ທ່ານ ຫວູວີງຟູ, ນັກຊ່ຽວຊານດ້ານການຄ້າ ຖືວ່າ: ເພື່ອກະຕຸກຊຸກຍູ້ຄວາມຕ້ອງການຂອງຕະຫລາດພາຍໃນ ຕ້ອງສ້າງແຜນກຳນົດພັດທະນາການຜະລິດ ແລະ ລະບົບແຈກຢາຍ, ຍູ້ແຮງການເຄື່ອນໄຫວສົມທົບການສະຫນອງ ແລະ ຄວາມຕ້ອງການ, ສ້າງການຮ່ວມສຳພັນລະຫວ່າງບັນດາວິສາຫະກິດ, ທ້ອງຖິ່ນຕ່າງໆ ເພື່ອຫນູນຊ່ວຍການຈຳຫນ່າຍຜະລິດຕະພັນ.

“ກ່ອນອື່ນ ຕ້ອງສ້າງຫລາຍລະບົບຈຳຫນ່າຍສິນຄ້າ, ແບ່ງຜົນປະໂຫຍດ, ຄຸ້ມຄອງຄຸນນະພາບ ແລະ ສ້າງຕັ້ງບັນດາລະບົບສະສົມສິນຄ້າທີ່ຈຳເປັນແບບຍຸດທະສາດ. ບັນຫາຫນຶ່ງອີກ ແມ່ນເພີ່ມທະວີການຄຸ້ມຄອງຄຸນນະພາບໃນລະບົບມູນຄ່າ, ກໍ່ສ້າງບັນດາສາງສະສົມແບບຍຸດທະສາດ ຫລຸດຜ່ອນລາຍຈ່າຍ logistic ການຂົນສົ່ງ”

ທ່ານນາງ ເຈີນທິເຟືອງລານ, ຜູ້ຮັກສາການ ຫົວຫນ້າພະແນກອຸດສາຫະກຳ ການຄ້າ ນະຄອນ ຮ່າໂນ້ຍ

ໃນສະພາບການປະຈຸບັນ, ການເຊື່ອມຕໍ່ລະບົບການຜະລິດ, ຈຳຫນ່າຍສິນຄ້າ, ການສະຫນອງຄວາມຕ້ອງການ, ການພົວພັນແລກປ່ຽນສິນຄ້າລະຫວ່າງບັນດາແຂວງ, ນະຄອນ ຄວນຍູ້ແຮງການຜັນຂະຫຍາຍ. ຄືຢູ່ ຮ່າໂນ້ຍ, ນະຄອນ ຈະຍູ້ແຮງບັນດາການເຄື່ອນໄຫວກະຕຸກຊຸກຍູ້ການບໍລິໂພກສິນຄ້າພາຍໃນປະເທດ, ເປີດກວ້າງຕະຫລາດພາຍໃນ ເພື່ອຊຸກຍູ້ການຜະລິດດຳເນີນທຸລະກິດ ແລະ ຟື້ນຕົວການເຕີບໂຕເສດຖະກິດໃນໄລຍະປົກກະຕິແບບໃຫມ່. ທ່ານນາງ ເຈີນທິເຟືອງລານ, ຜູ້ຮັກສາການ ຫົວຫນ້າພະແນກອຸດສາຫະກຳ ການຄ້າ ນະຄອນ ໃຫ້ຮູ້ວ່າ:

“ພວກຂ້າພະເຈົ້າ ພວມກະກຽມສ້າງແຜນການຮັບໃຊ້ບຸນປີໃຫມ່ປະຈຳຊາດໃນບໍລິເວນທົ່ວນະຄອນ ຮ່າໂນ້ຍ ແລະ ສອດຄ່ອງກັບສະພາບການຂອງໂລກລະບາດ, ສຸມໃສ່ຍູ້ແຮງບັນດາໂຄງການກະຕຸກຊຸກຍູ້ຄວາມຕ້ອງການ, ສົ່ງເສີມການຄ້າເພື່ອຊຸກຍູ້ຍອດການຂາຍສິນຄ້າ ແລະ ລາຍຮັບການບໍລິການ, ສືບຕໍ່ສົມທົບກັບກະຊວງອຸດສາຫະກຳ ການຄ້າ ເພື່ອຕິດຕາມການຜັນແປຂອງໂລກລະບາດ, ການຮັບມືຂອງບັນດາປະເທດອື່ນເພື່ອມີມາດຕະການເໝາະສົມຊອກຫາສົ້ນອອກໃຫ້ແກ່ການສົ່ງອອກສິນຄ້າ ແລະ ຍູ້ແຮງການຄ້າເອເລັກໂຕນິກ ຮັບໃຊ້ຄວາມຕ້ອງການຂອງປະຊາຊົນ”

ທ່ານນາງ ຫງວຽນທິມີງຮ່ວຽນ, ຮອງຫົວຫນ້າກົມການຄ້າເອເລັກໂຕນິກ ແລະ ເສດຖະກິດດີຈີຕອນ, ສັງກັດກະຊວງອຸດສາຫະກຳ ການຄ້າ ຖືວ່າ: ເລື່ອງຍູ້ແຮງການຈຳຫນ່າຍສິນຄ້າຢູ່ ຕະຫລາດພາຍໃນ ແມ່ນສິ່ງສຳຄັນທີ່ສຸດ, ພິເສດແມ່ນການຫນູນຊ່ວຍ, ນຳບັນດາວິສາຫະກິດ, ຄອບຄົວຊາວກະສິກອນເຂົ້າຮ່ວມບັນດາທຸລະກຳການຄ້າເອເລັກໂຕນິກ.

