(vovworld)- ຫວຽດນາມແມ່ນປະເທດມີທີ່ຕັ້ງພູມສາດຢູ່ເຂດຮ້ອນ, ລົມມໍລະສຸມ, ແດດຮ້ອນ, ລົມແຮງ ດ້ວຍຝັ່ງທະເລຍາວກວ່າ 3.200 ກິໂລແມັດ. ນີ້ແມ່ນບັນດາເງື່ອນໄຂທຳມະຊາດທີ່ສະດວກເພື່ອໝູນໃຊ້ ແລະ ພັດທະນາແຫລ່ງພະລັງງານຜະລິດຄືນໃຫມ່ຄື: ພະລັງງານແສງຕາເວັນ, ພະລັງງານໃຊ້ພະລັງແຮງລົມ, ພະລັງງານຊີວະສາດ… ຫວຽດນາມ ກໍແມ່ນຫນຶ່ງໃນບັນດາປະເທດຖືກຜົນສະທ້ອນຢ່າງຫນັກຫນ່ວງຈາກການປ່ຽນແປງຂອງດິນຟ້າອາກາດ, ສະນັ້ນ ການນຳໃຊ້ແຫລ່ງພະລັງງານຜະລິດຄືນໃຫມ່ຈາກທຳມະຊາດກໍປະກອບສ່ວນເຂົ້າໃນວິວັດການຈຳກັດສະພາບປ່ຽນແປງຂອງດິນຟ້າອາກາດ.
ພາບປະກອບ
|
ຄວາມຕ້ອງການນຳໃຊ້ພະລັງງານເພື່ອຮັບໃຊ້ການຜະລິດ ແລະ ຊີວິດການເປັນຢູ່ຂອງຊາວ ຫວຽດນາມ ນັບມື້ນັບເພີ່ມຂຶ້ນ, ໃນຂະນະທີ່ແຫລ່ງຖ່ານຫີນໃຊ້ເພື່ອຜະລິດໄຟຟ້າພວມຄ່ອຍໆໝົດກ້ຽງ. ຄຽງຄູ່ກັນນັ້ນ, ປະລິມານນ້ຳເພື່ອຜະລິດໄຟຟ້ານ້ຳຕົກກໍ່ພວມບົກແຫ້ງລົງ. ໃນສະພາບຄືແນວນັ້ນ ການພັດທະນາພະລັງງານຜະລິດຄືນໃຫມ່ເວົ້າລວມ ແລະ ພະລັງງານແສງຕາເວັນ ແລະ ພະລັງງານໃຊ້ພະລັງແຮງລົມທີ່ມີຢູ່ແລ້ວໃນທຳມະຊາດເພື່ອຜະລິດໄຟຟ້າ ແມ່ນທ່າອ່ຽງທີ່ຕັ້ງຫນ້າ ແລະ ມີຄວາມເປັນໄປໄດ້. ນີ້ກໍແມ່ນທ່າອ່ຽງພັດທະນາແຫລ່ງພະລັງງານສະອາດທີ່ກ້າວຫນ້າຢູ່ໃນໂລກ. ທ່ານນາຍົກລັດຖະມົນຕີຫວຽດນາມ ໄດ້ເຊັນອະນຸມັດແຜນສັງລວມພັດທະນາໄລຍະ 2011- 2020, ວິໄສທັດຮອດປີ 2030. ລັດຖະບານກໍໄດ້ປະກາດໃຊ້ບັນດານະໂຍບາຍບຸລິມະສິດແກ່ການລົງທຶນພັດທະນາໄຟຟ້າໃຊ້ພະລັງແຮງລົມ, ໃນນັ້ນ ສົ່ງເສີມການພັດທະນາໄຟຟ້າໃຊ້ພະລັງແຮງລົມລະດັບຊາດຢູ່ບັນດາທ້ອງຖິ່ນ. ນີ້ໄດ້ຮັບຖືວ່າແມ່ນພື້ນຖານນິຕິກຳໃຫ້ແກ່ການພັດທະນາພະລັງງານຜະລິດຄືນໃຫມ່ຢູ່ຫວຽດນາມ, ໃນນັ້ນ ລວມມີການນຳໃຊ້ພະລັງງານແສງຕາເວັນ, ພະລັງງານໃຊ້ພະລັງແຮງລົມ. ສາດສະດາຈານ ດັ້ງຮູ່ງຫວໍ ໃຫ້ຮູ້ວ່າ:
“ພະລັງງານຜະລິດຄືນໃຫມ່ປະຈຸບັນພວມແມ່ນວິທີຫນຶ່ງເພື່ອແກ້ໄຂບັນຫາພະລັງງານ ແລະ ພວມໄດ້ຮັບການສະຫນັບສະຫນູນຈາກໂລກ, ເພາະວ່າ ນີ້ແມ່ນພະລັງງານສະອາດ ທັງແມ່ນພະລັງງານຂຽວ ໝາຍຄວາມວ່າ ມັນຮັບປະກັນມາດຖານບໍ່ກໍ່ມົນລະພິດເຖິງສິ່ງແວດລ້ອມ ແຕ່ຍັງຮັບປະກັນພະລັງງານຮັບໃຊ້ໃຫ້ແກ່ມະນຸດ. ປະຈຸບັນຢູ່ໃນໂລກ, ການນຳໃຊ້ພະລັງງານນີ້ພວມພັດທະນາຢ່າງແຂງແຮງ ແລະ ໄປຄຽງຄູ່ກັນນັ້ນແມ່ນຄວາມສຳນຶກກ່ຽວກັບສະຖາປັດຕະຍະກຳຂຽວ, ໃນນັ້ນມີການນຳໃຊ້ແຫລ່ງພະລັງງານສະອາດຄືແນວໃດໃຫ້ກົມກຽວກັບສະພາບແວດລ້ອມ.”
