(vovworld) - ນັບແຕ່ປີ 2011 ມາຮອດປະຈຸບັນ, ໃນເງື່ອນໄຂທີ່ພື້ນຖານເສດຖະກິດ ເຕັມໄປດ້ວຍຄວາມຫຍຸ້ງຍາກນັບທັງທາງພາວະວິໄສ ແລະ ອັດຕະວິໄສນັ້ນ, ສະພາບການເຄື່ອນໄຫວຂອງບັນດາວິສາຫະກິດ, ພິເສດແມ່ນວິສາຫະກິດຂະຫນາດກາງ ແລະ ນ້ອຍຍິ່ງປະສົບກັບຄວາມຫຍຸ້ງຍາກຫຼາຍກວ່າ. ເພື່ອແກ້ໄຂສະພາບດັ່ງກ່າວ, ດ້ວຍບ້ວງເງິນຫນູນຊ່ວຍວິສາຫະກິດລວມມູນຄ່າກວ່າ 29.000 ຕື້ດົ່ງເຊິ່ງກະຊວງການເງິນປະກາດນັ້ນ, ບັນດາທະນາຄານໄດ້ ແລະ ພວມຜັນຂະຫຍາຍບ້ວງເງິນຫນູນຊ່ວຍ ເພື່ອຊ່ວຍໃຫ້ວິສາຫະກິດຫລຸດພົ້ນອອກຈາກສະພາບຫນິ້ສິນ ກໍຄືຟື້ນຟູການຜະລິດ ແລະ ສືບຕໍ່ພັດທະນາ.
ບວ້ງເງິນຫນູນຊ່ວຍຂອງທະນາຄານມາສູ່ວິສາຫະກິດ
ພາບ: internet
|
ຕາມບັນດາວິສາຫະກິດແລ້ວ, ນອກຈາກຄວາມຫຍຸ້ງຍາກໃນປະຈຸບັນຄື: ສິນຄ້າຄ້າງສາງເປັນຈຳນວນຫຼວງຫລາຍ, ຕະຫລາດຖືກຮັດແຄບ…ຍັງມີສາຍເຫດຫນຶ່ງທີ່ສົ່ງຜົນສະທ້ອນເຖິງການຄົງຕົວຂອງວິສາຫະກິດ ນັ້ນແມ່ນການກູ້ຢືມທຶນຈາກທະນາຄານຍາກທີ່ຈະປະຕິບັດໄດ້. ເພາະວ່າ ໃນໄລຍະຜ່ານມາ, ອັດຕາດອກເບ້ຍທະນາຄານຍັງສູງ ແລະ ສິນຄ້າຄ້າງສາງເປັນຈຳນວນຫລວງຫລາຍ ຊັບສິນຄ້ຳປະກັນ ຂອງວິສາຫະກິດມີຫນ້ອຍ. ໃນຂະນະນັ້ນ ການຄ້ຳປະກັນດ້ວຍສິນຄ້າຄ້າງສາງເພື່ອກູ້ຢືມທຶນແມ່ນຍາກທີ່ສຸດ. ເງ່ືອນໄຂເພື່ອໃຫ້ບັນດາທະນາຄານພິຈາລະນາຕົກລົງໃຫ້ວິສາຫະກິດກູ້ຢືມທຶນແມ່ນບໍ່ທັນມີໄຫວພິບຕາມຄວາມຕ້ອງການຂອງວິສາຫະກິດ. ທ່ານ Nguyen Tri Kien ຜູ້ອຳນວຍການບໍລິສັດຫຍິບກະເປົາ Minh Tien ໃຫ້ຮູ້ວ່າ:
“ບັນດາທະນາຄານພິຈາລະນາເງື່ອນໄຂໃຫ້ກູ້ຢືມຢ່າງເຄັ່ງຄັດ. ຕົວຢ່າງຄື ຮອດສົກຮຽນໃຫມ່ ພວກຂ້າພະເຈົ້າຢາກກູ້ຢືມຈຳນວນເງິນ 6 ຕື້ດົ່ງ ແຕ່ຊັບສິນຄ້ຳປະກັນພຽງແຕ່ກູ້ຢືມເງິນໄດ້ 4 ຕື້ດົ່ງເທົ່ານັ້ນ, ນອກນັ້ນ ພວກຂ້າພະເຈົ້າບໍ່ສາມາດກູ້ຢືມເງິນບ້ວງໃດຕື່ມອີກ.ເມື່ອພວກຂ້າພະເຈົ້າເອົາສິນຄ້າຄ້າງສາງ
ມາຄ້ຳປະກັນເພື່ອ ກູ້ຢືມທຶນຕື່ມອີກ, ແຕ່ທະນາຄານພັດປະຕິເສດ.”
