ເງິນຈຳນວນ 7,4 ຕຶ້ USD ແມ່ນແຫລ່ງທຶນຊຶ່ງບັນດານັກອຸປະຖຳໃຫ້ຄຳໝັ້ນໝາຍສະຫງວນໃຫ້ແກ່ຫວຽດນາມ ໃນປີ 2012 ຢູ່ທີ່ກອງປະຊຸມກຸ່ມບັນດານັກອຸປະຖຳໃຫ້ແກ່ຫວຽດນາມ ປີ 2011 ຊຶ່ງຫາກໍ່ດຳເນີນໄປຢູ່ ຮ່າໂນ້ຍ. ໃນສະພາບການເສດຖະກິດໂລກຕົກເຂົ້າສູ່ສະພາບວິກິດການຄືປະຈຸບັນ, ຈຳນວນທຶນອຸປະຖຳດັ່ງກ່າວ ແມ່ນສະແດງໃຫ້ເຫັນຄວາມໄວ້ເນື້ອເຊື່ອໃຈຂອງປະຊາຄົມໂລກ ແລະ ບັນດານັກອຸປະຖຳທີ່ມີຕໍ່ພື້ນຖານເສດຖະກິດ ຫວຽດນາມ. ເຖິງຢ່າງໃດກໍຕາມ, ບັນຫາທີ່ວາງອອກໃນປະຈຸບັນສຳລັບຫວຽດນາມ ນັ້ນແມ່ນຈະກຳນົດທິດ ແລະ ນຳໃຊ້ບັນດາແຫລ່ງທຶນຫນູນຊ່ວຍນີ້ເຂົ້າໃນບາງຂົງເຂດ, ບາງໂຄງການຍຸດທະສາດຄືແນວໃດໃຫ້ມີປະສິດທິຜົນ, ພ້ອມທັງມີບັນດາກົນໄກທີ່ສະດວກສະບາຍ, ມີໄຫວພິບ ເພື່ອປ່ອຍເງິນໃຫ້ແກ່ ແຫລ່ງທຶນຕ່າງໆຢ່າງວ່ອງໄວ ແລະປະຕິບັດບັນດາຈຸດໝາຍເສດຖະກິດໃນໄລຍະຈະມາເຖິງເປັນຢ່າງດີ, ຊ່ວຍພື້ນຖານເສດຖະກິດມີສະຖຽນລະພາບຢ່າງວ່ອງໄວ ແລະ ກ້າວໄປເຖິງການເຕີບໂຕໂດຍໄວ ແລະ ໝັ້ນທ່ຽງ.
ໃນສະພາບການປະຈຸບັນ, ຈຳນວນເງິນ 7,4 ຕຶ້ USD ຊຶ່ງແມ່ນແຫລ່ງທຶນໝັ້ນໝາຍອຸປະຖຳທີ່ກອງປະຊຸມບັນດານັກອຸປະຖຳ CG ໃນປີນີ້ ໄດ້ຮັບຖືວ່າ ແມ່ນເງື່ອນໄຂທີ່ດີເພື່ອຊ່ວຍໃຫ້ພື້ນຖານເສດຖະກິດຫວຽດນາມກ້າວເຂົ້າສູ່ປີ 2012, ຊຶ່ງແມ່ນປີໄດ້ຮັບຖືວ່າຈະຕ້ອງປະເຊີນຫນ້າກັບຄວາມຫຍຸ້ງຍາກສິ່ງທ້າທາຍຫລາຍຢ່າງ ດ້ວຍຄວາມເຊື່ອໝັ້ນ. ກະຊວງແຜນການ ແລະ ການລົງທຶນຫວຽດນາມ ໃຫ້ຮູ້ວ່າ: ຈຳນວນທຶນ 7,4 ຕຶ້ USDຈະສືບຕໍ່ສຸມໃສ່ເຂົ້າໃນບັນດາຂົງເຂດຈຸດສຸມຂອງພື້ນຖານເສດຖະກິດຫວຽດນາມ. ທີ 1 ແມ່ນການພັດທະນາພື້ນຖານໂຄງລ່າງຄົມມະນາຄົມ, ພື້ນຖານໂຄງລ່າງຕົວເມືອງ. ທີ 2 