ໃນບັນດາແຫລ່ງພະລັງງານຜະລິດຄືນໃຫມ່ທີ່ີມີຢູ່ແລ້ວໃນທຳມະຊາດ, ພະລັງງານແສງຕາເວັນແມ່ນແຫລ່ງພະລັງງານທີ່ອຸດົມສົມບູນ ແລະ ປ່ຽນແປງຫນ້ອຍສຸດ. ຫວຽດນາມ ແມ່ນປະເທດທີ່ມີທ່າສະດວກ, ເພາະນອນໃນເຂດຮ້ອນ, ມີແສງແດດຫລາຍມື້ໃນປີ. ນີ້ແມ່ນເງ່ືອນໄຂສະດວກເພື່ອຂຸດຄົ້ນແຫລ່ງພະລັງງານທີ່ອຸດົມສົມບູນນີ້. ການໝູນໃຊ້ພະລັງງານໃນປະຈຸບັນໄດ້ຮັບຖືວ່າ ແມ່ນມາດຕະການປະຢັດ, ລາຄ່າຖືກ ແລະ ສາມາດໝູນໃຊ້ຢ່າງກວ້າງຂວາງໃນຊີວິດປະຈຳວັນ. ມີຜູ້ຊ່ຽວຊານຫລາຍທ່ານຍັງຕີລາຄາວ່າ ນີ້ແມ່ນແຫລ່ງພະລັງງານທີ່ມີຄວາມສາມາດບົ່ມຊ້ອນໃຫ້ແກ່ການຜະລິດອຸດສາຫະກຳ ແລະ ການກໍ່ສ້າງ. ໃນຊຸມປີມໍ່ໆມານີ້, ມີວິສາຫະກິດຫລາຍແຫ່ງໄດ້ລົງທຶນປະກອບເຕັກໂນໂລຊີທັນສະໄຫມເພື່ອຜະລິດບັນດາອຸປະກອນນຳໃຊ້ພະລັງງານແສງຕາເວັນເພື່ອຕົ້ມນ້ຳຮ້ອນໃຫ້ແກ່ຄອບຄົວ ແລະ ໄດ້ຮັບການສະຫນັບສະຫນູນຈາກຜູ້ອຸປະໂພກຫລາຍຄົນ. ບໍລິສັດ ຫຸ້ນສ່ວນ ເຊີນຮ່າ ຜະລິດສະເພາະບັນດາຜະລິດຕະພັນ ທາຍເຢືອງນັງ ນຳໃຊ້ພະລັງງານແສງຕາເວັນ ແມ່ນຫນຶ່ງໃນຈຳນວນບໍລິສັດດັ່ງກ່າວ. ທ່ານ ດາມກວາງຮຸ່ງ, ຮອງຜູ້ອຳນວຍການໃຫຍ່ບໍລິສັດຫຸ້ນສ່ວນເຊີນຮ່າ ໃຫ້ຮູ້ວ່າ:
“ໃນໄລຍະຈະມາເຖິງ, ຄຽງຄູ່ກັບບັນດາຜະລິດຕະພັນທາຍເຢືອງນັງ ທີ່ນຳໃຊ້ພະລັງງານແສງຕາເວັນ ເພື່ອຕົ້ມນ້ຳຮ້ອນໃຫ້ແກ່ບັນດາຄອບຄົວແລ້ວ, ພວກຂ້າພະເຈົ້າຍັງພັດທະນາຜະລິດຕະພັນອື່ນໆເພື່ອຕອບສະຫນອງຄວາມຕ້ອງການໃນຂະແຫນງອຸດສາຫະກຳອີກຄື: ນຳໃຊ້ໃນໂຮງຮຽນ, ໂຮງໝໍ, ປ້ອມທະຫານ, ຮ້ານຄ້າ, ໂຮງແຮມ, ພິເສດໃນຂະແຫນງອຸດສາຫະກຳປຸງແຕ່ງ, ເປັນຕົ້ນແມ່ນປຸງແຕ່ງສິນໃນນ້ຳຕ້ອງການແຫລ່ງນ້ຳຮອ້ນເພື່ອຮັບໃຊ້ການຜະລິດ. ພວກຂ້າພະເຈົ້າປາດຖະຫນາ ວ່າ: ລັດຖະບານຈະມີໂຄງການຫນູນຊ່ວຍວິສາຫະກິດພັດທະນາບັນດາຜະລິດຕະພັນພະລັງງານສະອາດ.”
