ໃນສະພາບການຜັນແປລວມຂອງໂລກ, ພາຍຫຼັງເຫດການ Brexit, ຕະຫຼາດຫຼັກຊັບຫວຽດນາມ ກໍມີການເໜັງຕິງຢ່າງແຮງ, ເມື່ອຖືກເສຍເງິນເຖິງກວ່າ 1 ລ້ານ USD. ເຖິງຢ່າງໃດກໍ່ຕາມ, ພາຍຫຼັງຖືກຫຼຸດຄະແນນຢ່າງແຮງໃນວັນທີ 24/06, ຕະຫຼາດນັ້ນໄດ້ມີການຟຶ້ນຟູ. ທີ່ການປະຊຸມຂ່າວກ່ຽວກັບສະພາບການປະຕິບັດໜ້າທີ່ການເງິນ, ງົບປະມານ 6 ເດືອນຕົ້ນປີ 2016 ແລະ ຜັນຂະຫຍາຍໜ້າທີ່ 6 ເດືອນທ້າຍປີ 2016, ທີ່ຫາກໍດຳເນີນ, ກະຊວງການເງິນຫວຽດນາມ ກໍຢືນຢັນວ່າ: ເຫດການ Brexit ຍັງບໍ່ທັນສົ່ງຜົນສະທ້ອນຢ່າງໃຫຍ່ຫຼວງເຖິງຕະຫຼາດການເງິນຂອງຫວຽດນາມ. ທ່ານນາງ ຫງວຽນມາຍເຟືອງ, ຜູ້ອຳນວຍການວິຊາສະເພາະໄຈແຍກ VNDirect ແລ້ວ, ສຳລັບບັນດາວິສາຫະກິດປະກາດທຸລະກຳໃນຕະຫຼາດຫຼັກຊັບ, ການເຄື່ອນໄຫວຊອງວິສາຫະກິດພາຍໃນປະເທດເກືອບຄືວ່າບໍ່ຖືກຜົນສະທ້ອນ. ທ່ານເລດຶກແຄ໋ງ, ຜູ້ອຳນວຍການຍຸດທະສາດການລົງທຶນບໍລິສັດຫຼັກຊັບ Maritime, ໃຫ້ຂໍ້ສັງເກດວ່າ.
“ໃນຕະຫຼາດຫຼັກຊັບ, ຖ້າຫາກປຽບທຽບການຜັນແປຂອງຕະຫຼາດໃນ 6 ເດືອນຕົ້ນປີ, ຈຳນວນບັນຊີທຸລະກຳຂອງນັກລົງທຶນຕ່າງປະເທດໄດ້ເພີ່ມຂຶ້ນ. ຄວາມໄວ້ເນື້ອເຊື່ອໃຈຂອງທັງນັກລົງທຶນຕ່າງປະເທດ ແລະ ພາຍໃນປະເທດລ້ວນແຕ່ເພີ່ມຂຶ້ນ. ຕະຫຼາດໄດ້ກຽມພ້ອມໃຫ້ການເຕີບໂຕຢ່າງແຮງ, ບັນຫາພຽງແມ່ນເວລາເທົ່ານັ້ນ. ການກະທົບເຖິງຕະຫຼາດຫຼັກຊັບ ແມ່ນເລີ່ມຈາກນະໂຍບາຍ ແລະ ຈິດຕະຂອງນັກລົງທຶນ. ວາລະທຸລະກຳວັນທີ 24/06 ຖືກຫຼຸດຄະແນນແມ່ນຍ້ອນການກະທົບດ້ານຈິດຕະເປັນຕົ້ນ”.
ດ້ວຍແຫຼ່ງເງິນລົງທຶນໂດຍກົງຈາກ EU ແລະ ອັງກິດເຂົ້າຫວຽດນາມ, ມີນັກຊ່ຽວຊານຫຼາຍຄົນໃຫ້ຂໍ້ສັງເກດວ່າ, ເຫດການ Brexit ຍັງບໍ່ທັນສົ່ງຜົນສະທ້ອນເຖິງແຫຼ່ງທຶນດັ່ງກ່າວໃນທັນທີ, ຫຼື ຖ້າຫາກຖືກຜົນສະທ້ອນກໍ່ບໍ່ຮ້າຍແຮງປານໃດ. ຍ້ອນແຫຼ່ງເງິນລົງທຶນຈາກອັງກິດ ເຂົ້າຫວຽດນາມ ຍັງຢູ່ລະດັບຕ່ຳຢູ່. ໄລ່ຮອດປະຈຸບັນ, EU ລົງທຶນເຂົ້າຫວຽດນາມ ດ້ວຍຍອດຈຳນວນທຶນຈົດທະບຽນປະມານ 100 ຕື້ USD. ໃນນັ້ນຈຳນວນໂຄງການລົງທຶນຍັງມີຜົນສັກສິດຂອງລາຊະອານາຈັກ ເຂົ້າຫວຽດນາມ ແມ່ນ 266 ໂຄງການ, ດ້ວຍຈຳນວນທຶນປະມານ 3,5 ຕື້ USD. ຕາມທ່ານປະລິຍາເອກ ເກີ໋ນວັນຫຼືກ, ຜູ້ອຳນວຍການສູນບຳລຸງສ້າງທະນາຄານລົງທຶນ ແລະ ພັດທະນາຫວຽດນາມ, ສະມາຊິກສະພາທີ່ປຶກສາດ້ານການເງິນ, ເງິນຕາແຫ່ງຊາດ ແລ້ວ, ໃນສະພາບປະສົບກັບຄວາມຫຍຸ້ງຍາກ, ບັນດາແຫຼ່ງທຶນຈະຊອກຫາແຫ່ງລົງທຶນໃໝ່ ແລະ ຫວຽດນາມ ຈະແມ່ນສະຖານທີ່ທີ່ໜ້າເອົາໃຈໃສ່, ລົງທຶນ.
“ປະຈຸບັນ, ບັນດານັກລົງທຶນພວມຫັນແຫຼ່ງທຶນມາຍັງບັນດາແຫ່ງທີ່ປອດໄພກວ່າ. ໃນນັ້ນອາດມີຫວຽດນາມ ຖ້າຫາກນະໂຍບາຍມີຄວາມສະດວກກວ່າ, ພິເສດຖ້າຮູ້ໝູນໃຊ້ຜົນປະໂຫຍດຈາກການເຊື່ອມໂຍງ. ຈຳນວນທຶນຫັນປ່ຽນອອກຈາກຫວຽດນາມ ກັບເມື່ອລົງທຶນໂດຍທາງອ້ອມໃນຕະຫຼາດຫຼັກຊັບອາດຈະຖືກຜົນທະທ້ອນ, ແຕ່ໃນພື້ນຖານເສດຖະກິດຕົວຈິງ, ເງິນລົງທຶນໂດຍກົງບໍ່ຖືກຜົນສະທ້ອນຫຼາຍ”.