ແມ່ນສຸມໃສ່ພັດທະນາສາທາລະນະສຸກ ການສຶກສາ, ພິເສດ ແມ່ນສຸມໃສ່ເຂົ້າໃນການພັດທະນາການບຳລຸງສ້າງແຫລ່ງຊັບພະຍາກອນມະນຸດທີ່ມີຄຸນນະພາບສູງ. ທີ 3 ແມ່ນຊ່ວຍໃຫ້ ຫວຽດນາມ ຮັບມືກັບການປ່ຽນແປງຂອງດິນຟ້າ ອາກາດ ແລະ ສິ່ງແວດລ້ອມຢ່າງທັນການ. ທີ 4 ແມ່ນແກ້ໄຂບັນຫາລົບລ້າງຄວາມອຶດຫິວຫລຸດຜ່ອນຄວາມທຸກຍາກ, ຮັບປະກັນຊີວິດສັງຄົມ, ພິເສດແມ່ນແກ້ໄຂກົມບັນຫາກະສິກຳ, ຊົນນະບົດ ແລະ ຊາວກະສິກອນຢ່າງກົມກຽວ.
ໃນຂົງເຂດຄົມມະນາຄົມຂົນສົ່ງ, ທ່ານ ໂງທີ້ງດຶກ ລັດຖະມົນຕີຊ່ວຍວ່າການກະຊວງຄົມມະນາຄົມຂົນສົ່ງຫວຽດນາມໃຫ້ຮູ້ວ່າ: ຄຽງຄູ່ບາດກ້າວບຸກທະລຸຄື ໂຄງລ່າງສາຍທາງດ່ວນເໜືອ - ໃຕ້, ສາຍທາງດ່ວນ ຮ່າໂນ້ຍ - ລາວກາຍ, ຮ່າໂນ້ຍ - ຫາຍຟ່ອງ, ນະຄອນ ໂຮ່ຈີມີນ - ເກີນເທີ ແລ້ວ, ຄົມມະນາຄົມຫວຽດນາມ ຍັງຕ້ອງການໄດ້ຮັບການຫນູນຊ່ວຍຫຼາຍຢ່າງຈາກບັນດານັກອຸປະຖຳ*.
“ຄວາມຈິງແລ້ວຄົມມະນາຄົມຂອງຫວຽດນາມ ຍັງບໍ່ທັນເໝາະສົມເທື່ອ, ພ້ອມກັບເລື່ອງສືບຕໍ່ລົງທຶນກໍ່ສ້າງລະບົບທາງບົກນັ້ນ, ລະບົບທ່າກຳປັ່ນຢູ່ບັນດາເຂດໃຈກາງ, ບັນດານະຄອນໃຫຍ່ ຄື ຫາຍຟ່ອງ, ນະຄອນ ໂຮ່ຈິມີນ, ດາຫນັງ ຍັງຄົງແມ່ນບັນຫາຊຶ່ງບັນດານັກລົງທຶນຕ່າງປະເທດພວມຄິດໄລ່ຊັ່ງຊາ ເມື່ອລົງທຶນເຂົ້າຫວຽດນາມ. ແລະການເຊື່ອມຕໍ່ລະຫວ່າງລະບົບທ່າກຳປັ່ນກັບສາຍທາງຫຼວງ ແລະ ລະບົບທາງລົດໄຟກັບ ລະບົບ logicstic.“
ໃນຂົງເຂດກະສິກຳຊົນນະບົດ, ທ່ານ ຮ່ວາງວັນທັ໋ງ ລັດຖະມົນຕີຊ່ວຍວ່າການກະຊວງກະສິກຳ ແລະ ພັດທະນາຊົນນະບົດຫວຽດນາມ ຖືວ່າ ຫວຽດນາມຄວນມີການຫນູນຊ່ວຍ ເພື່ອສ້າງບັນດາກົນໄກນະໂຍບາຍລະດົມກຳລັງແຮງຂອງສັງຄົມເພື່ອລົງທຶນເຂົ້າໃນຂົງເຂດກະສິກຳຊົນນະບົດ.