ພ້ອມກັບແຫລ່ງພະລັງງານແສງຕາເວັນ, ພະລັງງານໃຊ້ພະລັງແຮງລົມ ເພື່ອຜະລິດໄຟຟ້າຢູ່ຫວຽດນາມ ກໍ່ອຸດົມສົມບູນ. ດ້ວຍຝັ່ງທະເລຍາວ ພ້ອມກັບເກາະໃຫຍ່ນ້ອຍຫລາຍແຫ່ງ, ລົມພັດຕະຫລອດປີ, ຫວຽດນາມ ມີເງື່ອນໄຂ, ຄວາມສາມາດບົ່ມຊ້ອນສະດວກຫຼາຍຢ່າງເພື່ອພັດທະນາລະບົບໄຟຟ້າໃຊ້ພະລັງແຮງລົມ. ວັນທີ 29/5/2013 ຜ່ານມາ, ກະແສໄຟຟ້າທຳອິດຂອງໂຄງການໄຟຟ້າໃຊ້ພະລັງແຮງລົມຢູ່ແຂວງບາກລຽວ ໄດ້ເຊື່ອມຕໍ່ເຂົ້າຕາໜ່າງໄຟຟ້າແຫ່ງຊາດ. ໂຄງການນີ້ເລີ່ມລົງມືກໍ່ສ້າງແຕ່ປີ 2010 ແລະ ແມ່ນໂຄງການໄຟຟ້າໃຊ້ພະລັງແຮງລົມແຫ່ງທີສອງຢູ່ຫວຽດນາມ ດ້ວຍກຳລັງຜະລິດໄຟຟ້າ 99,2 MW, ລວມມີ 62 ເສົາຕວກບິນແຮງລົມ ສາມາດຜະລິດໄຟຟ້າໄດ້ປະມານ 320 ລ້ານ KWh/ປີ. ເລື່ອງໂຮງງານໄຟຟ້າໃຊ້ພະລັງແຮງລົມຢູ່ ບາກລຽວ ເຊື່ອມຕໍ່ເຂົ້າຕາຫນ່າງໄຟຟ້າແຫ່ງຊາດເປັນຂີດໝາຍສຳຄັນໃຫ້ແກ່ການພັດທະນາບັນດາແຫລ່ງພະລັງງານສະອາດຢູ່ຫວຽດນາມ. ດ້ວຍການຫນູນຊ່ວຍພິເສດຈາກລັດ, ບັນດານັກລົງທຶນເຂົ້າຂົງເຂດໄຟຟ້າໃຊ້ພະລັງແຮງລົມຫວຽດນາມ ພວມມີຫລາຍກາລະໂອກາດເພື່ອພັດທະນາ. ໃນອະນາຄົດໃກ້ໆນີ້ ພ້ອມກັບແຫລ່ງພະລັງງານແສງຕາເວັນ, ແຫລ່ງພະລັງງານໃຊ້ພະລັງແຮງລົມຈະສືບຕໍ່ໄດ້ຮັບການຂຸດຄົ້ນເພື່ອກາຍເປັນແຫລ່ງສະຫນອງພະລັງງານໄຟຟ້າອຸດົມສົມບູນໃຫ້ແກ່ປະເທດຊາດ.