫ້ກຸ່ມບໍລິສັດໄປສະນີໂທລະຄົມ ຫວຽດນາມ ເປັນເຈົ້າຂອງການລົງທຶນ ດ້ວຍງົບປະມານແຕ່ 260 - 280 ລ້ານ USD. ດາວທຽມ Vinasat 2 ໂດຍແມ່ນກຸ່ມບໍລິສັດ Lockheed Martin ປະເທດ ອາເມລິກາ ຜະລິດ, ມີອາຍຸການໃຊ້ງານຕາມການອອກແບບແມ່ນ 15 ປີ ແລະ ສັນຍານປົກຄຸມທົ່ວພື້ນທີ່ ຫວຽດນາມ, ລາວ, ກຳປູເຈຍ, ໄທ ແລະ ພາກສ່ວນຫນຶ່ງຂອງປະເທດມ້ຽນມາ. ເລື່ອງ ຫວຽດນາມ ມີດາວທຽມຕ່າງຫາກ ບໍ່ພຽງແຕ່ຊ່ວຍໃຫ້ ຫວຽດນາມ ເປັນເຈົ້າການໃນຂົງເຂດຖະແຫລງຂ່າວໂທລະຄົມເທົ່ານັ້ນ ຫາກຍັງປະກອບສ່ວນໃນການປະຢັດງົບປະມານແຫ່ງລັດ ແລະ ບັນດາຫົວຫນ່ວຍດຳເນີນທຸລະກິດດ້ານໂທລະຄົມ, ເຕັກໂນໂລຊີຂໍ້ມູນຂ່າວສານພາຍໃນປະເທດໄດ້ຫລາຍພໍສົມຄວນ. ດາວທຽມ Vinasat 1 ແລະ Vinasat 2 ລ້ວນແຕ່ມີເຕັກໂນໂລຊີທັນສະໄຫມທີ່ສຸດໃນປະຈຸບັນ, ແຕ່ດາວທຽມ Vinasat 2 ມີປະລິມານບັນຈຸຫລາຍ ກວ່າ 20% ເມື່ອທຽບກັບ Vinasat 1 ແລະ ສັນຍານກໍຖືກປົກຄຸມກວ້າງກວ່າ Vinasat 1. ສະນັ້ນ Vinasat 2 ຈະນຳມາຊຶ່ງປະສິດທິຜົນທາງດ້ານເສດຖະກິດສັງຄົມຫລາຍກວ່າ Vinasat 1. ບົດບາດຂອງ Vinasat 2 ບໍ່ພຽງແຕ່ຮັບປະກັນຄວາມປອດໄພໃຫ້ແກ່ລະບົບຕິດຕໍ່ສື່ສານເທ່ົານັ້ນ ຫາກຍັງຕອບສະຫນອງຄວາມຕ້ອງການນຳໃຊ້ບັນດາການບໍລິການໂທລະຄົມ, ກະຈາຍສຽງ, ໂທລະພາບຜ່ານດາວທຽມອີກດ້ວຍ, ເປັນຕົ້ນໃນຍຸກເຕັກໂນໂລຊີຂໍ້ມູນຂ່າວສານພວມພັດທະນາຢ່າງແຂງແຮງຄືປະຈຸບັນ. ທີ່ການຕິດຕາມໂດຍກົງການຍິງດາວທຽມຂຶ້ນສູ່ວົງໂຄຈອນ, ທ່ານນາຍົກລັດຖະມົນຕີ ຫວຽດນາມ Nguyen Tan Dung ໄດ້ເນັ້ນຫນັກວ່າ:
“ພ້ອມກັບດາວທຽມ Vinasat 1, ດາວທຽມ Vinasat 2 ປະກອບສ່ວນສ້າງພື້ນຖານໂຄງລ່າງໃຫ້ສົມບູນແບບ, ຍົກສູງຄຸນນະພາບຂໍ້ມູນຂ່າວສານ ແລະ ໂທລະຄົມແຫ່ງຊາດ, ນຳສົ່ງຂໍ້ມູນຂ່າວສານໄປສູ່ທຸກເຂດຫ່າງໄກສອກຫລີກ, ເຂດຊາຍແດນ, ໝູ່ເກາະ, ຫນູນຊ່ວຍໃຫ້ແກ່ວຽກງານປ້ອງກັນ, ຕ້ານພາຍຸນ້ຳຖ້ວມ ແລະ ຫລຸດຜ່ອນໄພທຳມະຊາດຢ່າງມີປະສິດທິຜົນ. ເລື່ອງຍິງດາວທຽມ Vinasat 2 ສຳເລັດຜົນ ແມ່ນບາດກ້າວສຳຄັນໃນວິວັດການປະຕິບັດແຜນຮ່າງໂດຍໄວ ແລະ ເຮັດໃຫ້ ຫວຽດນາມ ກາຍເປັນປະເທດມີຄວາມເຂັ້ມແຂງທາງດ້ານເຕັກໂນໂລຊີຂໍ້ມູນຂ່າວສານ, ໂທລະຄົມ.”
