(vovworld)- ໃນຊຸມປີມໍ່ໆມານີ້, ເມື່ອມາຢ້ຽມຢາມນະຄອນໂຮ່ຈິມີນ, ນັກທ່ອງທ່ຽວຜູ້ໃດກໍເງີຍຫນ້າຊົມຕຶກອາຄານທີ່ມີຮູບຮ່າງຄ້າຍຄືດອກບົວຢູ່ໃຈກາງນະຄອນ. ໂດຍໄດ້ຮັບການກໍ່ສ້າງໃນຈຸດເວລາທີ່ພື້ນຖານເສດຖະກິດຫວຽດນາມພວມພັດທະນາ, ຕຶກອາຄານການເງິນ Bitexco (Bitexco Financial Tower - BFT) ໄດ້ຮັບການຕີລາຄາວ່າແມ່ນກິດຈະກຳແຫ່ງສັນຍາລັກຄວາມວັດທະນາຖາວອນຂອງນະຄອນທີ່ພວມປ່ຽນແປງໃຫມ່ ແລະ ຂະຫຍັນຂັນເຄື່ອນ.
Bitexco Financial Tower
ພາບ:internet
ຢູ່ໃຈກາງນະຄອນ ຫລືຈາກບໍລິເວນຊານນະຄອນ, ຖ້າຫາກຢືນຢູ່ທິດໃດພວກເຮົາກໍສາມາດເຫັນໄດ້ ຕຶກອາຄານ Bitexco ດ້ວຍຮູບຮ່າງເປັນດອກບົວທີ່ສວຍງາມ. ຕຶກອາຄານການເງິນ Bitexco ໂດຍບໍລິສັດຜະລິດດຳເນີນທຸລະກິດນຳເຂົ້າ ແລະ ສົ່ງອອກ ບີ່ງມີນຈຳກັດ (Bitexco) ເປັນເຈົ້າຂອງການລົງທຶນ, ຖືກຕັ້ງຢູ່ໃຈກາງເມືອງ 1 ນະຄອນໂຮ່ຈິມີນ. ນັກສະຖາປະນິກ Carlos Zapata ຊາວອາເມລິກາທີ່ລືຊື່ ເປັນຜູ້ອອກແບບ ໂດຍອີງຕາມຮູບດອກບົວ, ຊື່ງແມ່ນສັນຍາລັກຂອງວັດທະນະທຳທີ່ເປັນມູນເຊື້ອຂອງຫວຽດນາມ. ຈຸດພິເສດທີ່ສ້າງຄວາມປະທັບໃຈຂອງ ຕຶກອາຄານ Bitexco ນັ້ນແມ່ນບ່ອນລົງຈອດເຮືອບິນເຮີລີຄອບເຕີຢູ່ຊັ້ນ 52. ແລະ ຊັ້ນສູງສຸດຂອງຕຶກອາຄານຫລັງນີ້ໄດ້ຮັບການປະດັບປະດາດ້ວຍລະບົບດອກໄຟທີ່ສວຍງາມ. ຜູ້ມີແນວຄວາມຄິດ ແລະ ຕັດສິນໃຈປະຕິບັດໂຄງການດັ່ງກ່າວແມ່ນທ່ານ ຫວູກວາງໂຮ້ຍ, ປະທານກຸ່ມບໍລິສັດ Bitexco. ທ່ານຫວູກວາງໂຮ້ຍໄດ້ລົງທຶນເຂົ້າໂຄງການອະສັງຫາລິມະຊັບຢູ່ນະຄອນຫລວງ ຮ່າໂນ້ຍ ແລະ ນະຄອນໂຮ່ຈິມີນຫລາຍແຫ່ງ ປະສົບຜົນສຳເລັດ, ແຕ່ ຕຶກອາຄານການເງິນ Bitexco ແມ່ນກິດຈະກຳທີ່ທ່ານຫວູກວາງໂຮ້ຍ ສະຫງວນເວລາຫລາຍ ແລະ ສຸມຈິດສຸມໃຈທີ່ສຸດ. ທ່ານຫວູກວາງໂຮ້ຍ ໃຫ້ຮູ້ວ່າ: ກ່ອນນີ້ເມື່ອເວົ້າເຖິງຫວຽດນາມ, ຜູ້ຄົນທັງຫລາຍເຄີຍຄິດເຖິງສົງຄາມ ແລະ ຄວາມອຶດຫິວທຸກຍາກ. ສະນັ້ນ ທ່ານໂຮ້ຍຢາກປ່ຽນແປງທັດສະນະນີ້. ສຳລັບ ຕຶກອາຄານການເງິນ Bitexco, ທ່ານຢາກໃຫ້ ນະຄອນໂຮ່ຈິມີນມີກິດຈະກຳແຫ່ງຫນຶ່ງເປັນສັນຍາລັກທີ່ມີຄຸນນະພາບສຸູງ ແລະ ເຄື່ອງອຸປະກອນທັນສະໄຫມມີລະດັບສາກົນ, ສົມກັບສູນເສດຖະກິດໃຫຍ່ຂອງທົ່ວປະເທດ. ທ່ານຫວູກວາງໂຮ້ຍ ເວົ້າວ່າ:
“ສິ່ງທີ່ພວກຂ້າພະເຈົ້າສົນໃຈທີ່ສຸດ ແລະ ກໍແມ່ນຄວາມຫຍຸ້ງຍາກທີ່ສຸດ ນັ້ນແມ່ນປະຕິບັດໂຄງການທັງລົງທຶນດຳເນີນທຸລະກິດ ທັງມີຄວາມງາມຂອງສະຖາປັດຕະຍະກຳຄືດັ່ງກິດຈະກຳວັດທະນະທຳ. ສະນັ້ນ ການປະສານສົມທົບສອງຈຸດດັ່ງກ່າວແມ່ນຫຍຸ້ງຍາກຫລາຍ. ເພື່ອປະຕິບັດໂຄງການໃຫ້ສຳເລັດ, ພວກຂ້າພະເຈົ້າໄດ້ເຊີນຖັນແຖວນັກສະຖາປະນິກທີ່ມີຊື່ສຽງຢູ່ໃນໂລກມາ, ສ່ວນກຳລັງກໍ່ສ້າງແມ່ນມາຈາກ ສເກົາຫລີ. ຕຶກອາຄານການເງິນ Bitexco ຮັບປະກັນການເຄື່ອນໄຫວຢ່າງດີສຸດຄືບັນດາຕຶກອາຄານທັນສະໄຫມຢູ່ໃນໂລກ ເພື່ອຮັບໃຊ້ປະຊາຊົນກໍຄືນັກທ່ອງທ່ຽວມາຢ້ຽມຢາມນະຄອນໂຮ່ຈິມີນ.”
ຕຶກອາຄານ Bitexco ໃນຍາມກາງຄືນ
ພາບ:internet
ຕຶກອາຄານການເງິນ Bitexco ມີເນື້ອທີ່ກໍ່ສ້າງເກືອບ 6000 ຕາລາງແມັດ ດ້ວຍຍອດຈຳນວນເງິນລົງທຶນກວ່າ 270 ລ້ານ USD, ດ້ວຍຄວາມສູງ 262 ແມັດ, ລວມມີ 68 ຊັ້ນ.ໃນຊ່ວງເວລາເປີດສະຫລອງໂຄງການເມື່ອປີ 2010, ຕຶກອາຄານການເງິນ Bitexco ຖືກຈັດອັນດັບ 110 ໃນຈຳນວນບັນດາ ຕຶກອາຄານສູງສຸດຢູ່ໃນໂລກ ແລະ ກາຍເປັນຈຸດເດັ່ນທີ່ສຳຄັນ, ສະແດງພະລັງຊີວິດຢ່າງແຂງແຮງ ແລະ ຄວາມປະເອີບໃຈກ່ຽວກັບການເຕີບໂຕຂອງເສດຖະກິດນະຄອນໂຮ່ຈິມີນ. ເມື່ອເວົ້າເຖິງກິດຈະກຳພົ້ນເດັ່ນນີ້, ທ່ານ ເລຮ່ວາງກວນ, ປະທານຄະນະກຳມະການປະຊາຊົນນະຄອນໂຮ່ຈິມີນ ເນັ້ນຫນັກວ່າ:
“ພວກຂ້າພະເຈົ້າຕີລາຄາວ່າ: ນີ້ແມ່ນຫນຶ່ງໃນບັນດາກິດຈະກຳສະຖາປັດຕະຍະກຳພົ້ນເດັ່ນຂອງຫວຽດນາມ ແລະ ກໍແມ່ນຫນຶ່ງໃນບັນດາຕຶກອາຄານໄດ້ຮັບການອອກແບບທີ່ສວຍງາມຂອງໂລກ, ແມ່ນຄວາມເອກອ້າງທະນົງໃຈຂອງຊາວຫວຽດນາມ, ຂອງນະຄອນໂຮ່ຈິມີນ. ກິດຈະກຳດັ່ງກ່າວໂດຍນັກລົງທຶນແມ່ນເອກະຊົນດຳເນີນກໍ່ສ້າງໃນຈຸດເວລາທີ່ພື້ນຖານເສດຖະກິດປະສົບກັບຄວາມຫຍຸ້ງຍາກ. ສະນັ້ນ ອາດຈະເວົ້າໄດ້ວ່າ ຊາວຫວຽດນາມ ພວກເຮົາ ມີຄວາມເຊື່ອໝັ້ນຕົນເອງ, ມີເງື່ອນໄຂເພື່ອປະຕິບັດບັນດາກິດຈະກຳໃຫຍ່ຂອງປະເທດຊາດ, ໃນນັ້ນມີກິດຈະກຳຕ່າງໆເຊັ່ນດຽວກັນຕຶກອາຄານນີ້.”