“ຫວຽດນາມ ປາດຖະຫນາຢາກມີການຫນູນຊ່ວຍ ເພື່ອເຮັດແນວໃດວາງອອກບັນດາກົນໄກນະໂຍບາຍທ່ີສາມາດລະດົມແຫລ່ງກຳລັງຈາກສັງຄົມໄດ້ຫລາຍກວ່າໃຫ້ແກ່ຂົງເຂດກະສິກຳ ຊົນນະບົດ. ຮຽກຮ້ອງໃຫ້ບັນດາກຸ່ມບໍລິສັດທົ່ວໂລກສາມາດຍນຳພວກເຮົາເຂົ້າໃນລະບົບການປູກຝັງ, ການຜະລິດຂອງໂລກ ຫລື ພຽງແຕ່ລະດົມທົ່ວສັງຄົມ ແລະ ບັນດາແຫລ່ງກຳລັງແຮງຈາກສາກົນ ຈຶ່ງສາມາດກໍ່ສ້າງຊົນນະບົດໃຫມ່ໄດ້.
ຕາມການຄາດຄະເນຂອງກະຊວງແຜນການ ແລະ ການລົງທຶນຫວຽດນາມແລ້ວ, ເພື່ອປະຕິບັດຍຸດທະສາດພັດທະນາໄລຍະ 5 ປີ, 10 ປີ, ໃນໄລຍະຈະມາເຖິງ ຫວຽດນາມ ຕ້ອງການແຫລ່ງກຳລັງແຮງຫລາຍ. ທ່ານ ກາວຫວຽດຊິງ ລັດຖະມົນຕີຊ່ວຍວ່າການກະຊວງແຜນການ ແລະ ການລົງທຶນໃຫ້ຮູ້ວ່າ: ຄວາມຕ້ອງການດ້ານທຶນຮອນຂອງຫວຽດນາມໃນໄລຍະ 10 ປີ ຄືແຕ່ປີ 2011 - 2020 ແມ່ນເກືອບ 700 - 750 USD, ໃນນັ້ນແຕ່ປີ 2011 - 2015 ແມ່ນປະມານ 250 - 260 ຕຶ້ USD.
“ຖ້າຫາກອີງໃສ່ແຫລ່ງທຶນຂອງລັດ, ແຫລ່ງທຶນພາຍໃນປະເທດເທົ່ານັ້ນ ພວກເຮົາຈະບໍ່ປະສົບຜົນສຳເລັດໄດ້. ແຫລ່ງກຳລັງແຮງຈາກຕ່າງປະເທດແມ່ນມີຄວາມສຳຄັນໃນການປະຕິບັດແຜນການທີ່ໄດ້ວາງອອກໃນໄລຍະ 5 ປີ ແລະ 10 ປີ, ດັ່ງນັ້ນຮຽກຮ້ອງບັນດານັກອຸປະຖຳ ແລະ ທະນາຄານໂລກຫນູນຊ່ວຍຫວຽດນາມ ເຮັດແນວໃດໃຫ້ມີຄຳໝັ້ນສັນຍາອຸປະຖຳເງິນປະມານ 30 - 35 ຕຶ້ USD, ແລະສູ້ຊົນປ່ອຍເງິນເຫຼົ່ານັ້ນໃຫ້ໄດ້ 2/3 ໃນໄລຍະ 5 ປີຈະມາເຖິງ. ປະຈຸບັນ ມີຫລາຍປະເທດຄູ່ຮ່ວມມືພວມສ້າງຍຸດທະສາດຮ່ວມມືຫນູນຊ່ວຍຫວຽດນາມ ປະຕິບັດແຜນການ 5 ປີ, 10 ປີ ໃຫ້ສຳເລັດ. ຫວຽດນາມ ພວມວາງຍຸດທະສາດດຶງດູດທຶນ ODA ໃນໄລຍະ 5 ປີ 2011 -2015.“
