(vovworld)-ດ້ວຍແຜນນະໂຍບາຍແກ້ໄຂແຫລ່ງທຶນ, ຍູ້ແຮງການເຕີບໂຕດ້ານສິນເຊື່ອ, ສ້າງເງື່ອນໄຂສະດວກໃຫ້ບັນດາວິສາຫະກິດເປີດກວ້າງການຜະລິດ, ດຳເນີນທຸລະກິດ, ໃນໄຕມາດທີ 1 ປີນີ້, ຍອດເຫລືອຫນີ້ສິນເຊື່ອຂອງນະຄອນ ໂຮ່ຈິມີນ ບັນລຸກວ່າ 1 ລ້ານຕື້ດົງ, ເພີ່ມຂຶ້ນ 2,3% ເມື່ອທຽບໃສ່ທ້າຍປີ 2014 ແລະ ເພີ່ມຂຶ້ນ 14% ເມື່ອທຽບໃສ່ໄລຍະດຽວກັນຂອງປີກາຍ. ນີ້ແມ່ນສັນຍານຕັ້ງຫນ້າຂອງພື້ນຖານເສດຖະກິດ, ບົດຂຽນຂອງນັກຂ່າວ ເລ້ຮັ່ງ, ທີ່ມີຫົວຂໍ້ວ່າ: “ນະຄອນໂຮ່ຈິມີນ ຍູ້ແຮງ ການເຕີບໂຕດ້ານສິນເຊື່ອ”.
ພາບປະກອບ:Thitruongtaichinh.vn
|
ຕົ້ນປີນີ້ ບໍລິສັດ Container ເຕີນແທງ ຢູ່ເມືອງ ຖູດືກ ນະຄອນ ໂຮ່ຈິມີນ ໄດ້ຮັບສັນຍາການຄ້າຫລາຍສະບັບ. ບໍລິສັດຜະລິດຈົນສຸດຄວາມສາມາດ ແຕ່ບໍ່ຕອບສະຫນອງຄວາມຕ້ອງການໄດ້. ຜ່ານໂຄງການເຊື່ອມຕໍ່, ທະນາຄານ ແລະ ວິສາຫະກິດຂອງນະຄອນ, ບໍລິສັດກູ້ຢືມທຶນໄດ້ 50 ຕື້ດົງ ດ້ວຍອັດຕາດອກເບ້ຍ 6,9%/ປີ ຈາກທະນາຄານ Vietinbank ສາຂາຖູດືກ. ຈາກແຫລ່ງທຶນດັ່ງກ່າວ, ບໍລິສັດລົງທຶນເປີດກວ້າງໂຮງຈັກ, ໂຮງງານ ເພີ່ມສະມັດຕະພາບ ແລະ ປ່ຽນໃຫມ່ເຕັກໂນໂລຊີ. ຍ້ອນເຫດນັ້ນ, ປະຈຸບັນ ແຕ່ລະເດືອນ ບໍລິສັດສົ່ງສິນຄ້າໄປຂາຍໄດ້ປະມານ 200 container ດ້ວຍລາຍຮັບ 60 ຕື້ດົງ, ເພີ່ມຂຶ້ນ 50% ເມື່ອທຽບໃສ່ປີກ່ອນ. ທ່ານນາງ ເຈີນຢ້ຽວແກ໋ງ, ຜູ້ອຳນວຍການໃຫຍ່ບໍລິສັດ Container ເຕີນແທງ ໃຫ້ຮູ້ວ່າ:
“ຍ້ອນມີແຫລ່ງທຶນບຸລິມະສິດນີ້, ພວກຂ້າພະເຈົ້າຈື່ງເປີດກວ້າງການຜະລິດ ຕອບສະຫນອງຄວາມຕ້ອງການຂອງລູກຄ້າ. ການເຮັດລະບຽບການກູ້ຢືມທຶນໃນປະຈຸບັນແມ່ນງ່າຍດາຍ. ກ່ອນນີ້ ຖ້າຢາກກູ້ຢືມທຶນຕ້ອງມີຊັບສິນຈຳນຳ ແລະ ຕ້ອງຜ່ານການກວດກາຢ່າງສັບສົນ ແຕ່ມາຮອດປະຈຸບັນ ດ້ວຍອິດທິພົນຊື່ສຽງຂອງຕົນ ການກູ້ຢືມທຶນຂອງບໍລິສັດກໍ່ສະດວກສະບາຍກວ່າ.”