ດ້ວຍເນື້ອທີ່ 37.700 ຕາລາງແມັດ ສະຫງວນໃຫ້ແກ່ບໍລິເວນສຳນັກງານທີ່ມີຄຸນນະພາບສູງ, 11.000 ຕາລາງແມັດສະຫງວນໃຫ້ແກ່ສູນການຄ້າ, ບໍລິການ ແລະ ການບັນເທິງ, ຕຶກອາຄານ Bitexco ແມ່ນສູນເສດຖະກິດ, ວັດທະນະທຳ ສົມທົບກັບການທ່ອງທ່ຽວທີ່ຈັບອົກຈັບໃຈ. ເມື່ອເຂົ້າຢ້ຽມຊົມຕຶກອາຄານນີ້, ລະບົບລີບທີ່ທັນສະໄຫມຢູ່ທີ່ນີ້ຈະນຳນັກທ່ອງທ່ຽວຂຶ້ນປ້ອມສັງເກດ Saigon SkyDeck ຢູ່ຊັ້ນ 49 ເພື່ອຊົມເບິ່ງທິວທັດນະຄອນໂຮ່ຈິມີນທັງກາງເວັນ ແລະ ກາງຄືນ. ອ້າຍໂດ໋ກວກເຫລ໋, ພາລະກອນຮັບໃຊ້ໃນຕຶກອາຄານໃຫ້ຮູ້ວ່າ:
“ນັບແຕ່ເມື່ອມີຕຶກອາຄານຫລັງນີ້ ຊາວຕ່າງປະເທດຮູ້ຈັກເຖິງນະຄອນໂຮ່ຈິມີນຫລາຍກວ່າ. ດ້ວຍຄວາມສູງຂອງຕຶກອາຄານພ້ອມກັບປ້ອມສັງເກດ, ສະນັ້ນແຫ່ງນີ້ຖືກແນະນຳໃນປື້ມຄູ່ມືທ່ອງທ່ຽວຂອງຫລາຍປະເທດໃນໂລກ, ຜ່ານນັ້ນ ເພື່ອນມິດສາກົນຈຶ່ງຮູ້ຈັກເຖິງນະຄອນໂຮ່ຈິມີນ ແລະ ຫວຽດນາມຫລາຍກວ່າ. ພິເສດເມື່ອມາຢ້ຽມຢາມຕຶກອາຄານຫລັງນີ້, ນັກທ່ອງທ່ຽວໄດ້ຊົມເບິ່ງທິວທັດທົ່ວນະຄອນໂຮ່ຈິມີນ ແລະ ເຂົ້າໃຈຕື່ມອີກກ່ຽວກັບວິວັດທະນາການກໍ່ສ້າງຕຶກອາຄານ. ກິດຈະກຳນີ້ແມ່ນສະແດງໃຫ້ເຫັນວ່າ: ຊາວຫວຽດນາມ ມີພູມປັນຍາຢ່າງພຽງພໍ, ມີກຳລັງຄວາມສາມາດເພື່ອກໍ່ສ້າງຕຶກອາຄານສົມກັບການພັດທະນາ, ທັດທຽມກັບເພື່ອນມິດສາກົນ.”
ໃນຊຸມມື້ຈັດງານບຸນຕ່າງໆ, ແສງໄຟ laser ໄດ້ສົ່ງສີສັນຫລາກຫລາຍທີ່ສວຍງາມ, ພົ້ນເດັ່ນແມ່ນຮູບພາບດອກບົວໄດ້ສ້າງຄວາມປະທັບໃຈໃຫ້ແກ່ນັກທ່ອງທ່ຽວຢ່າງແທ້ຈິງ. ບັນດາຮູບພາບເຫລົ່ານັ້ນເຮັດໃຫ້ນັກທ່ອງທ່ຽວແຕ່ລະຄົນບໍ່ອາດຫລົງລືມຈຸດເວລາທີ່ຫນ້າຈັບອົກຈັບໃຈເມື່ອມາຢ້ຽມຢາມຕຶກອາຄານ Bitexco, ແມ່ນສັນຍາລັກແຫ່ງການພັດທະນາຢ່າງແຂງແຮງຂອງນະຄອນໂຮ່ຈິມີນ ແລະ ຂອງປະເທດຫວຽດນາມໃນວິວັດທະນາການເຊື່ອມໂຍງເຂົ້າກັບສາກົນ.