ທ່ານ ໂດ໋ທັງຫາຍ ຮອງລັດຖະມົນຕີກະຊວງອຸດສາຫະກຳ ການຄ້າ

ທ່ານຮອງລັດຖະມົນຕີກະຊວງອຸດສາຫະກຳການຄ້າ ໂດ໋ທັງຫາຍ ໃຫ້ຮູ້ວ່າ: ກະຊວງອຸດສາຫະກຳ ການຄ້າ ຈະຕິດຕາມການຜັນແປຂອງການສະຫນອງ ແລະ ຄວາມຕ້ອງການ, ລາຄາຂອງບັນດາປະເພດສິນຄ້າທີ່ຈຳເປັນເພື່ອໃຫ້ມີມາດຕະການບໍລິຫານຢ່າງທັນການ. ພ້ອມກັນນັ້ນ ກໍເພີ່ມທະວີບັນດາການເຄື່ອນໄຫວສົ່ງເສີມ, ເຊື່ອມຕໍ່ລະຫວ່າງ ບໍລິສັດຜະລິດ, ສະຫນອງສິນຄ້າກັບບໍລິສັດຈຳຫນ່າຍສິນຄ້າ, ອົງການຈັດຕັ້ງການສົ່ງເສີມການຄ້າພາຍໃນປະເທດຢູ່ບັນດາທ້ອງຖິ່ນ.

“ຄາດວ່າ ປີ 2021, ຍອດລະດັບການຂາຍຍ່ອນສິນຄ້າ ແລະ ລາຍຮັບການບໍລິການຈະເພີ່ມຂຶ້ນປະມານ 3-4% ເມື່ອທຽບໃສ່ປີ 2020. ນັບແຕ່ນີ້ຮອດທ້າຍປີ ຂະແຫນງອຸດສາຫະກຳການຄ້າ ສຸມໃສ່ແກ້ໄຂຄວາມຫຍຸ້ງຍາກໃຫ້ແກ່ການຜະລິດດຳເນີນທຸລະກິດ. ທີສອງ ຕິດຕາມການຜັນແປ, ການສະຫນອງຄວາມຕ້ອງການ, ລາຄາປະເພດສິນຄ້າທີ່ຈຳເປັນເພື່ອໃຫ້ມີມາດຕະການບໍລິຫານຢ່າງທັນການ, ຮັບປະກັນການຈຳຫນ່າຍສິນຄ້າຢ່າງເໝາະສົມລະຫວ່າງເຂດພາກ, ພິເສດ ຮັບປະກັນການສະຫນອງ ຄວາມຕ້ອງການ, ລາຄາສິນຄ້າໃຫ້ມີຄວາມເປັນປົກກະຕິ ແລະ ການຈໍລະຈອນສິນຄ້າຢ່າງລຸລ່ວງໃນທົ່ວປະເທດ”

ໃນສະພາບເກີດໂລກລະບາດໂຄວິດ -19 ຜັນແປໄປຢ່າງສັບສົນ ພ້ອມກັບການຍົກສູງຄຸນນະພາບສິນຄ້າ, ວິສາຫະກິດ ໄດ້ສ້າງຍຸດທະສາດເປັນລະບົບໃນການສ້າງເຄື່ອງໝາຍການຄ້າເພື່ອຮັກສາຕະຫລາດຢ່າງໝັ້ນຄົງ. ນີ້ກໍ່ແມ່ນໂອກາດເພື່ອໃຫ້ສິນຄ້າ ຫວຽດນາມ ຢັ້ງຢືນໄດ້ທີ່ຕັ້ງ, ສ້າງຄວາມໄວ້ເນື້ອເຊື່ອໃຈຂອງຜູ້ບໍລິໂພກພາຍໃນປະເທດ. ດ້ວຍພົນລະເມືອງເກືອບ 100 ລ້ານຄົນ, ໃນຈຸດເວລານີ້ ຈຳເປັນຕ້ອງຍູ້ແຮງການຂົນຂວາຍ “ຊາວຫວຽດນາມ ບຸລິມະສິດນຳໃຊ້ສິນຄ້າ ຫວຽດນາມ”, ສ້າງການຮ່ວມສຳພັນລະຫວ່າງ ວິສາຫະກິດ, ທ້ອງຖິ່ນຕ່າງໆເພື່ອຫນູນຊ່ວຍການຈຳຫນ່າຍຜະລິດຕະພັນ, ຂຸດຄົ້ນຕະຫລາດພາຍໃນຢ່າງມີປະສິດທິຜົນ, ຍາດແຍ່ງກາລະໂອກາດປົກກະຕິແບບໃຫມ່ ເພື່ອຊ່ວຍວິສາຫະກິດຟື້ນຕົວ ແລະ ພັດທະນາ.