ສ່ວນທ່ານ Phan Hoang Duc ຮອງຜູ້ອຳນວຍກຸ່ມບໍລິສັດໄປສະນີໂທລະຄົມ ຫວຽດນາມ ຢືນຢັນລັກສະນະຖືກຕ້ອງໃນການກຳນົດທິດພັດທະນາໄປສະນີໂທລະຄົມ ຫວຽດນາມ ຮອດປີ 2020. ທ່ານ Phan Hoang Duc ເວົ້າວ່າ:
“ໂຄງການດາວທຽມ Vinasat 2 ແມ່ນເພື່ອມຸ່ງໄປເຖິງຈຸດໝາຍຍຸດທະສາດແຫ່ງຊາດເພີ່ມທະວີກຳລັງຄວາມສາມາດພື້ນຖານໂຄງລ່າງໂທລະຄົມ, ຕອບສະຫນອງຄວາມຕ້ອງການນຳໃຊ້ດາວທຽມຂອງຕະຫລາດພາຍໃນປະເທດ. Vinasat 2 ປະກອບສ່ວນຢືນຢັນທີ່ຕັ້ງບົດບາດຂະແຫນງເຕັກໂນໂລຊີຂໍ້ມູນຂ່າວສານ ຫວຽດນາມນັບມື້ນັບແຂງແຮງ”.
ໂດຍແມ່ນປະເທດທີ່ມີຝັ່ງທະເລຍາວກວ່າ 3000 ກິໂລແມດ. ຂະແຫນງເສດຖະກິດ ທະເລ ນັບມື້ນັບຢືນຢັນວ່າແມ່ນຂະແຫນງເສດຖະກິດຍຸດທະສາດ, ປາຍແຫລມຂອງປະເທດຊາດ. ເລື່ອງຍິງດາວທຽມ Vinasat 2 ກໍແມ່ນນອນໃນຍຸດທະສາດພັດທະນາເສດຖະກິດທະເລ ຂອງຫວຽດນາມ ຮອດປີ 2020. ດາວທຽມ Vinasat 2 ຈະສະຫນອງບັນດາບໍລິການຂໍ້ມູນຂ່າວສານຢ່າງຊັດເຈນ, ວ່ອງໄວໃຫ້ແກ່ກຳປັ່ນ, ເຮືອຫາປາຢູ່ນອກຝັ່ງ, ຊ່ວຍກຳນົດທີ່ຕັ້ງ, ກູ້ໄພກຸູ້ຊີບຢ່າງຮີບດ່ວນໃນກໍລະນີກຳປັ່ນ, ເຮືອຫາປາປະສົບກັບໄພທຳມະຊາດ, ລົມພະຍຸຢູ່ກາງທະເລ ພ້ອມທັງຊ່ວຍສຳຫລວດ, ຂຸດຄົ້ນຊັບພະຍາກອນທຳມະຊາດນ້ຳມັນອາຍແກສຢູ່ທະເລ.
Vinasat 2 ພວມຖືກຍິງຂຶ້ນວົງໂຄຈອນ
ພາບ:internet
|
ທ່ານ Ho Cong Lam ຮອງຜູ້ອຳນວຍການບໍລິສັດໂທລະຄົມສາກົນ, ຊຶ່ງແມ່ນຫົວຫນ່ວຍທີ່ກຸ່ມບໍລິສັດໂທລະຄົມ ຫວຽດນາມ ມອບໝາຍຫນ້າທີ່ດຳເນີນທຸລະກິດບໍລິການ Vinasat 2 ໃຫ້ຮູ້ວ່າ: ໂຄງການ Vinasat 2 ບໍ່ພຽງແຕ່ມຸ່ງໄປເຖິງຕະຫລາດພາຍໃນປະເທດເທົ່ານັ້ນ ຫາກຍັງມຸ່ງໄປເຖິງຕະຫລາດຢູ່ພາກພື້ນ ອາຊີຕາເວັນອອກສຽງໃຕ້ ອີກດ້ວຍ, ກ່ອນອື່ນໝົດແມ່ນຕະຫລາດ ກຳປູເຈຍ ແລະລາວ.
“ກ່ອນອື່ນໝົດ Vinasat 2 ແມ່ນຮັບໃຊ້ໃຫ້ແກ່ປະເທດຊາດ, ຮັບໃຊ້ລູກຄ້າພາຍໃນປະເທດ. ພວກຂ້າພະເຈົ້າຈະເປີດກວ້າງບໍລິການໄປຍັງປະເທດເພື່ອນບ້ານໃກ້ຄຽງ ນັບທັງຮູບການຮ່ວມທຸລະກິດ ເຮັດແນວໃດເພີ່ມກຳລັງແກ້ງແຍ້ງ, ຮັບປະກັນການດຳເນີນທຸລະກິດຢ່າງມີປະສິດທິຜົນສູງສຸດ.”
ມີບໍລິສັດພາຍໃນ ແລະ ຕ່າງປະເທດ ຫລາຍແຫ່ງໄດ້ດຳເນີນການເຈລະຈາກັບກຸ່ມບໍລິສັດໄປສະນີໂທລະຄົມ ຫວຽດນາມ ກ່ຽວກັບຄວາມຕ້ອງການຊົມໃຊ້ບໍລິການຂອງ Vinasat 2. ດາວທຽມ Vinasat 2 ສືບຕໍ່ຫັນຄວາມໄຝ່ຝັນເປັນເຈົ້າຂອງ ດາວທຽມໂທລະຄົມຕ່າງຫາກຂອງ ຫວຽດນາມ ໃຫ້ປະກົດຜົນເປັນຈິງ, ຢືນຢັນອະທິປະໄຕແຫ່ງຊາດໃນອາວະກາດ. ດາວທຽມ Vinasat 2 ບໍ່ພຽງແຕ່ນຳມາຊຶ່ງປະສິດທິຜົນທາງດ້ານເສດຖະກິດ ສັງຄົມ ເທົ່ານັ້ນ ຫາກຍັງເພີ່ມທະວີການປ້ອງກັນຊາດ ປ້ອງກັນຄວາມສະຫງົບ ໃຫ້ແກ່ປະເທດຊາດອີກດ້ວຍ.
ນັກຂ່າວ Ngoc Anh