ສ່ວນຝ່າຍທະນາຄານກໍ່ຖືວ່າແຫລ່ງທຶນຈໍລະຈອນບໍ່ທັນໄດ້ດີ ຍ້ອນບັນດາວິສາຫະກິດຍັງມີສິນຄ້າຄ້າງສາງເປັນຈຳນວນຫຼວງຫລາຍ ສະນັ້ນທະນາຄານຈຶ່ງເປັນຫ່ວງຕໍ່ການຈຳຫນ່າຍສິນຄ້າກໍຄືຄວາມສາມາດຖອນທຶນຄືນ. ເຖິງຢ່າງໃດກໍຕາມ, ສຳລັບໂຄງການຈຳນວນຫນຶ່ງທີ່ດຳເນີນທຸລະກິດໄດ້ດີ ທະນາຄານຍັງສ້າງເງື່ອນໄຂເພື່ອໃຫ້ເຂົາເຈົ້າກູ້ຢືມທຶນ. ພາຍຫລັງດັດປັບອັດຕາດອກເບ້ຍເປັນ 4 ຄັ້ງ, ມາຮອດປະຈຸບັນ ເລື່ອງວິສາຫະກິດກູ້ຢືມທຶນຈາກທະນາຄານກໍໄດ້ຮັບການປັບປຸງແລ້ວ. ໃນ 6 ເດືອນຕົ້ນປີ 2012, ສິນເຊື່ອຂອງນະຄອນໂຮ່ຈິມີນ ບັນລຸລະດັບເຕີບໂຕ 0,37%. ບັນດາທະນາຄານໄດ້ສຸມແຫລ່ງທຶນກວ່າ 26.600 ຕື້ດົ່ງໃຫ້ 4 ໝວດຂະແໜງບຸລິມະສິດກູ້ຢືມ ດ້ວຍອັດຕາດອກເບ້ຍແຕ່ 11 - 13% ຄື: ການພັດທະນາກະສິກຳ, ຊົນນະບົດ, ການສົ່ງອອກ, ວິສາຫະກິດຂະຫນາດກາງ ແລະ ນ້ອຍ. ພ້ອມກັນນັ້ນ, ບັນດາທະນາຄານກໍ່ໄດ້ສ້າງອົງປະກອບບ້ວງຫນິ້ສິນປະມານ 12.000 ຕື້ດົ່ງໃຫ້ແກ່ບັນດາວິສາຫະກິດ. ພິເສດ, ພາຍຫລັງຫລຸດຜ່ອນອັດຕາດອກເບ້ຍໃຫ້ກູ້ຢືມດ້ວຍລະດັບຕຳ່ກວ່າ 15%/ປີ ໃນເວລາເກືອບ 2 ອາທິດ. ທະນາຄານ Dong A ມີບ້ວງເງິນຫນູນຊ່ວຍ 10.000 ຕື້ດົ່ງເພື່ອໃຫ້ວິສາຫະກິດກູ້ຢືມ, ໃນນັ້ນ 1.000 ຕື້ດົ່ງໃຫ້ວິສາຫະກິດກູ້ຢືມດ້ວຍຄວາມໄວ້ວາງໃຈ, ທ່ານ Tran Phuong Binh ຜູ້ອຳນວຍການໃຫຍ່ທະນາຄານ Dong A ໃຫ້ຮູ້ວ່າ:
“ທະນາຄານ Dong A ພວມພິຈາລະນາເພື່ອຫລຸດຜ່ອນອັດຕາດອກເບ້ຍໃຫ້ກູ້ຢືມທຶນທີ່ມີຕໍ່ບັນດາວິສາຫະກິດພວມມີຈຳນວນເຫລືອຫນິ້. ທະນາຄານພວມມີບ້ວງເງິນໃຫ້ກູ້ຢືມສຳລັບຜູ້ມີຄວາມຕ້ອງການດ້ານເຮືອນຢູ່. ອັດຕາດອກເບ້ຍໃນປີທຳອິດແມ່ນ 12% ເພື່ອກະຕຸກຄວາມຕ້ອງການສຳລັບບັນດາວິສາຫະກິດມີຄວາມຕ້ອງການຢ່າງແທ້ຈິງ.”
ພາບປະກອບ:vasep.com.vn
|
ບັນດາມາດຕະການຫນູນຊ່ວຍຂອງລັດຖະບານ ແລະ ທະນາຄານພວມຊ່ວຍບັນດາວິສາຫະກິດແກ້ໄຂຄວາມຫຍຸ້ງຍາກ, ຫລີກລ້ຽງການລົ້ມລະລາຍຫລືຢຸດຕິການເຄື່ອນໄຫວ. ເຖິງຢ່າງໃດກໍຕາມ, ບັນດາວິສາຫະກິດຖືວ່າ: ທະນາຄານແຫ່ງລັດຕ້ອງມີວິວັດການຫລຸດຜ່ອນອັດຕາດອກເບ້ຍລົງຕຳ່ກວ່າ 10%, ເພາະວ່າ ອັດຕາດອກເບ້ຍໃຫ້ກູ້ຢືມຂອງ ຫວຽດນາມ ປະຈຸບັນ ຍັງມີລະດັບສູງກວ່າເມື່ອທຽບໃສ່ບັນດາປະເທດໃນພາກພື້ນແຕ່ 3 - 4%. ພ້ອມກັນນັ້ນ, ຕ້ອງມີການດັດປັບອັດຕາດອກເບ້ຍໃຫ້ກູ້ຢືມຄືນໃຫມ່, ເພາະວ່າ ບັນດາວິສາຫະກິດຍັງຄົງປະສົບກັບຄວາມຫຍຸ້ງຍາກທີ່ສຸດ. ທ່ານນາງ Nguyen Thi Hong, ຮອງປະທານຄະນະກຳມະການປະຊາຊົນນະຄອນ ໂຮ່ຈິມີນ ຖືວ່າ:
“ນະຄອນ ໂຮ່ຈິມມີນ ໄດ້ສ້າງແຜນນະໂຍບາຍ ແລະ ມີບັນດາຮູບແບບຜັນຂະຫຍາຍການຮ່ວມມືນີ້. ຂ້າພະເຈົ້າຖືວ່າ: ນີ້ແມ່ນຮູບແບບດີເພື່ອໃຫ້ລັດຈັດຕັ້ງການເຊື່ອມຕໍ່ລະຫວ່າງທະນາຄານ ແລະ ວິສາຫະກິດເພື່ອພົບປະ, ແບ່ງປັນຄວາມຫຍຸ້ງຍາກ, ຄຽງບ່າຄຽງໄລ່ກັບວິສາຫະກິດເພື່ອພັດທະນາ.”
