(vovworld)- ໄພເງິນເຟີ້ສືບຕໍ່ໄດ້ຮັບການຄວບຄຸມ, ລາຄາໃນທ້ອງຕະຫລາດເປັນປົກກະຕິ, ບັນດາມາດຕະການຂອງລັດຖະບານໃນການແກ້ໄຂຄວາມຫຍຸ້ງໃຫ້ແກ່ວິສາຫະກິດໄດ້ເສີມຂະຫຍາຍຢ່າງມີປະສິດທິຜົນ, ປະກອບສ່ວນຟື້ນຕົວການຜະລິດ ແລະ ສ້າງທ່າເຕີບໂຕເສດຖະກິດໃນຊຸມເດືອນທ້າຍປີ 2013. ນີ້ແມ່ນເນື້ອໃນບົດຂຽນຂອງນັກຂ່າວ ໂຕຕວນ ທີ່ພາດຫົວເລື່ອງວ່າ: ບັນດາຈຸດພົ້ນເດັ່ນຂອງເສດຖະກິດຫວຽດນາມ ໃນ 6 ເດືອນຕົ້ນປີ.
ບັນດາຕົວເລກຊື່ງກົມສະຖິຕິຫາກໍ່ປະກາດໃຫ້ເຫັນວ່າ: ສະພາບເສດຖະກິດ ຫວຽດນາມ ໃນ 6 ເດືອນຕົ້ນປີໄດ້ຮັບການປັບປຸງດີພໍສົມຄວນ. ບັນດາມາດຕະການທີ່ວາງອອກໃນມະຕິຂອງລັດຖະບານ, ເປັນຕົ້ນແມ່ນມະຕິເລກທີ 02 ກ່ຽວກັບການແກ້ໄຂຄວາມຫຍຸ້ງຍາກໃຫ້ແກ່ການຜະລິດດຳເນີນທຸລະກິດ, ການຫນູນຊ່ວຍຕະຫລາດ, ແກ້ໄຂຫນີ້ເສຍ, ບັນດາມາດຕະການກະຕຸ້ນຄວາມຕ້ອງການ, ແກ້ໄຂສະພາບສິນຄ້າຄ້າງສາງ ຊື່ງໄດ້ຮັບການຜັນຂະຫຍາຍໃນໄລຍະຜ່ານມາ ໄດ້ເສີມຂະຫຍາຍປະສິດທິຜົນ, ປະກອບສ່ວນແກ້ໄຂສິ່ງທ້າທາຍຂອງພື້ນຖານເສດຖະກິດໃນຕໍ່ຫນ້າກໍຄືຮັບປະກັນເສດຖະກິດມະຫາພາກເປັນປົກກະຕິ, ສ້າງທ່າເຕີບໂຕແບບຍືນຍົງ. GDP ໃນ 6 ເດືອນຕົ້ນປີບັນລຸ 4,9%, ໃນຂະນະທີ່ດັດຊະນີລາຄາໃຊ້ສອຍ (CPI) ໃນເດືອນ 6 ເພີ່ມຂຶ້ນພຽງ 2,4% ຊ່ືງແມ່ນລະດັບເພີ່ມຕຳ່ສຸດເມື່ອທຽບໃສ່ໄລຍະດຽວກັນໃນຮອບ 10 ປີມໍ່ໆມານີ້. ທ່ານ ຫງວຽນດືກທັງ, ຫົວຫນ້າກົມສະຖິຕິ ລາຄາ ສັງກັດກົມໃຫຍ່ສະຖິຕິ, ຖືວ່າ:
“ຖ້າທົບທວນຄືນ 6 ເດືອນຕົ້ນປີ ພວກເຮົາເຫັນວ່າ: ດັດຊະນີລາຄາໃຊ້ສອຍໃນ 2 ເດືອນຕົ້ນປີເພີ່ມຂຶ້ນສູງ ແລະ ນັບແຕ່ເດືອນ 3 ມາຮອດປະຈຸບັນ ລະດັບລາຄາເປັນປົກກະຕິ ແລະ ມີທ່າອ່ຽງຫລຸດລົງ. ໃນເດືອນ 6 ສືບຕໍ່ເພີ່ມຂຶ້ນ ແຕ່ພຽງຢູ່ໃນລະດັບ 0,05%. ເທົ່ານັ້ນ. ສະນັ້ນ ຂ້າພະເຈົ້າເຫັນວ່າ ໃນ 6 ເດືອນຕົ້ນປີ ລາຄາເພີ່ມຂຶ້ນຢູ່ໃນລະດັບຕຳ່ເມື່ອທຽບໃສ່ 10 ປີຜ່ານມາ. ນີ້ແມ່ນສັນຍານຕັ້ງຫນ້າສະແດງໃຫ້ເຫັນ ວຽກງານຄວບຄູມໄພເງິນເຟີ້ບັນລຸໝາກຜົນດີ. ສິ່ງດັ່ງກ່າວສະແດງໃຫ້ເຫັນວ່າ ບັນດາກະຊວງ, ຂະແຫນງການ, ທ້ອງຖິ່ນຕ່າງໆໄດ້ປະຕິບັດມາດຕະການຕ່າງໆຂອງລັດຖະບານ ກ່ຽວກັບການຄວບຄຸມໄພເງິນເຟີ້ຢ່າງຂ້ຽວຂາດ.”
ໃນໄລຍະ 6 ເດືອນຕົ້ນປີ, ລະດັບເຕີບໂຕຢູ່ຂະແຫນງການ, ຂົງເຂດຕ່າງໆຂອງພື້ນຖານເສດຖະກິດລ້ວນແຕ່ໄດ້ຮັບການປັບປຸງດີພໍສົມຄວນ. ໃນ 3 ຂົງເຂດຄື: ກະສິກຳ, ປ່າໄມ້ ແລະ ສິນໃນນ້ຳ; ອຸດສາຫະກຳ ແລະ ບໍລິການລ້ວນແຕ່ເພີ່ມຂຶ້ນເມື່ອທຽບໃສ່ໄລຍະດຽວກັນຂອງປີກາຍ. ການຜະລິດອຸດສາຫະກຳ, ເປັນຕົ້ນແມ່ນອຸດສາຫະກຳປຸງແຕ່ງ, ການປະດິດສ້າງຮັກສາໄດ້ທ່າຟື້ນຕົວ ແລະ ມີການຫັນປ່ຽນພໍສົມຄວນ. ຂົງເຂດບໍລິການສືບຕໍ່ພັດທະນາດ້ວຍລະດັບຈະເລີນເຕີບໂຕສູງກວ່າເມື່ອທຽບໃສ່ໄລຍະດຽວກັນຂອງປີກາຍ. ການເຄື່ອນໄຫວຜະລິດດຳເນີນທຸລະກິດ, ການດຳເນີນທຸລະກິດຂອງວິສາຫະກິດ ເບື້ອງຕົ້ນໄດ້ມີສັນຍານຕັ້ງຫນ້າ. ສິ່ງເປັນຫນ້າສົນໃຈ ນັ້ນແມ່ນການສົ່ງອອກສືບຕໍ່ຮັກສາທ່າເຕີບໂຕສູງກວ່າເມື່ອທຽບໃສ່ແຜນການທີ່ໄດ້ວາງອອກ, ຍອດວົງເງິນສົ່ງອອກ ໃນ 6 ເດືອນບັນລຸກວ່າ 62 ຕື້ USD, ເພີ່ມຂຶ້ນ 16% ເມື່ອທຽບໃສ່ໄລຍະດຽວກັນຂອງປີກາຍ. ແຫລ່ງເງິນລົງທຶນພັດທະນາ ODA ແລະ ເງິນລົງທຶນໂດຍກົງຂອງຕ່າງປະເທດ ຫລື FDI ລ້ວນແຕ່ເພີ່ມຂຶ້ນເມື່ອທຽບໃສ່ໄລຍະດຽວກັນຂອງປີກາຍ. ອາດຈະເຫັນໄດ້ວ່າ ສະພາບການເສດຖະກິດຫວຽດນາມມີສັນຍານດີຂຶ້ນ ແລະ ຈຸດໝາຍທີ່ລັດຖະບານໄດ້ວາງອອກກ່ຽວກັບການ“ບຸລິມະສິດຄວບຄຸມໄພເງິນເຟີ້, ຮັກສາເສດຖະກິດມະຫາພາກເປັນປົກກະຕິ, ການເຕີບໂຕຢູ່ໃນລະດັບເໝາະສົມ” ໄດ້ຮັບການປະຕິບັດໃນ 6 ເດືອນຕົ້ນປີ 2013. ເຖິງຢ່າງໃດກໍຕາມ, ຕາມດຣ ຫວໍຈີແທ່ນ, ຮອງຫົວຫນ້າສະຖາບັນຄົ້ນຄ້ວາຄຸ້ມຄອງເສດຖະກິດສູນກາງແລ້ວ, ນີ້ພຽງແຕ່ແມ່ນບັນດາສັນຍານໃນເບື້ອງຕົ້ນ, ສ່ວນພື້ນຖານເສດຖະກິດຂອງຫວຽດນາມ ຍັງຄົງຕ້ອງການມີເວລາຕື່ມອີກເພື່ອຟື້ນຕົວ ແລະ ຈຸດໝາຍຂອງລັດຖະບານໃນໄລຍະຈະມາເຖິງແມ່ນສືບຕໍ່ຄວບຄຸມໄພເງິນເຟີ້.
“ພວກເຮົາຕ້ອງເອົາໃຈໃສ່ເປັນພິເສດເຖິງການຮັກສາເສດຖະກິດມະຫາພາກເປັນປົກກະຕິ. ເຖິງວ່າພວກເຮົາປະຕິບັດຕາມມາດຕະການໃດ ກໍຕ້ອງພິຈາລະນາ, ຕ້ອງຕິດພັນກັບການຮັກສາເສດຖະກິດມະຫາພາກເປັນປົກກະຕິ, ກັບໄພເງິນເຟີ້ ຄວາມສາມາດຂອງງົບປະມານ, ບັນຫາຫນີ້ສິນສາທາລະນະ, ການຮັກສາພື້ນຖານການເງິນທະນາຄານເປັນປົກກະຕິ, ການຮັກສາຄວາມດຸນດຽງໃນການຊຳລະກັບສາກົນຂອງຫວຽດນາມ.”
ພາບປະກອບ:internet
|
ໃນວາລະປະຊຸມປະຈຳເດືອນ 6 ຂອງລັດຖະບານ, ທ່ານນາຍົກລັດຖະມົນຕີ ຫງວຽນເຕີນຢູງ ໄດ້ສະເຫນີບັນດາທ້ອງຖິ່ນຈົ່ງສຸມໃສ່ໄຈ້ແຍກບັນດາບັນຫາເຄັ່ງຮ້ອນຂອງພື້ນຖານເສດຖະກິດຄື: ລະດັບເຕີບໂຕຂອງບາງຂະແຫນງການ, ບາງຂົງເຂດບໍ່ທັນສູງ, ກຳລັງຊື້ຂອງປະຊາຊົນຍັງຕຳ່. ດ້ວຍຄວາມຕັ້ງຫນ້າໃນການຄວບຄຸມໄພເງິນເຟີ້ນັບແຕ່ຕົ້ນປີມາຮອດປະຈຸບັນ, ລັດຖະບານ ໄດ້ຢືນຢັນຈະມີບັນດານະໂຍບາຍໃຫມ່ກ່ຽວກັບການຫນູນຊ່ວຍຕະຫລາດ ແລະ ດຳເນີນທຸລະກິດຢ່າງແຮງໃນໄລຍະຈະມາເຖິງ. ບົນພື້ນຖານເປັນເອກະພາບໃນການຊີ້ນຳນຳພາ, ລັດຖະບານ ໄດ້ວາງອອກບັນດາມາດຕະການບໍລິຫານເສດຖະກິດໃນ 6 ເດືອນທ້າຍປີ, ສູ້ຊົນບັນລຸລະດັບຈະເລີນເຕີບໂຕທັງປີໃຫ້ໄດ້ 5,5% .