ບໍລິສັດ Container ເຕີນແທງ ພຽງແຕ່ແມ່ນຫນຶ່ງໃນຈຳນວນວິສາຫະກິດນັບຮ້ອຍແຫ່ງ ທີ່ໄດ້ກູ້ຢືມທຶນບຸລິມະສິດຂອງໂຄງການເຊື່ອມຕໍ່ທະນາຄານ ແລະ ວິສາຫະກິດນະຄອນໂຮ່ຈິມີນ ນັບແຕ່ຕົ້ນປີມາຮອດປະຈຸບັນ. ຍອດຈຳນວນສິນເຊື່ອທີ່ທະນາຄານໃຫ້ກູ້ຢືມແມ່ນກວ່າ 17.000 ຕື້ດົງ, ດ້ວຍອັດຕາດອກເບ້ຍ 6,5-6,9%. ບັນດາທະນາຄານການຄ້າຂອງນະຄອນ ກໍໃຫ້ຄຳໝັ້ນສັນຍາ ໃນປີນີ້ຈະສະຫງວນ ທຶນ 128.000 ຕື້ດົງເພື່ອໃຫ້ບັນດາວິສາຫະກິດ ແລະ ສ່ວນບຸນຄົນກູ້ຢືມ ດ້ວຍອັດຕາດອກເບ້ຍຕ່ຳ. ປີນີ້ ໂຄງການດັ່ງກ່າວຍັງໃຫ້ຊາວກະສິກອນກູ້ຢືມທຶນ. ຫວ່າງແລ້ວນີ້, ທະນາຄານ 7 ແຫ່ງຄື: Vietinbank, Agribank, Sacombank… ໃຫ້ຊາວກະສິກອນຢູ່ບັນດາເມືອງ ຄື ກູຈີ, ຮອກມົນ, ເກີເຢີ, ບີງແຈງ ແລະ ຍ່າແບ່ ກູ້ຢືມທຶນລວມມູນຄ່າ 750 ຕື້ດົງ ດ້ວຍອັດຕາດອກເບ້ຍຕ່ຳ. ນອກນັ້ນ ບັນດາທະນາຄານການຄ້າຂອງນະຄອນ ກໍໄດ້ຜັນຂະຫຍາຍຫລາຍບ້ວງສິນເຊື່ອບຸລິມະສິດເພື່ອຍູ້ແຮງການເຕີບໂຕສິນເຊື່ອ. ທ່ານ ຮີ່ງແອງຫວູ, ຫົວຫນ້າຫ້ອງທຸລະກຳ Sacombank ສາຂາ ຖູດືກ ໃຫ້ຮູ້ວ່າ:
“ເພື່ອເພີ່ມສິນເຊື່ອຕື່ມອີກ, ນັບແຕ່ຕົ້ນປີ Sacombank ໄດ້ມີຫລາຍໂຄງການໃຫ້ກູ້ຢືມທຶນດ້ວຍດອກເບ້ຍຕຳ່ເຊັ່ນ: ໃນໂອກາດບຸນປີໃຫມ່ປະຈຳຊາດ, ຫລືເພື່ອໃຫ້ວິສາຫະກິດປະຈຸບັນ ກໍຄືວິສາຫະກິດສ້າງຕັ້ງໃຫມ່.”
ຍ້ອນຍູ້ແຮງບັນດາບ້ວງສິນເຊື່ອບຸລິມະສິດ ນັບແຕ່ຕົ້ນປີ ສະນັ້ນ ໃນໄຕມາດທີ 1, ຈຳນວນສິນເຊື່ອ ຂອງ Vietinbank ສາຂາ ຖູດືກ ໄດ້ເພີ່ມຂຶ້ນ 6%. ເພື່ອຍູ້ແຮງການເຕີບໂຕດ້ານສິນເຊື່ອ, ທະນາຄານການຄ້າຫລາຍແຫ່ງຢູ່ນະຄອນ ໂຮ່ຈິມີນ ໄດ້ເປັນເຈົ້າການໃນການຊອກຫາລູກຄ້າ. ພ້ອມກັນນັ້ນ, ບັນດາລະບຽບການກູ້ຢືມຂອງທະນາຄານກໍນັບມື້ນັບມີໄຫວພິບກວ່າ. ທ່ານ ຫງວຽນຈູງແທ່ງ, ຮອງຜູ້ອຳນວຍການໃຫຍ່ທະນາຄານການຄ້າຫຸ້ນສ່ວນ ຫວຽດນາມ Vietbank ໃຫ້ຮູ້ວ່າ:
“ພວກຂ້າພະເຈົ້າຍາມໃດກໍເປັນເຈົ້າການໃນການຊອກຫາລູ້ກຄ້າ. ພວກຂ້າພະເຈົ້າໄດ້ຊອກຫາລູກຄ້າຜ່ານເວທີປາໄສ, ສະຫະສະມາຄົມ, ຫນ້າເວັບ.”
ລາຍການເຊື່ອມຕໍ່ທະນາຄານ ແລະ ວິສາຫະກິດໃນໄລຍະ 2 ປີເຄິ່ງຜ່ານມາ ໄດ້ຮັບການຜັນຂະຫຍາຍຢູ່ 24 ເມືອງຂອງນະຄອນໂຮ່ຈິມີນ. ເພື່ອໃຫ້ທຸກເປົ້າໝາຍສາມາດກູ້ຢືມແຫລ່ງທຶນສິນເຊື່ອໄດ້, ທ່ານ ຮ່ວາງມີງ, ຮອງຫົວຫນ້າທະນາຄານແຫ່ງລັດສາຂານະຄອນໂຮ່ຈິມີນຖືວ່າ:
"ຂໍ້ຕິດຄັດນັ້ນແມ່ນຊັບສິນຈຳນຳ. ພວກຂ້າພະເຈົ້າຕັ້ງຫນ້າແກ້ໄຂຫນີ້ເສຍ, ບັນດາທະນາຄານການຄ້າໃຫ້ວິສາຫະກິດກູ້ຢືມທຶນດ້ວຍຄວາມເຊື່ອຖື.ກອງທຶນຄ້ຳປະກັນສິນເຊື່ອຂອງພວກຂ້າພະເຈົ້າຈະຄ້ຳປະກັນໃຫ້ວິສາຫະກິດຂະຫນາດກາງ ແລະ ນ້ອຍ ເພື່ອກູ້ຢືມທຶນ.”
ຢູ່ນະຄອນ ໂຮ່ຈິມີນ, ເມື່ອແຫລ່ງທຶນໄດ້ຮັບການແກ້ໄຂ, ວິສາຫະກິດຈະມີໂອກາດເປີດກວ້າງການຜະລິດ, ດຳເນີນທຸລະກິດ ແລະ ເພີ່ມກຳລັງແກ້ງແຍ້ງ. ສິ່ງດັ່ງກ່າວປະກອບສ່ວນສຳຄັນເຂົ້າໃນການຊຸກຍູ້ການເຕີບໂຕດ້ານເສດຖະກິດຂອງນະຄອນ.