ມີນັກຊ່ຽວຊານດ້ານເສດຖະກິດສາກົນບາງຄົນຖືວ່າ, ພື້ນຖານເສດຖະກິດຫວຽດນາມ ບໍ່ຖືກຜົນສະທ້ອນຫຼາຍ ຈາກເລື່ອງອັງກິດ ອອກຈາກ EU, ຫາກສິ່ງນີ້ຈະເປີດກາລະໂອກາດຫຼາຍຢ່າງໃຫ້ຕະຫຼາດການເງິນ, ເງິນຕາ ກໍຄືການດຶງດູດເງິນລົງທຶນ. ຫວ່າງແລ້ວນີ້, ກະຊວງການເງິນຫວຽດນາມ ກໍຢືນຢັນວ່າ: Brexit ບໍ່ມີການກະທົບຢ່າງຫຍໍ້ທໍ້ເຖິງສະພາບໜີ້ສາທານະລະຂອງຫວຽດນາມ. ທ່ານ ວໍ້ຮິວຫຽນ, ຮອງຫົວໜ້າກົມຄຸ້ມຄອງໜີ້ ແລະ ການເງິນຕ່າງປະເທດ ໃຫ້ຮູ້ວ່າ, ເຫດການ Brexit ໄດ້ໃຫ້ເງິນປອນ ຖືກຫຼຸດລາຄາ 8% ແລະ ເງິນຢວນ ກໍ່ຖືກຕົກລາຄາ, ໃນຂະນະນັ້ນເງິນເຢນຂອງຍີ່ປຸ່ນ ພັດເພີ່ມລາຄາ. ໃນໂຄງປະກອບໜີ້ສາທາລະນະຂອງຫວຽດນາມ, ໜີ້ລັດຖະບານດ້ວຍເງິນດົ່ງຫວຽດນາມ ກວມເອົາ 55%, ເງິນຢວນກວມເອົາ 13%, ເງິນ USD ກວມເອົາ 16%. ໃນສະພາບການນີ້, ທະນາຄານແຫ່ງລັດ ໄດ້ມີການດັດປັບອັດຕາແລກປ່ຽນເງິນຕາໃຫ້ເໝາະສົມ. ທ່ານ ວໍ້ຮິວຫຽນ ໃຫ້ຮູ້ວ່າ.
“ເລື່ອງດັດປັບຢ່າງທັນການເຮັດໃຫ້ໜີ້ສາທາລະນະບໍ່ຖືກຜົນສະທ້ອນປານໃດ. ຕົວຢ່າງວ່າ, ເງິນປອນ 2%, ເມື່ອແລກເປັນເງິນດົງ ແມ່ນເພີ່ມລາຄາ. ເອີໂລ ຖືກຫຼຸດລາຄາ 2,4%, ຫວຽດນາມ ມີ 7% ໃນໂຄງປະກອບໜີ້, ເມື່ອແລກເປັນເງິນດົ່ງຂອງຫວຽດນາມ ແມ່ນເພີ່ມລາຄາ. ເງິນ USD ບໍ່ປ່ຽນແປງ. ສະເພາະເງິນເຢນ ພັດເພີ່ມລາຄາ, ເມື່ອແລກປ່ຽນເງິນຕາ, ມູນຄ່າໜີ້ດ້ວຍເງິນຢວນ ຖືກເພີ່ມລາຄາ ແຕ່ຄິດໄລ່ລວມແລ້ວແມ່ນບໍ່ຖືກກະທົບຫຼາຍປານໃດ”.
ພາຍຫຼັງທີອັງກິດ ອອກຈາກ EU, ລັດຖະບານຫວຽດນາມ ໄດ້ມີບັນດາການຕີລາຄາກ່ຽວກັບການກະທົບຂອງເຫດການນີ້ເຖິງຂົງເຂດການຄ້າ, ການລົງທຶນ, ຕະຫຼາດການເງິນພາຍໃນປະເທດ. ຕິດແທດກັບການຜັນແປຢູ່ຕະຫຼາດພາຍໃນປະເທດ ແລະ ສາກົນ, ບັນດານັກວາງນະໂຍບາຍຫວຽດນາມ ຈະມີບັນດາການດັດປັບຢ່າງທັນການ ເພື່ອແນໃສ່ຮັກສາເສດຖະກິດມະຫາພາກເປັນປົກກະຕິ, ສ້າງຄວາມສະດວກໃຫ້ດ້ານການຄ້າ ກໍຄືສືບຕໍ່ດຶງດູດແຫຼ່ງເງິນລົງທຶນຈາກອັງກິດ ແລະ EU ໃນໄລຍະຈະມາເຖິງ.