(Vovworld)- ປະຈຸບັນ ຍີ່ປຸ່ນ ມີເກືອບ 800 ໂຄງການລົງທຶນ ດ້ວຍຍອດຈຳນວນເງິນລົງທຶນຂຶ້ນແມ່ນກວ່າ 2 ຕື້ 720 ລ້ານ USD ຢືນອັນດັບທີ 6 ໃນຈຳນວນບັນດາປະເທດ ແລະ ເຂດແຄ້ວນລົງທຶນຢູ່ ນະຄອນ ໂຮ່ຈິມີນ. ຄາດວ່າຕົວເລກດັ່ງກ່າວຈະເພີ່ມຂຶ້ນໃນໄລຍະຈະມາເຖິງ. ໃນລາຍການເສດຖະກິດພາກນີ້ ພວກເຮົາຂໍແນະນຳບົດຂຽນຂອງນັກຂ່າວ ເລ້ຮັ່ງ ທີ່ມີຫົວຂໍ້ວ່າ: ນະຄອນໂຮ່ຈິມີນ:ສະຖານທີ່ ດຶງດູດນັກລົງທຶນຍີ່ປຸ່ນ
ເວທີປາໄສສົ່ງເສີມການຄ້າ ແລະ ການລົງທຶນ ຫວຽດນາມ - ຍີ່ປຸ່ນ
ພາບ:baotintuc.vn
|
ພາຍຫລັງກວ່າ 16 ປີທີ່ລົງທຶນຢູ່ ນະຄອນ ໂຮ່ຈິມີນ ແລະ ການດຳເນີນທຸລະກິດນັບມື້ນັບມີປະສິດທິຜົນ, ບໍລິສັດ Toyota TSUSHO ຫວຽດນາມຈຳກັດ ພວມສືບຕໍ່ເປີດກວ້າງການລົງທຶນເພື່ອຕອບສະຫນອງຄວາມຕ້ອງການກ່ຽວກັບອຸດສາຫະກຳຫນູນຊ່ວຍໃຫ້ບັນດາວິສາຫະກິດຕິດຕັ້ງລົດໂອໂຕຢູ່ ຫວຽດນາມ. ທ່ານ Hiroyuki SHIO, ຮອງຜູ້ອຳນວຍການໃຫຍ່ ບໍລິສັດ Toyota TSUSHO ຫວຽດນາມຈຳກັດ ສາຂານະຄອນ ໂຮ່ຈິມີນ ໃຫ້ຮູ້ວ່າ:
“ເມື່ອ ພວກຂ້າພະເຈົ້າ ມາລົງທຶນຢູ່ ນະຄອນ ໂຮ່ຈິມີນ, ບັນດາຂະແຫນງການກ່ຽວຂ້ອງຂອງນະຄອນ ໄດ້ສ້າງເງື່ອນໄຂສະດວກໃຫ້ພວກຂ້າພະເຈົ້າໃນການເຄື່ອນໄຫວຜະລິດດຳເນີນທຸລະກິດແລະ ເຮັດລະລຽບການບໍລິຫານ. ການນຳນະຄອນ ໂຮ່ຈິມີນ ກໍຈັດການໂອ້ລົມສົນທະນາກັບບັນດາວິສາຫະກິດເປັນປະຈຳ ເພື່ອແກ້ໄຂຄວາມຫຍຸ້ງຍາກໃຫ້ວິສາຫະກິດ.”