ຕໍ່ຫນ້າຄວາມຫຍຸ້ງຍາກຂອງວິສາຫະກິດໃນການກູ້ຢືມທຶນ, ການນຳທະນາຄານແຫ່ງລັດໄດ້ມອບໃຫ້ທະນາຄານແຫ່ງລັດສາຂາຢູ່ບັນດາແຂວງ, ນະຄອນ ສົມທົບກັບທະນາຄານການຄ້າແກ້ໄຂຂໍ້ຕັດຂັດ. ເລື່ອງທະນາຄານໜູນຊ່ວຍວິສາຫະກິດແກ້ໄຂຄວາມຫຍຸ້ງຍາກ ບໍ່ພຽງແຕ່ສ້າງເງື່ອນໄຂໃຫ້ວິສາຫະກິດພັດທະນາເທົ່ານັ້ນ, ຫາກຍັງເຮັດໃຫ້ທະນາຄານພັດທະນາອີກດ້ວຍ, ການກູ້ເອົາວິສາຫະກິດກໍ່ແມ່ນການກູ້ເອົາທະນາຄານນັ້ນເອງ. ທ່ານ Nguyen Van Binh ຜູ້ວ່າການທະນາຄານແຫ່ງລັດ ຫວຽດນາມ ໃຫ້ຮູ້ວ່າ:
“ທະນາຄານແຫ່ງໃດຕັ້ງຫນ້າຜັນຂະຫຍາຍ ທະນາຄານແຫ່ງລັດຈະໃຫ້ຄະແນນບວກ. ສ່ວນທະນາຄານແຫ່ງໃດບໍ່ຜັນຂະຫນຍາຍຈະຖືກຄະແນນລົບ ແລະ ຈະມີມາດຕະການປັບໄຫມ. ກ່ອນອື່ນໝົດ ພວກຂ້າພະເຈົ້າສົ່ງເສີມທະນາຄານ ແລະ ວິສາຫະກິດພ້ອມກັນແກ້ໄຂຄວາມຫຍຸ້ງຍາກ. ພວກຂ້າພະເຈົ້າທັງຫນູນຊ່ວຍທັງມີມາດຕະການກວດກາ, ເລັ່ງລັດວຽກງານນີ້.”
ບ້ວງເງິນຫນູນຊ່ວຍຂອງລັດໃຫ້ແກ່ວິສາຫະກິດ ຈະຊ່ວຍ GDP ຂອງຫວຽດນາມໃນປີ 2012 ເພີ່ມຂຶ້ນ 1%. ໃນຂະນະນັ້ນ ບ້ວງເງິນຫນູນຊ່ວຍກໍ່ບໍ່ສົ່ງຜົນສະທ້ອນເຮັດໃຫ້ໄພເງິນເຟີ້ເພີ່ມຂຶ້ນຄືນໃຫມ່. ເຖິງຢ່າງໃດກໍຕາມ, ນີ້ຍັງຄົງແມ່ນມາດຕະການໃນຕໍ່ຫນ້າ ແລະ ຈຳເປັນຕ້ອງມີມາດຕະການໃນໄລຍະຍາວກວ່າຄື: ທະນຄານແຫ່ງລັດຄວນສືບຕໍ່ຫລຸດຜ່ອນອັດຕາດອກເບ້ຍໃນໄລຍະຍາວເພື່ອສົ່ງເສີມວິສາຫະກິດກູ້ຢືມທຶນ; ຕ້ອງມີບັນດາມາດຕະການດ້ານອາກອນທີ່ມີລັກສະນະເປັນປົກກະຕິ ແລະ ຫລຸດຜ່ອນອາກອນລາຍຮັບວິສາຫະກິດ ເພື່ອໃຫ້ບ້ວງເງິນໜູນຊ່ວຍຂອງທະນາຄານ ໃຫ້ແກ່ວິສາຫະກິດເປັນປົກກະຕິ ແລະ ພັດທະນາປະກົດຜົນເປັນຈິງ.