ໃນໄລຍະຜ່ານມາ, ເລື່ອງນຳໃຊ້ທຶນຊ່ວຍເຫລືອຂອງຫວຽດນາມໄດ້ຮັບການຕີລາຄາວ່າແມ່ນມີປະສິດທິຜົນ. ຈຳນວນທຶນອຸປະຖຳ 7,4 ຕຶ້ USD ທີ່ໝັ້ນໝາຍໃນສະໄໝປະຊຸມ CG 2011 ນັ້ນ ແມ່ນສະແດງໃຫ້ເຫັນຄວາມໄວ້ເນື້ອເຊື່ອໃຈຂອງບັນດານັກອຸປະຖຳທີ່ມີຕໍ່ ຫວຽດນາມ. ແຕ່ເມື່ອຫວຽດນາມ ໄດ້ຫັນໄປສູ່ລະດັບພັດທະນາໃຫມ່, ຖ້າຫາກບໍ່ມີວິທີການນຳໃຊ້ບັນດາແຫລ່ງທຶນຢ່າງມີປະສິດທິຜົນກວ່າ ແລະ ປ່ອຍ ແຫລ່ງທຶນກູ້ຢືມຢ່າງວ່ອງໄວກວ່າ, ແມ່ນຍາກທີ່ຈະຮຽກຮ້ອງແຫລ່ງທຶນຫນູນຊ່ວຍຈາກບັນດານັກອຸປະຖຳໄດ້. ທ່ານ Tsuno Motonori ຫົວຫນ້າ ອົງການຕາງຫນ້າຮ່ວມມືສາກົນຍີ່ປຸ່ນ, ຊຶ່ງແມ່ນປະເທດນຳຫນ້າໃນການຫນູນຊ່ວຍທຶນ ODA ໃຫ້ແກ່ຫວຽດນາມໃຫ້ຮູ້ວ່າ: ປີ 2011 ຫວຽດນາມ ໄດ້ປ່ອຍເງິນ 900 ລ້ານເຢັນ ຊຶ່ງແມ່ນທຶນ ODA ຂອງຍີ່ປຸ່ນ. ສະນັ້ນ ໃນປີ 2012 ທຶນ ODA ຂອງຍີ່ປຸ່ນ ທີ່ສະຫງວນໃຫ້ແກ່ຫວຽດນາມ ຈະແມ່ນ 1,9 ຕຶ້ USD ແລະ ອາດຈະເພີ່ມຂຶ້ນອີກ. ທ່ານ Tsuno Motonori ເວົ້າວ່າ:
“ພາຍຫລັງແຜ່ນດິນໄຫວ, ຄຶ້ນຟອງຍັກເກີດຂຶ້ນ, ວຽກງານສ້າງສາປະເທດຊາດຄືນໃຫມ່ຂອງຍີ່ປຸ່ນແມ່ນປະສົບກັບຄວາມຫຍຸ້ງຍາກຫລາຍຢ່າງ. ເຖິງຢ່າງໃດກໍຕາມ ຫວຽດນາມ ແມ່ນຄູ່ຮ່ວມມືສຳຄັນຂອງຍີ່ປຸ່ນ, ສະນັ້ນ ລັດຖະບານຍີ່ປຸ່ນ ກຳນົດວ່າ ຈະສືບຕໍ່ຫນູນຊ່ວຍຫວຽດນາມ. ສິ່ງດັ່ງກ່າວແມ່ນສອດຄ່ອງກັບກຳນົດທິດພົວພັນຄູ່ຮ່ວມມືຍຸດທະສາດ ຊຶ່ງລັດຖະບານສອງປະເທດໄດ້ຮັບຮູ້. ປີກາຍນີ້ ຫວຽດນາມ ແມ່ນປະເທດທີ່ມີລາຍຮັບສະເລ່ຍໃສ່ຫົວຄົນໃນລະດັບປານກາງ. ເຖິງຢ່າງໃດກໍຕາມ ນີ້ພຽງແຕ່ແມ່ນບາດກ້າວທຳອິດ. ໃນໄລຍະຈະມາເຖິງ ພ້ອມກັບການຫັນເປັນການຄ້າເສລີໃນພາກພື້ນ, ເພື່ອຫວຽດນາມ ມີຄວາມແກ້ງແຍ້ງ, ທັດທຽມກັບປະເທດຈຳນວນຫນຶ່ງໃນພາກພື້ນ ຍັງມີຫລາຍວຽກງານຈະຕ້ອງເຮັດ, ໃນນັ້ນ ມີເລື່ອງກໍ່ສ້າງລະບົບພື້ນຖານໂຄງລ່າງດ້ານເຕັກນິກ, ພິເສດ ແມ່ນພື້ນຖານໂຄງລ່າງຄົມມະນາຄົມເພື່ອດຶງດູດນັກລົງທຶນຕ່າງປະເທດເຂົ້າມາລົງທຶນ. ສະນັ້ນ ຍີ່ປຸ່ນ ຈະສືບຕໍ່ຫນູນຊ່ວຍຫວຽດນາມໃນໄລຍະຈະມາເຖິງ. ພິເສດ ເພື່ອໃຫ້ສອດຄອ່ງກັບຂອບຂະຫນາດໃຫ່ຍກວ່າຂອງພື້ນຖານເສດຖະກິດຫວຽດນາມ, ຍີ່ປຸ່ນ ພວມພ້ອມກັບລັດຖະບານຫວຽດນາມ ສ້າງສຳເລັດລະບອບ, ນະໂຍບາຍ, ຍູ້ແຮງຮູບການຮ່ວມມື ພາກລັດ ແລະ ເອກະຊົນ ໃນຂົງເຂດພັດທະນາພື້ນຖານໂຄງລ່າງ.“
ໃນຊຸມປີມໍ່ໆມານີ້ ການປ່ອຍທຶນ ODA ຂອງຫວຽດນາມ ຍາມໃດກໍໃນລະດັບສູງ, ປີ 2010 ປ່ອຍເງິນໄດ້ເກືອຍ 3 ຕຶ້ USD ແລະ ປີ 2011 ນີ້ ຄາດວ່າ ປ່ອຍເງິນໄດ້ເກືອຍ 3,65 ຕຶ້ USD. ເປັນອັນວ່າ ໄລ່ມາຮອດປີ 2011 ຈຳນວນທຶນ ODA ຊຶ່ງຫວຽດນາມ ປ່ອຍເງິນໄດ້ແມ່ນປະມານ 33,4 ຕຶ້ USD, ກວມ 61% ຍອດຈຳນວນທຶນ ODA ທີ່ໄດ້ລົງນາມ. ນີ້ແມ່ນຕົວເລກບໍ່ແມ່ນຫນ້ອຍ ແຕ່ເຖິງຢ່າງໃດກໍຕາມ, ໃນໄລຍະຈະມາເຖິງ ບັນດາກົນໄກນະໂຍບາຍເພື່ອປ່ອຍເງິນໃຫ້ໄດ້ນັ້ນແມ່ນ ຕ້ອງສືບຕໍ່ສ້າງໃຫ້ສົມບູນແບບ. ນີ້ແມ່ນບັນຫາເຊິ່ງ ບັນດານັກວາງແຜນນະໂຍບາຍ ຄວນເອົາໃຈໃສ່ໃນການສ້າງຍຸດທະສາດດຶງດູດທຶນ ODA ໄລຍະ 2011 - 2015./.
ຫວີງຟອງ