ຕາມບັນດາອົງການສົ່ງເສີມການຄ້າຕ່າງປະເທດຂອງ ຍີ່ປຸ່ນ(JETRO) ນະຄອນ ໂຮ່ຈິມີນ ແລ້ວ, ບັນດາຂົງເຂດຊື່ງວິສາຫະກິດ ຍີ່ປຸ່ນ ລົງທຶນຫລາຍສຸດຢູ່ ນະຄອນ ໂຮ່ຈິມີນ ນັ້ນແມ່ນ: ອະສັງຫາລິມະຊັບ, ອຸດສາຫະກຳປຸ່ງແຕ່ງ, ການປະດິດສ້າງ ແລະ ວິທະຍາສາດເຕັກໂນໂລຊີ.. ມີວິສາຫະກິດຫລາຍແຫ່ງມາຈາກ ຍີ່ປຸ່ນ ລ້ວນແຕ່ຕີລາຄາສູງສະພາບແວດລ້ອມແຫ່ງການລົງທຶນຢູ່ ນະຄອນ ໂຮ່ຈິມີນ ເວົ້າສະເພາະ, ແລະ ຢູ່ຫວຽດນາມ ເວົ້າລວມ, ພິເສດ ນັບແຕ່ເມື່ອອຳນາດການປົກຄອງ ແລະ ບັນດາຂະແຫນງການກ່ຽວຂ້ອງຂອງນະຄອນ ໂຮ່ຈິມີນ ຍາມໃດກໍເປັນເຈົ້າການ ຮັບຟັງຄຳເຫັນຂອງວິສາຫະກິດ, ຕັ້ງຫນ້າປັບປຸງສະພາບແວດລ້ອມແຫ່ງການລົງທຶນ. ຫວ່າງແລ້ວນີ້, ສະຫະພັນເສດຖະກິດ KEIDANREN ຂອງ ຍີ່ປຸ່ນ ໄດ້ຈັດຕັ້ງ ຄະນະວິສາຫະກິດມາຊອກຫາສະພາບແວດລ້ອມແຫ່ງການລົງທຶນ ແລະ ດຳເນີນທຸລະກິດ ຢູ່ ນະຄອນ ໂຮ່ຈິມີນ. ຜ່ານການຢ້ຽມຢາມຄັ້ງນີ້, ວິສາຫະກິດຍີ່ປຸ່ນຫລາຍແຫ່ງໃຫ້ຮູ້ວ່າ: ເຂົາເຈົ້າຈະສ້າງແຜນການລົງທຶນຢູ່ນະຄອນ ໂຮ່ຈິມີນ ເພາະວ່າ ຜ່ານການໄຈ້ແຍກຕີລາຄາ ເຂົາເຈົ້າມີຄວາມອຸ່ນອ່ຽນໃຈ, ເຊື່ອໝັ້ນກ່ຽວກັບສະພາບແວດລ້ອມແຫ່ງການລົງທຶນຢູ່ທີ່ນີ້. ທ່ານ MuKuTa, ຜູ້ອຳນວຍການບໍລິຫານຂັ້ນສູງຂອງ KEIDANREN ໃຫ້ຮູ້ວ່າ:
“ໄລຍະຈະມາເຖິງ, ເມື່ອສັນຍາຄູ່ຮ່ວມມືຂ້າມປາຊີຟີກ ໄດ້ຮັບການລົງນາມ ແລະ ປະຊາຄົມເສດຖະກິດ ອາຊຽນ ໄດ້ຮັບການສ້າງຕັ້ງຂຶ້ນ. ຫວຽດນາມ ກໍຄືນະຄອນ ໂຮ່ຈິມີນ ຈະແມ່ນສະຖານທີ່ສຳຄັນໃນຍຸດທະສາດຂອງລະບົບສະຫນອງທົ່ວໂລກ. ຂ້າພະເຈົ້າພາຄະນະວິສາຫະກິດມາຊອກຫາການລົງທຶນຢູ່ຫວຽດ ແລະ ວິສາຫະກິດ ຍີ່ປຸ່ນສ່ວນຫລາຍ ມີຄວາມສົນໃຈເຖິງບັນດາຂົງເຂດຄື: ອຸດສາຫະກຳປຸງແຕ່ງ, ປະດິດສ້າງ, ຕ່ຳແຜ່ນຕັດຫຍິບ, ກໍ່ສ້າງ, ຄົມມະນາຄົມຂົນສົ່ງ, ກະສິກຳເຕັກໂນໂລຊີສູງ”
ເພື່ອເພີ່ມທະວີການດຶງດູດທຶນ FDI, ໄລຍະຜ່ານມາ ນະຄອນ ໂຮ່ຈິມີນ ໄດ້ເພີ່ມທະວີການປະຕິຮູບລະບຽບການບໍລິຫານ. ປະຈຸບັນ, ການເຮັດລະບຽບການອອກຫນັງສືອະນຸຍາດສ້າງຕັ້ງວິສາຫະກິດ ພຽງເສຍເວລາ 3 ວັນ, ການອອກຫນັງສືອະນຸຍາດພຽງເສຍເວລາ15 ວັນ. ຂະແຫນງສ່ວຍສາອາກອນ ນະຄອນກໍໝັ້ນໝາຍຈະຫລຸດຜ່ອນເວລາແຈ້ງພາສີອາກອນລົງເຫລືອ ພຽງ 171 ຊົ່ວໂມງໃນທ້າຍປີນີ້ ແທນທີ່ກວ່າ 200 ຊົ່ວໂມງຄືກອ່ນນີ້. ການນຳນະຄອນ ເປັນເຈົ້າການຈັດຕັ້ງການພົບປະ ແລະ ໂອ້ລົມສົນທະນາກັບວິສາຫະກິດເປັນປະຈຳ ເພື່ອແກ້ໄຂຄວາມຫຍຸ້ງຍາກຢ່າງທັນການ. ເຖິງຢ່າງໃດກໍຕາມ, ຍັງມີຫລາຍບັນຫາເຮັດໃຫ້ບັນດານັກລົງທຶນຕ່າງປະເທດຍັງລັ່ງເລໃຈ. ນັ້ນແມ່ນ ຂົງເຂດນິຕິກຳຈຳນວນຫນຶ່ງຂອງຫວຽດນາມ ບໍ່ທັນໄດ້ຮັບການປັບປຸງ, ພື້ນຖານໂຄງລ່າງບໍ່ທັນຄົບຊຸດ, ອຸດສາຫະກຳຫນູນຊ່ວຍບໍ່ທັນຕອບສະຫນອງຄວາມຮຽກຮ້ອງຕ້ອງການຂອງບັນດາວິສາຫະກິດຜະລິດ. ທ່ານນາງ ເລທິຮີ່ງມາຍ, ຮອງຜູ້ຫົວຫນ້າ ພະແນກແຜນການ ແລະ ການລົງທຶນ ນະຄອນ ໂຮ່ຈິມິນ ໃຫ້ຮູ້ວ່າ:
“ໄລຍະຈະມາເຖິງ, ເພື່ອປະຕິຮູບລະບຽບການລົງທຶນ ແລະເຮັດໃຫ້ໂປ່ງໃສ, ກໍຄືບຸກທະລຸຂອງກົດໝາຍວ່າດ້ວຍການລົງທຶນ ພວກຂ້າພະເຈົ້າເປີດເຜີຍລະບຽບການບໍລິຫານໃນຫນ້າເວັບແລະ ເພີ່ມທະວີການໃຫ້ຄຳປຶກສາ, ແນະນຳບັນດານັກລົງທຶນ ເພີ່ມທະວີບັນດາມາດຕະການເຕັກໂນໂລຊີຂໍ້ມູນຂ່າວສານ ກໍຄືອອກຫນັງສືອະນຸຍາດໃຫ້ບັນດານັກລົງທຶນຜ່ານເຄືອຄ່າຍອິນເຕີແນັດ.”
ເພື່ອຮັບກາລະໂອກາດຈາກບັນດາສັນຍາການຄ້າເສລີ, ສືບຕໍ່ດຶງດູດບັນດານັກລົງທຶນຕ່າງປະເທດ, ພິເສດແມ່ນວິສາຫະກິດຍີ່ປຸ່ນ, ໃນການພົບປະຄັ້ງຕ່າງໆກັບບັນດານັກລົງທຶນຕ່າງປະເທດ, ຄຽງຄູ່ກັບການຢັ້ງຢືນສືບຕໍ່ປະຕິຮູບບັນດາລະບຽບການບໍລິຫານກວ່າ, ອຳນາດການປົກຄອງນະຄອນ ໂຮ່ຈິມີນ ໝັ້ນໝາຍ: ຈະປັບປຸງພື້ນຖານໂຄງລ່າງໃຫ້ດີກວ່າ ກໍຄືຮັບຟັງບັນດາຄຳສະເຫນີ, ແກ້ໄຂບັນຫາກ່ຽວກັບນິຕິກຳຈຳນວນຫນຶ່ງຊື່ງວິສາຫະກິດຍັງຂ້ອງໃຈຢ່າງທັນການ. ການນຳ ນະຄອນໂຮ່ຈິມີນ ກໍຕີລາຄາສູງບັນດາໂຄງການລົງທຶນຕ່າງປະເທດຂອງບັນດາວິສາຫະກິດຍີ່ປຸ່ນ ແລະ ຖືວ່າ ນີ້ແມ່ນແຫລ່ງສຳຄັນເພື່ອໃຫ້ນະຄອນ ໂຮ່ຈິມີນ ສ້າງບາດກ້າວບຸກທະລຸ, ກາຍເປັນສູນເສດຖະກິດພັດທະນາຢ່າງຂະຫຍັນຂັນເຄື່ອນໃນພາກພື້ນ ອາຊີຕາເວັນອອກສຽງໃຕ້.